Mateo 28
28
O Devel krell o Yezouses i moulendar djides
1O Debleskro dives djas trouyel. O vavar dives, taysarlake, har o kham pre djala, djas i Maria Magdalena, oun koy vavar Maria pash o moulengro kheer. 2Ap yek kopo vas i phoub zoreles trisslemen. Oun o Debleskro bolepaskro vas dran o bolepen, čivas ko baro bar glan o moulengro kheer ap i rig, oun beshas pes koy pre. 3Leskro mouy rhačas har i zoreli momeli. Oun leskro ripen his parno har i gib. 4Kol lourde, kay kote yak dan, tapran savi daar, te peran le ap i phoub, oun ačan kote čiddo, har te vans le moulo.
5Oun o bolepaskro penas ap kol djouvyende: “Ma darenn! Me djinau, te rodenn t'mer o Yezouses, kay ap o troushel dino vas. 6Yob hi gar kate. O Devel kras les i moulendar djido, yaake har yob penas. Avenn oun dikenn, kay yob čiddo his! 7Djan sik pash leskre malende oun penenn lenge: O Devel kras les djido! Shounenn, yob djal glan t'mende an o them Galilea. Oun kote dikenn t'mer les pale. Ma bistrenn, hoy me t'menge penom!”
8Oun yon djan sik krik. Lengro dji his pherdo daar oun barht. Oun yon nashan, te penenn le o Yezouseskre malenge kova lauter. 9Ap o drom vas o Yezous pash lende oun penas: “Lačo dives!”
Oun yon djan pash leste, peran glan leste tele, oun tapran leskre pire.
10Koy penas o Yezous ap lende: “Ma darenn! Djan pash mire phralende oun penenn lenge, te djan le an o them Galilea! Oun kote dikenn le man pale.”
I lourdengro rhorhepen
11Har i djouvya ap o drom his, djan ninna kol lourdendar, kay ap o moulengro kheer yak dan, an o foro. Oun kolla penan i bare rashayenge lauter, hoy koy djas. 12Oun i bare rashaya dan i biboldengre phoureden khetne gole, oun kran lentsa vin, te denn le kol lourden boud love. 13Oun yon penan ap kol lourdende: “Penenn i menshenge: Leskre mala čoran les an i rat, har mer sovam. 14O themeskro ray, te shounell lo kova, palle penah mer leske, te anan t'mer an ko koova kek doosh ap t'mende. Yaake hounte trashenn t'mer gar lestar.”
15Oun kol lourde lan kol love, oun kran kova yaake, har i pralstoune lenge penan. Oun ko rakepen djal gomme kava dives mashkral i biboldende trouyel.
Penenn i menshenge mire laba!
16O Yezouseskre deesh-te-yek mala djan an o them Galilea, ap koy berga, kay o Yezous penas, te venn le kote. 17Oun har yon les dikan kote tardo, peran le glan leste tele, ninna te patsan gar lauter, te hi yob čačepah o Yezous.
18Oun o Yezous djas pash lende oun penas ap lende: “O baro Devel das man i zoor pral o bolepen oun pral i phoub. 19Doleske djan pash i menshende an hake themma, oun penenn lenge mire laba, te patsenn le ap mande! Taufrenn len ap o lab o dadestar, o čavestar oun o Debleskro Dourho! 20Penenn lenge, te rikrenn le ap lauter, hoy me t'menge penom! Čačepah, me hom pash t'mende hako dives yaake rah, har i phoub koy hi.”
Currently Selected:
Mateo 28: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Mateo 28
28
O Devel krell o Yezouses i moulendar djides
1O Debleskro dives djas trouyel. O vavar dives, taysarlake, har o kham pre djala, djas i Maria Magdalena, oun koy vavar Maria pash o moulengro kheer. 2Ap yek kopo vas i phoub zoreles trisslemen. Oun o Debleskro bolepaskro vas dran o bolepen, čivas ko baro bar glan o moulengro kheer ap i rig, oun beshas pes koy pre. 3Leskro mouy rhačas har i zoreli momeli. Oun leskro ripen his parno har i gib. 4Kol lourde, kay kote yak dan, tapran savi daar, te peran le ap i phoub, oun ačan kote čiddo, har te vans le moulo.
5Oun o bolepaskro penas ap kol djouvyende: “Ma darenn! Me djinau, te rodenn t'mer o Yezouses, kay ap o troushel dino vas. 6Yob hi gar kate. O Devel kras les i moulendar djido, yaake har yob penas. Avenn oun dikenn, kay yob čiddo his! 7Djan sik pash leskre malende oun penenn lenge: O Devel kras les djido! Shounenn, yob djal glan t'mende an o them Galilea. Oun kote dikenn t'mer les pale. Ma bistrenn, hoy me t'menge penom!”
8Oun yon djan sik krik. Lengro dji his pherdo daar oun barht. Oun yon nashan, te penenn le o Yezouseskre malenge kova lauter. 9Ap o drom vas o Yezous pash lende oun penas: “Lačo dives!”
Oun yon djan pash leste, peran glan leste tele, oun tapran leskre pire.
10Koy penas o Yezous ap lende: “Ma darenn! Djan pash mire phralende oun penenn lenge, te djan le an o them Galilea! Oun kote dikenn le man pale.”
I lourdengro rhorhepen
11Har i djouvya ap o drom his, djan ninna kol lourdendar, kay ap o moulengro kheer yak dan, an o foro. Oun kolla penan i bare rashayenge lauter, hoy koy djas. 12Oun i bare rashaya dan i biboldengre phoureden khetne gole, oun kran lentsa vin, te denn le kol lourden boud love. 13Oun yon penan ap kol lourdende: “Penenn i menshenge: Leskre mala čoran les an i rat, har mer sovam. 14O themeskro ray, te shounell lo kova, palle penah mer leske, te anan t'mer an ko koova kek doosh ap t'mende. Yaake hounte trashenn t'mer gar lestar.”
15Oun kol lourde lan kol love, oun kran kova yaake, har i pralstoune lenge penan. Oun ko rakepen djal gomme kava dives mashkral i biboldende trouyel.
Penenn i menshenge mire laba!
16O Yezouseskre deesh-te-yek mala djan an o them Galilea, ap koy berga, kay o Yezous penas, te venn le kote. 17Oun har yon les dikan kote tardo, peran le glan leste tele, ninna te patsan gar lauter, te hi yob čačepah o Yezous.
18Oun o Yezous djas pash lende oun penas ap lende: “O baro Devel das man i zoor pral o bolepen oun pral i phoub. 19Doleske djan pash i menshende an hake themma, oun penenn lenge mire laba, te patsenn le ap mande! Taufrenn len ap o lab o dadestar, o čavestar oun o Debleskro Dourho! 20Penenn lenge, te rikrenn le ap lauter, hoy me t'menge penom! Čačepah, me hom pash t'mende hako dives yaake rah, har i phoub koy hi.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.