Matsiyù 23

Yesù nìi dèu sàrìryà kaamoo reè ko Faridziɲɛn rèè tsɛ

(Marikì 12.38-40; Lukì 11.39-52; 20.45-47)

1Àyìwà, Yesù yè gooma jàmaà ko e re kàràndzin neè rà. 2À ci: «Kɛɛra Musà rè sàrìyaa goo rèè yè kàràn mòdzian nà, tɔ̀ faagoò ni Sàrìryà Kaamoo reè, ko Faridziɲɛn rèè rìì suun. 3Tà doùn, è ye goo o goo dè e ra, ye si kun à ra, y'a shi jiì. Ŋà, e maà e gban è faadziɛ kpɛyn waa, kàtsu è nìi dèe, è na tɔ̀ faa waa. 4È seyn vuun vuun sen ɲaùn nèè tsùɔ mòdzian kùùn, à to na ni è yɛ̀r'leè mà, yè e siiniɛn tsu wɔ à ɲan tsu waa. 5#Mat 6.1; Sdk 6.8; Dɛk 15.38.È nà goo o goo fa, à sapɛ faa rìì, sànko mòdzian yè ye jà. Tɔ̀ rii kamà, è Ŋaablà re gooma niì tsùa y'à shì e teen ko e sià rà, y'à sapɛ baà blà bla, yè e re mɛ̀yɛ bla reè sàn dziɛ bùsaa gbànbe, yè tɔ̀ ka à kpàdè ci ye Ŋaabla shi jiibaa. 6Ɲwɛyn bla gane reè ɲàn è gaa tsùùma wùù reè rìì là. À to ye ba ŋaablabegba rèè doùn, è jɔun naa tsùùma rèè rìì gaa. 7Mòdzian yè è tswà beè jàmà gane reè ɲàn, tà ko yè è kir'là kàrànfaà tɔ̀ sa dzi è ra. 8Ŋà nìi ye, e maà à to ye kiri kàrànfa waa, kàtsu kàrànfa soo pe rii ni ye re, ye sapɛ to yè bà e si neema ì. 9E to mà mòò pɛn kiri dzɔ̀nxɔɔ̀ tsɛ ci e fa waa, kàtsu fà soo pe rii ni ye re, nìi jìrànxɔ rɔ̀n Fàà. 10E maà à to ye kiri kùntsii tsu waa, kàtsu kùntsii soo pe rii ni ye re, nìi Ŋaablà Jaara Modzìàn. 11#Mat 20.26,27; Mar 9.35; 10.43,44; Luk 22.26.Mòò riì ci wo blà dzyee rèè sapɛ ma ye ɲan, tɔ̀ rii wù, è bà è re faagoofadzian. 12#Luk 14.11; 18.14.Mòò o moò nà e yɛrɛ ɲansen, tɔ̀ ma nà jàà. Mòò o moò to nà e majàà tɔ̀ ɲan nà sen.

13Ye Sàrìryà Kaamoo reè ko Faridziɲɛn rèè, byɛnbe ye nìn, duungoofiitsi ì ! Byɛnbe ye nìn, kàtsu ye Jìrànxɔɔ̀ Màsà ganee tsyeè mòdzian jɔun. Ye yɛ̀r'leè fa dɔ̀n, à to ni nìì reè mà yè dɔ̀n, e fa à to twɛy tsu yeè dɔ̀n.

14[Ye Sàrìyà Kaamoo reè ko Faridziɲɛn rèè, byɛnbe ye nìn, duungoofiitsi ì ! Byɛnbe ye nìn, kàtsu ye fùnshɔ̀ùntaan rèè suun gee sapɛ tsià è ra, ye to ye ba Ŋaabla mafyɛɛ̀n faa tɔ̀un, ye tɔ̀ fa toò fur'lu sànko ye yè tɔ̀ ka e yɛrɛ kpadè. Tɔ̀ kamà kitsi riì nà mɛɛy ye tsɛ, tɔ nà xɔbe fɔ è bè geren.]

15Ye Sàrìyà Kaamoo reè ko Faridziɲɛn rèè, byɛnbe ye nìn, duungoofiitsi ì ! Byɛnbe ye nìn, kàtsu ye yè e ɲantsyeere beè dzɔ̀nxɔɔ̀ ko kòòyua sa tsɛ min niì sapɛ, sànko ye yè bà ni mòò sɔn tàrà ba e re dzinɛɛ mòdzin. À to ye dzi tarà nòn, y'a faa fɔ è bà jààndàmàn dòùn dzin, è geren ye tsɛ shìɲaan jaa fii.

16Byɛnbe ye nìn, kurukunbaa jaana ì ! Ye dziàn ci: "Mòò ye e kɛɛ̀y Ŋaablà re gbà blàa tsɛ, tɔ̀ kɛ̀ɛ̀ na daàn waa. Ŋà, à ye e kɛɛ̀y gbà blàa sɛn'na tsɛ, tɔ kuàn." 17Akiribɛy ì, jaana ì ! Gbà blàa ko sɛn'na ɲàn kɛ̀n ni blà ? Gbà blàa rìì na sɛn'na bàa Ŋaablà raa gbɛ ? 18Ye yè bà dziàn sa ci: "Mòò riì yè e kɛɛ saakabomaà tsɛ, tɔ̀ kɛ̀ɛ̀ na daàn waa. Ŋà kwɛ̀yge rìi ni saakabomaà tsɛ, mòò riì yè e kɛɛ tɔ̀ tsɛ, tɔ̀ kɛ̀ɛ̀ kuàn." 19Jaana ì ! Saakabomaà ko kwɛ̀ygeè ɲàn, kɛ̀n ni blà ? Saakabomaà nì na kwɛ̀ygeè bàa Ŋaablà raa gbɛ ? 20Àwà, mòò riì yè e kɛɛ saakabomaà nà, è kɛrɔun à ko e tsɛ gè rèè sa rii là. 21Mòò riì yè e kɛɛ Ŋaablà re gbà blàa rà, Ŋaablà riì ni à doùn, tɔ̀ yeè e kɛrɔun tɔ̀ sa ra. 22#Ekk 66.1; Mat 5.34.Mòò riì to yè e kɛɛ ŋaablaxɔɔ̀ rà, è kɛrɔun Ŋaablà re màsà gbaaniɛn nì nà, è kɛɛ̀y à tsɛ tsùùbaà sa ra.

23 # Sak 27.30. Ye Sàrìyà Kaamoo reè ko Faridziɲɛn rèè, byɛnbe ye nìn, duungoofiitsi ì ! Byɛnbe ye nìn kàtsu ye yè e re nankɔɔ rɔ̀n gè tsìrà myɛyn neè sapɛ yaà boò, nìi nànàye rèè ko e ge rèè, ŋà goo nìì reè goo kùnma taki sàrìyaa doùn, ye twɛy boo e si bònè, nìi yɛ e teren, e màtsuru, e bà ɲɛɔ̀n Ŋaablà ra. Twɛy rìì na goo farama taki reè, ŋà dzyee rèè tsu to mà bà boo si bònè waa. 24Kurukunbaa jaana ì ! Ye yè e minàyua sɛnsɛɛn ye yè mɔnmwɛyn myɛɛn bo à ɲan, ŋà, ye ɲɔ̀ɔ̀nmɛn nì nìan à ɲan.

25Ye Sàrìyà Kaamoo reè ko Faridziɲɛn rèè, byɛnbe ye nìn, duungoofiitsi ì ! Byɛnbe ye nìn, kàtsu ye yè e re yukuun neè ko ɲwɛyn ɲɔɔn kondo rèè bòùn nèè fòò fyɛɛ̀, tɔ̀ to y'à tàrà, è doùn nèè tsyɛɔ̀n ye re nanmara goo reè ko ye juu ɲaan nà. 26Faridziɲɛn jaana ì ! Ye yukuɔn doòn rìì fòò fyɛ ŋe. Tɔ̀ ye fa, à bòòn sa nà fyɛ.

27 # Kɛf 23.3. Ye Sàrìyà Kaamoo reè ko Faridziɲɛn rèè, byɛnbe ye nìn, duungoofiitsi ì ! Byɛnbe ye nìn, kàtsu ye ni a ci mòòkɔɔ ì, nìì reè ma fyɛɔ. È darɔɔ̀n na gè wùbè san, tɔ̀ to y'à tàrà, è doùn nèè tsyɛɔ̀n mòdzìn xɔ rèè rìì là, ko gè nooŋmaà kaatsià sapɛ. 28Ye sa ni tɔ̀ rii tsuru. Mà nɔ̀n, ye tereòn mòdzian jaa ra, ŋà ye duɔ̀n tsyɛɔ̀n duungoofiibeè ko ɲaan nì nà.

29Ye Sàrìyà Kaamoo reè ko Faridziɲɛn rèè, byɛnbe ye nìn, duungoofiitsi ì ! Byɛnbe ye nìn, kàtsu ye kɛɛra reè fùnkɔɔ reè lamɔnɔ̀n jia, ye yè mòdzin tereonma rèè raa rèè lamɔnɔ̀ùn'n kuru wube. 30Ye dzin tɔ̀un ci: "Ɲe sa ye ba na ni e fa rèè bwèy, ɲe fa ni e ba è tɛ̀y, kɛɛra reè yè vu waa." 31Tà doùn, ye shɛɛrɛbe faa e yɛrɛ kamà, kàtsu y'a kpàdèe ci ye kɛɛra reè vubaa rèè dzin ì. 32Àwà, ye yè e fa rèè gɔ̀ɔn cèen tsyɛun. 33#Mat 3.7; 12.34; Luk 3.7.È myɛn reè jà ! Fɔnfwɛyn kuru ! Y'a kɛ̀sɛɛ̀ ci ye nà dzi e vwɛyn dzùrù, ye yè e dan gbànbe jààndamaan kitsia rà. 34Tɔ̀ rii y'à to mun nà kɛɛra ì ka ye re, min mòdzin akiribla ì ka ye re, ko Sàrìyà Kaamoo ì. Ye nà swey vu è ɲan, ye yè swey gban gɔ̀ɔ ra, ye yè swey dɔrɔ sɛyn ka e re ŋaablabegba rèè doùn, ye yè byɛnbe ɲɛn beè swey tsɛ wɔ̀ rèè ɲàn. 35#Gok 4.8; Mbk2 24.20,21.Tɔ̀ kamà, mòdzin tereonma gè o ge tsìɛn koun dzɔ̀nxɔɔ̀ tsɛ, twɛy sapɛ tsiɛ̀ nà sàrà ye ɲan. È sen fɔ Abɛlì tereonmaà raa tsìɛn nà, è bè suu fɔ Bàrakì dzin kpiri Jakàrìya raà rà, ye tɔ̀ niì vuu Ŋaablà re gbà blàa ko saakabomaà fi. 36Sààben na, mun nì ci e ra, twɛy goo rèè sapɛ tsiɛ̀ nà sàrà nèe waatsi ree mòdzian ɲàn.

Yesù ci min niì, ci Yerusalɛmunka reè jaa fa ɲɛn wò mà dɛ

(Lukì 13.34-35)

37Yerusalɛmunka reè, Yerusalɛmunka reè, ye nìì reè kɛɛra reè vua, Ŋaabla nìì reè kaɔ ye re, ye nìì reè twɛy dzyɛn vua ko kpàa ì ka, è bè tàrà fɔ jaa fɛ̀rɛ̀n, mun sàò na ni mun yè wo dzin nèè ladzyeè a ci tsɛ̀naà yè e dzin nèè ladzyee e tamaàn dzuun nìi tsuru, ŋà ye na gaa tɔ̀ ra waa. 38#Ykk 22.5.À siin nèe, ye re gbàà xɔ nà to. 39#Zab 118.26.Àwà mun nì ci e ra, nèe shɔùn, ye jaa fa ɲɛn mun mà dɛ, fɔ jisee riì, ye nà dzin nèe tsuru ci: "Mòò riì nàa Tsìfaà tsoo ra, dzwɛ ni tɔ̀ kpɛyn."»

Currently Selected:

Matsiyù 23: BDZU

Highlight

Copy