Lukì 12

Yesù Faridziɲɛn rèè rè duungoofiibeè dèu min niì

(Matsiyù 10.26-33)

1 # Mat 16.6; Mar 8.15. Tɔ̀ waatsia ɲàn, mòdzian yè nà e ladzyèè giri Yesù tɛyn. È giribe ɲaanfaa suun, fɔ yè tèen e si sànkòò tsɛ. È giribee na mòdzin gbaa dànman boò. À yè è to jàmaà fi, Yesù yè goomaa dzii kun e re kàràndzin nèè jɔ̀na ka ŋe. È gooma bɔɔ soo de è ra nèe tsuru ci: «Ye e yɛrɛ kaàwɔ Faridziɲɛn rèè rè buru fu geè rà, nìi yɛ è re duungoofiibeè. 2#Mar 4.22; Luk 8.17.Àwà, goo o goo mɛnɛɔn, à sapɛ nà bo da. Goo o goo to gòndo, à sapɛ nà tɔ̀. 3Tɔ̀ kamà, ye nà goo o goo dè tsitsiɛ̀ dzuun, à sapɛ nà myɛ̀n bwèy rɔ̀n vyevyeè rà. Ye nà goo o goo ŋùnùŋunun mòdzian toro dzuun gbàà dzii yè bà tsyeeŋna ye mà mɔn, à nà nà gbango gbàma reè tsɛ.»

Yesù ci mùn yeè shi Ŋaablà rii jɔun

(Matsiyù 10.28-31)

4Tà shɔ̀ùn, Yesù yè dzin kɔn ci: «Ye nìì reè mun dzunwɛynsi reè, mun nì ci e ra, nìì reè dzia mòò vu, e maà shi twɛy jɔun waa. È nà ye màà bàsɔùn nì bara, è fa dzi goo kpɛrɛ fa ye ra tɔ̀ tɛ̀y waa. 5Ye wù ye yè shi nìi jɔun, tɔ̀ rii siin: Mùn sa Ŋaablà riì tɔ̀, ci à dzia san wɔ mòò tsɛ, tà shɔ̀ùn, à y'à ji jààndaman, sààben fyan, mun ci à wù ye shi tɔ̀ rii jɔun.

6Kɛ̀ynììn nun na gɔɔ̀ tanma fii ɔ ? Tà ko e sa ra, Ŋaablà taa ni è soo sookɔɔn sapɛ ma. 7Gooma na ni ye mà waa. Arì ye kùngwɛ̀yn neè, twɛy sa daɔn rìì, è dzii yè tɔ̀. Tɔ̀ doùn, e maà shi waa, kàtsu nàfa ni ye ɲan, è geren twɛy kɛ̀ynììn neè kuru blaa tsɛ !»

A tsiì Yesù rà, tàmafa a nɔn à re, nìi ni tɔ̀ ɲan

(Matsiyù 10.32-33; 12.32; 10.19-20)

8Tà shɔ̀ùn, Yesù yè dzin sa ci: «Mun nì ci e ra, mòò o moò ye e tsiì, è dzin mòdzian jaa ra, ci wo mun naa, Adamà dziàn sa nà e tsiì, è dzin Ŋaablà re mɛ̀rɛ̀kɛ rèè jaa ra, ci wo tɔ̀ tsìfa raa. 9Ŋà mòò riì nà e nɔn mun ne, è dzin mòdzian nà, ci wò na ni mun ne, Adamà dziàn sa nà à dè Ŋaablà re mɛ̀rɛ̀kɛ rèè jaa ra, ci wò tsu na tɔ̀ tsìfa tɔ̀ waa.

10 # Mat 12.32; Mar 3.29. Àyìwà, mòò o moò ye de dɔ̀n Adamà dziàn ɲàn, Ŋaablà nà e yɛrɛ to tɔ̀ tsìfa re tɔ̀ goò rà. Ŋà, mòò riì ye de dɔ̀n Ŋaablà re Dzi Fɛnɛɛ ɲàn wo y'à tsoo bara, Ŋaablà fa e yɛrɛ to tɔ̀ tsìfa re waa.

11 # Mat 10.19,20; Mar 13.11; Luk 21.14,15. Àwà, è ye e kun, mun naa goo rèè kamà, ci è bèe ye kitsi ŋaablabegba rèè doùn, fààntsi rèè, ko à kùntsii rèè rè, ye nà gooma niì dè mɔn, ye raà yè dzibe, e maà tɔ̀ ka e vyɛɛ̀y waa. 12E maà tɔ̀ ka e vyɛɛ̀y waa, kàtsu tà waatsi soo ɲàn, Ŋaablà re Dzi Fɛnɛɛ yɛ̀r'la rìì nà twɛy gooma reè wɔ ye dzu.»

Gètsi akiribɛɛ raa kàjaa

13Tɔ̀un, kpiri sɔn yeè to jàmaà ɲàn mɔn, è dzin Yesù ra ci: «Mùn kàrànfaà, à dè n tsinà kpir'la rà, ci ɲe fàà saun è shɛn nìì to ɲe re, ci à y'à tanan, è n naa nìàn sìn n na.» 14Yesù yè dzin tɔ̀ kpir'la rà ci: «Ee kpiri ! Tsì rii mun tsùuŋ, è mun bà ye re goo rèè kitsikununbaa, min ye re shɛɛ̀n tan'nà ?»

15Tà shɔ̀ùn, Yesù yè dzin jàmaà nà ci: «Ye e yɛrɛ kaàwɔ ! Ye e yɛrɛ kun nàfor'la kɛ̀n gereunmaà nà. Fee kamà min tɔ̀ dè, a kɛnsɛɛn ye nàfor'la tàrà dzii o dzii, a re jaamabee na ni tɔ̀ suun dɛ !» 16Yesù yè tɔ̀ goomaa jaa kpàdè è ra gooma bɔɔ soo ka nèe tsuru ci: «Gètsi sɔn na ni, à re fɛɛ fa dzuà shìmaan yè bà na wùbeò à re, fɔ è bè geren. 17Shìmaan wùbe gereunmaà suun, è bè wɔ, fɔ gètsià yè dziàn e duùn nèe tsuru ci: "Mun nà fee rìì fa sa ? Shìman ree sapɛ jima na ni mun ne !" 18È kɛsɛ fur'lu, è nà dzin ci: "Mun nà n ne bòndo reè ci, min blà bla ì ji. Tɔ̀ ye fa, mun nà n ne shìmaan, ko n suun ge reè sapɛ ji twɛy doùn, min è màrà mɔn." 19Tɔ̀ faumaà shɔ̀ùn, mun dzia dzin n yɛr'la ci: "Aa kpiri, wo jaàn ciun dòònuùn. Gèè giri wo tɛyn, wo dzia nìi bà a magoo jii giri doùn. Tɔ̀ kamà a dzia a ɲanwɔ, e ɲwɛyn fa, e mììn fa, a taama dzibe." 20Tɔ̀un, Ŋaablà yeè dzin à ra ci: "Mòdzìn manan ! Ke fen nèe ɲan ko e sa wo nà san. Wo gè nìì reè sapɛ maraunà a tɛyn, twɛy nà bà tsì rii laa sa ?"»

21Tà shɔ̀ùn, Yesù yè dzin kɔn ci: «Mòò riì nàfor'la ladzyee e yɛr'le dziɲantsiɛ doùn, tɔ̀ y'a tàrà gèsɔn pɛn na ni à re Ŋaablà re, tɔ̀ tsìfa raà sa ni tɔ̀ gètsià raà rìì tsuru.»

Yesù ci min niì, ci mùn mà vyɛ̀ɛ̀y dziɲaan doùn gè rèè goofaa rà waa

(Matsiyù 6.25-34)

22Tà shɔ̀ùn, Yesù yè dzin e re kàràndzin neè rà ci: «Tɔ̀ rii kamà m'a dèe e ra ci e maà vyɛ̀ɛ̀y, ci ye nà fee ɲɔn tàmafa, ye nà fee mìn. E to mà vyɛ̀ɛ̀y, ci ye nà vya ji e ma dzùrù. 23È ɲɛn à tsɛ, jaamabee rìì vùn ɲwɛyn goo mà, màà yè bà vùn vya goo mà. 24Àyìwà, y'a siin kpàankpaàn rèè maanaa nà ŋe ! È na shìman sià, è to na shìmàndzin gaa. Bòndo na ni è re, shìmàn marama kpɛrɛ to na ni è re. Ŋaablà to na è dziira gaara ɔ ? Tɔ̀ y'a tàrà, ye vùn kɛ̀yn neè mà. 25Tsì rii soo ni ye ɲan, ci wo dzia sɔn ba e sià tɛ̀y, à vyɛ̀ɛ̀y gereunmaà suun goo rèè rè ? 26Twɛy tsuru goorii rèè faa dzi ma ba ni ye ɲan, fee bèe à to ye yè e yɛrɛ vyɛɛ̀y goo dzyee re ka ? 27#Mak1 10.4-7; Mbk2 9.3-6.Ye jòon nɔ̀n vun nèè swey siin, è fùa nìi tsuru, yè kan. È na faagoo faa, è to na jìsi myɛɛ̀n y'à bà vya. Ŋà mun nì ci e ra, arì màsa Sɔ̀ɔ̀mɛyn, à ko e nɔɔrɔɔ̀ sa, à na vya wɔ jà, nìi twɛy vunkan nèè soo wubee boò waa. 28Tɔ̀ jòon nɔ̀n vuàn, Ŋaablà ye ba tɔ̀ màwɔɔ̀ tɔ̀ tsuru wùùruùn she, tɔ̀ y'a tàrà gbey ko e sa, à nà maa sa rɔ̀n, Ŋaablà fa ye màwɔ è geren tɔ̀ tsɛ peu ɔ ! Ye ɲan ɲɛynaà dzyɛ̀n dɛ ! 29Ye kpɛ̀yn, ye nà nìi ɲɔn, tà ko ye nà nìi mìn, e maà tɔ̀ gaa, ye tɔ̀ ka e vyɛɛ̀y waa. 30Àwà, tɔ̀ riì sapɛ yɛ, dziɲantsiɛ doùn, nìì reè na Ŋaablà tɔ waa, twɛy rìì twɛy gè rèè gaa kudɛyn. Ŋà nìi ye, ye Fà Ŋaablà y'a tɔ̀ ci ye màgoo ni twɛy rà. 31Tɔ̀ kamà, ye Ŋaablà re Màsàbee rìì gaa. Tɔ̀ ye fa, twɛy gè rèè sa nà sìn ye ra, è bà tɔ̀ tɛ̀y.»

32Tà shɔ̀ùn Yesù yè dzin e re kàràndzin neè rà kɔn ci: «Ye kpɛ̀yn na giri waa, ŋà, e maà shi waa. À dzibeu ye fà Ŋaablà ra, è ye dɔ̀n e re màsàbee ɲàn. 33Ye e suun ge reè gɔɔ, ye gbakɔɔn reè kɔ̀ à ɲɛɛn nà. Ye nàfòrò marama lamɔnɔ̀n tsùù, nìi na dzia bara waa. Ye nàforo marà tsùù e yɛrɛ jɔun gbey, nàfor'liì na dzia dò waa, shɔn ì fa dzi à tàrà shɔn, daa ì tsu to fa dzi dɔn à ɲan mɔn. 34Kàtsu, ye re nàfor'la ni min niì, tɔ̀ gàneè rìì fɔ̀rɔ̀ tsùuŋnà ye vun'nà sa ra.»

Yesù ci à wù wò yeè shù nìi tsuru

(Matsiyù 24.45-51)

35 # Mat 25.1-13. Yesù yè dzin kɔn ci: «Ye e re ɲànshìàge reè ka e ɲanshì cɛyn, ye bà ni faagoò ɲan tsuù ɲàn. Ye e re fìtsina rèè den tsùù. 36#Mar 13.34-36.Ye bà ni, jàci faagoofadzin niì reè yè e kuntsiɛ̀ màshua. À ye dan kɔnɲɔn goo jaaravi kpà, è na dziɛ̀ mà ban nìi tsuru, yè fù y'à san à re. 37Àwà, è kùntsiɛ̀ ye na, è nà faagoofadzin neè jà e jaa ra, è na cìiŋnà fyeu, twɛy raà wùbeu. Sààben na, mun nì ci e ra, kùntsiɛ̀ yɛ̀r'la nà e ɲanshì, è twɛy faagoofadzin neè kiri, yè nà e tsuù è ɲwɛɛ̀n sìn è ra. 38Kùntsiɛ̀ nàu wɔ̀taama rìì o, à yɛ̀rɛ̀ to nàu tsɛ̀kèn ben bwey rìì o, à kpɛ̀ynto ye na faagoofadzin neè jà e jaa ra, è na cìiŋnà fyeu, è raà wùbeu.

39 # Mat 24.43,44. Ye yɛ̀r'la sa y'a tɔ̀, ci gbàtsià ye ba na à tɔ̀, ci shɔɔ̀n nà nà waatsi riì, à fa e tsiì è ɲɛn è cìi dɛ ! À fa à to shɔɔ̀n yè nà wò re gbàà kɛɛy dɛ ? 40Tɔ̀ fau'n kuru soo rà, e sa lamɔ̀nɔ̀n tsùuŋma yè bà ni, kàtsu, ye taa na ni waatsi riì mà ci Adamà dziàn nà nà, à nà nà tɔ̀ rii bwèy.»

41Àyìwà, Yesù twɛy gooma reè dè dòu min niì, Piyɛrì y'à tey ci: «Mùn Tsìfaà, wo nèe gooma bɔɔ rèe dèe ɲe kàràndzin neè bàsɔùn nì nè gbɛ, tàà wo y'à dèe mòdzian sapɛ rii lè ?» 42Yesù yè dzin à ra ci: «Wo re o, mòo dzia ɲɛn gbàà goojaabobaa rìi rà à akiri yè bà dzi, tɔ mòdzìn kaatsi kɛ̀n ? Tɔ mòdzin, à kùntsiɛ̀ y'à tsùɔ e re gbàà doùn jòn dzyee reè kùùn, è bà ni è re ɲwɛɛ̀n sìn è ra e waatsi ɲan. 43Àwà, tɔ̀ jòòn kùntsiɛ̀ ye seè na, è nà à jà faagoo rèe ra, a ci à dèu à ra nìi tsuru, à raà wùbeu. 44Sààben na, mun nì ci e ra, kùntsiɛ̀ nà à tsùù e suun ge reè sapɛ kuùn. 45Ŋà, tɔ̀ jòòn y'a ji e duùn, è dzin ci: "Mun kùntsiɛ̀ fa nà tabe waa." Tà goò y'à to, è ji jòn dzyee reè tsɛ, kpirima ko à tàànma sa, è twɛy baan, è ɲwɛɛ̀n ɲɔɔ̀n, è mìɛn faa, fɔ tɔ̀ y'a kuàn, nìi nà tɔ̀ tàrà, tɔ̀ rii siin: 46Tɔ̀ jòòn kùntsiɛ̀ nà nà jisee sɔn, waatsi ɲan, à taa na ni nìi mà waa. Tà doùn, à nà à kuun'n kuru ɲaan fa, a ci jàànfà moo rèè kuàn nìi tsuru.

47Faagoofadzin niì yè e kuntsiɛ̀ dzibee goo tɔ, à to na goo sɔn pɛn fa tsuɔ à jɔun, jàci à dzi à ra nìi tsuru waa, tɔ̀ faagoofadzian nà banbwey giri tsi. 48Ŋà, faagoofadzin niì na e kuntsiɛ̀ dzibee goo tɔ, tɔ̀ ye firì, è fabɛy goo fa nìi banbwey ra goo, tɔ̀ faagoofadzian fa banbwey bɛrɛ tsi waa. Àwà, Ŋaabla gè giri sìan wo mòò riì rà, à giri gaa wo rìì lè. À to gè giri kɛ̀ɛ̀yfaa wo mòò riì mà, à nìi gaa wo re, tɔ bà giri kɔn, fɔ è bè geren.»

Ye e bon wɔ e si ra, tɔ̀ goo rèè

(Matsiyù 10.34-36)

49Yesù yè dzin kɔn ci: «Mun naɔ̀ sà rìì maa dzɔ̀nxɔɔ̀ tsɛ. Mun sào ni à re, è jà sà rèe deon nòn. 50#Mar 10.38.Àwà, à wù byɛnbe xɔù sɔn yeè mun tàrà ŋe, nìi yɛ a ci mun jaara foo Ŋaablà re shia goo rèè rà. Ŋà, è bè wɔ fɔ tɔ̀ fa jisee dzu, mun akir'là bara tsuuŋma nì ni.

51Y'a siɛ̀n ci mun naɔ̀ jaancin nì ji dzɔ̀nxɔɔmaà tsɛ gbɛ ? Mun na naɔ̀ jaancin ji dzɔ̀nxɔɔmaà tsɛ dɛ ! Mun naɔ̀ mòdzian bòn wɔ e si ra rii. 52A jà min tɔ̀ dè, è sen dòònuùn nà, mun tsoò kamà, mòkun nun nà e bon wɔ e si ra fɔɔn soo doùn. Zhììgia fa bà ni fiɛ̀ ka, fiɛ̀ to fa bà ni zhììgia ka. 53#Mik 7.6.Fɔɔn reè swey rè, fàà fa bà ni dziɛ̀n ka, dziɛ̀n tsu fa bà ni fàà ka. Namaa fa bà ni e dzin taan ka, dzin taan tsu fa bà ni e naà ka. Dàànaà fa bà ni e dzinaa ka, dzinaa tsu to fa bà ni e daànaà ka.»

Yesù ci mùn yeè nèe waatsi ree goo rèè sa faànmun

(Matsiyù 16.2-3)

54Yesù na dziàn jàmaà nà sa ci: «Ye ye ŋaa tsìuma jà bwèydoo rè nìi tsuru, ye dziàn ci ŋaà nà nà. À to faa tɔ̀ rii tsuru taki. 55Ye to ye fyɛɛn bokɔɔn ja wòròdùù tɔɔn kpàkèrè ye dziàn ci wɔ̀dzùùntaà nà bà ni she. À to faa tɔ̀ rii tsuru taki. 56Mòdzin duungoofiitsi ì ! Twɛy tàànmàshɛn niì reè faa ŋaablaxɔɔ̀ ko dzɔ̀nxɔɔ̀ tsɛ, ye twɛy dzuun tɔ. Feera goo nìì reè faa ɲe re dòònuùn naa waatsi ree ɲan, ye ci ye na twɛy dzuun tɔ ?

Goo rèè jaa bou'n kur'la mùn ko e si fi

(Matsiyù 5.25-26)

57Goo nìì reè tereòn, feera ye jaa na ni twɛy rà ? 58È ba a ci goo dɔ̀un a ko mòò fi, ye bà nà bè goo rèe kitsi kunùn kitsikununbaà rè, e bekɔɔn nà shia rè, a maxɔbe, a ko a kitsifasià yè e si jà, ye byɛ̀n à mà. Tà boshɔ̀ùn, tɔ̀ tsìfa ye wɔ wo ka kitsikununbaà tsɛ, tɔ nà wo sìn fàànmaan nà, è wo ji kàsoò doùn. 59Wo to ye dzi dɔn mɔn nòn, mun nì ci a ra, è ɲɛyn niì jiɔ̀ wo jɔun, arì à dasi soo, wo ma tɔ̀ sapɛ sarà dò sa fyeu, wo na boò mɔn dɛ.»

Currently Selected:

Lukì 12: BDZU

Highlight

Copy