Lukì 7
7
Yesù kaadzin jɛrɛ̀blàtsi sɔn ne jòn kpiri cɛrɛmabeu min niì
(Matsiyù 8.5-13)
1Àyìwà, Yesù nàu twɛy gooma reè sapɛ de dò mòdzian nà waatsi riì bwèy, è fù, è dɔ̀n be Kapɛrinaxumùn wɔ̀ɔ̀ doùn. 2Kaadzin jɛrɛ̀blàtsi sɔn na ni tɔ̀ wɔ̀ɔ̀ doùn. Jòn kpiri soo na ni à re, tɔ̀ jòn kpir'là goojaa yè bà na xɔ à re, fɔ è bè geren. Yesù dɔ̀un wɔ̀ɔ̀ doùn, tɔ̀ y'a tàrà, jòn kpir'là na ɲìniɔ̀n jàci à ni san. 3Tɔ̀un, Kaadzin jɛrɛ̀blàtsià Yesù gooma myɛun nìi fa, è Dzyèèsìbee mòdzin neè bɔɔ rèè swey ka Yesù rè, ci twɛy yè bè à màfyɛ̀n, è nà wò re jòn kpir'là cɛrɛmabe. 4Twɛy bɔɔ rèè yè bè. È bèu wɔ Yesù tsɛ min niì, yè e maa y'à màfyɛ̀ɛn cèreoma, yè dzin ci: «Wo ye nèe kpir'lee dzwɛ̀ma, tɔ wù à ka. 5À Dzyèèsìbee mòdzin neè kɛ̀n gereon. Wò rii y'à tou wɔ̀ rèe doùn ŋaablabegbaà yè ji.»
6Bɔɔ rèè rè goomaa shɔ̀ùn, Yesù yè e tsiì è bè ko è ka. È bèu tsyɛnbe kaadzin jɛrɛ̀blàtsià rè gbàà rà, tɔ̀ yeè to mɔn, è dzunwɛynsi reè swey ka Yesù rè, twɛy yè bè dzin à ra ci: «Tsìfaà, maà dzin ci a byɛnbe kpɛrɛkuru jia a yɛrɛ jɔun waa. Wo yè bà ni dɔn mun tsur'le tsii, mun na wɔɔ tɔ̀ mà waa. 7Tɔ̀ rii y'à to, mun y'à jà ci mun ne blàbee na wɔɔ min wɔ wo tsɛ mɔn waa. Mun ne, wo kɛ̀nsɛɛn ye gooma soo rii dè, tɔ̀ goomaa baraka rɔ̀n, mun ne jòn kpir'là dzia cɛrɛmabe.»
8È sèè è dzin kɔn ci: «Àwà mun mòdzin, kùntsii ì tsùuŋnà mun kùùn. Mun sa yeè bà ni kaadzin ì kùùn. Min sɔn ka, tɔ bèe, mun to ye sɔn kiri, tɔ nàa. Min dzin n ne jòòn rà, nèe fa, tɔ tɔ̀ rii faa.»
9Yesù twɛy gooma reè myɛ̀un min niì, è ji à dzii tsɛ. Tɔ̀un, Jàma nìi gbaɔn à kpɛyn, è jaà lakere twɛy rà, è dzin ci: «Mun nì ci e ra, arì Isirayɛlidzin neè ɲàn, mun na mòò jà ŋe, nèe ɲɛyna brìsi rèe kaatsi ni nìi ɲàn waa.»
10Yesù tà dè dòu min niì, kɛɛra reè yè sèè be kaadzin jɛrɛ̀blàtsià kpà. È bèu wɔ mɔn, y'à jà, ci jòn kpir'là cɛrɛmabeu.
Yesù dzunwɛyn sɔn fun kpunaun min niì
11Tɔ̀ raa gbee, Yesù ko e re kàràndzin neè yè fù, ci ye bèe wɔ̀ sɔn ɲan, ci Naxinìn. Jàma brìsi na gbaɔn è kpɛyn. 12È bèu wɔ wɔ̀ɔ̀ dɔ̀nmàdziɛ rà, yè mòdzin swey bokɔɔn ja wɔ̀ɔ̀ doùn ko dzunwɛyn sɔn fun ka. È na bèe à ka fùn wɔma nɔ̀n. Tɔ̀ dzunwɛɛn soo den ni na ni e naà rè. Tɔ̀ taàn sa re kpir'la na saɔn nòn. Wɔ̀ùndzin neè na boo giri, yè bà bèe taàn ka e dziàn fùn wɔma nɔ̀n. 13Tsìfa Yesù tɔ̀ taàn gɛynkɔɔn jau, à màtsuru y'a kun. È dzin à ra ci: «A mɛnshɛ̀n, maà gɛyn waa.»
14Tɔ̀un, Yesù yè e kpɛrɛ̀ fùn sen neè rà, è bè e dzyɛn fùn seen gèè rà. Fùn sen neè yè e tsiì. Twɛy yè e tsiiŋ, è gooma fùàn tsɛ ci: «Dzunwɛyn, mun ci e fù.»
15Yesù tà goomaa dèu min niì, dzunwɛɛn yè kpunan, è fù è tsuù è maa è goomaa. Tɔ̀un, Yesù yè dzin dzunwɛɛn naà nà ci: «Tàan, a dzin kpir'la yɛ.»
16Mòdzian gè o ge na ni mɔn, à goò yè è sapɛ shi, è ji è dzii tsɛ. Yè e maa, yè tsoo dzi ɲɛɛn Ŋaablà tsɛ, yè dziàn ci: «Ŋaablà re kɛɛra blaa sɔn ni ni ɲe fi !» Yè dziàn kɔn ci: «Ŋaabla naɔ̀ wɔ e re mòò rèè rà.»
17È gooma ge o ge dèe Yesù rè goò ɲàn, tɔ̀ yeè wɔ Yudè màr'là ko e lagur'la gàne rèè sapɛ ɲan.
Yesù ko Yùxanà raa goo rèè
(Matsiyù 11.2-19)
18Àyìwà, è Yùxanà to kàsoò doùn, Yesù na goo nìì reè sapɛ faɔ̀, Yùxanà rè kàràndzin neè yè bè tɔ̀ sapɛ lakɛ̀ɛ̀y à ra mɔn. Yùxanà tɔ̀ myɛ̀un min niì, à yè e re kàràndzin neè fii kiri, 19è twɛy ka bè Tsìfa Yesù rè, ci yè b'a tey ci: «À dèu ci mòò riì nà nà, tɔ wo rìì làà, tàà mùn mòò kpɛr'lì màshua ?» 20Kàràndzin fiɛ̀ bèu wɔ Yesù tsɛ waatsi riì bwèy, yè dzin à ra ci: «Tsìfaà, Mòdzìn Jààràfoobaa Yùxanà ɲe ka naɔ wo rìì lè. À ci ɲe yè nà wo tey ci mòò riì goo na deò, ci à nà nà, ta wo rìì làà, tàà mùn mòò kpɛr'lì màshua ?»
21Tɔ̀ waatsia yɛ̀r'la ɲàn, Yesù ɲìnìnkɔɔn giri cɛrɛmabeu. È ɲìnìnkɔ̀ɔ̀n ɲan giri cɛrɛmabe. È kweykɔɔn gir'le kwey kaa bo è kpɛyn. È jaana giri jaa dzii san. 22#Ekk 35.5,6; Ekk 61.1.Tà shɔ̀ùn, Yesù yè kòmànà Yùxanà rè kɛɛra fii rèè rè goomaa latsi ci: «Ye nìi jàu tà ko ye nìi myɛ̀un, ye bè twɛy lakɛɛ̀y Yùxanà nà. Ye bè dzin à ra ci: Jaana reè jɛ̀y faa, mùrùku reè jìɛ, byèèma reè cɛrɛmabeè, yè fɛnɛbe, torokper'neè myɛ̀yn faa, fùn nèè sèè kpunaàn, Kùnàgoo Dziɔ̀ yè bà dèe gbakɔɔn reè rà. 23Àwà, mun ma dzi ba mòò o moò sàn nà baan kpàà fyeu, tɔ̀ tsìfa raà wùbeu !»
24Àyìwà, Yùxanà rè kɛɛra reè dɔ̀n bèuma shɔ̀ùn, Yesù yè e maa è dziàn jàmaà nà Yùxanà raa goò tsɛ ci: «Ye bèumaà nà jènjàà kor'nà doùn, ye bèu fee rìì jà ? Ye bèu vun maana ni jà fyɛɛn y'à flɛ̀flɛɛra ɔ ? 25Ye to bou ye bè fee rìì jà ? Ye bèu mòò rìì jà nìi vya wùù jiunà e ma ɔ̀n ? Àwà nìì reè vya wùù reè wɔɔ̀, yè bà e re jaamabee faa dziɔ̀ tsɛ, twɛy ni màsà gba rèè rìì doùn. 26Ye to bou ye bè fee soo rii jà ? Ŋaablà re kɛɛra gbɛ ? Ɔ̀ɔn, mun nì ci e ra, è bà gereon Ŋaablà re kɛɛra sa tsɛ. 27#Mak 3.1.Ŋaablà re goomaa doùn, à re kɛɛra sɔn na kùnàgoo sɔn sɛbɛɔ̀n kpiri sɔn tsɛ nèe tsuru ci:
"Mun Ŋaablà nà n ne kɛɛraa sɔn baji be wo jɔun,
è bè wo jɔun lamɔnɔ̀n tsùù." Tɔ̀ kɛɛraa rìì yɛ Yùxanà.»
28Yesù yè dzin kɔn ci: «Mun nì ci e ra, tàan pɛn na dzin kere jà ŋe, nìi blà Yùxanà mà waa. Tɔ̀ to y'à tàrà mòò riì dzyɛ̀n mòdzian sapɛ ma Ŋaablà re màsàbee doùn, tɔ̀ sa blà à mà.»
29 #
Mat 21.32; Luk 3.12. Yesù yè sèè è dzin kɔn ci: «Mòdzian gè o ge yè e toro wɔu Yùxanà rè, arì xɔnsɔɔn tsi reè sa, y'à tou Yùxanà yè ye jaara foò Ŋaablà re shia goo rèè rà. Twɛy sapɛ y'a jàu ci Ŋaablà tereòn. 30Ŋà, nìi Faridziɲɛn rèè, ko Sàrìyà Kaamoo reè, Ŋaablà na nìi gaaŋnà twɛy rè, yè e nɔun tɔ̀ mà. È to na e tsiì Yùxanà yè ye jaaraa fòò waa.»
31Yesù yè dzin kɔn ci: «Mùn yɛ waatsi riì ɲàn ci she, mun nà tɔ̀ mòdzian ko tsi rìì gɔ̀n ? È boò tsì ì rìì lè ? 32È ni a ci dziin kòòmɛ̀yn ì, nìì reè tsùuŋnà siikpaa ɲan, yè bà e vu boò e si ra ci:
"Ɲe gwɛ̀ɛn fyɛu ye re,
ye to na ɲɔun ji waa !
Ɲe yè shì ye ì cèè ye re,
ye to na gɛyn waa !"
33Àwà, Mòdzìn Jààràfoobaa Yùxanà nàu, à na ɲwɛyn cèreoma ɲɔɔ̀n, à to na mììnge ɲaùn mìan. Ye dziàn ci: "À kweykɔɔn !"
34Àwà, Adamà dziàn nàu, tɔ ɲwɛɛ̀n ɲɔɔ̀n, è bà mìɛn faa. Ye dziàn ci: "À nwɛ̀yn ɲan, à mììnfabaa, è bà xɔnsɔɔn tsi reè ko mòdzin faadzii ɲaan neè dzunwɛynsi." 35Ŋà, dzi sìan Ŋaablà re akiriblabeè rà, à dzin nèè sapɛ yeè bà saabu.»
Tàan sɔn ɲinin kinin dziù koun Yesù sàn nèè tsɛ min niì
(Matsiyù 26.6-13; Marikì 14.4-9; Yùxanà 12.1-8)
36Faridziɲɛn kpiri sɔn na ni, tɔ̀ tsoò yè bà na ci Shimɔ̀n. Sii sɔn see, tɔ̀ kpir'la yè nà Yesù kiri, ci è bè ɲwɛyn ɲɔn wò re tsii. Yesù yè bè. À bèu wɔ kpir'la rè tsii rɔ̀n, yè e maa yè ɲwɛɛ̀n ɲɔɔ̀n. 37#Mat 26.7; Mar 14.3; Yux 12.3.È to ɲwɛɛ̀n nà, tàan sɔn yeè nà dɔ̀n mɔn. Wɔ̀ dòùn dzin neè na dziàn ci tɔ̀ taàn faadziɛ nooŋnà. Taàn y'à myɛ̀un nìi fa, ci Yesù ni Faridziɲɛn kpir'là rè tsii rɔ̀n, à nàkɔɔn è nà ko ɲinin kinin dziù sɔn ka e suun. Tɔ̀ ɲin'nà na ni bwèyn sɔn doùn nìi kpaxɔ fɔ è bè geren. 38Taàn nàu wɔ, è dɔ̀n Yesù bonè, è bè e kunun gban à sàn nèè tɛyn, è maa è gɛɛ. È gɛyn fɔ à jaayuà yè bè Yesù sàn nèè fyee. Tà shɔ̀ùn, è kungwɛ̀ɛn ka à sàn nèè tsùsa, è mà nùù nùù. Tɔ̀un, è ɲin'nà kon à sàn nèè tsɛ. 39Faridziɲɛn kpiri nìi na Yesù kiri naɔ e re tsii rɔ̀n, tɔ tɔ̀ jàu min niì, è dzin e duùn ci: «Nèe kpir'lee na Ŋaablà re kɛɛraa sɔn dɛ ! È ba na Ŋaablà re kɛɛra taki, tàan nìi yɛ e dzyɛɛn à sàn nà, à na nà à tɔ̀, à mòò riì kuru. À na nà à tɔ̀, ci à tàan faadzii nooŋma.»
40Yesù yè dzin Faridziɲɛn kpir'là rà tɔ̀un ci: «Shimɔ̀n, gooma ni mun ne, mun y'à dè wo ra.» Shimɔ̀n sa yeè dzin à ra ci: «Àyìwà, gooma n karanfaà.» 41Yesù ci tɔ̀un: «Kpiri sɔn na tsìì wɔɔ kpiri fii ra. Tsìì tsi mòò sɔɔn raà na gbaa càànmoò nùn, soo raà yè bà na gbaa dzyèètsyeùn. 42Kpir'la nàu à jà tsìì tsi rèè pɛn fa dzi wò re tsìɛ̀ sàrà nìi fa waa, è dzin, ci wo yàfau à shɔ̀ùn. Wo re o, twɛy tsìì tsi fiɛ̀ ɲàn, kpir'la goo nà dzibe geren tsì rii là ?» 43Shimɔ̀n yè dzin tɔ̀un ci: «Mun jaa ra, nìi raa tsìì na giri, kpir'la goo nà dzibe geren tɔ̀ rii là.» Yesù ci: «Wo sààben deu.»
44Tà shɔ̀ùn, è jaa kere taàn nà, è dzin Shimɔ̀n nà ci: «Wo tàan rèe jàa kɛ̀ ? Mun nàu wo kpà, wo na yu pɛn sìn, è ka mun san nèè fòò waa. À to yè e jaayuà ka mun sàn nèè fòoŋ è tsùsa e kungwɛ̀yn neè ka. 45Mun nàu dɔ̀n wo re mìin, wo na mun kùùntsi blàbe doùn waa. Fɔ mun to yè dɔ̀n mìin nɔn, tàan rèe ko blàbe rii mun sàn nèè mà nùù nùɔ. 46Wo na ɲinin yɛ mun kùùn waa, à to nàu làtsìkɔrɔ kinin dziù kon mun sàn nèe tsɛ. 47Tà doùn, mun nì ci a ra, ci à mun kɛ̀n nìi fau nèe tsuru cèreoma, tɔ̀ y'a kpàdèe ci à re gooɲaan tsìɛ̀ sapɛ mɛɛy bou à vu ra. Gooɲaan giri tsìì ma mɛɛy bo mòò riì vu ra, tà tsìfa ɲan kɛ̀ɛ̀n bà dzyɛ̀n.»
48Yesù yeè dzin taàn nà tɔ̀un ci: «Wo re gooɲaan tsìɛ̀ mɛɛy bou wo vu ra.» 49À ko nìì reè na ni ɲwɛɛ̀n nà esire, twɛy yè e maa yè dziàn e duùn ci: «Ee ! Nèe tsì rii tà tsuru, è bà gooɲaan tsìɛ̀ mɛɛy boò mòdzian vu ra ?» 50Tà ko e sa ra, Yesù yè dzin taàn nà ci: «Wo ɲɛn niì fau mun na, tà wo tsiu. Bèe ! Ŋaa yè b'à ko xɛɛrɛ tsi !»
Currently Selected:
Lukì 7: BDZU
Highlight
Share
Copy
Want to have your highlights saved across all your devices? Sign up or sign in
© 2024 Église Évangélique Mennonite du Burkina Faso (EEMBF) et SIL International
