Lukì 21

Fùnshɔ̀ùntaan gbakɔɔn rè kwɛ̀ygeè goò

(Marikì 12.41-44)

1Àwà, ɲɛyn jia ge ì na ni Ŋaablà re gbà blàa doùn, mòdzian ɲɛɛn jia min niì, Ŋaablà re blàbe. Tɔ̀un, è Yesù to gbà blàa doùn, è nà e kuùn sen, è lagur'la siin. Tɔ̀ siɛ̀n doùn, è nàfòròtsi ì jà, twɛy yè e raa blàbè ɲɛɛ̀n jia ɲɛyn jia gèè doùn. 2È fùnshɔ̀ùntaan gbakɔɔn sɔn sa ja, tɔ̀ sa ɲɛyn myɛyn fii jiɔ̀ ɲɛyn jia gèè doùn. 3Yesù yè dzin tɔ̀un ci: «Sààben na, mun nì ci e ra, nèe fùnshɔ̀ùntaan gbakɔɔn ree ɲɛyn giri jiu, è geren dzyee rèè sapɛ tsɛ. 4A y'a jà min tɔ̀ dè, nìi dzyee rèè, twɛy sapɛ yeè e raa rèè tsɛ mɔn'na nì jiu kwɛ̀yge. Ŋà, fùnshɔ̀ùntaan gbakɔɔn, tɔ̀ ko e re gbaa sa, è shɛɛ̀n sapɛ rii jiu, arì pɛn tsu na ni à suun è bà ni ɲwɛyn ɲɔn dɛ.»

Yesù ci goo nìi reè nà fa, sani dziɲaan dò bwey

(Matsiyù 24.3-44; Marikì 13.3-13)

5Tà shɔ̀ùn, swey yè nà e maa yè Ŋaablà re gbà blàa goo dèe. È ci à na gè wùbè san. Ci kpàà niì reè ka à jiɔ̀, ko gè nìì reè ni à doùn, yè bà siɔ̀n Ŋaablà ra blàbè ge, twɛy sapɛ yeè bà wùù wuu. Yesù yè dzin tɔ̀ rii ɲàn ci: 6«Jisee nàa jisee ra, ye jaa yɛ nèe gbà rìi rà nèe, à kpàà dzin soo fa to soo tsɛ waa. À sapɛ nà jee bo e si tsɛ.»

7Àwà, yè Yesù tey tɔ̀un ci: «Mùn kàrànfaà, tɔ̀ nà fa waatsi kɛn ? Tàànmàshɛn kɛnma ni nà twɛy goo rèè fa waatsia kpàdè ?» 8Yesù yè dzin ci: «Ye e yɛrɛ kaàwɔ, e maà à to mòò yè e san fìrì waa. A y'a jà min tɔ̀ dè, mòò giri nà nà mun tsoo ka, yè nà dzin, ci ye rìì Ŋaablà Jaara Modzìàn, ci dziɲaan dò bwey to tsyɛnbeu. Ŋà, e maà e gban twɛy kpɛyn dɛ ! 9Ye na bà kaa goo ɲan gooma reè myɛ̀ɛn waatsi riì bwèy, mòdzian yè bà fùa e si kpɛyn, e maà shi waa. Fɔ twɛy goo rèè yè fa rii ŋe, ŋà, tɔ̀ na naà bà à kpàdèe, ci dziɲaan dòkɔɔn ni yɛ tɔ̀ nɔ̀nkɔɔrɔn waa.»

10È dzin è ra kɔn ci: «Kun ko kun nà fù e si kpɛyn, màsà gane ko màsà gane yeè fù e si kpɛyn. 11Dzɔ̀nxɔ̀ɔ̀mà kpinin bla blaa nà bà ni, dzuà ko ɲìnìn ɲan ɲaun nèè yè bà ni gàne giri. Tɔ̀ nìn yè bo à ra, shiɲaan goo giri sa nà bà ni, ko tàànmàshɛn bla bla ì yè bo jìrànxɔ rɔ̀n. 12Ŋà, sani twɛy goo rèè sapɛ yeè fa, è nà ye kun, yè ye byɛn cèreoma. È nà bè ye ka ŋaablabegba rèè doùn, yè kitsi kunun ye tsɛ. Yè ye ji kàsoò doùn. È nà bè ye ka màsa ì, ko jàmààntsi ì rè. Tɔ̀ sapɛ nà fa ye ra mun tsoò kamà. 13Twɛy goo rèè rìì nà à to, ye yè bà mun shɛɛrɛ mòdzian jaa ra. 14#Luk 12.11,12.Àwà, ye e taa to goo soo re, nìi yɛ, ci ye nà gooma niì dè, tɔ̀ yeè ye tsi, e maà tɔ̀ ka e vyɛɛ̀y waa. 15Tà doùn, mun yɛ̀r'la rìì nà akiri goòmà ì wɔ ye dzu, nìi nà à to ye ɲan rèè fa dzi goomaa latsi ye dzu, yè nà dzin ci yè ye sɔ̀swɛy. 16Arì nìi ye ker'làgè rèè, ye tseyn nèè, ko ye tsìnà rèè, ye neema reè, ko ye dzunwɛynsi reè, twɛy sa nà ye wɔ mòdzian suun. Tɔ̀ doùn, mòò giri nà vu ye ɲan. 17Mun tsoò kamà, ye goo nà xɔbe mòdzian sapɛ ma. 18Ŋà, tà ko e sa ra, arì ye kùngwɛ̀yn dzin soo fa fìrì waa. 19Y'a tsi e ma, tɔ̀ rii nà ye xɔɔn tsi.»

20Yesù yè dzin kɔn ci: «Ye na à jà kaadzin ì Yerusalɛmùn wɔ̀ɔ̀ laguruɔ̀ waatsi riì bwèy, ye bà à tɔ̀, ci à ci bwèy rìì wɔɔ tà bwèy. 21Tɔ̀ waatsia ye wɔ, à y'à tàrà nìì reè ni Yude mar'la ɲàn, twɛy yè vwɛ̀yn be jèn nèè kpàkèrè. Nìì reè ni Yerusalɛmùn wɔ̀ɔ̀ doùn, twɛy yè e dan gbànbe à ra. Nìì reè to nà bà ni wɛ̀ɛ̀rìì reè ɲàn, è mà dzin, ci ye nàa Yerusalɛmùn wɔ̀ɔ̀ doùn waa. 22#Ukk 9.7.Twɛy jisee reè rìì doùn, Ŋaabla nà tɔ̀ gooɲaan ka e wɛyn bo e re mòò rèè ɲàn. Tɔ̀ tsuru, nìi sapɛ sɛbɛɔ̀n à re Goomaa doùn, tɔ̀ nà bo e shi tsɛ. 23Twɛy jisee reè sii sèè, tàan fwɛynma reè, ko dzina rèè, à na naà bà byɛnbe san twɛy tsɛ ! È nà byɛn, kàtsu taama ŋununbe bla nà jàmaàn ko e kur'la sapɛ tarà, Ŋaablà re vununta kpàdèkɔɔn doùn jàmaàn mòdzian nà. 24Swey nà vu kaamunun ka, jàmààn dzyee reè sapɛ modzin ì yè swey kun bè e re. Kun kpɛrɛ mòdzin neè nà Yerusalɛmùn wɔ̀ɔ̀ tɔ̀rɔ̀ e san dzuun, fɔ è bo waatsi yeè bè wɔ à doùn.»

25 # Ekk 13.10; Ezk 32.7; Ywk 3.4; Gokp 6.12,13. Yesù yè dzin kɔn ci: «Àwà, ŋaablaxɔɔ̀ rà, bwèè, ko kuɔ̀, ko swɛyn nèè, tàànmàshɛn ì nà bà ni twɛy rà. Dzɔ̀nxɔɔmaà tsɛ mòdzian sapɛ duungoo do ɲaanfaa suun kòòyua fù tèynkɔɔn, ko à ku reè màànkaan blàbee rè, è sapɛ shiuma blà rii nà bà ni. 26Goo nìì reè nà bà ni dzɔ̀nxɔɔ̀ tsɛ, swey ɲɛyn shɛn ɲaanfaa suun twɛy goo rèè kɛ̀sɛɛ̀ rè, è nà cìrì. Tɔ nà fa, kàtsu gè o ge ni ŋaablaxɔɔ̀ doùn, è sapɛ nà yuuyuu bo e shɔùn. 27#Dkk 7.13; Gokp 1.7.Tɔ̀un, Adamà dziàn nàkɔɔn nà jà mun'na tsɛ, dzi brisi yè bà ni à ɲan, nɔɔrɔ brìsi yè bà ni à tsɛ.

28Àwà, ye na twɛy goo rèè sapɛ dzii kuunma jà waatsi riì bwèy, ye e kuùn sen, ye siin fa jìran, kàtsu ye tsi waatsia rìì nà bà e kpɛrɛ̀ naɔ tà tsuru.»

29Tà shɔ̀ùn, Yesù yè nèe gooma bɔɔ rèe ka tàlen ban è re. À ci: «Ye fiigikuà ko gɔ̀ɔ̀kù dzyee reè siin bè ŋe siin. 30N ci ye ye à jà, ci yè e maaŋnà yè tsɔɔ waatsi riì bwèy, ye bàa à tɔ̀ ci ŋaayua tsyɛnbe naɔ. 31Tɔ̀ soo tsuru, e ye na twɛy goo rèè fakɔɔn ja waatsi riì bwèy, ye bà à tɔ̀, ci Ŋaablà re màsàbee fa waatsi tsyɛnbe naɔ. 32Sààben na, mun nì ci e ra, nèe waatsi ree mòdzian sapɛ fa san dò fyeu, twɛy goo rèè sapɛ mà bà faɔ̀ waa. 33Ŋaablaxɔɔ̀ ko dzɔ̀nxɔɔ̀ sa nà dɔ̀n bo, ŋà mun naa gooma reè, twɛy fa dɔ̀n bo fyeu.

34Ye e yɛrɛ kun ! E maà to ji tsuù ɲwɛyn bla bla ɲɔɔn, ko mìɛn ko dziɲan kpɛyn màànkàn goo reè vyɛ̀ɛ̀ rà, fɔ Adamà dziàn nà jisee yè bè bàràma e ɲan waa. 35E maà à to tɔ̀ yeè e tarà waa, kàtsu tɔ̀ jisee nà bàrà dzɔ̀nxɔɔmaà tsɛ mòdzian sapɛ ra, jàci myɛ̀ɛn shu kuàn nìi tsuru. 36Tà doùn, e maà cìi waa, ye Ŋaablà mafyɛ̀ɛn kudɛyn. Tɔ̀ ye fa, ye nà dzi fààn tarà, ye yè goo nàkɔɔn reè sapɛ ku e ɲan. Adamà dziàn to ye na nà, ye nà dzi e tsiì à jaaterema.»

37 # Luk 19.47. Àyìwà, jisee sapɛ, Yesù na nàa mòdzian kàr'na Ŋaablà re gbà blàa fɔɔn doùn bwèy rɔ̀n. Ɲɛ̀rɛɛ̀rà ye wɔ, jèn nìi kir'là, ci oliviku rèè jèèn, è bo, è bè feèn fa mɔn. 38Mòdzian sapɛ na swɛ̀y naà Ŋaablà re gbà blàa fɔɔn doùn gbishɛɛ̀mà nɔ̀n, yè nà e toro wɔɔ̀ à re.

Currently Selected:

Lukì 21: BDZU

Highlight

Copy