Marikì 14

È na jaa gaa Yesù vu goo rà min niì

(Matsiyù 26.1-5; Lukì 22.1-2; Yùxanà 11.45-53)

1 # Jdk 12.1-27. Àyìwà, à na too bwèy fii, Geren n tsɛɛ̀ sɛr'là ko Buru fu bɛɛ sɛr'là yè wɔ. Tɔ̀ y'a tàrà, Saaka Jɔundzin neè, ko Sàrìyà Kaamoo reè na jaa gaa, è nà dzi Yesù kun nìi tsuru sànbe ka, y'à vu. 2È na dziàn ci: «N mà à to è bà sɛr'la waatsia waa, tà boshɔ̀ùn, jàmaà nà màànkan fu.»

Tàan sɔn ɲinin kinin dziù koun Yesù kùùn min niì

(Matsiyù 26.6-13; Lukì 7.36-50; Yùxanà 12.1-8)

3 # Luk 7.37,38. Àwà, tɔ̀ y'a tàrà, Yesù na ni Betanìn wɔ̀ rɔ̀n, Shimɔ̀n nè gbàà doùn, è tɔ̀ niì kir'là byèèmà kpir'là. È Yesù to ɲwɛɛ̀n nà mɔn, tàan sɔn yeè nà ɲinin kinin dziù sɔn ka, tɔ faɔ̀ gɔ̀ɔ sɔn terèke ka, nìi kir'là naari. Ɲin'nèe kpaxɔ fɔ è bè geren, è bà ni bwèyn sɔn doùn, nìi sa kpaxɔ. Taàn yè siin tɔ̀un è ɲinin bweyn nee dzii kɛɛy, è ɲin'nà kon Yesù kùùn. 4Àwà, nìì reè na ni mɔn, à goò yè dɔ̀n twɛy swey kpɛyn. Yè dziàn e si ra ci: «Feera nèe ɲinin kinin dziù rèe yè bara nèe tsuru maana maànà ? 5À na dzia gɔɔ à gɔrɔunmaà yè faagoofadzin kuu tsyeùn sàrà bo, à ɲɛɛn yè sìn gbakɔɔn reè rà.» È vun'na taɔ à kpɛyn fɔ è bè geren. 6Ŋà, Yesù yè dzin ci: «Ye taàn to mɔn. Feera y'a vunuun kɔɔ̀n ? À yɛ nìi faɔ̀ mun ne, à goowùù rii. 7#Sdk 15.11.Àwà, gbakɔɔn reè, twɛy ni tsuù ye ka kudɛyn. Waatsi o waatsi ye ye dzibe, ye dzia goowùù fa è ra. Ŋà mun do, mun fa bà ni tsuù ye ka kudɛyn dɛ ! 8Ɲinin kinin dziù rìi kon tsùuŋnà mun mà nòn, tɔ mun fùn wɔɔ raà rìì. À dzia bau nìi à tɔ̀ rii fau. 9Sààben na, mun nì ci e ra, Kùnàgoo Dziɔ̀ nà dè dziɲantsiɛ min o min, tàan rèe raa goo faumaà sa nà dè, è taa yeè to à re.»

Yudasì yè e dzii sìun min niì ci wo nà Yesù wɔ suun

(Matsiyù 26.14-16; Lukì 22.3-6)

10Tà doùn, nìi Yudasì Sikariyɔtsì, Yesù rè kàràndzin teeŋ fii rèè sɔn, tɔ̀ yeè bè Saaka Jɔundzin neè kpɛyn, è bè dzin è ra, ci wo nà Yesù wɔ è suun. 11Saaka Jɔundzin neè tɔ̀ goomaa myɛ̀un min niì, tɔ̀ yeè è taamadzibe fɔ è bè geren. Yè e dzii sìn à ra, ci ye nà ɲɛyn sin à ra. Tɔ̀un, à nà dzi waatsi wuu riì tàrà, è Yesù wɔ è suun, è maa è tɔ̀ jaa gaa.

Yesù kàràndzin fii kau min niì ci yè bè Geren n tsɛɛ̀ sɛrɛ ɲwɛyn goo jaa bo

12Àwà, Buru fu bɛɛ sɛr'là jisee jɔnaa, è Geren n tsɛɛ̀ sɛr'là sààtòmòìriɛ vua tɔ̀ jisee riì, Yesù rè kàràndzin neè y'à tey ci: «Wo ci mìn bè Geren n tsɛɛ̀ sɛr'là ɲwɛyn goo jaa bo wo re min ?» 13Tà doùn, è re kàràndzin neè fii ka, è dzin è ra ci: «Ye bè wɔ̀ɔ̀ doùn. Kpiri sɔn nà nà ye kùùntsi, yu ni à kùùn dziniin doùn. Ye e gban à kpɛyn. 14È be dɔ̀n fɔɔn niì rè, ye fɔɔntsià tey ci: "Kàrànfaà ci wò ko e re kàràndzin neè nà Geren n tsɛɛ̀ sɛr'là ɲɔn gbà nìi doùn, tɔ̀ gbàà ni min ?" 15Tɔ̀un, à nà gbà blà sɔn kpadè ye ra sangasoò tsɛ, gè rèè sapɛ ni nìi doùn, à mà yè bà byɛ̀n tsùuŋnà. Ye Geren n tsɛɛ̀ sɛrɛ ɲwɛyn goo jaa bo mùn ne tɔ̀ gbàà doùn.» 16Kàràndzin neè yè bo tɔ̀un, yè dɔ̀n be wɔ̀ɔ̀ doùn. È bèu wɔ y'à jà, a ci à y'à dèu è ra nìi tsuru. Tɔ̀un, yè Geren n tsɛɛ̀ sɛrɛ ɲwɛyn goo jaa bo.

Yesù dziun min niì ci kàràndzin neè soo nà wò jàànfa

(Matsiyù 26.20-25; Lukì 22.14; Yùxanà 13.21-30)

17Àwà, bwèè nàu dò min niì, Yesù ko e re kàràndzin teeŋ fiɛ̀ yè bè. 18#Zab 41.10.È ni ɲwɛɛ̀n nà waatsi riì bwèy, Yesù yè dzin ci: «Sààben na, mun nì ci e ra, mòò sɔn nà mun jàànfa ye ɲan. À sa ni ɲwɛɛ̀n nà mun ka.» 19È taama yè ŋununbe, yè maa, yè teè faa soo soo ci: «À mun nì gbɛ ?» 20Yesù ci è ra ci: «À ye mòkun teeŋ fii rèe sɔn ni, nìi sɔn yeè e si wɔɔ mun ka ɲwɛyn geè doùn. 21Adamà dziàn kpɛ̀yn nà san a ci à sɛbɛɔ̀n à re goò tsɛ nìi tsuru. Ŋà mòò riì nà bà à jàànfaà saabu, tɔ̀ tsìfa raà barau. À mà bà na kereu fyeu, tɔ̀ na fyan à mà.»

Yesù nìi ka jaa kpadey fau ci tɔ wò gɔɔ̀n ko wò tsìɛn

(Matsiyù 26.26-30; Lukì 22.15-20; Korɛntsika reè1 11.23-25)

22Àwà, è ni ɲwɛɛ̀n nà, Yesù yè buru sen, è baraka sìn Ŋaablà ra, à y'à tara tara, à y'à sìn è ra, è dzin ci: «Y'a tsi ɲɔn, à mun gɔɔ̀n rìì.» 23Tà shɔ̀ùn, è yukuun ko e doùn mììnge sen. À re tswɛ̀y siunmaà shɔ̀ùn Ŋaablà ra, à y'à sìn è ra, è sapɛ y'a sɔn min. 24#Jdk 24.8; Ykk 31.31-34.È dzin è ra ci: «Àwà, à mun tsìɛn nì, Ŋaablà ka dzyèèsìbee tsìɛn, nìi koon mòò giri kamà. 25Sààben na, mun nì ci e ra, nèe shɔ̀ùn, mun fa nèe ɛ̀rɛ̀nzhɛ̀ndzian yu mìn dɛ fyeu, fɔ jisee riì, mun nà à yeo mìn Ŋaablà re Màsà gane rɔn.» 26Tà shɔ̀ùn yè Ŋaabla makiri ye rèè cèè, yè bo yè dɔ̀n be oliviku rèè jèèn rà.

Yesù ci Piyɛrì nà dzin min niì ci wò na wò tɔ̀ waa

(Matsiyù 26.31-35; Lukì 22.31-34; Yùxanà 13.36-38)

27 # Jkk 13.7. Àwà, Yesù yè dzin kàràndzin neè rà ci: «Ye sapɛ nà vwɛ̀yn ye yè mun to, kàtsu à sɛbɛɔ̀n Ŋaablà re Goomaa doùn ci: "Mun nà sàà kplàtsuubaà vu, sàà rèè sapɛ to nà jee."» 28#Mat 28.16.Yesù yè dzin kɔn ci: «Min na sèè kpunan bo saàn ɲàn waatsi riì bwèy, mun nà bè ye shù Galile mar'lɔùn.» 29Piyɛrì yè dzin à ra ci: «Tɔ̀ to kɛ̀nsɛɛn ye ba è sapɛ mɛɛ̀ saabu, tɔ̀ fa mun tàrà byɛ.» 30Yesù yè dzin à ra ci: «Sààben na, mun nì ci a ra, she fen nèe ɲan ko e sa, sani tsɛ̀keen yè ben jaa fii fa, wo nà bà à dè jaa zhììgi faɔ̀ nòn, ci wo na mun tɔ̀ waa.» 31Ŋà Piyɛrì yè e dzu xɔbe, è dzin kɔn ci: «Mun kɛ̀nsɛɛn ye ba saàn wo ka rìì, mun fa dzin ci mun na wo tɔ̀ byɛ.» Dzyee rèè sapɛ sa yeè tɔ̀ soo dè.

Yesù bèu Ŋaablà mafyɛ̀n min niì

(Matsiyù 26.36-46; Lukì 22.39-46)

32Tà shɔ̀ùn, yè dɔ̀n be gàne sɔn ɲan, nìi kir'là Gɛtsisemanin. È bèu wɔ mɔn, Yesù yè dzin kàràndzin neè rà ci: «Ye e tsuù mìin, min bè Ŋaablà mafyɛ̀n na.» 33Tɔ̀un, è Piyɛrì, ko Yàkubà, ko Yùxanà kiri bà e tɛy. À akir'là yè maa è gbiimaan, à duungoo yeè bà doò. 34È dzin è ra ci: «Taamaŋununbeè ni a ci à nà mun vu. Ye to tsùù e jaa ra mìin, e maà cìi waa.» 35È kpɛrɛ̀ bè jɔun dɛyn tɔ̀un, è kunun gban, è Ŋaablà mafyɛ̀n, byɛnbe waatsi ree dàn ye ba dzia gbànbe wò ra. 36À ci: «Mun Fàà, wo dzi ni goo sapɛ ra. Nèe byɛnbe ree dàn gbànbe n na. Ŋà mun naa sàɔ mà fa dɛ, wo raà rìì yè fa.» 37Tà shɔ̀ùn, è kpɛyn sèè, è nà à jà è ciɛ̀. È dzin Piyɛr'là ci: «Shimɔ̀n, wo ciɛ̀ rìì ɔ̀ ? Wo na dzi fààn tarà w'e to a jaa ra waatsi soo basɔùn doùn ɔ̀n ? 38Ye to e jaa ra, ye Ŋaablà mafyɛ̀n, dzuunbwey mà nà e tarà waa. Mòdzin gè niì, ŋɛ̀nɛ̀ɲan wuu ni à ɲan, ŋà à ŋɔ̀n nì fyɛn.» 39Tà shɔ̀ùn è ma bo è ra kɔn, è bè Ŋaablà mafyɛ̀n, è twɛy gooma soo reè sèè dè. 40È kpɛyn sèè nau è kpà kɔn, è nà à jà è ciɛ̀. È ɲɛn à tsɛ, ciɛ̀ na ni è ra fɔ è bè geren. È nà nìi dè à ra, è naà tɔ̀ tɔ̀ waa. 41À nàu e kpɛyn sèè na e jaa zhiigiraa ɲàn tà shɔ̀ùn, è dzin è ra ci: «Ye ciɛ̀ rìì ŋe ye yè bà e ɲanwɔrà ɔ̀ ? À wù tɔ̀ tsuru. Waatsia wɔu. À yɛ nèe, Adamà dziàn wɔu gooɲaan fa reè suun. 42Ye fù m'a wa. Mun jàànfabaà yɛ e kpɛrɛɔ̀.»

È Yesù kuun min niì

(Matsiyù 26.47-56; Lukì 22.47-53; Yùxanà 18.2-12)

43Àyìwà, è Yesù dzii to tɔ̀ goomaa nà ŋe, nìi Yudasì, kàràndzin teeŋ fii rèè sɔn, tɔ̀ yeè nà e kungɔ bo ko jàma ka, kaa faa kaamunun ì, ko kɔn ì yè bà ni twɛy suun. Saaka Jɔundzin neè, ko Sàrìyà Kaamoo reè, ko bɔɔ rèè rìì na è kaɔ. 44Yudasì, Yesù jàànfabaà, tɔ̀ na tàànmàshɛn kpadeò Yesù kunbaa rèè rà nòn. À na dziɔn è ra ci: «E ye na à jà mun mòò riì tswàu dzunwɛynsi tswaù'n kur'la, à wò rii. Y'a kun bè, y'a kààwɔu'n kuru wube.» 45Àwà, Yudasì nàu dzi min niì, è kpɛrɛ̀ Yesù rà suu, è dzin ci: «Kàrànfaà !» È siin à y'à tswà a ci e dzunwɛynsi. 46Tɔ̀un, y'à kun. 47Nìì reè ni Yesù ka, twɛy mòò sɔn yè e raa kaamun'nà shɔ̀, è Saaka Jɔundzin blaa raa jòn kpir'là toro sɔɔ̀n sen bo mɔn caù. 48Yesù yè dzin è ra tɔ̀un ci: «Feera ye yè bà naɔ̀ mun kun kaamunun ì ko kɔn ì ka, a ci mun gookoronfabaa rìì ? 49#Luk 19.47; 21.37.Mun naà ni siì saa see Ŋaablà re gbà blàa fɔɔn doùn ye fi, min mòdzian kàr'na ɔn ? Feera ye na mun kun tà bwèy ? Àwà, nèe sapɛ fau nì, sànko nìi deò Ŋaablà re Goomaa doùn, tɔ̀ yeè bo e shi tsɛ.» 50Tɔ̀un, kàràndzin neè sapɛ yeè vwɛ̀yn y'à to. 51Àwà, dzunwɛyn sɔn na gbaɔn Yesù kpɛyn, tɔ bringan basɔùn miniunà e ra. Yè tɔ̀ sa kun. 52Ŋà y'à kuun min niì, è bringaan fùùru to è suun, è vwɛ̀yn geren e maxɔ ra.

È dziun Yesù yè vu min niì

(Matsiyù 26.57-68; Lukì 22.54-55; 22.63-71; Yùxanà 18.12-14; 18.19-24)

53Tɔ̀un, yè bè Yesù ka Saaka Jɔundzin blaa rè gàne rɔ̀n. Saaka Jɔundzin neè, ko bɔɔ rèè, ko Sàrìyà Kaamoo reè sapɛ yeè e si ladzyeè mɔn. 54Piyɛrì yè to jeenà, è kɔ̀rɔ̀ùn jìì beè, fɔ yè bè dɔ̀n Saaka Jɔundzin blaa rè fɔɔn doùn. Piyɛrì dɔ̀un, è tsuù gànè kplàtsuu reè ka, è sàà mà gɔ̀r'la. 55Saaka Jɔundzin neè, ko kitsi kunun kuru blàa mòdzian sapɛ na gooma ì nì gaa, è nà dzi nìi bà kùn yè kitsi mɛɛy Yesù tsɛ, y'à vu. Ŋà è na kùn gaa gbaɔ̀. 56Àwà mòò giri yè fù yè doò ì wɔ à ra, è pɛn ne gooma to naà tsiɔ waa. 57Swey yè nà fù yè doò ì wɔ à ra, nìi doùn è ci: 58#Yux 2.19.«Ɲe y'à myɛ̀un à dzu, ci Ŋaablà re gbà blà riì yɛ nèe, mòdzin ì yè bà e si ka à jiɔ̀, wo nà à ci, wò y'a sèè ji bwèy zhììgi doùn, nìi fa bà mòdzin ì rè si ka jiuma waa.»

59Arì tɔ̀ goomaa doùn, twɛy pɛn ne gooma naà tsiɔ kɔn waa. 60Tɔ̀un, Saaka Jɔundzin blaa yè fù è tsiì jàmaà fi, è Yesù tey ci: «È yɛ nìi sapɛ deè wo re goò ɲàn, pɛn na ni wo re dèràma ɔn ?» 61Ŋà Yesù yè e mɛnshɛ̀n, à na gèsɔn pɛn latsi. Saaka Jɔundzin blaa yè sèè à y'à tey kɔn ci: «Wo rìì Ŋaablà Jaara Modzìnà ɔ̀n ? Dzwɛɛ̀ tsìfa Ŋaablà Dzin kpir'la kɛ̀ ?» 62#Dkk 7.13.Yesù yè dzin tɔ̀un ci: «À mun nì. Ye nà Adamà dziàn tsùuŋma jà Dzitsi Ŋaablà sirama si jaa rè, tà ko y'a nàkɔɔn ja è bo jìrànxɔ rɔ̀n mun'na tsɛ.» 63Tɔ dèu min niì, è dɔ̀n Saaka Jɔundzin blaa kpɛyn fɔ è bè geren, è re vya rèè vyɛ̀, è dzin ci: «Shɛɛrɛ ì gaa kun fèe kɔn ? 64#Sak 24.16.À Ŋaablà tsoo bara goòmà nìi dèu, ye sa y'a myɛ̀un. Y'a jàa dzùrù ?» È sapɛ ci à wù è vu. 65Tɔ̀un, swey yè e maa yè dzweeyuà fyɛɛ̀ à tsɛ, y'à jaà shìa, y'à baan sikuɔ ka, yè dziàn à ra ci: «Tsì rii wo baun ? Kɛɛrabee fa, a dè mùn na.» Gànè kplàtsuu reè sa y'a dɔr'là e taàkuùn.

Piyɛrì yè e sɔswɛrɔun min niì ci wò na Yesù tɔ̀ waa

(Matsiyù 26.69-75; Lukì 22.56-62; Yùxanà 18.15-18; 18.25-27)

66Àwà, è Piyɛrì to fɔɔn doùn, Saaka Jɔundzin blaa rè faagoofadzin taan rèè soo yeè nà. 67À Piyɛrì jàu min niì è ma gɔ̀r'la, à y'à siin to, è dzin ci: «Wo sa na ni Nazarɛtsika kpiri Yesù ka.» 68Piyɛrì yè e sɔswɛy ci: «Mun na à tɔ̀ wo nìi dèe dɛ. Mun na à dzin seòn dɛ.» Tà shɔ̀ùn, Piyɛrì yè bo bè fɔɔn dɔ̀nmàdziɛ rà. [Tɔ̀un tsɛ̀ken sɔn yeè ben]. 69Faagoofadzin taàn y'à jàu mɔn kɔn, nìì reè na ni mɔn, è maa, è dziàn twɛy rà e shɔùn, ci nèe sa yeè è sɔn ni. 70Piyɛrì yè e sɔswɛy kɔn. Dɛ̀ɛnin tà shɔ̀ùn, nìì reè ni mɔn, twɛy yè dzin Piyɛr'là ci: «Sààben na, wo sa yeè è sɔn ni kàtsu wo Galile mar'la mòdzin ni.» 71Tɔ dèu min niì, Piyɛrì yè e kɛɛ̀y fɔ è dzii ɲaan kere e yɛr'la. È dzin ci: «Ye nèe kpir'liì goo dèe nèe, mun na à tɔ̀ waa.» 72Tɔ̀ nɔ̀nkɔɔrɔn ko e sa, tsɛ̀ken sɔn yeè ben kɔn, tɔ̀ y'a jaa fiiraa. Tɔ̀ faumaà, Yesù gooma niì dèu Piyɛr'là, à taa yeè to tɔ̀ re, nìi yɛ ci: «Sani tsɛ̀keen yè ben jaa fii fa, wo nà bà à dè jaa zhììgi faɔ̀ ci wo na mun tɔ̀ waa.» Tɔ̀un, Piyɛrì yè e maa è gɛɛ.

Currently Selected:

Marikì 14: BDZU

Highlight

Copy