Matsiyù 25

Yesù gooma bɔɔ nìi ka tàlen baun canguru tsyeòn tsɛ

1 # Luk 12.35. Àyìwà, Yesù yè nèe gooma bɔɔ rèe ka tàlen ban è re kɔn. À ci: «Ŋaablà re Màsàbee goo rèè nà bà a ci canguru mokun tsyeùn nèe raa goò kaatsi. Yè e re fìtsina rèè seun fene rɔn, yè bo ci ye bèe kɔnɲɔn kpiri kuuntsima nɔ̀n. 2Nùn na ni è ɲan, akiri na ni twɛy rè waa. Ŋà dzyee nùàn, akiri ni twɛy rè. 3Àwà akiribɛy reè yè e raa fìtsina rèè seun, è na ɲinin sen e suun waa. 4Ŋà akiritsi rèè yè e raa rèè seun, twɛy yè ɲinin sa sen e suun ge ì doùn. 5Tà doùn, kɔnɲɔn kpir'là yè cin, à na na waa. Cìi yè cangur'leè sapɛ kun, yè cìi.

6Feèn nàu wɔ e tar'la mà waatsi riì bwèy, vu sɔn yeè bo fààna ci: "Kɔnɲɔn kpir'là yɛ nèe, ye bo y'a kùùntsi !" 7Tɔ̀un canguru mokun tsyeùn nèe sapɛ yeè kpunan. È kpunaun, yè e re fìtsina rèè dzu bo. 8Akiribɛy reè, twɛy yè dzin akiritsi rèè rà ci: "Ye e re ɲin'nèè sɔn sin mùn na, ɲe re fìtsina rèè gaa dzi." 9Akiritsi rèè ci: "À fa dzi fa. Ɲe suun naà fa ye ko ɲe sa bo waa. Nìi fyan, ye bè ɲinin gɔɔ reè rè, ye sɔn fi." 10Àwà, è dɔ̀n beumaà ɲinin fima nɔ̀n, kɔnɲɔn kpir'là yè nà è shɔ̀ùn. Tɔ̀un, nìi reè mabyɛunà, à ko twɛy yè dɔ̀n kɔnɲɔn gbaà doùn, dziɛ̀ yè sòò. 11#Luk 13.25.Tà shɔ̀ùn, è sa yeè bo ɲinin fima nɔ̀n yè nà. Dziɛ̀ sòoŋmaà tɔ̀un, è ci: "Tsìfaà, Tsìfaà, dziɛ̀ san mùn ne." 12Tɔ̀ yeè dzin è ra ci: "Sààben na, mun nì ci e ra, mun na ye tɔ̀ waa."» 13Yesù yè dzin e re kàràndzin neè rà tɔ̀un ci: «Ye to tsùù e jaa ra, kàtsu ye na à jisee tɔ̀, ye to na à waatsi tɔ.»

Jòn nèè rè sɛn'na kuun'n kur'la goomaa

(Lukì 19.11-27)

14 # Luk 19.11-27. «À ni a ci nèe kpir'lee raa goò kaatsi. À ci e ye bè jìì rà, è re jòn nèè kiri, è suun nafor'la goojaa wɔ to è suun. 15À sɛnu kunun nun sìun soo rà, è fii sìn soo rà, zhììgìraa è soo sin tɔ̀ ra. È soo sookɔɔn sapɛ dzia nìi, è tɔ̀ sìn è ra, è dɔ̀n be jìɛ̀ rà. 16Tɔ̀un, nìi sɛnu kunun nuàn tàrau, tɔ̀ yeè duru dzii kun suu è faagoo fa à ka, à y'à tsuru nùn tàrà. 17Kunun fiitsià sa yeè tɔ̀ soo fa, tɔ̀ sa yeè e raà tsuru fii tàrà. 18Ŋà nìi kunun soo tàrau, tɔ̀ yeè bè, è bè kɔ̀ɔ̀ ɲɛɛn dzù rɔ̀n, è tsifaà rè ɲɛɛn wɔ mɔn. 19Àwà waatsi gbaan tà shɔ̀ùn, è tsìfaà yè sèè na. È dzin è ra tɔ̀un, ci yè ɲɛɛn kpunan bo wò re. 20Sɛnu kunun nuàn sìun nìi ra, tɔ̀ yeè e kpɛrɛ̀ e raà tsuru nùn kpɛrɛ ka, è dzin ci: "Tsìfaà, wo kunun nun nì sìun mun na, ŋà m'a tsuru nùn kpɛrɛ tàrau, à yɛ nèe." 21À tsìfaà yè dzin à ra tɔ̀un ci: "Tɔ wùbeu, wo jòn wùù, w'e bà tereòn. Wo tereun nèe goorii rèe faa doùn, mun nà wo tsùù blà kuùn. Nà a taama dzibe a tsifaà ka." 22Kunun fiɛ̀ sìun nìi rà, tɔ̀ sa yeè e kpɛrɛ, è dzin ci: "Kùntsiɛ̀, wo kunun fii rìì sìun mun sa ra, ŋà, mun sa y'a tsuru fii kpɛrɛ tàrau, à yɛ nèe." 23À tsìfaà yè dzin à ra tɔ̀un ci: "Tɔ wùbeu, wo jòn wùù, w'e bà tereòn. Wo tereun nèe goorii rèe faa doùn, mun nà wo tsùù blà kuùn. Nà a taama dzibe a tsifaà ka." 24Sɛnu kunun soo sìun nìi rà, tɔ̀ sa yeè e kpɛrɛ̀, è dzin ci: "Kùntsiɛ̀, m'a tɔ̀u ci wo mòdzin, nìi rè goò xɔ. Wo na gèdzin jiɔ̀ min niì, wo shìmàndzin gaa mɔn. Wo to na shìmàndzin sɛɔ̀n min niì, wo tɔ̀ shìmaan ladzyee. 25Tà doùn, mun shiu, min bè wo re sɛnu kun'na mɛnɛn dzù rɔ̀n, à to yɛ nèe, à wo raa rìì." 26À kùntsiɛ̀ yè dzin à ra tɔ̀un ci: "Jòn ɲan, e bà sàànmaan. Wo na à tɔ̀ ci mun na gèdzin jiɔ̀ min niì, ci mun shìmàndzin gaa mɔn kɛ̀ ? Mun to na shìmàndzin sɛɔ̀n min niì, mun tɔ̀ shìmaan ladzyee kɛ̀ ? 27Àwà wo ye ba na tɔ̀ tɔ̀, wo na bèe mun ne ɲɛɛn sìn nàfòrò mar'leè rà. Tɔ̀un mun sèè naumaà, mun na bèe à ko e tɔn'nà sen. 28Nìi sɛnu kunun tsyeòn tàrau, y'a raa soo tsi sìn tɔ̀ ra. 29#Mat 13.12; Mar 4.25; Luk 8.18.Àwà, sɔn ni nìi rè, gè nà bà tɔ̀ raà tɛ̀y, giri yè bà ni à re. Ŋà pɛn na ni nìi rè, kiɲaanin nìi ni à re, tɔ̀ sa nà tsi à ra. 30#Mat 8.12; 22.13; Luk 13.28.Àwà nèe faagoofadzin dɔntsɔ̀bɛy riì yɛ, y'a sen maa da rɔ̀n tsitsiɛ̀ rà, gɛyn boo ko ɲiun taa nà bà ni min niì."»

Mòdzian nà ɲankɛrɛn nìi tsuru tsìɛ̀ sii sèè

31 # Mat 16.27; Mat 19.28. Yesù yè dzin kɔn ci: «Adamà dziàn ye na nà e nɔɔrɔɔ̀ doùn waatsi riì bwèy, à ko mɛ̀rɛ̀kɛ rèè sapɛ, à nà e tsuù e re màsà gbaaniin nɔɔrɔmaa tsɛ. 32Tɔ̀un, jàmàan rèè sapɛ modzin nà nà e ladzyèè à bììn, è ɲankɛrɛn bo e si ɲan, a ci dzwɛka kplatsuubaa yè e re dzwɛkà rèè ɲankɛr'na nìi tsuru, è sàà rèè ko ba reè bo e si ɲan. 33À nà sàà rèè ji e sirama re, è ba reè ji e ɲɔnma re. 34Tà doùn, nìì reè ni màsà kpir'là sirama sia rè, à nà dzin twɛy rà ci: "Mun Fà Ŋaabla dzwɛ kuɔn ye nìì reè mà, ye nà. Màsà gane riì mabyɛ̀n tsùuŋnà ye re fɔ dziɲaan jɔ̀n bwey, ye nà dɔ̀n mɔn, y'a bà e re shɛn. 35Àwà dzu na ni mun na, ye to mun kɔ̀u ɲwɛyn, min ɲɔn. Mìnoo na ni mun na, ye to mun kɔ̀u yu, min n min. Mun na tɔnɔn, ye to mun kuun'n kuru wuu fau. 36Mun na ni n ma xɔ ra, ye to vya jiu mun mà. Mun ɲìniun, ye to bèu mun siin. Mun na ni kàsoò rà, ye to nàu mun kpà." 37Twɛy mòdzin tereonma rèè nà dzin tɔ̀un ci: "Tsìfaà, ɲe wo dzukɔɔn jau waatsi kɛn, ɲe yè wo kɔ̀ ɲwɛyn ? Ɲe wo mìnòòkɔɔn jau waatsi kɛn, ɲe yè wo kɔ̀ yu ? 38Ɲe wo tɔnɔnkɔɔn jau waatsi kɛn, ɲe yè wo kuun'n kuru wuu fa ? Ɲe wo màxɔ̀ɔ̀ma jau waatsi kɛn, ɲe yè vya ji wo mà ? 39Ɲe to wo ɲìnìnkɔɔn jau waatsi kɛn, tàmafa kàsoò rà, ɲe yè bè wo siin ?" 40Màsà kpir'là nà dzin è ra tɔ̀un ci: "Sààben na, mun nì ci e ra, ye twɛy tsuru fau mun neema kiɲaanin nèe rèè mòò sɔn ne min niì, ye y'à fau mun nì nè."

41Tà shɔ̀ùn, nìì reè ni Màsà kpir'là ɲɔ̀nmà sì jaa rè, à nà dzin twɛy rà ci: "Ye dangauma rèè, ye bo n tɛyn, ye bè jeenà. Sà dzibɛy riì màbyɛ̀n tsùuŋnà Sànwɔbaa ko e re mɛ̀rɛ̀kɛ rèè rè, ye bè mɔn. 42Àwà, dzu na ni mun na, ye to na ɲwɛyn sìn mun na min ɲɔn waa. Mìnoo na ni mun na, ye to na mun kɔ̀ yu min n min waa. 43Mun na tɔnɔn, ye to na mun kuun'n kuru wuu fa waa. Mun na ni n ma xɔ ra, ye to na vya ji mun mà waa. Mun na ɲìnìnkɔɔn, min bà na ni kàsoò doùn, ye to na be mun siin waa." 44Twɛy sa nà dzin tɔ̀un ci: "Tsìfaà, ɲe wo dzukɔɔn jau waatsi kɛn, ɲe wo mìnòòkɔɔn jau waatsi kɛn, ɲe wo tɔnɔnkɔɔn jau waatsi kɛn, ɲe wo màxɔ̀ɔ̀ma jau waatsi kɛn, ɲe wo ɲìnìnkɔɔn jau waatsi kɛn, ɲe to wo jàu kàsoò rà waatsi kɛn, ɲe na goo fa wo re ?" 45Màsà kpir'là sa to nà dzin è ra tɔ̀un ci: "Sààben na, mun nì ci e ra, ye na twɛy tsuru fa mun neema kiɲaanin nèe rèè mòò sɔn ne min niì waa, ye na à fa mun nì nè waa." 46#Dkk 12.2.Àwà twɛy mòdzin neè nà bè byɛnbe dobɛɛ ɲàn tɔ̀un. Mòdzin tereonma rèè, twɛy yè bè jaamabe dziù dòbɛɛ ɲàn.»

Currently Selected:

Matsiyù 25: BDZU

Highlight

Copy