Matsiyù 26

Dzyèèsìbee mòdzin neè jɔundzin neè byɛ̀un à mà min niì ci Yesù yè vu

(Marikì 14.1-2; Lukì 22.1-2; Yùxanà 11.45-53)

1Àyìwà, Yesù nàu dò twɛy gooma reè sapɛ ra waatsi riì bwèy, è dzin e re kàràndzin neè rà ci: 2#Jdk 12.1-27.«Ye y'à tɔ̀ ci à dzyee tou bwèy fii, Geren n tsɛɛ̀ sɛr'là yè wɔ. È to nà Adamà dziàn wɔ mòdzin ì suun, è bà ni gban gɔɔ̀ rà, è vu.»

3Tà doùn, Saaka Jɔundzin neè, ko Dzyèèsìbee mòdzin neè rè bɔɔ rèè yè e si ladzyeè Saaka Jɔundzin blaa rè gàne rɔ̀n, tɔ̀ niì tsoo Kàyifè. 4Yè byɛ̀n à mà, ci ye yè Yesù kun sànbe ka, y'a vu. 5È to yè dzin ci: «À na wù è fa sɛr'là mà waa, tà boshɔ̀ùn jàmaà nà màànkan fu.»

Tàan sɔn ɲinin kinin dziù koun Yesù kùùn min niì

(Marikì 14.3-9; Lukì 7.36-50; Yùxanà 12.1-8)

6Àyìwà, Yesù nàumaà Betanìn wɔ̀ rɔ̀n, à na ni Shimɔ̀n nè gbàà doùn, è tɔ̀ niì kir'là byèèmà kpir'là. 7#Luk 7.37,38.À ni mɔn, tàan sɔn ye nà e kpɛrɛ̀ à ra ɲinin kinin dziù ka, nìi kpaxɔ, è bà ni bwèyn kpaàma doùn, nìi sa kpaxɔ fɔ è bè geren. Yesù ni ɲwɛɛ̀n nà, taàn yè ɲin'nèe kon à kùùn. 8Àwà, Yesù rè kàràndzin neè tɔ̀ jà nìi fau, à na byɛn è mà waa. È ci: «Fee nèe baragoò rèe kùn ? 9À na dzia gɔɔ kpàxɔù rà à ɲɛɛn yè sìn gbakɔɔn reè rà kɛ̀ !» 10Yesù tɔ̀ ɲantɔu min niì, è dzin kàràndzin neè rà ci: «Nèe tàan rèe vunuun kɔn kùn ye re ? À yɛ nìi faɔ̀ mun ne, à goowùù rii. 11#Sdk 15.11.Àwà, gbakɔɔn reè, twɛy ni tsuù ye ka kudɛyn, ŋà mun, mun fa bà ni tsuù ye ka kudɛyn waa. 12À yɛ ɲinin kinin dziù rìi koun mun tsɛ nèe, à tɔ̀ fau nì, à y'à ka mun fùn wɔɔ màbyɛ̀n tsùù. 13Sààben na, mun nì ci e ra, nèe Kùnàgoo Dziù rèe nà dè dziɲantsiɛ min o min, tàan rèe raa goo faumaà sa nà dè, è taa yeè to à re.»

Yudasì Yesù jàànfaà jiu e duùn min niì

(Marikì 14.10-11; Lukì 22.3-6)

14Àwà, Yesù rè kàràndzin teeŋ fiɛ̀ ɲàn, nìi tsoo Yudasì Sikariyɔtsì, tɔ̀ yeè bè Saaka Jɔundzin neè kpɛyn. 15#Jkk 11.12.È bè dzin è ra ci: «Min Yesù wɔ ye suun, ye nà fee sìn mun na ?» Twɛy yè siin, yè warifyɛ moòtsyeùn dan wɔ à suun. 16È sen tɔ̀ waatsia rà, Yudasì nà waatsi wuu riì tàrà è bà ni Yesù wɔ è suun, è maa è tɔ̀ jaa gaa.

Yesù ko e re kàràndzin neè Geren n tsɛɛ̀ sɛr'là fau esire min niì

(Marikì 14.12-26; Lukì 22.7-23; Yùxanà 13.21-30)

17Àyìwà, Buru fu bɛɛ sɛr'là jisee jɔnaa sii sèè, Yesù rè kàràndzin neè yè e kpɛrɛ̀ à ra, y'à tey ci: «Wo sào ni mìn bè Geren n tsɛɛ̀ sɛr'là ɲwɛyn goo jaa bo wo re min ?» 18È dzin è ra tɔ̀un ci: «Ye bè wɔ̀ɔ̀ doùn kpiri sɔn ne, ye dzin à ra ci kàrànfaà ci wò re waatsia yè e kpɛrɛɔ̀, ci wò ko e re kàràndzin neè to nà Geren n tsɛɛ̀ sɛr'là fa wò rii lè.» 19Àwà, kàràndzin neè y'à fa a ci Yesù y'à dèu è ra nìi tsuru, yè Geren n tsɛɛ̀ sɛr'là ɲwɛyn goo jaa bo. 20Bwèè nàu dò min niì, Yesù ko e re kàràndzin teeŋ fiɛ̀ yè bè e tsuù ɲwɛɛ̀n nà. 21È ni ɲwɛɛ̀n nà, è dzin è ra ci: «Sààben na, mun nì ci e ra, mòò sɔn nà mun jàànfa ye ɲan.» 22Tɔ̀ goomaa yè è taama ŋununbe fɔ è bè geren. Yè e maa, y'à teè soo soo ci: «À mun nì gbɛ Tsìfaà ?» 23#Zab 41.10.Yesù ci: «Mòò riì yè e si wɔɔ mun ka ɲwɛyn geè doùn, tɔ̀ rii nà mun jàànfa. 24Adamà dziàn kpɛ̀yn nà san, a ci à sɛbɛɔ̀n à re goò tsɛ nìi tsuru. Ŋà, mòò riì nà bà à jàànfaà saabu, tɔ̀ tsìfa raà barau. À mà bà na kereu fyeu, tɔ̀ na fyan à mà.» 25Yudasì rìi na nà à jàànfa, tɔ̀ y'a tey ci: «Kàrànfaà, à mun nì gbɛ ?» Yesù yè dzin à ra ci: «Wo rìì y'à dèu.»

26È ni ɲwɛɛ̀n nà, Yesù yè buru sen, è baraka sìn Ŋaablà ra, à y'à tara tara, à y'à sìn kàràndzin neè rà, è dzin ci: «Y'a tsi ɲɔn, à mun gɔɔ̀n rìì.» 27Tà shɔ̀ùn, è yukuun ko e doùn mììnge sen. À re tswɛ̀y siunmaà shɔ̀ùn Ŋaablà ra, à y'à sìn kàràndzin neè rà, è dzin ci: «E sapɛ y'a sɔn min. 28#Jdk 24.8; Ykk 31.31-34.Àwà, à mun tsìɛn nì, Ŋaablà ka dzyèèsìbee tsìɛn, nìi koon mòò giri kamà, è re gooɲaantsiɛ yè bà ni mɛɛy bo è vu ra. 29Sààben na, mun nì ci e ra, è sen dòònuùn nà, mun fa ɛ̀rɛ̀nzhɛ̀ndzian yu mìn dɛ fyeu, fɔ jisee riì, mun nà à yeo mìn ye ka mun Fà Ŋaablà re Màsà gane rɔn» 30Tà shɔ̀ùn, yè Ŋaabla makiri ye rèè cèè, yè bo yè dɔ̀n be oliviku rèè jèèn rà.

Yesù dziun min niì ci Piyɛrì nà dzin ci wò na wò tɔ̀ waa

(Marikì 14.27-31; Lukì 22.31-34; Yùxanà 13.36-38)

31 # Jkk 13.7. Tà doùn, Yesù yè dzin kàràndzin neè rà ci: «Fen nèe ɲan, ye sapɛ nà vwɛ̀yn min bà saabu. Tɔ nà fa, kàtsu à sɛbɛɔ̀n Ŋaablà re Goomaa doùn ci:

Mun nà sàà kplàtsuubaà vu, sàà rèè sapɛ to nà jee.»

32 # Mat 28.16. Yesù yè dzin kɔn ci: «Min na sèè kpunan bo saàn ɲàn waatsi riì bwèy, mun nà bè ye shù Galile mar'lɔùn.» 33Piyɛrì yè dzin à ra ci: «Wo to kɛ̀nsɛɛn ye ba è sapɛ mɛɛ̀ saabu, tɔ̀ fa mun tàrà byɛ.» 34Yesù yè dzin à ra ci: «Sààben na, mun nì ci a ra, she fen nèe ɲan ko e sa, sani tsɛ̀keen yè ben, wo na bà à dè jaa zhììgi faɔ̀ nòn ci wo na mun tɔ̀ waa.» 35Piyɛrì yè dzin à ra ci: «Arì mun kɛ̀nsɛɛn ye ba nà san wo ka rìì, tɔ̀ pɛn fa à to min dzin ci mun na wo tɔ̀ byɛ.» Àwà, kàràndzìn dzyee reè sapɛ yeè tɔ̀ soo dè.

Yesù bèu Ŋaablà mafyɛ̀n min niì

(Marikì 14.32-42; Lukì 22.39-46)

36Tà doùn, Yesù yè bè è ka gàne sɔn ɲan, nìi kir'là Gɛtsisemanin. Àwà è wɔumaà mɔn, Yesù yè dzin kàràndzin neè rà ci: «Ye e tsuù mìin, min bè jɔun, min bè Ŋaablà mafyɛ̀n.» 37À bèkɔɔn, è Piyɛrì ko Zhebedè dzin kpiri fii rèè kiri bà e tɛy. Tɔ̀un à taama yè nà e maa è ŋununbee, à duungoo yeè bà doò. 38È dzin è ra ci: «Taamaŋununbeè ni a ci à nà mun vu. Ye to tsùù n ka mìin, e maà cìi waa.» 39Tà shɔ̀ùn è kpɛrɛ̀ be jɔun dɛyn, è bè e kunun gban, è kuu, è Ŋaablà mafyɛ̀n ci: «Mun Fà Ŋaablà, è ba dzia fa, byɛnbe riì nàkɔɔn yɛ mun tàrà, à dàn gbànbe n na. Tà ko e sa ra, mun naa sàɔ mà fa dɛ, wo raà rìì yè fa.» 40À nàu dò waatsi riì bwèy, è kpɛyn sèè na kàràndzin zhiigia kpà. À nàu wɔ, à y'à jà è sapɛ cìiŋ. Tɔ̀un, è dzin Piyɛr'là ci: «Ye na dzi fààn tarà ye yè bà ni to e jaa ra waatsi soo basɔùn tsu rii doùn mun ka waa. 41Ye to e jaa ra, ye Ŋaablà mafyɛ̀n, dzuunbwey mà nà e tarà waa. Mòdzin gè niì, ŋɛ̀nɛ̀ɲan wuu ni à ɲan, ŋà à ŋɔ̀n nì fyɛn.»

42È ma bo è ra kɔn e jaa fiira ɲan, è bè Ŋaablà mafyɛ̀n ci: «Mun Fà Ŋaablà, byɛnbe ree jɔun ma ba dzia bo bou'n kuru pɛn fɔ è mun tàr'li, wo sàɔ yè fa.» 43È kpɛyn sèè nau è kpà kɔn, è nà à jà è ciɛ̀. È ɲɛn à tsɛ, ciɛ̀ na ni è ra fɔ è bè geren. 44È bo è tɛyn kɔn, è bè Ŋaablà mafyɛ̀n e jaa zhiigira ɲan tɔ̀ fau'n kuru soo rà. 45Tà shɔ̀ùn à sèè nau è kpà, è dzin è ra ci: «Ye ciɛ̀ rìì ŋe ye yè bà e ɲanwɔrà ɔ̀ ? Àwà Adamà dziàn yè wɔ gooɲaan fa reè suun, tɔ̀ waatsi wɔu dòònuùn. 46Ye fù, m'à wa ! Mun jàànfabaà yɛ e kpɛrɛɔ̀.»

È Yesù kuun min niì

(Marikì 14.43-50; Lukì 22.47-53; Yùxanà 18.2-12)

47Àyìwà, è Yesù dzii to tɔ̀ goomaa nà ŋe, nìi Yudasì, kàràndzin teeŋ fii rèè sɔn, tɔ̀ yeè nà e kungɔ bo ko jàma brìsi ka, kaa faa kaamunun ì ko kɔn ì yè bà ni twɛy suun. Saaka Jɔundzin neè ko Dzyèèsìbee mòdzin neè rè bɔɔ rèè rìì na è kaɔ. 48Yudasì, Yesù jàànfabaà, tɔ̀ na tàànmàshɛn kpadeò Yesù kunbaa rèè rà nòn. À na dziɔn è ra ci: «E ye na à jà mun mòò riì tswàu dzunwɛynsi tswaù'n kur'la, à wò rii, y'a kun.» 49Àwà è nàu dzi min niì, Yudasì yè e kpɛrɛ̀ Yesù rà suu, è dzin ci: «Kàrànfaà, a kɔfen !» È siin à y'à tswà a ci e dzunwɛynsi. 50Yesù yè dzin à ra ci: «N dzunwɛynsi, a na kuàn jaa bo.» Tɔ̀un dzyee rèè yè e kpɛrɛ̀ Yesù rà, y'à kun. 51Tɔ fau min niì, Yesù kpɛyn dzin neè soo yeè e siun sɔɔ̀n è raa kaamun'nà shɔ̀, è Saaka Jɔundzin blaa raa jòn kpir'là toro sɔɔ̀n sen bo mɔn caù. 52Yesù yè dzin à ra tɔ̀un ci: «A re kaamun'nà sèè wɔ e shɔùn. Àwà, gè o ge kaà faa kaamun'nà ka, kaamun'nà nì nà twɛy sapɛ vu. 53Wo y'à kɛ̀sɛɛ̀ dzùrù ? Wo na à tɔ̀ ci mun dzia n Fa Ŋaablà mafyɛ̀n dòonen ɲan è mɛ̀rɛ̀kɛ rèè kuru bla bla teeŋ fii ko e bonè bàji na mun ne yè nà wɔ mun na ɔ ? 54À ma kun tɔ̀ tsuru, Ŋaablà re goomaa nìi dèu, tɔ nà bo e shi tsɛ dzùrù ? Tɔ̀ goomaa nì na dzin ci à nà fa tà tsuru ɔ ?» 55#Luk 19.47; 21.37.Tɔ̀ ɲan, Yesù yè dzin jàmaà nà ci: «Feera ye yè bà naɔ̀ mun kun kaamunun ì ko kɔn ì ka a ci mun gookoronfabaa rìì ? Mun naà n tsuɔ siì saa see Ŋaablà re gbà blàa fɔɔn doùn, min mòdzian kàr'na ɔ ? Fee y'à to ye na mun kun ? 56Àwà, nèe sapɛ fau nì, sànko Ŋaablà re kɛɛra reè na gooma ge o ge deò Ŋaablà re Goomaa doùn, tɔ̀ sapɛ yeè bo e shi tsɛ.» Tɔ̀un, kàràndzin neè sapɛ yeè vwɛ̀yn y'à to.

È bèu Yesù ka Saaka Jɔundzin blaa rè min niì

(Marikì 14.53-65; Lukì 22.54-55; 22.63-71; Yùxanà 18.12-14; 18.19-24)

57Àyìwà Yesù kunbaa rèè yè b'a ka Saaka Jɔundzin blaa rè gàne rɔ̀n tɔ̀un, nìi Kàyifè. Sàrìyà Kaamoo reè ko bɔɔ rèè na e ladzyèeŋnà mɔn. 58È bèkɔɔn Yesù ka, Piyɛrì yè to jeenà è kɔ̀rɔ̀ùn jìì beè, fɔ yè bè dɔ̀n Saaka Jɔundzin blaa rè gàne rɔ̀n. È bèu dɔ̀n mɔn, Piyɛrì sa yeè bè dɔ̀n è tsuù gànè kplàtsuu reè ka, sànko à goo rèè nà e latan nìi tsuru, wò yeè tɔ̀ jà. 59Saaka Jɔundzin neè ko kitsi kunun kuru blàa mòdzian sapɛ na gooma ì nì gaa, è nà dzi nìi bà kùn, yè kitsi mɛɛy Yesù tsɛ, y'à vu.

60Shɛɛrɛ doodebaa giri yè e kpɛrɛ̀ yè sɔn de, ŋà kùn na tarà tɔ̀ pɛn ɲan. À lataan, mòkun fii yè nà e kpɛrɛ̀. 61#Yux 2.19.Twɛy yè dzin ci: «À dziun ci wo dzia Ŋaablà re gbà blàa ci, wò y'a sèè ji bwèy zhììgi doùn.» 62Saaka Jɔundzin blaa yè fù tɔ̀un, è Yesù tey ci: «È yɛ nìi sapɛ deè wo re goò ɲàn, pɛn na ni wo re dèràma ɔn ?» 63Yesù yè e mɛnshɛ̀n. Saaka Jɔundzin blaa yè dzin à ra kɔn ci: «Ŋaablà jaamaa tsoò kamà, à dè mùn na wo rìì ye ba Ŋaablà Jaara Modzìàn, Ŋaablà Dzin Kpir'la.» 64#Dkk 7.13.Yesù yè dzin à ra ci: «Wo rìì y'à dèu. Ŋà, mun nì ci e ra, nèe shɔ̀ùn, ye nà Adamà dziàn tsùuŋma jà Dzitsi Ŋaablà sirama si jaa rè, tà shɔ̀ùn, y'a nàkɔɔn ja jìrànxɔ rɔ̀n mun'na tsɛ.» 65#Sak 24.16.Tɔ dèu min niì, è dɔ̀n Saaka Jɔundzin blaa kpɛyn fɔ è bè geren, è re vya rèè vyɛ̀, è dzin ci: «À Ŋaablà tsoo barau ! Shɛɛrɛ ì gaa kun fèe kɔn ? E sapɛ na Ŋaablà tsoo bara goòmàà myɛ̀n à dzu dòònuùn ɔ̀n ? 66Y'a jàa dzùrù ?» Mòdzian ci: «À wù è vu !» 67#Ekk 50.6.Tɔ̀un, yè dzweeyuà fyɛɛ̀ à jaakɔɔ doùn, yè sikuɔ tèyn boò à tsɛ, y'à dɔr'là e taàkuùn. 68Yè dziàn ci: «Ŋaablà Jaara Modzìàn, mòò riì wo baun, kɛɛrabee fa, a tsìfa dè mùn na.»

Piyɛrì yè e sɔswɛrɔun min niì ci wò na Yesù tɔ̀ waa

(Marikì 14.66-72; Lukì 22.56-62; Yùxanà 18.15-18; 18.25-27)

69Tɔ̀ sapɛ ɲan, Piyɛrì na tsùuŋnà fɔɔn doùn. Àwà faagoofadzin taan sɔn yeè nà e kpɛrɛ̀ à ra, tɔ̀ yeè dzin ci: «Wo sa na ni Galileka kpiri Yesù ka.» 70Ŋà, Piyɛrì yè e sɔswɛy è sapɛ jaa ra. À ci: «Wo yɛ nìi dèe mun na tɔ̀ tɔɔ̀ dɛ.» 71Tà shɔ̀ùn, Piyɛrì yè e maa è bèe fɔɔn bomadziɛ kpàkèrè. Faagoofadzin taan kpɛrɛ y'à jà kɔn, tɔ̀ yeè dzin mòdzian nà mɔn ci: «Nèe sa na ni Nazarɛtsika kpiri Yesù ka.» 72Piyɛrì yè e sɔswɛy tɔ̀un kɔn fɔ è kɛɛ̀y. À ci: «Mun na tɔ̀ kpir'la tɔ̀ waa.» 73Dɛyn nà fa kɔn, nìì reè ni mɔn, twɛy yè e kpɛrɛ̀ Piyɛr'là, yè dzin à ra ci: «Sààben ci yè e de, wo sa yeè è sɔn, kàtsu wo goomau'n kur'la wo danmàà kpàdèe.» 74Tɔ̀un kɔn, Piyɛrì yè e kɛɛ̀y fɔ è bè wɔ è dzii ɲaan kere e yɛr'la, è dzin ci: «Mun na tɔ̀ kpir'la tɔ̀ waa.» Tɔ̀ nɔ̀nkɔɔrɔn ko e sa, tsɛ̀ken sɔn yeè ben. 75Tɔ fau min niì, Piyɛrì taa yeè to Yesù rè gooma deumaà rè nìi yɛ ci: «Sani tsɛ̀keen yè ben, wo nà bà a dè jaa zhììgi faɔ̀, ci wo na mun tɔ̀ waa.» Piyɛrì yè bo bè da rɔ̀n tɔ̀un, è bè gɛyn cèreoma.

Currently Selected:

Matsiyù 26: BDZU

Highlight

Copy