Matsiyù 22

Yesù Ŋaablà re màsàbee gɔ̀un min niì kɔnɲɔn goo ka

(Lukì 14.15-24)

1Àyìwà, Yesù yè gooma è ka kɔn gooma bɔɔ ì ɲàn, nìi doùn, à ci: 2«Ŋaablà re Màsàbee boo màsà kpiri sɔn ne, nìi na nà furu fa e dzin kpir'la kɔ̀. 3Tɔ̀un, kɔnɲɔn ɲwɛɛ̀n ta jiumaà, à na e vu boo nìì reè rà, è re jòn nèè ka, ci yè bè twɛy kiri. Ŋà, è bèu kiri, è na e tsiì yè nà waa. 4È sèè kɔn è faagoofadzin kpɛrɛkuru ì ka, è dzin twɛy rà ci: "Ye bè dzin mòdzin kiriuma rèè rà, ci mun ne kɔnɲɔn ɲwɛɛ̀n sɔn byɛ̀n dòu. Ci min n ne nìì tor'la reè vuunà, ko mun ne dzwɛkà ceynama reè. Ci goò sapɛ sɔn byɛ̀n dòu, ci yè nà kɔnɲɔn goo rà." 5Ŋà, mòdzin kiriuma rèè na tɔ̀ goomaa bà e jaa waa, è sa yeè geren e jaara gane ì ɲàn. Sɔn yeè dɔ̀n be e re dzùùn, sɔn yeè bè e re durufama. 6Dzyee rèè yè màsà kpir'là rè faagoofadzin neè kun, yè byɛnbe ɲɛn è tsɛ, yè vu. 7Tɔ̀ goò yè màsà kpir'là vunun ta, fɔ è bè geren. Tɔ̀un, è re kaadzin kur'là bàji be twɛy mòdzìn vu reè kpɛyn, yè bè è vu, yè è re wɔ̀ɔ̀ dzu. 8Tà shɔ̀ùn, màsà kpir'là yè dzin e re jòn nèè rà ci: "Kɔnɲɔn ɲwɛɛ̀n kpɛ̀yn goojaa bo dòu. Ŋà gè o ge na kiriɔ, twɛy pɛn naà wù à ɲɔnbaa waa. 9Tà doùn, ye bè wɔ̀ɔ̀ shi kungɔ reè rà, e ye mòò o moò jà, y'a kiri kɔnɲɔn ɲwɛɛ̀n nà." 10Jòn nèè yè bo bè wɔ̀ɔ̀ shi reè rè tɔ̀un, è mòò o moò jàu, mòdzin wuu sen ɲɛn mòdzìn ɲan tsɛ, yè è sapɛ ladzyèè na. Kɔnɲɔn gbaà yè tsyɛn kpan ɲwɛyn ɲɔn reè rà.

11Àwà màsà kpir'là nàu bè dɔ̀n ci wo nà ɲwɛyn ɲɔn reè siin, è mòò sɔn jà è ɲan, kɔnɲɔn vya na ni tɔ̀ vu ra waa. 12È dzin tɔ̀ ra ci: "N dzunwɛynsi, wo dɔ̀un mìin dzùrù, kɔnɲɔn vya mà bà ni wo vura waa ?" Gooma na ja kpir'la rè waa. 13#Mat 8.12; 25.30; Luk 13.28.Màsà kpir'là yè dzin faagoofadzin neè rà tɔ̀un ci: "Y'a si rèè ko à sàn nèè shì, y'a maa da rɔ̀n tsitsiɛ̀ rà. Gɛyn boo, ko ɲiun taa rìì nà bà ni mɔn." 14Mòò giri kpɛ̀yn kiriɔ, ŋà nìì reè boo jaara taki, twɛy dzyɛ̀n.»

Faridziɲɛn rèè na myɛ̀ɛ̀n ɲɛnma gaa Yesù jɔun min niì xɔnsɔɔn goo ka

(Marikì 12.13-17; Lukì 20.20-26)

15Àwà Faridziɲɛn rèè yè bè e si jà tɔ̀un, y'à siin, ye ye ba ni dzi myɛ̀ɛ̀n ɲɛn Yesù jɔun nìi tsuru gooma ka, y'a kun. 16Tà doùn yè e re kàràndzin neè swey, ko Erodzì raa mòò rèè swey ka à kpɛyn, yè bè dzin à ra ci: «Kàrànfaà, m'à tɔ̀ ci wo sààben ni dèe, w'e bà Ŋaabla shià kàr'na mòdzian nà sààben ka, wo na mòò jaadzin siɛ̀n. Mòdzian to kɛ̀nsɛɛn ye ba ni dzii o dzii, wo na tɔ̀ siɛ̀n waa. 17Àwà wo raa kɛ̀sɛmàà nìi nèe goo rèe tsɛ, tɔ̀ dè mùn na: Xɔnsɔɔn yè sàrà Sezarì, Ɔ̀rɔmùn màsà kpiri blàa rè, tɔ dàaŋnà ràà, à na dàaŋnà ?» 18Yesù yè è duungoo ɲaan tɔ̀ nìi fa, è dzin è ra ci: «Mòdzin duungoofiitsi ì, feera ye yè bà mun dzuun bomà gaa ? 19Ɲɛyn niì ka xɔnsɔɔn sàr'la, y'a sɔn kpadè n na siin.» Tɔ̀un, yè ɲɛɛn taman soo kpadè à ra. 20À yè è tey ci: «Tsì rii ɲɛyn, ko à tsoo ni taman ree tsɛ ?» 21È ci à ra ci: «À Sezar'lì.» È dzin è ra tɔ̀un ci: «Nìi Sezar'laa ye tɔ̀ sìn Sezar'là, nìi to Ŋaablà raa, ye tɔ̀ sìn Ŋaablà ra.» 22È tɔ̀ goomaa myɛ̀un min niì, è ji è dzii tsɛ. Y'à bàto mɔn, yè geren.

Sadusiɲɛn rèè Yesù teroun fùn nèè sèè kpunan goo mà min niì

(Marikì 12.18-27; Lukì 20.27-40)

23 # Kɛf 23.8. Àyìwà, tɔ̀ sii sèè ko e sa, Sadusiɲɛn rèè swey yè bè Yesù rè. Sadusiɲɛn rèè rìì ci fùn nèè sèè kpunan na ni waa. Tà doùn, yè Yesù tey. 24#Sdk 25.5.È ci: «Kàrànfaà, kɛɛra Musà dziun ci kpir'la sɔn ye san è re tààn to dzin bɛy, tseyn kpirimaa wù è tàan ree sen, gè riì ni à to è dzin tàrà à ka, tɔ̀ yeè bà sanbaa rèe tsu. 25Àwà, keresima ɲɛɛ̀nun na ni ɲe re mìin. Jɔ̀naà furu fau, è san à na dzin tàrà waa. À na tsu tarà nìi fa waa, à re tààn yè to à tseyn kpiri gbanaa rè. 26Tɔ̀ sa yeè san à na dzin tàrà waa, taàn yè to tɔ̀ raa gbanaa rè kɔn. È fa tà tsuru, fɔ mòkun ɲɛɛ̀nun nèe sapɛ yeè bè dò. 27È sapɛ saunmaà shɔ̀ùn, taàn sa yeè nà san. 28Àwà fùn nèè to ye na sèè kpunan ɔn, tàan rèe nà bà tsì rii soo raa mòkun ɲɛɛ̀nun nèe ɲan, à to bà dɔɔ̀n è sapɛ re tààn ?» 29Yesù yè dzin è ra tɔ̀un ci: «Ye fìriɔ̀ taki, kàtsu ye na Ŋaablà re goomaa dzin seunà, ye to na à re dzibaabee tsu tɔ. 30È ɲɛn à tsɛ, fùn nèè ye na sèè kpunan, kpiri fa tàan furu, tàan tsu to fa sìn kpir'la waa, è nà bà ni a ci jìrànxɔ rɔ̀n mɛ̀rɛ̀kɛ rèè. 31Nìi fùn nèè raa sèè kpunan goo, Ŋaabla nìi dèu ye ra tɔ̀ tsɛ, tà bwèy ye na tɔ̀ kàràn gbɛ ? À dziun ci:

32 # Jdk 3.6. "Mun Ibraximà rè Ŋaablà, ko Ishakà rè Ŋaablà, ko Yàkubà rè Ŋaablà.

Tɔ̀ goomaa y'à kpàdèe ci Ŋaablà na fun ì rè Ŋaablà waa, à jaama ì rè Ŋaablà rii."» 33Jàmaà twɛy gooma reè myɛ̀un min niì, Yesù rè kàr'nà yè ji è dzii tsɛ fɔ è bè geren.

Faridziɲɛn rèè Yesù teroun Ŋaablà dzugooma xɔù rèè sapɛ ɲan blàa mà min niì

(Marikì 12.28-34; Lukì 10.25-28)

34Àwà, Faridziɲɛn rèè toro jiu à ɲan min niì ci Yesù Sadusiɲɛn rèè dzu ciun, è sa yeè e ladzyèè tɔ̀ gàne sɔ̀n nɔ̀n. 35Tɔ̀un, è ɲan mòò sɔn, sàrìryà kaamoo sɔn, tɔ̀ ni ba nìi tsuru è myɛ̀ɛ̀n ɲɛn à jɔun goomaa ka, à y'à tey ci: 36«Kàrànfaà, sàrìyaa doùn, Ŋaablà dzugooma xɔù rèè ɲàn, kɛ̀n ni blà dzyee rèè sapɛ ma ?»

37 # Sdk 6.5. Yesù yè dzin à ra ci: «"A Tsifa Ŋaablà kɛn kɛ̀n'n kur'la sapɛ: à goò yè bà ni a vunun tsɛ, è bà ni a xɔɔn tsɛ, a kɛsɛmàà sapɛ yeè bà ni à tsɛ." 38Tɔ̀ rii Ŋaablà dzugooma xɔù rèè sapɛ ɲan blàa, è bà jɔ̀naà. 39#Sak 19.18.Fiira riì y'à bosi, tɔ̀ rii yɛ ci: "A modzìnsia kɛ̀n, jàci a yɛr'la." 40#Luk 10.25-28.A ci à sàrìyaa ò, kɛɛra reè dzugooma reè ò, twɛy sapɛ shiɔ̀ nèe dzugooma xɔù fii rèe rìì là.»

Ŋaablà Jaa ra Modzìàn ko màsà kpiri Dawudà fia

(Marikì 12.35-37; Lukì 20.41-44)

41Àwà, Faridziɲɛn rèè ladzyeeŋmaà tɔ̀un, Yesù yè è tey ci: 42«Ye raa kɛ̀sɛmàà kɛ̀n ni Ŋaablà Jaara Modzìàn raa goò tsɛ ? À boo tsu kɛn ɲan ?» È ci à ra ci: «Màsà kpiri Dawudà.» 43È dzin è ra ci: «À to yè bà dzùrù, Ŋaablà re Dzia baraka rɔ̀n, Dawudà y'à kiri ci Tsìfaà, à dziunmaà doùn ci:

44 # Zab 110.1. "Mùn Tsìfa Ŋaabla dziun mun Tsìfaà rà ci:

Nà a tsuù n sirama si jaa rè, fɔ min b'à ɲan rèè sapɛ wɔ dò a san dzuun."

45Dawudà to ye ba à kiriu ci wò Tsìfaà, à to bàa dzùrù, è bà à tsua dzin ?» 46Gooma soo na ja mòò pɛn dzu è bà ni tɔ̀ ka à latsi. À to yè sen tɔ̀ jisee rà, mòò pɛn kùùn na xɔbe à y'à tey dɛ.

Currently Selected:

Matsiyù 22: BDZU

Highlight

Copy