Lukì 8

Tàan nìì reè na ni Yesù ko e re kàràndzin neè ka

1Twɛy goo rèè sapɛ shɔùn, Yesù yè dɔ̀n beè wɔ̀ blà bla reè ko wɛ̀ɛ̀rìì reè ɲàn, è waajibia fa beè, è Ŋaablà re Màsàbee Kùnàgoo Dziɔ̀ dè beè mòdzian nà, è bèe. À re kàràndzin teeŋ fii rèè na ni ko à ka. 2#Mat 27.55,56; Mar 15.40,41; Luk 23.49.À tàan nìì reè cɛrɛmabeu, è bà swey raa kwey kaa boo twɛy kpɛyn, twɛy tàan rèè swey sa na ni ko à ka. Sɔn tsoo na ci Mariyamùn, yè tɔ̀ tsoo wɔ, ci Mariyamùn Màngàdàràkà taàn. Yesù na kwey ɲɛ̀ɛ̀nun nì kaa boo tɔ̀ kpɛyn. 3Sɔn tsoo na ci Yàxanà. Tɔ̀ na màsà kpiri Erodzì rè faagoo fa reè jɔundzin sɔn ne tààn, tɔ̀ kpir'la yè bà kir'là ci Suzà. Soo kpɛrɛ sa na ni nìi kir'là ci Sùzanà, tàan giri kpɛ̀rɛ̀kuru ì sa yeè bà na ni. Twɛy tàan rèè sapɛ na e suun ge reè seen, y'à ka Yesù ko e re kàràndzin neè dzwɛ̀ma.

Yesù tàlen soo baun shìmàndzian tsɛ min niì

(Matsiyù 13.1-9; Marikì 4.1-9)

4Mòdzian na boò wɔ̀ rèè sapɛ ɲan, yè nà e ladzyèe Yesù re. Jàmaà nàu blàbe Yesù tɛyn sii sɔn see, è nèe gooma bɔɔ rèe dè è ra ci:

5«Fɛɛfabaa sɔn bou, ci wo nà e re shìman sɛn. À re shìmaan sɛ̀nkɔɔn e re dzù rɔ̀n, shìmàndzin neè swey yè tɔrɔn tɔrɔn shi dziɛ rè. Shia tsɛ dɔ̀nbaa rèè yè è tɔ̀rɔ̀ tɔ̀rɔ̀, tà shɔ̀ùn, kɛ̀yn neè yè nà è fɔn. 6Shìmàndzin neè swey tɔrɔnmà yè bè kòrò faa gane ka. Twɛy shìmàndzin neè xeu min niì, à na cin waa yè gɔ̀rɔ̀, kàtsu dzɔ̀n cin naà ni mɔn waa. 7Shìmàndzin neè swey tɔrɔnmà yè bè kòrò daaku gane ì ka. Daaku rèè ko shìmànku rèè sa yeè xe esire, yè shìmànku rèè kun. 8Shìmàndzin neè swey yè bè tɔrɔn dzù wùù gane ɲan. Twɛy shìmàndzin neè xeu, yè shìmàntan bla bla ì wɔ, yè bà dziɔn. Dzin càànmoò mòò yè jà tan soo soo sapɛ ra.» Tà shɔ̀ùn, Yesù yè sɛ̀ɛ̀y è dzin mòdzian nà ci: «Toro ì ye ba ni mòò riì rè, è bà è ka myɛ̀yn faa, è toro wɔu'n kuru wube dɛ !»

9Yesù rè kàràndzin neè y'à tey tɔ̀ gooma bɔɔ̀ dzuun ma. 10#Ekk 6.9.È dzin è ra ci: «Ye nìì reè mun lamyɛɛ̀n, e Ŋaablà re Màsàbee gòndoo tɔ̀, tɔ̀ twɛ̀ɛ sìun ye rìì là. Nìì kpɛ̀yn dzyee rèè, twɛy y'à gooma reè myɛ̀ɛn gooma bɔɔ rèè rìì ɲàn. Tɔ̀ rii y'à to,

è siin faa, ŋà, è na gèsɔn pɛn jàa waa.

Yè bà myɛ̀yn faa, ŋà, è na gèsɔn pɛn fàànmuan waa.

11Àwà, tɔ̀ tàleèn dzuɔn nì yɛ nèe tsuru ci: Shìmàndzian, tɔ Ŋaablà re Goomaa nì. 12Shìmàndzin neè tɔrɔun shi dzii niì rè, mòdzin neè swey ni tɔ̀ shi dziɛ rìì tsuru. Yè e toro wɔɔ̀ Ŋaablà re Goomaa rè, ŋà, Sànwɔbaà nàa è màniin, à bo è vunun tsɛ, sànko è mà ɲɛn Ŋaablà re goomaa nà yè tsi waa. 13Shìmàndzin neè tɔrɔnmàà bèu kòrò faa gane riì ka, mòdzin neè swey ni tɔ̀ faa ganee rìì tsuru. Yè e toro wɔɔ̀ Ŋaablà re Goomaa rè yè e tsiì à ra ko taamadzibe ka. Tɔ̀ to y'à tàrà à na dɔɔ̀n è ɲan cɛyn waa. È dzia ɲɛn Ŋaablà ra tà tsuru waatsi dɛɛnin bàsɔùn doùn. Ŋà, kùùngoo ye è ji nìi tsuru, tɔ̀ yeè è sèè bouma Ŋaablà kpɛyn. 14Shìmàndzin neè tɔrɔnmàà bèu kòrò daa gane riì ka, mòdzin neè swey ni tɔ̀ daa ganee rìì tsuru. Yè e toro wɔɔ̀ Ŋaablà re Goomaa rè, ŋà, è na wɔ waatsia sɔn ma, è vyɛ̀ɛ̀yràgoo reè, ko nàfòrò goo reè, ko dziɲan kpɛyn màànkaan goo rèè nàa dɔ̀n geren è ɲan, tɔ̀ yeè è kùnàn ban bo Ŋaablà kpɛyn. Tɔ faa jàci shìmànku rìi gɔ̀r'la è dziàn bɔɔ bɛɛ to. 15Àyìwà, shìmàndzin neè tɔrɔnmàà bèu kòrò dzù wùù gane riì ka, mòdzin neè swey ni tɔ̀ dzù wùù ganee rìì tsuru. Yè e toro wɔɔ̀ Ŋaablà re Goomaa rè, y'à to e duùn ko duun fyɛ ka, è na boò à tsɛ waa. Twɛy mòdzin neè rìì yè e maxɔbee yè Ŋaablà sao faa kudɛyn.»

16 # Mat 5.15; Luk 11.33. Yesù yè dzin è ra kɔn ci: «Mòò pɛn na fìtsina dzu wɔɔ̀, è gèè sɔn kuu à tsɛ waa. Mòò to na fìtsina dzu wɔɔ̀ è sèè à sen wɔ ɲaangee dzuun waa. Y'à dzu wɔɔ̀ rìì, y'à tsùù fìtsìnà tsuuma nɔ̀n, sànko gbàà doùn dɔ̀nbaa rèè y'à vyeè jà. 17#Mat 10.26; Luk 12.2.Àyìwà, goo o goo mɛnɛɔn, à sapɛ nà bo da. Goo o goo to gòndo, à sapɛ nà bo ji vyevyeè rà. 18#Mat 25.29; Luk 19.26.Ye e myɛyn fàù'n kur'la kààwɔ ! È ɲɛn à tsɛ, sɔn ni nìi rè, gè nà bà tɔ̀ raà tɛ̀y. Ŋà, pɛn na ni nìi rè, à taa ni à mà ci nìi ni wò re, tɔ̀ sa nà tsi à ra.»

Yesù ci nìì reè wò re mòdzin ì

(Matsiyù 12.46-50; Marikì 3.31-35)

19Tà shɔ̀ùn, Yesù naà ko à tseyn kpir'leè yè nà à kpɛyn. Ŋà, jàmaà blàbe ɲaanfaa suun, è na dzi dɔ̀nma jà, yè bà ni e kpɛrɛ̀ à ra waa. 20Tɔ̀un, mòdzian yè è goo dè Yesù rà. È ci: «Wo naà ko wo tseyn kpir'leè tsìiŋnà da rɔ̀n. È ni à re, yè wo jà.»

21Yesù yè dzin mòdzian nà tɔ̀un ci: «Nìì reè yè e toro wɔɔ̀ Ŋaablà re goomaa rè, y'à shi jiì a ci à deò nìi tsuru, twɛy rìì mun na ko mun tseyn kpiri ì.»

Yesù fyɛn bla sɔn bokɔɔn tsiiŋ yu blàa tsɛ min niì

(Matsiyù 8.23-27; Marikì 4.35-41)

22Sii sɔn see, Yesù ko e re kàràndzin neè yè nà dɔ̀n konkoron bla sɔn doùn. È dzin è ra ci: «Y'a wa mìn yu blàa fuu m'a wa à kɛ̀yn.» Tɔ̀un, yè dɔ̀n be. 23È bèkɔɔn, Yesù yè cìi. Tà doùn, fyɛn bla sɔn yeè nà bàràma fu jaa soo yu blàa tsɛ. Tɔ̀ fyɛn blaa yuà pàngòpangoo nìi fa, yuà yè sɛrɛ sɛrɛ jia konkor'na doùn. Yuà yè na giribe konkor'na doùn, fɔ à gaa jàà be yuà dzuun. 24Tɔ̀un, kàràndzin nèe yè e kpɛrɛ̀ Yesù rà, y'à kpunan. È ci: «Kàrànfaà, kàrànfaà, fù, yuà nàkɔɔn yɛ mùn ɲɔn !» Tɔ̀un, Yesù yè fù, è cerè fyɛɛn ko yuà pàngòpangokɔɔn tsɛ. À tɔ̀ fau, fyɛɛn ko yuà sa yeè e maɲɛn tɛ, màànkaan sapɛ yeè dò. 25Tà shɔ̀ùn, Yesù yè dzin kàràndzin neè rà ci: «Ye ɲɛunmaà nì yɛ Ŋaablà ra nèe tsuru ɔ ?» Kàràndzin neè yè shi, à goò yè ji è dzii tsɛ. Yè dziàn e si ra tɔ̀un ci: «Nèe tsì rii tɔ̀ tsuru ? Arì fyɛɛn ko yuà sa y'a re dèumaà myɛ̀ɛn, y'à shi jiì.»

Yesù kwey rèè kaa bou kpiri sɔn kpɛyn min niì Gerasa mar'la ɲàn

(Matsiyù 8.28-34; Marikì 5.1-20)

26Yu blàa fuu dòumaà shɔ̀ùn, Yesù ko e re kàràndzin neè yè bè wɔ yu blàa kɛ̀yn Gerasaka reè rè jàmaàn ɲàn. Tɔ̀ jàmaàn ko Galile mar'la jaa jiɔ̀ e si ra. 27È bèu wɔ mɔn, Yesù jàà bokɔɔn konkor'na doùn, tɔ̀ wɔ̀ɔ̀ doùn kpiri sɔn yeè bo, è nà à kùùntsi. Kwey rèè na ni tɔ̀ kpir'la kpɛyn. Fɔ waatsi gbaan, à naà vya wɔɔ̀ dɛ, à na boo wɔ̀ɔ̀ doùn, è bè e tsuù kabur'lèè rà. 28À dziu Yesù jà min niì, è gɛyn vu jaa soo bo, è nà e maa ji à sàn dzuun, è sɛ̀ɛ̀y fààn na ci: «Yesù, Jìran nɔ̀n Ŋaablàa Dzin Kpir'la, fee rìì ni mùn fi ? Mun wo màfyɛ̀ɛn nì, maà gooɲaan fa n na waa !» 29À na tà dèe, kàtsu, Yesù na dziɔn kweè rà, ci è bo à kpɛyn. Kwey rèe na bà à kun jaa giri faa. Tɔ̀ ye ba na fau waatsi o waatsi, è na à kuàn y'à si rèè ko sàn nèè sa wɔ jòòroon rà. È na tɔ̀ faa, sànko à ma dzi bo e shɔùn waa. Tà ko e sa ra, kpir'lee na jòòroun nee shɛn shɛɛ̀n, kweè yè geren à ka fɔ jènjàà kor'nà doùn. 30Tɔ̀un, Yesù y'à tey ci: «Wo tsoo fèe ?» È dzin ci: «Mun tsoò rìì jàma blà.» À tà dèu, kàtsu kwey gir'lì na ni à kpɛyn. 31Twɛy kwey rèè yè Yesù mafyɛ̀ɛn ci à mà ye bàji be byɛnbe gane ɲan waa.

32Tɔ̀ y'a tàrà, bɛ̀y kuru brìsi sɔn na ni jèèn tsɛ mɔn, twɛy yè bà ni ɲwɛyn ɲɔɔn nà. Kwey rèè yè Yesù màfyɛ̀n, ci à y'à to ye yè bè dɔ̀n bɛy rèè ɲàn. Yesù yè tɔ̀ shia sìn è ra. 33Tɔ̀un, kwey rèè yè bo kpir'la ɲàn, yè bè dɔ̀n bɛ̀y rèè ɲàn. Tɔ fau min niì, bɛy rèè sapɛ yeè soso jaà bo jèèn tsɛ, yè nà e kpinìn yu rɔ̀n. Yuà yè è sapɛ ɲɔn.

34Bɛ̀y kplàtsuu reè dziu tà goò jà min niì, yè vwɛ̀yn, yè b'a lakɛɛ̀y wɔ̀ɔ̀ doùn, ko ten dzii reè sa ra. 35Mòdzian yè bo, ci ye bèe à goò lafyɛ. È bèu, yè bè wɔ Yesù tsɛ. Tɔ̀un, Yesù kwey rèè kaa bou kpir'liì kpɛyn, yè tɔ̀ tsùuŋma jà Yesù tɛyn, mɛ̀yɛɛ ni à vu ra, à jaamà yè bà tsìiŋnà. Yè shi. 36Tɔ̀un, Yesù kwey rèè kaa bou kpir'la kpɛyn nìi tsuru, nìì reè tɔ̀ jàu, twɛy y'à lakɛɛ mòdzian nà.

37Gerasa jamaan mòdzin neè y'à goò myɛ̀un tà tsuru min niì, è ɲɛyn yè shɛn, fɔ è bè geren. Yè dzin Yesù rà, ci è bè, è bo ye re gàne rɔ̀n. Yesù yè dɔ̀n konkor'na doùn tɔ̀un, è kpɛyn sèè. 38Yesù bèkɔɔn, à kwey rèè kaa bou kpir'liì kpɛyn, tɔ̀ y'a màfyɛ̀ɛn ci à y'à to w'e b'a ka. Yesù na e tsiì waa, à to yè dzin à ra ci: 39«Sèè b'a re tsii. Ŋaablà nìi sapɛ fau wo re, e bè tɔ̀ lakɛɛ̀y è ra.» Tɔ̀un, kpir'la yè bè. À bèu wɔ, Yesù goo o goo rìì fau à re, è tɔ̀ lakɛɛ̀y wɔ̀ɔ̀ min niì sapɛ.

Yayirusì Yesù màfyɛ̀un min niì, ci è wò dzin taan cɛrɛmabe

(Matsiyù 9.18-26; Marikì 5.21-43)

40Yesù sèè nau waatsi riì bwèy è bo yu blàa kɛ̀yn nɔn, jàma brìsi y'à kùùntsi. Twɛy sapɛ na à màshua. 41Kpiri sɔn na ni mɔn, tɔ̀ tsoo yè bà ci Yayirusì. Tɔ̀ kpir'la rìì na tɔ̀ gàneè ŋaablabegbaà kùntsiɛ̀. Tɔ̀ yeè nà Yesù kpɛyn, è nà e kunun gban à bììn, à màfyɛ̀n ci è yɛrɛ to è bè wò re tsii. 42Dzin taan soo den ni na ni à re, tɔ̀ yeè bà na wɔɔ jii teeŋ fii tsuru. Tɔ̀ dziɛ̀n na ɲìniɔ̀n fɔ à gaa san. Tɔ̀un, Yesù yè Yayirusì rè tsii shià sen. À bèkɔɔn, jàmaà blàbe ɲaanfaa suun, fɔ yè b'a ŋòò tsùù e shiɲaanfi.

43Tɔ̀ y'a tàrà, tàan sɔn na ni jàmaà ɲàn, tsììnàban ni tɔ̀ ra, tɔ̀ y'a jii teeŋ fii. À na e suun gee sapɛ dɔɔ̀n tɔ̀ ɲìn'nèe ɲan jangoo fa reè rè, ŋà, mòò pɛn to naà dziɔ̀ à cɛrɛmabe waa. 44Tɔ̀un, è kpɛrɛ̀ Yesù rà e bonè, è bè e dzyɛn à re mɛ̀yɛɛ dziɛ̀ rà. À tɔ̀ fau min niì, tɔ̀ gàne rɔ̀n ko e sa, à re tsììnàbaan yè dò.

45Tɔ̀un, Yesù yè tey fa ci: «Tsì rii yè e dzyɛun mun na ?» Mòdzian sapɛ yeè dzin ci, à na ye waa. Tɔ̀ ɲan, Piyɛrì yè dzin ci: «Kàrànfaà wo na à jàa jàmaà wo ŋòoŋnà yè wo bìì tsùù nìi tsuru ɔ ?» 46Yesù yè dzin ci: «Mòò yè e dzyɛun mun na, kàtsu m'a tɔ̀u n yɛr'la, ci dzia sɔn boo mun ɲan.»

47Taàn y'à jà, ci wo tɔ̀u nòn. Tɔ̀un, à mà sɔ̀ɔ̀nkɔɔn yè nà e kunun gban Yesù bììn. Goo nìi y'à tou wò yeè e dzyɛn à re mɛ̀yɛɛ dziɛ̀ rà, ko à bàu nìi tsuru wò yeè cɛrɛmabe tà nɔ̀nkɔɔrɔn, taàn yè tɔ̀ sapɛ lakɛɛ̀y Yesù rà, mòdzian jaa ra. 48Yesù yè dzin à ra ci: «N dzin taan, wo ɲɛunmaà mun na, tɔ wo cɛrɛmabeu. Bè, Ŋaa yè b'à ko xɛɛrɛ tsi.»

49È Yesù to tɔ̀ goomaa nà, kpiri sɔn yeè bo ŋaablabegbaà kùntsii Yayirusì rè tsii rɔ̀n, è nà dzin Yayirusì rà ci: «Wo dzin taan saun nòn, maà byɛnbe kpɛrɛkuru ji kàrànfaà rà dɛ.» 50Yesù tɔ̀ myɛ̀n nìi fau, è dzin ŋaablabegbaà kùntsiɛ̀ rà ci: «Maà shi waa, ɲɛn mun na bàsɔùn, wo dzin taan nà fù.»

51Tɔ̀un, yè bè. È bèu wɔ Yayirusì rè fɔɔn dɔ̀nmàdziɛ rà, Piyɛrì, ko Yùxanà, ko Yàkubà, ko dziɛ̀n naà ko à fàà boshɔ̀ùn, Yesù na e tsiì mòò pɛn yè dɔ̀n wò ka gbàà doùn waa. 52Dziɛ̀n saunmaà kamà, gè o ge na ni fɔɔn rè, è sa bèu gɛɛ, yè màtsùrù goo reè faa nèe tsuru. Yesù yè dzin tɔ̀un ci: «E maà gɛyn waa. À na saɔn waa, à ciɛ̀ rìì.»

53Yesù tà dèu min niì, yè jiran à mà. È sapɛ na à tɔ̀ ci dziɛ̀n saɔn taki rii. 54Tɔ̀un, Yesù yè dziɛ̀n kun e si ra, è dzin ko baraka ka ci: «Dziin kòòmɛ̀yn, fù !» 55Yesù tà dèu min niì, dziɛ̀n xɔɔn yè sèè à mà e shɔùn. Tɔ̀ nɔ̀nkɔɔrɔn, è fù. À fùu, Yesù yè dzin ci yè ɲwɛyn sìn à ra, à y'à ɲɔn. 56À goò yè ji dziɛ̀n ker'làgè rèè sa dzii tsɛ. Tɔ̀un, Yesù yè dzin è ra, ci è mà à goò lakɛɛ̀y mòò pɛn na waa.

Currently Selected:

Lukì 8: BDZU

Highlight

Copy