Lukì 13

Yesù ci à wù mìn jaamabee fau'n kur'la lakere

1Tà waatsi rɔn, mòdzin swey yè nà Yesù kpɛyn. È nàu wɔ, yè dzin à ra, ci jàmààntsi Pilatsì mòdzin swey bàji beu yè bè Galileka swey vu, tɔ̀ y'a tàrà twɛy Galileka reè na e ree saaka ì boò. 2Twɛy nàu tɔ̀ goomaa dè min niì, Yesù yè dzin è ra ci: «Twɛy Galileka niì reè vuu tɔ̀ vuu'n kur'la rà ɔ, y'a siɛ̀n ci twɛy Galileka reè raa gooɲaantsiɛ rìì giri è geren Galileka dzyee reè raà tsɛ gbɛ ? 3À na tɔ̀ dɛ, m'a dè e ra. Ye ma seè bo gooɲaan kpɛyn, ye yè e re jaamabee fau'n kur'la lakere, ye sapɛ sa nà san tɔ̀ rii tsuru.»

4Tà shɔ̀ùn, è dzin è ra kɔn ci: «Silowè sangaso gbàan mɛrɔun mòkun teeŋ ŋaalòn nìì reè tsɛ Yerusalɛmùn wɔ̀ɔ̀ doùn, è vu, ye taa ni tɔ̀ re kɛ̀. Y'a siɛ̀n ci twɛy mòkun teeŋ ŋaalòòn raa faadziɛ na ɲaan ni è geren Yerusalɛmùn wɔ̀dòùndzìn dzyee reè raà tsɛ gbɛ ? 5À na tɔ̀ dɛ, m'a dè e ra. Ye ma seè bo gooɲaan kpɛyn, ye yè e re jaamabee fau'n kur'la lakere, ye sapɛ sa nà san tɔ̀ rii tsuru.»

6Tà shɔ̀ùn, Yesù yè nèe gooma bɔɔ rèe ka tàlen ban è re nèe tsuru ci: «Ɛ̀rɛ̀nzhɛ̀ndzu sɔn na ni kpiri sɔn ne. À na gɔ̀ɔ̀ku sɔn tsiɔ̀ tɔ̀ ɛ̀rɛ̀nzhɛ̀ndzu rèe ɲan, nìi kir'là fiigiku. Kpir'la bè o be, ci wo bèe dzin bo tɔ̀ gɔ̀ɔ̀kuà rà, à na beè dzin jà waa. È nà bè sii sɔn see, à na dzin jà kɔn waa. 7Tɔ̀ sii sèè, è dzin e re dzùà faagoofadzian nà ci: "À jii zhiigi rii yɛ nèe, mun nàa, ci mun nàa gɔ̀ɔ̀dzìn xe bo n ne gɔ̀ɔ̀ku rèe ra, mun to na naà gèsɔn pɛn jà waa. À jèè bo mɔn ! À gàneè seòn maana à to na dziàn, ci fee daɔn tɔ̀ ka ?" 8Faagoofadzian yè dzin ci: "N kuntsii, à to mɔn jòòn naa jii soo ree ɲan, mun nà à dzuun ɲɛɛn, min noo ji siin à re. 9Jii kpɛrɛ è dzin, à tɔ̀ rii, à to ma dzin tà bwèy, a dzia a jèè bo mɔn."»

Yesù tàan sɔn cɛrɛmabeu min niì, ɲànwɔsiɛ̀ mà

10Sii sɔn see, Yesù na mòdzian kàr'nà ŋaablabegba sɔn doùn. À na ɲànwɔsii rìì mà. 11Tɔ̀ y'a tàrà, tàan sɔn na ni mɔn, kwey sɔn yeè bà na e gbaɔn tɔ̀ kpɛyn. Tɔ̀ kwey rèe na ɲìnìn sɔn kaɔ à ra, à y'à bòòn kpɛ̀n, è bè tàrà fɔ jii teeŋ ŋaalòn. Tàan rèe naà dzia e lateren tsiì waa. 12Yesù tɔ̀ taàn jàu min niì, à y'à kiri na. Taàn nàu, è dzin à ra ci: «Tàan, wo cɛrɛmabeu she, wo yè bo a re ɲìn'nà ɲàn.» 13À tà dèu min niì, è sià tsùù taàn tsɛ. Tɔ̀ nɔ̀nkɔɔrɔn, taàn yè cɛrɛmabe. Tɔ̀un, è dzi è teren tsiì, è maa, è tsoo dzi ɲɛɛn Ŋaablà tsɛ. 14#Jdk 20.9,10; Sdk 5.13,14.Yesù taàn cɛrɛmabe nìi fau ɲànwɔsiɛ̀ mà tɔ̀ tsuru, tɔ̀ goò yè ŋaablabegbaà kùntsiɛ̀ vunun ta. Tɔ̀un, ŋaablabegbaà kùntsiɛ̀ yè fù, è dzin jàmaà nà ci: «Shikuan doùn, bwèy tsùnmɛn ni ni, twɛy yè bà faagoo fa jisee reè. Ye nà, yè nà e cɛrɛmabeè twɛy jisee reè mà. Nìi ɲànwɔsiɛ̀, e maà nàa tɔ̀ mà waa.» 15Tɔ̀un, Tsìfa Yesù yè dzin à ra nèe tsuru ci: «Mòdzin duungoo fii ì ! Tsì rii dzia dzin ye ɲan, ci wò na e re nìì rèè, ko e re shùkwɛ̀yn neè for'là è bè è mìn ɲànwɔsiɛ̀ mà. Tɔ̀ na fara ɔ ? 16Nèe tàan nìi yɛ, à Ibraximà tsua mòdzian sɔn ni. Sùtana y'à byɛɔ̀n, à jii teeŋ ŋaalòn nì yɛ. Ye re o, mun ye tɔ̀ cɛrɛmabe ɲànwɔsiɛ̀ mà, tɔ̀ na wù ɔ̀ ?»

17Yesù tɔ̀ goomaa dèu min niì, tɔ̀ y'a ɲan rèè sapɛ kungɔ sùùru. Ŋà, jàmaà dzyeè sapɛ taama na dzibeò, Yesù rè goowùù wuu fakɔɔn reè rà.

Yesù ci Ŋaablà re màsàbee jɔ̀ɔn kiɲaanin nì

(Matsiyù 13.31-33; Marikì 4.30-32)

18Tɔ̀ ɲan, Yesù yè dzin kɔn ci: «Ŋaablà re màsàbee boo fee rìì lè ? Mun dzia à ko fee rìì gɔ̀n ? 19À boo kaanindzin ne, mòo nìi seun, è bè à sì e re naankɔɔ rɔ̀n. À nàu xe, è bà gɔ̀ɔ̀ku. Tɔ̀un jìran nɔ̀n kɛ̀yn neè yè e tan nèè ji à sààn neè ɲàn.» 20Yesù yè dzin kɔn ci: «Mun nà Ŋaablà re màsàbee gɔ̀n ko fee rìì ka ? 21À boo buru fua gè rè, taàn sɔn nìi seun, à y'à ji faaniin fa giri ɲan, à y'à guu. Buru fua gè rèe yè faaniin fa guuŋma rèe sapɛ fu.»

Yesù ci e tsi, tɔ̀ shia ni a ci dɔ̀nma dzii kiɲaanin

(Matsiyù 7.13-14; 7.21-23)

22Tɔ̀un, Yesù re shia kuunmaà, è bà bèe Yerusalɛmùn wɔ̀ɔ̀ kèrè, è dɔ̀n beè wɔ̀ blà bla reè, ko wɛ̀ɛ̀rìì reè doùn, è mòdzian kàràn beè, è bèe. 23Tɔ̀ ɲan, sɔn yeè Yesù tey ci: «Tsìfaà, nìì reè nà tsi, twɛy fa giribe dɛ ?» Yesù yè dzin ci: 24«Ye e maxɔbe, ye dɔ̀n dɔ̀nmàdzii kiɲaaniàn nà. A jà min tɔ̀ dè, giri nà à gaa ye yè dɔ̀n, è to fa dzi dɔn waa. 25Fɔɔntsià ye na fù waatsi riì bwèy, è tɔ̀ dziɛ̀ sòò, ye yè to da rɔ̀n, tà bwèy, ye nà dziɛ̀ mà baan, ye yè dziàn nèe tsuru ci: "Mùn tsìfaà, dziɛ̀ san mùn ne !" À nà dzin ye ra tɔ̀un ci: "Mun na ye tɔ̀ waa."

26Àwà, ye nà dzin à ra ci: "Mùn tsìfaà, ɲe rìì ɲwɛɛ̀n ɲɔun wo ka, ɲe yè mìɛn fa wo ka. Wo na tsyeere beè ɲe re wɔ̀ɔ̀ jaa rìì lè, wo yè mòdzian kàràn beè." 27#Zab 6.9.Tɔ̀un, à nà dzin ye ra kɔn ci: "N ci mun na ye bomà tɔ̀ sa. Ye bo n tɛyn, ye terenbɛy goo fa reè sapɛ !"

28 # Mat 22.13; 25.30. # Mat 8.11,12. Tɔ̀ sii sèè, ye nà gɛyn, fɔ ye yè bè e ɲiun taa. Ye jaa yɛ Ibraximà, ko Ishakà, ko Yàkubà, ko Ŋaablà re kɛɛra reè sapɛ ra, è ni Ŋaablà re màsàbee gàne rɔ̀n, ye to yè bà maaŋnà da rɔ̀n. 29Mòdzian nà bo dziɲan nɔnkɔn nààleèn min niì sapɛ: kir'la rà ko bwèydo re, kòòduu ko wòròduu, yè nà ɲwɛɛ̀n ɲɔn Ŋaablà re màsàbee gàne rɔ̀n. 30#Mat 19.30; 20.16; Mar 10.31.Àwà, tɔ̀ sii sèè, nìì reè bònèdzin she, twɛy swey nà bà ni jɔun. Nìì reè to ni jɔun she, twɛy swey nà bà bònèdzin.»

Yesù nìi dèu, è bà bèe Yerusalɛmùn

(Matsiyù 23.37-39)

31Àwà, è Yesù to Yerusalɛmùn wɔ̀ùn shià tsɛ, Faridziɲɛn rèè swey yè nà dzin à ra ci: «A ma bo mìin, e bè min kpɛrɛ, jàmààntsi Erodzì wo gaa vurama cɔ.» 32Yesù yè dzin è ra ci: «Ye b'a dè tɔ̀ kpiri tsɛ kùn kpar'nà nà, ci mun nà kwey rèè kaa bo kweykɔɔn reè kpɛyn, min ɲìnìnkɔɔn reè cɛrɛmabe bwèy fii rèe ɲan, tà shɔ̀ùn mun ne faagoò yè kòmànà dò. 33Tà ko e sa ra, à fààn ni mun mà, mun yè geren n ne jìɛ̀ rè nee bwèy fii ree ɲan. A jà min tɔ̀ dè, Ŋaablà re kɛɛra pɛn na vua min kpɛrɛ nìi na Yerusalɛmùn waa.

34Yerusalɛmunka reè, Yerusalɛmunka reè, ye nìì reè kɛɛra reè vua, Ŋaabla nìì reè kaɔ ye re, ye nìì reè twɛy dzyɛn vua ko kpàa ì ka, è bè tàrà fɔ jaa fɛ̀rɛ̀n, mun sàò na ni mun yè wo dzin nèè ladzyeè a ci tsɛ̀naà yè e dzin nèè ladzyee e tamaàn dzuun nìi tsuru, ŋà ye na gaa tɔ̀ ra waa. 35#Zab 118.26.Àwà à siin nèe, Ŋaabla nà ye re gbàà bàto ye suun. Mun nì ci e ra, ye jaa fa ɲɛn mun mà dɛ, fɔ jisee riì, ye nà dzin nèe tsuru ci:

"Mòò riì nàa Tsìfaà tsoo ra, dzwɛ ni tɔ̀ kpɛyn !"»

Currently Selected:

Lukì 13: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode

Popular Bible Verses from
Lukì 13

Videos for Lukì 13

Luke 10-24

The Bible Project

The Kingdom of God as a Mustard Seed

Jesus Film Project

Lukì 13

Popular Bible Verses from
Lukì 13

Videos for Lukì 13

Luke 10-24

The Kingdom of God as a Mustard Seed

Bible:

Dzùùngoo

Version: Bible Dzùùngoo Unicode - BDZU

Lukì 13

Lukì 13

Popular Bible Verses from Lukì 13

Videos for Lukì 13

Luke 10-24

The Kingdom of God as a Mustard Seed

Bible:

Dzùùngoo

Version: Bible Dzùùngoo Unicode - BDZU

Lukì 13

Popular Bible Verses from
Lukì 13