Lukì 22
22
Yesù jàànfamàà
(Matsiyù 26.1-5; 26.14-16; Marikì 14.1-2; 14.10-11; Yùxanà 11.47-54)
1 #
Jdk 12.1-27. Àyìwà, Dzyèèsìbee mòdzin neè rè sɛr'lìi na ni ci Geren n tsɛ, è na tɔ̀ kir'là sa ci buru fu bɛɛ sɛr'là. Àwà, tɔ̀ buru fu bɛɛ sɛr'là fa waatsi na e kpɛrɛ̀ naɔ. 2Nìi Saaka Jɔundzin neè, ko Sàrìyà Kaamoo reè, twɛy na jaa rìì gaa, nìi nà à to yè Yesù kuunma tàrà, y'à vu. Ŋà, è naà à tɔ̀, è nà nìi fa waa, kàtsu jàmaà nà nìi fa, è na shiɔ̀ tɔ̀ jɔun.
3Tɔ̀un, Yesù rè kàràndzin teeŋ fii rèè ɲàn, nìi tsoo ci Yudasì Sikariyɔtsika kpir'là, Sùtana yè dɔ̀n tɔ̀ ɲan. 4Yudà yè fù tɔ̀ rii ɲàn, è bè Saaka Jɔundzin neè, ko Ŋaablà re gbà blàa kplatsuubaa rèè jɔundzin neè kpɛyn. À nà dzi Yesù wɔ è suun nìi tsuru, yè byɛ̀n fa tɔ̀ tsɛ. 5Twɛy jɔundzin neè taama dzibe ɲaanfaa suun tà goò rè, yè dzin, ci è dzi à fa tɔ̀ tsuru, ye nà ɲɛyn sin à ra. 6Àwà, Yudà yè e tsiì tɔ̀ ra. Tɔ̀un è maa, è jaa wùù gaa nìi nà à to è dzi Yesù wɔ è suun, jàmaà tɔ mà bà ni à ɲan waa.
Yesù ko e re kàràndzin neè Geren n tsɛɛ̀ sɛrɛ ɲwɛɛ̀n ɲɔun esire min niì
(Matsiyù 26.17-30; Marikì 14.12-16; Yùxanà 13.1-30)
7Àyìwà, buru fu bɛɛ sɛr'là jisee yè nà wɔ. Tɔ̀ sii sèè rìì Dzyèèsìbee mòdzin neè wù yè sààtòmòìrii vu, y'à bà saaka, è bà Geren n tsɛɛ̀ sɛr'là ɲwɛyn. 8Tɔ̀ ɲan, Yesù yè Piyɛrì ko Yùxanà ka. È dzin è ra ci: «Ye bè Geren n tsɛɛ̀ sɛr'là ɲwɛyn goo jaa bo tsùù mùn ne.» 9Twɛy y'à tey ci: «Wo sàò to ni mùn yeè b'a jaa bo min ?» 10È dzin è ra ci: «Àwà, ye ye be dɔ̀n wɔ̀ɔ̀ doùn waatsi riì bwèy, kpiri sɔn nà nà ye kùùntsi, yu ni à kùùn dziniin doùn. Ye e gban à kpɛyn. 11È be dɔ̀n fɔɔn niì rè, ye dzin fɔɔntsià rà ci: "Kàrànfaà ci ɲe yè wo tey, ci wò ko e re kàràndzin neè nà Geren n tsɛɛ̀ sɛr'là ɲwɛɛ̀n ɲɔn gbà nìi doùn, tɔ̀ gbàà ni min ?" 12Tɔ̀un, à nà gbà blà sɔn kpadè ye ra sangasoò tsɛ, gè rèè sapɛ ni à doùn. Ye ɲwɛyn goo jaa bo tɔ̀ gbàà doùn.» 13Àwà yè bè. È bèu wɔ y'à jà, a ci à y'à dèu è ra nìi tsuru. Tɔ̀un, yè Geren n tsɛɛ̀ sɛrɛ ɲwɛyn goo jaa bo.
14Àyìwà, ɲwɛɛ̀n waatsi nàu wɔ, Yesù ko e re kɛɛradzin neè yè bè e tsuù ɲwɛɛ̀n nà. 15È ni ɲwɛɛ̀n nà, Yesù yè dzin è ra ci: «Mun na à dzwɛ rìì jia taki, min nèe Geren n tsɛ rèe sɛr'là ɲwɛɛ̀n ɲɔn ye ka, min kòmànà byɛn. 16A y'a jà min tɔ̀ dè, mun nì ci e ra, nèe shɔ̀ùn, mun fa à tsuru ɲɔn dɛ fyeu, fɔ jisee riì, tɔ̀ sɛr'là dzuɔn nà bo e shi tsɛ Ŋaablà re Màsàbee gàne rɔ̀n.»
17Àwà, è yukuun ko e doùn mììnge sen tɔ̀ rii ɲàn, è tswɛ̀y sin Ŋaablà ra, è dzin ci: «Ye nèe tsi, y'a mìn ye e si kɔ̀. 18Àwà, mun nì ci e ra, è sen dòònuùn nà, mun fa ɛ̀rɛ̀nzhɛ̀ndzian yu mìn dɛ fyeu, fɔ Ŋaablà re màsàbee fa waatsi yeè bè wɔ.»
19Tà shɔ̀ùn è buru sen, è tswɛ̀y sin Ŋaablà ra, à y'à tara tara, à y'à sìn è ra, è dzin ci: «Nèe mun gɔɔ̀n rìì yɛ nèe, nìi siɔ̀n ye kamà. Ye nà tɔ̀ faa, y'a ka e taa to mun ne.» 20#Ykk 31.31-34.Tɔ̀ fau'n kuru soo rà, fene fɔn'na ɲɔn dòuma shɔ̀ùn, è yukuɔn ko e doùn mììnge sen kɔn, è dzin ci: «Nèe yukuun nee mun tsìɛn nì, Ŋaablà ka dzyèèsìbè yee tsìɛn, nìi koon ye kamà. 21#Zab 41.10.Àwà, y'a siin, mòò riì nà mun jàànfa, tɔ̀ sa ni mìin ɲwɛɛ̀n nà mun ka. 22Àwà, Adamà dziàn kpɛ̀yn nà san a ci à dè tsùuŋnà à re goo tsɛ nìi tsuru. Ŋà mòò riì nà bà à jàànfaà saabu, tɔ̀ tsìfa raà barau !»
23Kɛɛradzin neè tɔ̀ goomaa myɛ̀un min niì, yè e maa yè e si tey tey bèe tɔ̀un, ci tsì rii to yè bà nà nà tɔ̀ goò fa ye ɲan sa.
Yesù rè kɛɛradzin neè ci min niì, ye ɲan mòò riì ni jɔun
(Matsiyù 20.25-28; Marikì 10.42-45)
24 #
Mat 18.1; Mar 9.34; Luk 9.46. Àyìwà, sɔ̀swɛy xɔù sɔn yeè nà fù Yesù rè kàràndzin neè ko e si fi. Tɔ̀ sɔ̀swɛɛ̀ doùn, è na n'a re y'a tɔ̀, mòò riì blà dzyee rèè mà ye ɲan. 25Yesù yè dzin è ra ci: «Màsa niì reè tsùuŋnà jàmaàn rèè kùùn yè è màrà, twɛy fààn ɲinaɔn e re jàmààndzin neè mà. Nìì reè to ni fàan nà twɛy jàmàan rèè tsɛ, twɛy ci ye yè bà kiriɔ, è ra "goowuu fa reè." 26#Mat 23.11; Mar 9.35.#Mat 20.25-27; Mar 10.42-44.Nìi ye, à na wù è bà tɔ̀ tsuru waa. Ye ɲan, mòò riì ci wo blà, tɔ wù, è bà a ci ye ɲan mòdzin kiɲaaniàn. Mòò riì to ni kùntsììbee rà, à wù, tɔ̀ yeè bà ni a ci faagoofadzian. 27#Yux 13.12-15.Tà doùn, mòò riì ɲwɛɛ̀n ɲɔɔ̀n, ko nìi ɲwɛyn nèe sen naà tsùù à re, ye re o, twɛy mòkun fiɛ̀ ɲàn, tsì rii blà tsì mà ? Ɲwɛyn nèe sen tsuɔ mòò riì rè, à y'à ɲɔn, à na tɔ̀ ɔ̀ ? Àwà, mun ni ye fi, a ci ɲwɛɛ̀n sen tsuùbaà rìì !
28Goo gè o ge mun tàrau, à sɔn na fa ye shɔ̀ùn waa. 29Tɔ̀ doùn, mun fà Ŋaabla e re Màsàbee labau mun na nìi tsuru, mun sa y'a labau ye ra tà tsuru. 30#Mat 19.28.Tɔ̀ kamà, ye nà ɲwɛɛ̀n ɲɔn, ye yè e min mun ka n ne màsàbee gàne rɔ̀n. Ye to nà bà tsùuŋnà màsà gbaaniin ì tsɛ, ye yè kitsia kùnùn Isirayɛlì fàdzìn kuru teeŋ fiɛ̀ mòdzin neè tsɛ.»
Yesù ci Piyɛrì nà dzin min niì, ci wò na wò tɔ̀ waa
(Matsiyù 26.31-35; Marikì 14.27-31; Yùxanà 13.36-38)
31Tà shɔ̀ùn, Tsìfa Yesù yè dzin Shimɔ̀n nà ci: «Shimɔ̀n, Shimɔ̀n ! A yɛrɛ kun: Sùtana y'à gaaŋnà, ci wo nà ye sapɛ ɲan yuuyuu siin a ci mòo shìmàndzin yuuyuu boò e ɲaan ɲàn nìi tsuru. 32Ŋà, mun Ŋaablà mafyɛɔ̀n wo re, sànko wo ɲɛn niì faɔ̀ Ŋaablà ra, tɔ mà bo wo ɲan waa. Wo ye na bà a yɛr'laa waatsi riì bwèy, wo yè sèè na mun na, a koòsì dzyee reè màxɔ̀n.» 33Piyɛrì yè dzin à ra ci: «Tsìfaà, à bàu wo jikɔɔn kàso rìì doùn ò, à yɛ̀rɛ̀ to bàu wo san nì ò, à ni mun sa ma, mun y'à fa wo ka.» 34Yesù yè dzin à ra ci: «Piyɛrì mun nì ci a ra, sani tsɛ̀keen yè ben she, wo nà bà à dè jaa zhììgi faɔ̀, ci wo na mun tɔ̀ waa.»
35 #
Mat 10.9,10; Mar 6.8,9; Luk 9.3; 10.4. Tà shɔ̀ùn, Yesù yè dzin e re kɛɛradzin neè rà ci: «Mun ye ka bèu jìɛ̀ rà waatsi riì bwèy ɔ, min bà na dziɔn ye ra, ci e maà ɲɛyn jia gè sen, e maà bɔ̀tɛ sen, seereyn kpɛrɛkuru ì to ma bà ni ye re, ye bèu, gèè sɔn bèu gba ye mà ɔ̀ ?» Yè dzin ci: «Gèsɔn pɛn na gba ɲe mà waa.» 36Yesù yè dzin è ra kɔn ci: «Àwà, dòònuùn, ɲɛyn jia gè ye ba ni a moò riì rè, à sen. Bɔ̀tɛ ye ba ni a moò riì rè, à sen. Kaamunun ma ba ni a moò riì rè, mɛ̀yɛ bla riì ni a re, tɔ̀ gɔɔ e soo fi. 37#Ekk 53.12.A y'a jà mun tɔ̀ dèe, à sɛbɛɔ̀n Ŋaablà re Goomaa doùn nèe tsuru ci: "Y'à sa dzii jiu gookoron fa reè ka." Àwà, tɔ̀ gooma niì sɛbɛunma yɛ nèe, fɔ tɔ̀ yeè mun tàrà. Tà doùn, à goò fa waatsia tsyɛnbe naɔ.» 38Kɛɛradzin neè yè dzin à ra ci: «Tsìfaà, kaamunun fii yɛ nèe.» Yesù yè dzin ci: «Tɔ̀ y'a boò.»
Yesù Ŋaablà mafyɛ̀un min niì, yè bà ni Oliviku rèè jèèn tsɛ
(Matsiyù 26.36-46; Marikì 14.32-42)
39Àwà, Yesù yè bo tɔ̀ rii ɲàn, è dɔ̀n be oliviku rèè jèèn rà, jàci à dɛ̀rɔɔ̀n à y'à faa nìi tsuru. Tɔ̀un, à re kàràndzin neè yè e gban à kpɛyn. 40È bèu wɔ mɔn, Yesù yè dzin è ra ci: «Ye Ŋaablà mafyɛ̀n, dzuunbwey mà nà e tarà waa.» 41Tɔ̀ dè dòumaà shɔ̀ùn, è ma bo è ra, è bè jeenà dɛyn, è bè e kunun gban, è Ŋaablà mafyɛ̀n. 42À ci: «Mun Fàà, è ba a sao, byɛnbe riì nàkɔɔn yɛ mun tàrà, à dàn gbànbe n na. Ŋà, mun naa sàɔ mà fa dɛ, wo raà rìì yè fa.»
43[Tɔ̀un, Ŋaablà re mɛ̀rɛ̀kɛɛ̀ sɔn yeè bo na jìrànxɔ rɔ̀n, è nà e yɛrɛ kpadè à ra, è fààn wɔ à ɲan. 44Tɔ fau, Yesù yè sɔn ba màfyɛɛ̀n tɛ̀y ŋe, kàtsu à duungoo na dòunà, fɔ è bè geren, à taama yè bà na ŋunun. Yesù ni Ŋaabla mafyɛɛ̀n nà, à màŋmunà yua bèu jàa nèe tsuru, a ci tsììn twɛynkɔɔn dzɔn nɔ̀n.]
45À nàu Ŋaabla mafyɛɛ̀n fa do waatsi riì bwèy, è fù na kàràndzin neè kpà. À nàu wɔ, à y'à jà, taamaŋununbe ɲaanfaa suun, twɛy sapɛ cìiŋ. 46È dzin è ra tɔ̀un ci: «Ye ciɛ̀ feera ? Ye fù, ye Ŋaablà mafyɛ̀n, dzuunbwey mà nà e tarà waa.»
È Yesù kuun min niì
(Matsiyù 26.47-56; Marikì 14.43-50; Yùxanà 18.3-11)
47Àwà, Yesù ni tɔ̀ goomaa nà, jàma sɔn yeè nà e kungɔ bo. Yesù rè kɛɛradzin teeŋ fiɛ̀ ɲàn, nìi tsoo na Yudasì, tɔ̀ rii na e ji naɔ jàmaà jɔun. È nàu wɔ Yesù ì tsɛ min niì, Yudà yè e kpɛrɛ̀ Yesù rà, ci wo nà à tswà a ci mòò yè e dzunwɛynsi tswaà nìi tsuru. 48Tɔ̀un, Yesù yè dzin à ra ci: «Yudasì, wo nà Adamà dziàn jàànfa ɔ, wo yè sèè kɔn, wo nà à tswà a ci a dzunwɛynsi kɛ ?»
49Àwà, Yesù dzyèèsi rèè y'à jaa tɔ̀u waatsi riì bwèy, ci goo rìi nà fa, yè Yesù tey ci: «Tsìfaà, mùn dzia e re kaamun'nèè ka banbwee fa ɔ ?»
50Tɔ̀un, è ɲan mòò sɔn yè e raa kaamun'nà ka Saaka Jɔundzin blaa raa jòn kpir'là sirama si jaa toro sɔɔ̀n sen bo mɔn caù. 51Yesù yè dzin tɔ̀un ci: «Y'a to tà tsuru.» À tɔ̀ dèu min niì, è dzyɛn kpir'la tor'là rà, à y'à cɛrɛmabe e shɔùn. 52Tɔ̀un, nìì reè na naɔ̀ Yesù kun, tɔ̀ yeè bà Saaka Jɔundzin neè, ko Ŋaablà re gbà blàa kplatsuubaa rèè jɔundzin neè, ko bɔɔ rèè, Yesù yè dzin twɛy rà ci: «W'e jà, ye naɔ̀ kaamunun ì, ko kɔn ì ka mun kpɛyn, a ci mun gookoronfabaa rìì. 53#Luk 19.47; 21.37.Mun naà ni ye ka Ŋaablà re gbà blàa fɔɔn doùn jisee sapɛ ɔ ? Feera ye na mun kun tà bwèy ? Àwà, dòònuùn ye raa waatsia wɔu, tsitsiɛ̀ fàan waatsia yè wɔ.»
È bèu Yesù ka Saaka Jɔundzin blaa rè min niì
(Matsiyù 26.57-58; 26.69-75; Marikì 14.53-54; 14.66-72; Yùxanà 18.12-18; 18.25-27)
54Àyìwà, yè Yesù kun tɔ̀un, yè dɔ̀n be à ka Saaka Jɔundzin blaa rè gàne rɔ̀n. Piyɛrì yè to jeenà, tɔ̀ yeè è kɔ̀rɔ̀ùn jìì beè. 55Àwà, è na sà sɔn wɔɔ fɔɔn shiɲaanfi, mòdzian yè bà e tsuuŋnà tɔ̀ ra. Piyɛrì bèu wɔ, à sa yeè bè e tsuù twɛy mòdzin neè ka. 56Faagoofadzin taànmɛ̀yn sɔn nàu Piyɛrì tsùuŋma jà mɔn sà vyeè rà, à y'à lamɔnɔ̀n siin, è dzin ci: «Nèe kpir'lee sa na ni ko à ka !» 57Ŋà, Piyɛrì yè e sɔswɛy, è dzin ci: «Tàan, mun na nèe kpir'lee tɔ̀ dɛ.» 58Dɛ̀ɛ̀niniin tà shɔ̀un, mòò kpɛrɛ y'à jà kɔn, tɔ̀ yeè dzin ci: «Wo sa yeè è sɔn ni !» Piyɛrì yè dzin tɔ̀ rii ɲàn ci: «Aa, ɔ̀ɔɔn mun na è sɔn dɛ !» 59Waatsi soo tsuru dɔ̀unma tà shɔ̀ùn, mòò kpɛrɛ yè nà à dè xɔbe nèe tsuru ci: «Sɔ̀swɛy na ni à ɲan waa, nèe kpir'lee sa na ni à ka. Tɔ̀ nìn yè bo à ra, à sa Galilekaa sɔn ni.» 60Piyɛrì y'à latsi ci: «Kpiri, wo fèe dèe nèe tsuru ?» Piyɛrì ni tɔ̀ goomaa nà, tɔ̀ waatsi soo ɲàn tsɛ̀ken sɔn yeè ben. 61Tɔ fau min niì, Tsìfa Yesù yè e jaa kere Piyɛr'là, à y'à siin to. Tɔ̀un, Piyɛrì taa yeè to, ci à na à deò wò ra nèe tsuru ci: «Sani tsɛ̀keen yè ben she, wo nà bà à dè jaa zhììgi faɔ̀, ci wo na mun tɔ̀ waa.» 62Piyɛrì yè bo bè da rɔ̀n tɔ̀un, è bè gɛyn cèreoma.
63Àwà, Yesù ni nìi reè suun, twɛy y'à ɲanŋmɛɛ̀n, y'à baan. 64Yè do, y'à jaà shì, y'à ban, y'à tey ci: «Tsì rii soo wo baun, kɛɛrabee fa, a tsìfa dè mùn na ?» 65Y'à ɲɛ̀ɛn gooma ɲaan ɲaan giri kpɛ̀rɛ̀kuru ì ka.
66Àyìwà, jià nàu seey min niì, Dzyèèsìbee mòdzin neè rè kitsi kunun kuru blàa mòdzin neè yè e si ladzyeè. Tɔ̀ na è re bɔɔ rèè, ko Saaka Jɔundzin neè, ko Sàrìyà Kaamoo reè. Tɔ̀un, yè Yesù kiri bè twɛy rè. 67Àwà, Yesù nàu wɔ, yè e maa y'à teè. È ci: «Wo rìì ye ba Ŋaablà Jaara Modzìàn, à dè mùn na.» Yesù yè dzin è ra ci: «Mun y'a dè ye ra, ye fa ɲɛn ja à ra waa. 68Mun to ye ye tey goo soo ma, ye fa à ɲancinan mun ne waa. 69Ŋà, è sen dòònuùn nà, Adamà dziàn nà e tsuù Dzitsi Ŋaablà sirama si jaa rè.»
70È sapɛ yeè dzin tɔ̀un ci: «Tà bwèy, wo rìì Ŋaablà Dzin Kpir'la kɛ̀ ?» È dzin è ra ci: «Ye yɛ̀r'leè sa to yɛ à dèe nòn ɔn, à mun nì.»
71Àwà, yè dzin tɔ̀un ci: «À na wɔɔ̀ shɛɛrɛ gaa ma dɛ, nìi bou à dzu, ɲe yɛ̀r'leè tɔ̀ myɛ̀un !»
Currently Selected:
Lukì 22: BDZU
Highlight
Share
Copy
Want to have your highlights saved across all your devices? Sign up or sign in
© 2024 Église Évangélique Mennonite du Burkina Faso (EEMBF) et SIL International
