Marikì 12

Yesù gooma bɔɔ rìi dèu ɛ̀rɛ̀nzhɛ̀ndzuà faagoo fa reè tsɛ

(Matsiyù 21.33-46; Lukì 20.9-19)

1 # Ekk 5.1,2. Àyìwà, tà shɔ̀ùn, Yesù yè e maa è goomaa è ka gooma bɔɔ ì ɲàn. À ci: «Kpiri sɔn ɛ̀rɛ̀nzhɛ̀ndzu wɔu, è kɛ̀yngɛ kun, à y'à laguru. È kɔ̀ɔ̀ ɲɛɛn, ɛ̀rɛ̀nzhɛɛ̀n nà vùr'la min niì, à yuà yè bo. È sangaso ji, à kplatsuubaa rèè nà bà ni min niì, y'à kààwɔɔ̀. Tɔ̀ sapɛ shɔùn, è kòmànà dzùà kɛ̀ɛ̀yfa to faagoofadzin neè swey mà, è dɔ̀n be jìì rà. 2Tɔ̀un, ɛ̀rɛ̀nzhɛɛ̀n nàu wɔ, è re jòòn soo ka ɛ̀rɛ̀nzhɛ̀ndzuà faagoo fa reè rè, yè bà ni à raa nìn ɛ̀rɛ̀nzhɛɛ̀n sìn. 3Tɔ̀ jòòn bèu wɔ min niì, ɛ̀rɛ̀nzhɛ̀ndzuà faagoo fa reè y'à kun y'à ban, y'à sixɔɔma baji be. 4È sèè kɔn, è jòn kpɛrɛ ka è re. Yè tɔ̀ sa kun kɔn y'à ban e kuùn fɔ y'à mɛ̀ɲɛ̀n, y'à cèù bo. 5È soo kpɛrɛ ka kɔn. Tɔ̀un, yè tɔ̀ vu. È giri kpɛ̀rɛ̀kuru ì ka è rè kɔn. Yè swey ban è ɲan, yè swey vu.

6Àwà, è to dzùtsià dzin kpiri soo pee dòònuùn, à tɔ̀ niì kɛ̀niɔ̀n fɔ è bè geren. À lataan, è tɔ̀ ka è re, è dzin ci: "È kpɛ̀yn nà blà wɔ mun dzin kpir'la ɲàn." 7Ɛ̀rɛ̀nzhɛ̀ndzua faagoo fa reè dzin kpirimaa jàu min niì, yè dzin e si ra ci: "À shɛnsenbaà rìì yɛ nèe, y'a wa m'a vu, shɛɛ̀n yè bà mùn naa." 8Yè dzùtsià dzin kpir'la kun tɔ̀un y'à vu, y'à geren maa dzùà bònè.» 9Àwà, dzùtsià nà fee rìì fa tɔ̀un ? À nà nà, è twɛy faagoo fa reè sapɛ vu, è dzùà sìn mòò kpɛrɛ ì rà. 10#Zab 118.22,23.Nèe gooma riì yɛ Ŋaablà re Goomaa doùn, ye na tɔ̀ kàràn gbɛ ? À sɛbɛɔ̀n ci: «"Gbà ji reè kpàà riì maaŋ, tɔ̀ rii nàu sèè è bà gbàà nɔ̀nkɔ̀n kpaa, nìi ni kpàà dzyee reè sapɛ jɔun. 11Tɔ bou Tsìfaà rìì ɲàn, è bà kabagoo ɲe jaa ra."»

12Àyìwà, Yesù dziu twɛy gooma reè dè min niì, Dzyèèsìbee mòdzin neè jɔundzin neè yè e maa yè jaa gaa, ci ye nà à kun, kàtsu è na à tɔ̀ ci Yesù nèe gooma bɔɔ rèe dè siɔ̀n ye rìì là. Ŋà yè shi jàmaà jɔun, y'à bàto mɔn, yè bèe.

Faridziɲɛn rèè myɛ̀ɛ̀n ɲɛun Yesù jɔun min niì xɔnsɔɔn goo ka

(Matsiyù 22.15-22; Lukì 20.20-26)

13Tɔ̀un, yè Faridziɲɛn rèè swey, ko màsà kpiri Erodzì kpɛyn dzin neè swey ka à kpɛyn, gè riì ni à to twɛy yè bè myɛ̀ɛ̀n ɲɛn à jɔun, y'à kun e dzugoomaa ka. 14Twɛy bèu wɔ, yè dzin à ra ci: «Kàrànfaà, ɲe y'à tɔ̀ ci wo sààbeen rìì dèe, wo na mòò jaadzin siɛ̀n. Mòdzian to kɛ̀nsɛɛn ye ba dzii o dzii, wo na tɔ̀ siɛ̀n waa, wo yè bà Ŋaabla shià kàr'na mòdzian nà sààben tsɛ. Àwà ɲe nà wo tey goo soo ra, xɔnsɔɔn yè sàrà Ɔ̀rɔmùn màsà kpiri blàa rè, tɔ dàaŋnà ràà, à na dàaŋnà ? Mùn wù mùn y'a sìn naà, mùn na wù mùn y'a sìn ?» 15Yesù yè è re duungoofiibeè tɔ̀ nìi fa, è dzin è ra ci: «Feera ye yè bà mun dzuun bomà gaa ? Ye nà ko ɲɛɛn taman soo ka n kɔ m'a siin.» 16Twɛy yè nà tɔ̀ ka. Tɔ̀un, à yè è tey ci: «Tsì rii ɲɛyn ko à tsoo ni taman ree tsɛ ?» È ci à ra ci: «À Sezar'lì.» 17Yesù ci è ra tɔ̀un ci: «Nìi Sezar'laa, ye tɔ̀ sìn Sezar'là, nìi to Ŋaablà raa, ye tɔ̀ sìn Ŋaablà ra.» Yesù rè goò yè ji è dzii tsɛ fɔ è bè geren.

Yesù nìi dèu fùn nèè sèè kpunan goo tsɛ

(Matsiyù 22.23-33; Lukì 20.27-40)

18 # Kɛf 23.8. Àyìwà, tà shɔ̀ùn Sadusiɲɛn rèè swey yè nà à kpɛyn. Sadusiɲɛn rèè rìì ci fùn nèè fa sèè kpunan waa. Tà doùn, twɛy y'à tey. È ci: 19#Sdk 25.5.«Kàrànfaà, kɛɛra Musà rè tàworataà doùn, à nèe gooma ree sɛbɛn tou mùn ne, nìi yɛ ci: "Kpir'la sɔn ye san è re tààn to, è mà bà dzin tàraɔ̀ waa, tseyn kpiri ye ba ni à re, tɔ wù è tàan rèe sen, gè riì ni à to è dzin tàrà à ka, tɔ̀ yeè bà à tsìnà kpir'la tsu." 20Àwà, keresima ɲɛɛ̀nun na ni, jɔ̀naà tàan seun, è san, à na dzin tàrà tàan rèe ka, nìi nà bà à tsu waa. 21Fiiraa sa yeè tàan rèe sen, è san, à na dzin tàrà à ka waa. Nìi zhììgìraa, tɔ̀ sa raà yè kun tɔ̀ tsuru. 22È ɲɛ̀ɛ̀nuàn sapɛ yeè bè dò, è pɛn na dzin tàrà tàan rèe ka waa. È sapɛ shɔùn, taàn sa yeè nà san.

23Àwà, fùn nèè to ye na sèè kpunan fù ɔ, tàan rèe nà bà tsì rii soo raa è ɲan sa ? È ɲɛ̀ɛ̀nuàn sapɛ to y'à bà jàu e re tààn.» 24Yesù yè dzin è ra tɔ̀un ci: «Ye fìriɔ̀, ŋà ye na à kùn tɔ̀ waa. À kùàn nì yɛ, ye na Ŋaablà re Goomaa dzin seunà, ye to na à re dzibaabee tsu tɔ. 25È ɲɛn à tsɛ, fùn nèè ye na sèè fù, kpiri fa tàan furu, tàan tsu to fa sìn kpir'la waa. È nà bà ni a ci jìrànxɔ rɔ̀n mɛ̀rɛ̀kɛ rèè. 26#Jdk 3.6.Nìi fùn nèè raa sèè kpunan goo, ye na tɔ̀ kàràn kɛɛra Musà rè tàworataà doùn gbɛ ? Gɔ̀ɔ̀kùìrii tsuunmaà goo deò min niì kɛ̀ ? À deò ci Ŋaabla dziun Musà rà mɔn ci: "Mun Ibraximà rè Ŋaablà, ko Ishakà rè Ŋaablà, ko Yàkubà rè Ŋaablà." 27Tà doùn, Ŋaablà na fun ì rè Ŋaablà waa, à jaama reè raa rìì. Ye fìriɔ̀ fɔ è bè geren.»

Yesù ci Ŋaablà dzugooma xɔù nìi blà dzyee rèè sapɛ ma

(Matsiyù 22.34-40; Lukì 10.25-28)

28Àyìwà, Yesù tɔ̀ kaangoo riì jiu ko Sadusiɲɛn rèè ka, Sàrìyà Kaamoo sɔn toro jiumaà tɔ̀ ɲan, à y'à jà è latsiu'n kuru wùbeu. Tɔ̀un, è kpɛrɛ̀ Yesù rà, à y'à tey ci: «Ŋaablà dzugooma xɔù rèè sapɛ ɲan, kɛ̀n ni ni jɔun ?» 29#Sdk 6.4,5.Yesù yè dzin à ra ci: «Ŋaablà dzugooma xɔù rìi ni dzyee rèè sapɛ jɔun, tɔ̀ rii siin. "A toro wɔ Isirayɛlì, mùn Tsìfa Ŋaablà rii Tsìfa soo pee. 30A naà à kɛ̀n kɛ̀n'n kur'la sapɛ. À goò yè bà ni a vunun tsɛ, è bà ni a xɔɔn tsɛ, a kɛsɛmàà sapɛ yeè bà ni à tsɛ, a goò kun a faan sapɛ ka." 31#Sak 19.18.À fiiraa yè bà yɛ nèe ci: "A modzìnsia kɛ̀n jàci a yɛr'la." Ŋaablà dzugooma xɔù rèè sapɛ ɲan, pɛn na blà twɛy rìì mà waa.» 32#Sdk 4.35.Sàrìyà Kaamoo yè dzin Yesù rà tɔ̀un ci: «À wùbeu Kàrànfaà ! Wo dzin nìi fau ci à soo pe, ci kpɛrɛkuru na ni à tɛ̀y, wo sààben deu. 33#Ukk 6.6.E Ŋaablà kɛn kɛ̀n'n kur'la sapɛ, à goò yè bà ni a vunun tsɛ, a kɛsɛmàà yè bà ni à tsɛ, a goò kun a faan sapɛ ka, tà shɔ̀ùn a modzìnsia kɛ̀n jàci a yɛr'la, saaka dzu kpaankɔɔn reè, ko saaka dzyee bokɔɔn reè pɛn na ni tɔ̀ rii jɔun waa.» 34#Luk 10.25-28.Àwà, Yesù y'à jàu min niì ci à wò re goomaa latsiu ko akiri ka, è dzin à ra ci: «Wo ko Ŋaablà re màsàbee ɲàn dɔ̀ɔ̀ fi na gbàn waa.» Tà shɔ̀ùn, mòò pɛn kùùn naà xɔ, è Yesù tey goo sɔn pɛn mà dɛ.

Yesù nìi dèu Ŋaablà Jaa ra Modzìàn ko Ŋaablà fia tsɛ

(Matsiyù 22.41-46; Lukì 20.41-44)

35Àwà è Yesù to mòdzian kàr'nà nà Ŋaablà re gbà blàa fɔɔn rè, è tey fa ci: «Feera Sàrìyà Kaamoo reè yè bà dziàn, ci Ŋaablà Jaara Modzìàn màsà kpiri Dawudà tsua dzin ? 36#Zab 110.1.Màsà kpiri Dawudà yɛ̀r'la to dziun Ŋaablà re Dzi Fɛnɛɛ baraka rɔ̀n ci: "Mùn Tsìfa Ŋaabla dziun mun Tsìfaà rà ci: Nà a tsuù n sirama si jaa rè, fɔ min b'à ɲan rèè sapɛ wɔ dò a san dzuun." 37Dawudà yɛ̀r'la ye ba Ŋaablà Jaara Modzìàn kir'là ci wò Tsìfa ɔ, à to bàa dzùrù, è bà à tsua dzin kɔn ?» Jàma brìsià toro wɔumaà Yesù rè, à re gooma reè myɛ̀nkɔɔn na dzibeò è ra fɔ è bè geren.

Yesù nìi dèu Sàrìyà Kaamoo reè juɔ tsɛ

(Matsiyù 23.1-36; Lukì 20.45-47)

38À re kàr'nà doùn, à na dziàn è ra ci: «Ye e yɛrɛ kaàwɔ Sàrìyà Kaamoo reè rà. Nìi dzi è ra, yè e ɲantsyeere beè mɛ̀yɛ bla bla reè ka e ma, tà ko mòdzian yè è tswà beè blàbèma jàmà gane reè ɲàn. 39È ba ŋaablabegba rèè doùn, tsùùma nìì reè ni jɔun, è gaa twɛy rìì là. Mòò to ye è kiri e re jaaravi ɲwɛyn na, è ye be wɔ, è gaa tsùùma rèè sapɛ ɲan wùù reè rìì là. 40È fùnshɔ̀ùntaan rèè màniɛ̀n, yè è suun gee sapɛ tsi è ra. Tɔ̀un, yè ba Ŋaablà mafyɛ̀ɛn, è tɔ̀ fa toò rìì fur'lu, yè tɔ̀ ka e juɔ mà mɛnɛn mòdzian mà. Àwà, byɛnbe riì nà ɲɛn è tsɛ tsìɛ̀ sii sèè, tɔ nà ɲanbe, fɔ è bè geren.»

Yesù nìi dèu fùnshɔ̀ùntaan gbakɔɔn rè goò tsɛ

(Lukì 21.1-4)

41Àwà, tà shɔ̀ùn, mòdzian ɲɛyn niì reè sìan Ŋaablà ra kwɛ̀yge, è tɔ̀ jia gè nìi doùn Ŋaablà re gbà blàa doùn, Yesù yè bè e tsuù è jaa kere tɔ̀ ra, è mòdzian ɲɛyn jikɔɔn kààwɔɔ̀. Gètsi rèè giri na ɲɛyn giri jia. 42Tà doùn, fùnshɔ̀ùntaan gbakɔɔn sɔn sa yeè nà, tɔ̀ yeè ɲɛyn myɛyn fii ji. Tɔ̀ naà gereon taman soo tsuru tsɛ waa. 43Yesù yè e re kàràndzin neè kiri kpɛ̀rɛ̀ e ra tɔ̀un, è dzin è ra ci: «Sààben na, mun nì ci e ra, nèe fùnshɔ̀ùntaan gbakɔɔn ree ɲɛyn giri jiu ɲɛyn jia gèè doùn, è geren dzyee rèè sapɛ tsɛ. 44Àwà, nìi dzyee rèè, twɛy sapɛ yeè e raa rèè tsɛ mɔn'na nì jiu. Ŋà fùnshɔ̀ùntaan gbakɔɔn, tɔ̀ ko e re gbaa sa, è shɛɛ̀n sapɛ rii jiu, arì pɛn tsu na ni à suun è bà ni ɲwɛyn ɲɔn dɛ.»

Currently Selected:

Marikì 12: BDZU

Highlight

Copy