Lukì 17

Modzìn sàn fir'la, ko yɛ̀rɛ̀ too

(Matsiyù 18.6-11; 18.21-35; Marikì 9.42-50)

1Tà shɔ̀ùn, Yesù yè nà dzin e re kàràndzin neè rà ci: «Goo nìi mòò sàn fìr'la, tà goo na do jàa waa. Ŋà, wo mòò riì bàa tsoo, tɔ̀ yeè mòò tàrà, wo raà barau. 2Yè ba zhi kpaa bla shiɔ̀ a vu ra, yè b'à maa kòòyu rɔn tɔ̀ ka, tɔ fyan, e bà tsoo tà goò yè twɛy dziinkòòmɛ̀yn neè tsuru mòò sɔn tàrà. 3#Mat 18.15.Ye e yɛrɛ kun.

A modzìnsia ye fìrìgoo fa, à re fìr'là dè à ra. À y'a jà wo fìriu, è sèè bo à kpɛyn, a yɛrɛ to à re. 4Arì à kɛ̀nsɛɛn ye fìrì jaa ɲɛ̀ɛ̀nun nì fa a re bwèy sɔɔ̀n doùn, è na dzin a ra à soo soo sapɛ ɲan, ci wo fìriu, è sèè bo à kpɛyn, a yɛrɛ to à re.»

E ɲɛn Ŋaablà ra, nìi ni tɔ̀ doùn

(Matsiyù 17.20)

5Tà shɔ̀ùn, Yesù rè kɛɛradzin neè yè nà dzin à ra ci: «Tsìfaà, mùn ɲɛn niì faɔ̀ Ŋaablà ra, sɔn ba tɔ̀ tɛ̀y min ɲɛn à ra ŋe.» 6Tsìfaà yè dzin è ra ci: «Kaanindzian blàbee ni nìi tsuru, ye ɲɛn niì faɔ̀ Ŋaablà ra, tɔ̀ ye ba na tɔ̀ boò, ye na dzia dzin nèe gɔ̀ɔ̀ku rèe rà, ci à ko e jii rèè sa yeè fù, yè bè e tsi kòòyu rɔn, à to na nà ye vu kun.»

Nìi faagoofadzian faa raà

7Yesù yè dzin kɔn ci: «Faagoofadzin yeè bà ni ye sɔn ne, è bà bèe fɛɛ faa ye re dzù rɔ̀n, tàmafa, è bà bèe ye re dzwɛkà rèè kplatsuɔ. Tɔ̀ faagoofadzian ye dan è bo jènjaà doùn, w'a tɔ̀ ye fa dzin à ra, ci è tsuù be suu, è ɲwɛyn ɲɔn dɛ ? 8N ci ye nà dzin à ra rii, ci è sà wɔ è ɲwɛyn goo jaa bo. Ɲwɛɛ̀n ye mɔn, è jòòn jìì vya reè bo, è vya kpɛrɛ ì wɔ. Ye raa nìàn è tɔ̀ sìn ye ra, ye yè ɲɔn, ye yè e min. Tà shɔ̀ùn, à sa yeè kòmànà ɲɔn, è min. 9Ye nìi jiu e re faagoofadzian jɔun, ci à y'à fa, à re tɔ̀ faumaà tswɛ̀y kpɛrɛ ni tɔ̀ ɲan ɔn ?»

10Tɔ̀un, Yesù yè dzin è ra ci: «À wù, ye sa yeè tɔ̀ shi soo rìì jìì. Nìi sapɛ dzyeèma gaaŋnà ye re, ci y'a fa, e ye tɔ̀ fa, ye dzin ci, ye faagoofadzin maana ì nì, ye to yè e faa raa rìì fau.»

Yesù byèèma tsyeùn cɛrɛmabeu min niì

11Àyìwà, è Yesù to Yerusalɛmùn wɔ̀ùn shià tsɛ, è bè dɔ̀n Samari mar'la, ko Galile mar'la fi. 12À ci e ye bè dɔ̀n wɔ̀ sɔn doùn, byèèmà kpiri tsyeùn yè e maa, twɛy y'à kùùntsià. Yè bè e tsiì gba à mà dɛ̀ɛnin. 13Yè e maa yè dziàn Yesù rà fààn na ci: «Mùn kàrànfa Yesù, a yɛrɛ to, e cinan mùn mà !»

14 # Sak 14.1-32. Yesù yè è jàu min niì, è dzin è ra ci: «Y'a wa, ye bè e yɛrɛ kpadè saaka goojaabo reè rà.» Yesù tà dèu è ra, yè dɔ̀n bè.

È ni shia tsɛ, è sapɛ yeè cɛrɛmabe. 15Tɔ̀un, è ɲan, mòò sɔn yè e yɛrɛ cɛrɛmabeuma jàu min niì, è kpɛyn sèè, è tsoo dzi ɲɛn naà Ŋaablà tsɛ, Yesù kpàkèrè fààn na. 16À nàu wɔ Yesù tsɛ min niì, è kunun gban à bììn, è jaà kuu dzùà tsɛ, è tswɛ̀y fa à re. Jàa tɔ̀ kpir'la na Samarika rii. 17Yesù yè dzin tɔ̀un ci: «Mòkun tsyeùn nì na cɛrɛmabe gbɛ ? Dzyee kyèèroòn do, twɛy to ni min na ? 18Mòò pɛn taa na to twɛy ɲàn, nìi nà e kpɛyn sèè na, è nà tswɛ̀y fa Ŋaablà re, fɔ nèe kpir'lee soo boshɔ̀ùn kɛ̀, tɔ̀ niì kun kpɛrɛ ?» 19Tɔ̀un, è dzin kpir'la rà ci: «Fù a waa, wo ɲɛn niì fau mun na, tà wo tsiu.»

Ŋaablà re Màsàbee nàù'n kur'la

(Matsiyù 24.23-28; 24.37-41)

20Sii sɔn see, Faridziɲɛn rèè yè Yesù tey, ci Ŋaablà to nà nà e re Màsàbee fa mòdzian tsɛ waatsi kɛn. Yesù yè dzin è ra ci: «Ŋaablà re Màsàbee na naà, e bà à jàa jaadzin na waa. 21Mòò na naà à dè ci: "Y'a siin, à yɛ mìin, tàmafa à yɛ nuu !" E kpɛynto yè b'a tɔ̀, ci Ŋaablà re Màsàbee ni ye fi.»

22Tɔ̀un, Yesù yè dzin e re kàràndzin neè rà ci: «Jisee ni jisee ra, ye nà bà à gaa gaaŋ'n kur'la sapɛ ra, ye yè Adamà dziàn jà, arì à kɛ̀nsɛɛn ye ba bwèy sɔn nì, ye to fa à jà waa. 23È nà dzin ye ra ci: "À yɛ mìin, tàmafa à yɛ nuu !" E maà bè mɔn waa, e maà e gban twɛy dèbaa rèè kpɛyn waa. 24A y'a jà min tɔ̀ dè, ŋaà bàràmaa è myɛ̀ɛ̀n nìi tsuru è bo ŋaablaxɔɔ̀ kùngɔ soo rà, è bè kùngɔ soo rà, Adamà dziàn nà jisee sa nà bà tɔ̀ rii tsuru. 25Ŋà, sani tɔ̀ yeè fa, fɔ è byɛn ni ŋe cɛyn, mùn yɛ bwèy rìi ɲàn a ci she, twɛy mòdzin neè yè e nɔn à re.

26 # Gok 6.5-8. Goo nìì reè fau Nuùn bwèy, twɛy tsur'lì nà fa Adamà dziàn raa jisee reè sa doùn. 27#Gok 7.6-24.Nuùn naa bwèy rɔ̀n, mòdzian tou ɲwɛɛ̀n nà, yè to mìɛn nà, yè to furu faa rà, yè e dzin nèè fur'la kpiri ì mà. È tɔ̀ fau fur'lu, fɔ jisee riì Nuùn dɔ̀un konkoron blaa doùn, ŋaa brìsià yè nà, yuà yè è sapɛ ɲɔn. 28#Gok 18.20–19.25.À nà bà jàci nìi tsuru fau Lotsì raa bwèè sa ɲan. Mòdzian tou ɲwɛɛ̀n nà, yè to mìɛn nà, è fìɛ faa, è gwɛɛ̀ faa, è fɛɛ faa, è gbà rèè jia. 29Ŋà, Lotsì bou Sodomùn wɔ̀ɔ̀ doùn sii rìi sèè, sàà ko gìrìbia rìì bou ŋaablaxɔ rɔ̀n jàci ŋaa, twɛy yè nà mòdzian sapɛ bara. 30Adamà dziàn nà kpàdè sii rìi sèè, tɔ̀ goo soo rìì nà fa tɔ̀ sii sèè sa.

31 # Mat 24.17,18; Mar 13.15,16. Tɔ̀ jisee ye na à tàrà, wo mòò riì ni a re gbàma tsɛ, maà dzin, ci a jaa, e b'à suun ge reè sen gbàmaa doùn waa. À to ye wo mòò riì tàrà jòon nɔ̀n, maà dzin, ci a seè naà tsii waa. 32#Gok 19.26.Nìi Lotsì rè tààn tàrau dan, ye e taa to tɔ̀ re ! 33#Mat 10.39; 16.25; Mar 8.35; Luk 9.24; Yux 12.25.Àwà wo mòò riì ci wo y'à xɔɔn tsimà gaa, wo nà fɔn à ɲan. Wo mòò riì to nà fɔn a xɔn nɔn, wo nà à màrà tsùù. 34Mun nì ci e ra, tɔ̀ sii sèè, mòkun fii nà bà ɲɛɔ̀n esire ɲaange soo tsɛ fen nɔ̀n, soo nà sen dɔn bè, soo yè to. 35Tàan fii nà bà ni gè zhia rà esire. Soo nà sen dɔn bè, soo yè to. 36[Kpiri fii nà bà ni esire jòon nɔ̀n, soo nà sen dɔn bè Ŋaablà re, soo yè to.]»

37Kàràndzin neè y'à tey tɔ̀ ɲan, ci: «Tsìfaà, tɔ̀ to nà fa min ?»

Yesù yè nèè tàlen nèe ban è re ci: «Gè fuan ye ba ni min niì, dzɔ̀bɔɔ rèè sa yeè e ladzyèe mɔn nì.»

Currently Selected:

Lukì 17: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode

Popular Bible Verses from
Lukì 17

Videos for Lukì 17

Luke 10-24

The Bible Project

Woe to Those Who Cause Others to Sin

Jesus Film Project

Jesus Teaches About Prayer and Faith

Jesus Film Project

Lukì 17

Popular Bible Verses from
Lukì 17

Videos for Lukì 17

Luke 10-24

Woe to Those Who Cause Others to Sin

Jesus Teaches About Prayer and Faith

Bible:

Dzùùngoo

Version: Bible Dzùùngoo Unicode - BDZU

Lukì 17

Lukì 17

Popular Bible Verses from Lukì 17

Videos for Lukì 17

Luke 10-24

Woe to Those Who Cause Others to Sin

Jesus Teaches About Prayer and Faith

Bible:

Dzùùngoo

Version: Bible Dzùùngoo Unicode - BDZU

Lukì 17

Popular Bible Verses from
Lukì 17