Mateo 18

¿Ko si o mai baro ande charoina e milosoki?

(Mk 9.33-37; Lk 9.46-48)

1Isto ande gua vreme e disipulura avile pasa o Jesus ta puche le:

—¿Ko si o mai baro ande charoina e milosoki?#Lk 22.24.

2Ondaka o Jesus ikkarda iekke minone ta ttodale po maskaral lendar 3ta ppenda:

—Chachimaia ppenau tumenge, kai te na pparrudola tumaro zivoto ta te na cherdona sargo minone, ni ka den ande charoina e milosoki.#Mt 19.13-14; Mk 10.15; Lk 18.17. 4Soke e mai bare ande charoina e milosoki si gola llene kai cherdon sargo gava minono kai si prosto. 5A vareko te lela ande mo anau iekke minone sargo gale, man lel.

E dar te pere ando bilachipe

(Mk 9.42-48; Lk 17.1-2)

6“A vareko te cherela te perel ando bilachipe iek katar gala minone kai pachan ande ma, mai sukar avela leke te chuden le chak telal katar e mora ppanglo e korratar pe iek baro barr. 7Tesko e suetoke pala e but ezgode kai inllaren e llenen te peren a gala ezgode morabi te aven, ¡a tesko goleke kai anel gala ezgode ta cherel averen te peren ando bilachipe!

8“Goleke cho va o cho porrno te cheren tut te pere ando bilachipe, chinlen ta chudelen tutar: Mai lache si te de ando zivoto chinde porrneko o chinde vasteko, neko te ave e duie vastenchar ta e duie porrnenchar ta te ave chudino ande iag ostade. 9A chi iak te cherel tut te pere ando bilachipe, ikanla ta chudela dur tutar; soke mai lache si te de iekke akkaia ando zivoto, neko che duie akkenchar te ave chudino ande iag ostade.

E paramichi katar o bakro jasardo

(Lk 15.3-7)

10“Dikken te na den e zea gale minonen kai pachan ande ma, soke me ppenau tumenge kai ando miloso lenge suechura suako llive dikken o mui me Dadeko kai si ando miloso, 11soke o Chavo e manuseko avilo te braduil so jasailoa.

12“¿A so ppenen tumen? Iek manus te avelale stotina bakre ta te jasaol leke iek lendar ¿ni mukel e iniavardes ta inia ta llal pe burdura te rodel gole bakre kai jasailo? 13Ta te malavela le, ka veselilpe mai but katar gua bakro neko katar e iniavardes ta inia bakre kai ni jasaile. 14Isto gia si e volia tumare Dadeki kai si ando miloso kai ni kamel te jasaol ni iek katar gala minone.

Sar morabi te prosti

(Lk 17.3)

15“Goleke, cho pplal te cherela chuke varesavo bilachipe, lla tu lete ta cher le te llanel kai cherda o bilachipe; a te asunda tut, dobisardan che pplale.#Lv 19.17. 16A te na asunda tut, le tuia iekke o duie llenen te asunen e orba.#Dt 19.15; 1 Ti 5.19. 17A te na asunela gale llenen, ppen le e kkanllirake; a te na asunela e kkanllira, dikkle sargo iek lleno kai ni pachal ando Del o sargo iek publikano.

18“Chachimaia ppenau tumenge kai sa so ppandena pe ppuv ka avel ppanglo ando miloso; ta sa so putarena pe ppuv ka avel putardo ando miloso.#Mt 16.19; Jn 20.23.

19“Pale ppenau tumenge kai dui llene tumendar te ttovenape ande iek mislo te mangen varesavi ezgoda ando molipe kate pe ppuv, mo Dad kai si ando miloso ka del la tumenge, 20soke kote kai si dui o trin llene chidine ande mo anau, kote sem me maskar lende.”

21Ondaka avilo pasa le o Pedro ta ppenda leke:

—Gazda, ¿Pe gachin droma morabi te prostiu me pplale kai cherda mange varesavo bilachipe? ¿Llik kai efta droma?

22O Jesus ppenda leke:

—Ni ppenau chuke llik kai efta; so ppenau chuke si llik kai eftavardes droma efta.

E paramichi katar o esluga kai ni kamela te prostil

23“Soke e charoina e milosoki si sargo iek charo kai mangla te lachardol pe eslugenchar te sai llanel pe gachin faidava achela le. 24Kana ttodape pe gaia buchi, ande lete iekke esluga kai saia leke unllile des milie talentura. 25Gava esluga sar ni saia le love te pochinel, o charo ppenda te bichinen gole llene ta i leke romia ta i leke chaurre ta sa so saia le, te sai pochinel sa so saia unllile. 26Ondaka gua esluga, ttodo changenchar molilape leke gia: ‘Te avel chuke zalba mandar ta ka pochinau chuke sa.’ 27Ondaka o gazda katar gua esluga avila leke zao, ta prostisarda leke sa so saia leke unllile.

28“A kana likisto gua esluga, maladilo avere eslugaia kai saia leke unllile stotina denariura; ta istarda le ta ppenda leke gia: ‘¡Pochin mange so san mange unllile.!’ 29Ondaka o gua esluga dia changa angla le ta ppenda leke gia: ‘Te avel chuke zalba mandar ta ka pochinau chuke sa.’ 30A vou ni kamla, ta ppangla le ande rubie te achel kote lligo ni ka pochinel sa so saia leke unllile. 31Kana ogola esluga dikkle so cherela, tristosaile but, ta llele ta ppende sa pe gazdake. 32Ondaka o charo ikkarda gole esluga ta ppenda leke: ‘¡Esluga bilacho! ¿Ni prostisardem tut sa so sana mange unllile kana molisailan mange? 33¿Ni saia te avel i chuke zao katar o gua esluga gia sar avila mange zao tutar?’ 34Ondaka o charo jolailo pe gachin kai ppenda te ppanden le ande rubie lligo ni ka pochinel sa so saia leke unllile.”

35Isto gia mo Dad kai si ando miloso ka cherel tumenchar te na prostina e pplal iek avere sa tumare liea o bilachipe kai cheren.#Mt 6.14-15.

Currently Selected:

Mateo 18: ROM07

Highlight

Copy