Lukì 16
16
Nàfòrò gòòjààbobaa sànbè moò raa goò
1Tà shɔ̀ùn, Yesù yè nà dzin e re kàràndzin neè rà ci: «Nàfòròtsi sɔn na ni. À na kpiri sɔn tsuuŋnà e re nàfor'la tsɛ, ci tɔ̀ y'a goo rèè jaa boò. Yè nà dzin nàfòròtsià rà, ci kpir'la y'à re nàfor'la bar'la. 2Kùntsiɛ̀ tɔ̀ myɛ̀un, à y'à kiri, è nà dzin à ra ci: "Mun na dziù myɛɔ̀n wo re goo rèè ɲàn waa. Àwà, mun wo tsùuŋ n ne nàfor'liì kùùn, ci wo y'à goo rèè jaa boò, à kpunaan bo n na, kàtsu, è sen she ra, mun nà wo bàji bo n ne nàfor'la tsɛ." 3Nàfòrò gòòjààbobaà tɔ̀ myɛ̀un min niì, tɔ̀ yeè dzin e duùn ci: "Mun kùntsiɛ̀ ci wò nà mun bàji bo e ree nàfor'la tsɛ. È mun bàji, mun nà fee rìì fa sa ? Fààn na ni mun na, min bà ni dzi fɛɛ fa. Mun to yè bà ni fyɛ̀yn fa, tɔ̀ seey ni mun na. 4Cɔ, m'a tɔ̀ mun nà nìi fa dòònuùn. Min tɔ̀ fa, yè na mun kaa faagoò rà, swey nà e tsiì min bè ye re tsii."
5Àwà, è fù tɔ̀ rii ɲàn, à kùntsiɛ̀ rè tsìì ni gè o ge rà, è twɛy sapɛ kir'na soo soo. Jɔ̀naà nàu wɔ, è tɔ̀ tey ci: "Mun kùntsiɛ̀ rè fɛ̀r'ni ni wo ra ?"
6Tɔ̀ yeè dzin à ra ci: "À re ɲinin gongon caànmoò rìì ni mun na." È sèè è dzin tɔ̀ ra ci: "A ree tsìì sɛbɛ̀ɛ̀n sen tabe tabe, a tsuù a lakere sɛbɛn ci à dzyèètsyeùn nì." 7Tà shɔ̀ùn, è kpɛrɛ tey kɔn ci: "Wo do, mun kùntsiɛ̀ rè fɛ̀r'ni ni wo ra ?" Tɔ̀ yeè dzin ci: "À re shìmàndzin bɔtɛ caànmoò rìì ni mun na." È dzin tɔ̀ sa ra ci: "A re tsìì sɛbɛ̀ɛ̀n sen, a lakere sɛbɛn ci à bɔ̀tɛ cɛ̀ɛ̀n nì."
8Àwà, nàfòròtsià twɛy goo rèè myɛ̀un min niì, è re nàfòrò gòòjààbobaa nanmara moò saan, kàtsu, à y'à goo rèè fau ko sànbe ka.» Tà shɔ̀ùn, Yesù yè dzin kɔn ci: «Dziɲantsii ree doùn, dziɲan gaabaa rèè yè e re goo rèè shi jiì jaa tɔ̀ e si ka, è geren Ŋaablà gaabaa rèè tsɛ.
9Àwà, mun nì ci e ra, dziɲan nafor'liì ni e re, y'a sen, y'a ka mòdzin ì dzwɛ̀ma, ye dzunwɛynsi ì gaa à ka. Tɔ̀ tsuru è na dò, twɛy dzia à to, ye yè dɔ̀n Ŋaablà re gàne rɔ̀n, nìi na doò waa.» 10Yesù yè dzin kɔn ci: «Moo ɲɛɛn wo mòò riì rà goo kiɲaanin na, mòo dzia ɲɛn wo ra goo blà sa ra. Mòò to na ɲɛɛn wo mòò riì rà goo kiɲaanin na, mòò fa dzi ɲɛn wo ra goo blà tsu ra waa. 11Àwà, nìi dziɲantsiɛ nàfor'la, mòò ma ɲɛn ye ra tɔ̀ kuun'n kur'la doùn ye re, mòo nà dzi ɲɛn ye ra dzùrù, è nàfor'la taki takìà kɛ̀ɛ̀yfa ye mà ? 12Gè nìi na ye re, mòò ma ɲɛn ye ra tɔ̀ kuun'n kur'la doùn ye re, nìi ye re, Ŋaabla dzia tɔ̀ sìn ye ra dzùrù ?
13 #
Mat 6.24. Faagoofadzin pɛn na dzia faagoo fa kùntsii fii re waa. Soo goo ma xɔbe à mà, soo goo dzibee à ra. Tàmafa, è shi soo rà, è soo kɔn. Ye fa dzi faagoò fa Ŋaablà re, y'a fa nàfor'la sa re waa.»
14Àyìwà, Faridziɲɛn rèè dziu twɛy gooma reè myɛ̀n Yesù dzu min niì, yè jiran à mà, kàtsu è na ɲɛɛn kɛ̀niɔ̀n fɔ è bè geren. 15Yesù yè dzin è ra tɔ̀un ci: «È ba mòdzian jaa ra, ye yè e yɛrɛ baà mòdzin tereonma ì, ŋà, Ŋaablà y'a tɔ̀ nìi ni ye duùn. Gè niì gè blà mòdzian rè, yè bà baraka wɔɔ̀ à ɲan, tɔ̀ gèè goo xɔ Ŋaablà ma.»
16 #
Mat 11.12,13. Tà shɔ̀ùn, Yesù yè dzin kɔn ci: «Àwà, nìi Ŋaablà re kɛɛra Musà raa sàrìyaa, ko kɛɛra dzyee reè raa kìtaabu rèè goomaa, twɛy to tsùuŋ sààn fur'lu, fɔ è bè suu mòdzìn jààràfoobaa Yùxanà raa waatsia dzu. Tà doùn, è sen fɔ Mòdzìn Jààràfoobaa Yùxanà raa waatsia rà, Ŋaablà re Màsàbee kùnàgoo dziɔ̀ ni dèè rà. Mòdzian sapɛ yeè e ɲinmàxɔbeò, yè bà ni dɔn.
17 #
Mat 5.18. Àwà, ŋaablaxɔɔ̀ ko dzɔ̀nxɔɔ̀ sa dzia dò bo ɲuun fa tsuru, ŋà, Ŋaablà re sàrìyaa, arì tɔ̀ sɛbɛndziniin, tɔ̀ na dzia dò waa.
18 #
Mat 5.32; Kor1 7.10,11. Tà doùn, kpiri o kpiri ye e re tààn bàjia, è tàan kpɛrɛ sen, tɔ ɲànmɔ̀ɔ̀be rii fau. Wo kpir'liì to tàan bàjiuma seen, à sa ɲànmɔ̀ɔ̀be rìì.»
Kpiri nafòròtsià ko Lazarì laa goò
19Tà shɔ̀ùn, Yesù yè neè gooma ree ka tàlen ban mòdzian rè ci: «Kpiri nafòròtsi sɔn na ni, a y'a jà, à vya o vya wɔɔ̀, à sapɛ vya wùù wuu kpa xɔ xɔù. A y'a jà, à ɲwɛyn o ɲwɛyn ɲɔɔ̀n, à sapɛ ɲwɛyn dzi dziù è bà giri, jaaravi to na doò à re. 20Àyìwà, kpiri gbakɔɔn sɔn sa na ni, tɔ̀ tsoò yè bà na ci Lazarì. Lazarì màà sapɛ na ɲuun, è bà ɲɛn tsuuŋnà kpiri nafòròtsià rè fɔɔn dɔ̀nmàdziɛ rà. 21Nàfòròtsià ɲwɛyn ɲɔnkɔɔn, ɲwɛyn bubui niì reè na tɔr'nà à re, Lazarì sào na ni à re, wò yeè bà e dziira gaa tɔ̀ ka. Arì nìi vì rèè, twɛy sa na nàa à mà ɲuun neè fɛr'nà.
22Àwà, Lazarì yè nà san. À saun, mɛ̀rɛ̀kɛ rèè y'à sen, Ibraximà ni min niì àrìjinɛɛ̀ doùn, yè b'a ji à tɛyn mɔn. Tà shɔ̀ùn, nàfòròtsià sa yeè nà san. À saun yè b'a wɔ. 23Tɔ̀un, è nàfòròtsià to byɛnbee ɲàn mɔn jààndamaan doùn, è nà e jaà ɲansen, è Ibraximà jà jeenà, Lazarì ni à tɛyn mɔn. 24Nàfòròtsià dziu tɔ̀ jà min niì, è vu bo fààn na ci: "Mun fà Ibraximà, cinan n ma. Lazarì ka, ci è bè e siiniɛn tsun yu rɔ̀n, è nà à ka n nɛɛ̀n cin, tà boshɔ̀ùn, wùù na ni n tsɛ sàden nɔ̀n mìin."
25Ibraximà yè dzin à ra tɔ̀ rii ɲàn ci: "N dzin kpiri, a taa to, ci wo na ni dziɲantsiɛ doùn waatsi riì bwèy, xɛɛrɛ na ni wo tsɛ fɔ è bè geren. Ŋà, Lazarì do, tɔ̀ yeè e raa jaamabee sapɛ fau byɛnbee rìì ɲàn. Àwà, dòònuùn tɔ̀ jaayuà tsɛ̀u mìin, wo yè bà byɛɛn. 26Tɔ̀ nìn yè bo à ra, kòngon bla rii ni ye ko ɲe fi. Tɔ̀ ɲan, à kɛ̀nsɛɛn ye ba ni ɲe duùn, kòngon nee kamà, mòò na dzia bo ɲe re mìin è bè ye re mɔn. Mòò to na dzia bo ye re mɔn, è nà ɲe re mìin."
27Ibraximà rè goomaa shɔ̀ùn, nàfòròtsià yè dzin ci: "Tà bwèy, mun fàà, mun wo màfyɛ̀ɛn nì, e Lazarì ka dziɲaan doùn, è bè mun fàà rè fɔɔn rè. 28Tseyn nùn ni mun shɔ̀ùn mɔn, à to è bè twɛy latsi, sànko, è sa mà nà nà nèe byɛnbe gane ree ɲan mìin waa." 29Ibraximà yè dzin à ra ci: "Ŋaablà re kɛɛra Musà rè sàrìyaa doùn gooma reè ni wo tseyn nèè rè, ko kɛɛra dzyee reè rè kìtaabu rèè doùn gooma reè sa ni è re. Wo tseyn nèè ye e si kun tɔ̀ ra, tɔ dzia è latsi." 30Nàfòròtsià yè dzin ci: "Mun fà Ibraximà, twɛy raa gooma reè bàsɔùn fa à wùbe waa. Mòdzin saunmaà sɔn ni fùn ye kpunan, è bè è kpɛyn, tɔ̀ rii nà à to yè nimisa, yè e re jaamabee lakere."
31Tɔ̀un, Ibraximà yè dzin à ra ci: "È ma dzi e toro wɔ Ŋaablà re kɛɛra Musà, ko kɛɛra dzyee reè rè gooma reè rè nòn, arì fùn nì kɛ̀nsɛɛn ye kpunan bo è bè, tɔ̀ sɔn na naà à to, yè e re jaamabee fau'n kur'la lakere waa."»
Currently Selected:
Lukì 16: BDZU
Highlight
Share
Copy
Want to have your highlights saved across all your devices? Sign up or sign in
© 2024 Église Évangélique Mennonite du Burkina Faso (EEMBF) et SIL International
