Marko 6
6
An o foro Nazaret
1O Yezous djas dran ko foro vin oun vas an peskro dadeskro foro. Oun leskre mala djan leha.
2Ap o Debleskro dives djas lo an i biboldengri kangri oun sikras i menshende o Debleskro drom. Oun boud menshe, kay shounan les, kran bare yaka pral kova, hoy yob penas. Yon penan: “Koon penas leske kova lauter? Koon das les savo gosvepen? Kay vell leskri bari zoor, te nay krell lo savo baro koova?”
3“Hi kova gar ko morsh, kay boudrell i kashtentsa? Hi leskri day gar i Maria? Hi leskre phrala gar o Yakobo, o Yosef, o Simon, oun o Youdas? Oun ninna leskre phenya djivenn pash mende.” Oun yon rhoyran pen pral leste. 4O Yezous penas ap lende: “Kek Debleskro rakepaskro vell kote sharedo, kay yob khere hi, vitar gar pash peskre menshende oun an peskro kheer. An i vavar forya oun gaba vell lo sharedo.”
5Oun kote nashte kras yob kek baro koova an o Debleskri zoor, kokres i nasslenge čivas yob i vasta pre oun kras len sasto, oun kolla his gar boud nassele. 6Oun yob nay hayvas gar, hoske i menshen kote kek patsepen his. Palle djas lo an kol gaba trouyel, oun sikras i menshende o Debleskro drom.
O Yezous bičrell peskre malen pash i menshende
7O Yezous das kol deesh-te-douyen pash peste gole, te bičrell lo len vin, douy te douy. Yob das len i zoor pral i benga, te nay tradenn le len i menshendar vin. 8-9Oun yob penas lenge zoreles: “Lenn či t'mentsa ap o drom, kokres i kasht oun kirrha. Lenn kek maro, kek possita, kek love, vitar gar i douyto gad!” 10Oun yob penas ap lende: “Kote, kay t'mer an i kheer dren djana, kote ačenn yaake rah har ačenn an ko foro. 11Kote, kay lenn le t'men gar an pengro kheer dren, oun kamenn gar ap t'mende te shounell, kote djan doureder, oun denn koy čik t'mare pirendar tele! Kova sikrell kol menshende, kay yon čilačo hi.”
12Oun kol deesh-te-douy djan trouyel, oun penan i menshenge: “Moukenn t'maro čilačo drom, oun djan ap o Debleskro drom!” 13Oun yon tradan boud bengen i menshendar vin, oun makan boud nasselen o djeteha dren, oun kran len sasto.
Hoske o Yohanni maredo vas
14Ninna o baro ray, o Herodes, shounas o Yezousestar. An o tselo them rakran le lestar. I menshe penan: “O Yohanni, kova, kay i menshen taufras, stas i moulendar pre. Doleske hi les i zoor, te krell lo savo baro koova.” 15Vavar penan: “Kova hi o Eliya.” Oun pale vavar penan: “Kova hi i Debleskro rakepaskro har kol vavar Debleskre rakepangre.” 16Har kova o Herodes shounas, penas lo: “Kova hi o Yohanni, kay moukom leske o shero tele te dell. Kova stas i moulendar pre.”
17-18Kova vas yaake: Glan ko tsiro las o Herodes koy romyat peskro phralestar Filip. Lakro lab his Herodia. Oun o Yohanni penas leske: “Kova hi gar mishto, kay tou lal tiro phraleskri romyat.” Har o Herodes kova shounas, penas lo ap peskre lourdende, te taprenn le o Yohanni, oun te vitsrenn le les an o stilepen. 19Oun i Herodia his rhoyedo ap o Yohanneste oun kamas les te marell, oun yoy kras les nashte gar. 20O Herodes trashas o Yohannestar. Yob djinas, kay o Yohanni i Debleskro morsh hi, kay djas o čačo drom. Doleske das lo garda ap leste oun rikras les an o stilepen. Yob kamas o Yohanneskro rakepen. Hako kopo, kay yob les shounas, djinas lo bouder gar, hoy te krell lo oun te penell lo.
21Koy vas i dives, kay hi mishto i Herodiake. O Herodes vas i bersh phoureder oun moukas i baro rhapen te krell. Pash ko rhapen van i pralstoune pral peskro them, ninna i pralstoune lourde. Oun i bravele dran o them Galilea his ninna koy.
22Koy vas i Herodiakri čay pash lende oun khelas glan lende. Lakro khelepen his shoukar an i yaka o rayestar Herodes oun an i yaka kolendar, kay pash leste beshdo hi oun rhan. Koy penas o Herodes ap koy čate: “Tou nay mangeh mandar, hoy tou kameh. Me dau kova toute!” 23Oun yob das pes sovel: “Hoy tou mandar ninna mangeh, kova dau tout, ninna te mangeh mandar o paash miro themestar oun bravlepen.”
24Oun koy čay djas vin pash peskri date, oun poučas latar: “Hoy mangap lestar?”
Koya penas: “O shero o Yohannestar, kova kay taufras i menshen.”
25Koy djas li sik dren pash o Herodeste, oun mangas lestar: “Me kamau, te dess man kanna ap i čaro o shero o Yohannestar, kova, kay taufras i menshen.”
26Har o Herodes kova shounas, doukas leskro dji. Ninna te khaytas les kova, kamas lo peskro lab te rikrell, hoy yob glan kolende das, kay pash leste troul i rhapaskri beshdo his oun shounan, har yob pes sovel das. 27Doleske bičras lo i lourdes pash o Yohanneste, te dell lo leskro shero tele. Kova djas an o stilepen, oun das leske o shero tele, 28hidjras ko shero ap i čaro, oun das les kol čate. Oun koy čay das les peskri date.
29Oun har shounan o Yohanneskre mala kova, van le, lan o moules lentsa, oun paskran les.
O Yezous dell panč zerya menshen te rhal
30Oun kol deesh-te-douy, kay o Yezous pash i menshende bičras, kolla van pale, oun penan o Yezouseske lauter, hoy yon kran oun penan. 31Kote his yaake boud menshe, kay van oun djan, te his len kek tsiro, te rhan le. Oun yob penas ap lende: “Avenn, djas kote, kay kokres ham, te lenn t'mer nevi zoor!” 32Oun yon ouleran an o bero kote, kay yon kokres hi. 33Har kol menshe dikan, kay yon ouleran penge, nashan le dran i tsele forya kote khetne, kay o Yezous peskre malentsa djas. Oun yon his glan lende koy.
34Oun o Yezous djas dran o bero vin, oun dikas kol boud menshen. Kolla khaytan les. Yon his har bakre, kay hi len kek bakrengro, kay dell garda ap lende. Oun yob rakras lentsa i rah tsiro.
35Ap i rati van leskre mala pash leste, oun penan: “Kate, kay mer ham, della či te rhal, oun i rati vella. 36Biče kal menshen toutar, te djan le pash i harhende oun an i gaba, te ginenn le penge maro!”
37Koy penas lo ap lende: “Denn t'mer len te rhal!”
Penan le: “Kameh, te las douy-sheel roupene beme, te ginas maro oun das len te rhal?”
38Penas lo: “Kitse mare hi t'men? Djan koy oun dikenn!” Oun har yon kova djinan, penan le leske: “Panč mare oun douy mače.”
39Oun o Yezous penas lenge, te beshenn le pen lauter kate te kote an o zenlepen khetne. 40Oun yon beshan pen kate te kote khetne, yaake te his kate sheel beshdo, oun kote his paash-sheel beshdo. 41Oun yob las kol panč mare oun kol douy mače an i vasta, dikas pre ap o bolepen, parkras pes pash o Debleste, oun phagas kol mare an kotya. Palle das lo len peskre malende, te denn le kova i menshende. Oun kol douy mače das lo ninna i tsele menshende.
42Oun yon rhan lauter oun van čalo.
43Palle hadan le kol kotya pre, hoy ačan pral. Koy van deesh-te-douy marengre gone pherdo lendar. Oun yon hadan ninna kol mačendar pre, hoy pral ačan. 44Oun kolla, kay rhan kol mare, kolla his panč zerya morsha.
O Yezous djal ap o baro pani
45Oun sik pral kova tradas o Yezous peskre malen, te djan le an o bero, te oulerenn le glan leste vergel ap i vavar rig pash o foro Betsayda. Yob ačas pash i menshende, te bičrell lo len khere.
46Har yob bičras len pestar, djas lo ap i berga, te rakrell lo o Debleha. 47Ap i rati his ko bero mashkral ap o baro pani. Oun yob his ap o them kokres. 48Oun i zorelo dourho phourdas pral o baro pani, oun das ap lende. Oun yob dikas, har yon pen tele maran an o bero, te venn le pash o them. Sik taysarlake, his yaake starenge, vas lo pash lende, oun djas ap o baro pani, oun kamas langs lende te djal. 49-50Yon lauter dikan les, oun i daar tapras len. Yon patsan, kay hi yob i moulo, oun dan gole i daryatar. Sik penas lo ap lende: “Ma darenn! Me hom. Lauter hi mishto!”
51Oun yob vas pash lende an o bero, oun o zorelo dourho moukas tele. Oun lenge ačas o rakepen krik.
52Ninna te dikan le, hoy yob kol panč marentsa kras, hayvan le gar, havi zoor les hi. Lengro dji his har bar.
Boud menshe venn sasto
53Oun yon ouleran vergel pral o pani oun djan ap o them pash o foro Genezaret. 54Oun har yon dran o bero stan, prindjran les i menshe sik, 55oun nashan an o tselo them trouyel, oun hidjran kol nasselen ap i čibya kote, kay yon shounan, te hi lo. 56Oun kote, kay yob djas, an i gaba, an i forya, oun ap o them, čivan le i nasselen kote, kay i menshe khetne venna, oun mangan lestar, te moukell lo len i kotar leskro ripen an-taprell. Oun hakeno, kay ap leskro ripen tapras, vas sasto.
Currently Selected:
Marko 6: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Marko 6
6
An o foro Nazaret
1O Yezous djas dran ko foro vin oun vas an peskro dadeskro foro. Oun leskre mala djan leha.
2Ap o Debleskro dives djas lo an i biboldengri kangri oun sikras i menshende o Debleskro drom. Oun boud menshe, kay shounan les, kran bare yaka pral kova, hoy yob penas. Yon penan: “Koon penas leske kova lauter? Koon das les savo gosvepen? Kay vell leskri bari zoor, te nay krell lo savo baro koova?”
3“Hi kova gar ko morsh, kay boudrell i kashtentsa? Hi leskri day gar i Maria? Hi leskre phrala gar o Yakobo, o Yosef, o Simon, oun o Youdas? Oun ninna leskre phenya djivenn pash mende.” Oun yon rhoyran pen pral leste. 4O Yezous penas ap lende: “Kek Debleskro rakepaskro vell kote sharedo, kay yob khere hi, vitar gar pash peskre menshende oun an peskro kheer. An i vavar forya oun gaba vell lo sharedo.”
5Oun kote nashte kras yob kek baro koova an o Debleskri zoor, kokres i nasslenge čivas yob i vasta pre oun kras len sasto, oun kolla his gar boud nassele. 6Oun yob nay hayvas gar, hoske i menshen kote kek patsepen his. Palle djas lo an kol gaba trouyel, oun sikras i menshende o Debleskro drom.
O Yezous bičrell peskre malen pash i menshende
7O Yezous das kol deesh-te-douyen pash peste gole, te bičrell lo len vin, douy te douy. Yob das len i zoor pral i benga, te nay tradenn le len i menshendar vin. 8-9Oun yob penas lenge zoreles: “Lenn či t'mentsa ap o drom, kokres i kasht oun kirrha. Lenn kek maro, kek possita, kek love, vitar gar i douyto gad!” 10Oun yob penas ap lende: “Kote, kay t'mer an i kheer dren djana, kote ačenn yaake rah har ačenn an ko foro. 11Kote, kay lenn le t'men gar an pengro kheer dren, oun kamenn gar ap t'mende te shounell, kote djan doureder, oun denn koy čik t'mare pirendar tele! Kova sikrell kol menshende, kay yon čilačo hi.”
12Oun kol deesh-te-douy djan trouyel, oun penan i menshenge: “Moukenn t'maro čilačo drom, oun djan ap o Debleskro drom!” 13Oun yon tradan boud bengen i menshendar vin, oun makan boud nasselen o djeteha dren, oun kran len sasto.
Hoske o Yohanni maredo vas
14Ninna o baro ray, o Herodes, shounas o Yezousestar. An o tselo them rakran le lestar. I menshe penan: “O Yohanni, kova, kay i menshen taufras, stas i moulendar pre. Doleske hi les i zoor, te krell lo savo baro koova.” 15Vavar penan: “Kova hi o Eliya.” Oun pale vavar penan: “Kova hi i Debleskro rakepaskro har kol vavar Debleskre rakepangre.” 16Har kova o Herodes shounas, penas lo: “Kova hi o Yohanni, kay moukom leske o shero tele te dell. Kova stas i moulendar pre.”
17-18Kova vas yaake: Glan ko tsiro las o Herodes koy romyat peskro phralestar Filip. Lakro lab his Herodia. Oun o Yohanni penas leske: “Kova hi gar mishto, kay tou lal tiro phraleskri romyat.” Har o Herodes kova shounas, penas lo ap peskre lourdende, te taprenn le o Yohanni, oun te vitsrenn le les an o stilepen. 19Oun i Herodia his rhoyedo ap o Yohanneste oun kamas les te marell, oun yoy kras les nashte gar. 20O Herodes trashas o Yohannestar. Yob djinas, kay o Yohanni i Debleskro morsh hi, kay djas o čačo drom. Doleske das lo garda ap leste oun rikras les an o stilepen. Yob kamas o Yohanneskro rakepen. Hako kopo, kay yob les shounas, djinas lo bouder gar, hoy te krell lo oun te penell lo.
21Koy vas i dives, kay hi mishto i Herodiake. O Herodes vas i bersh phoureder oun moukas i baro rhapen te krell. Pash ko rhapen van i pralstoune pral peskro them, ninna i pralstoune lourde. Oun i bravele dran o them Galilea his ninna koy.
22Koy vas i Herodiakri čay pash lende oun khelas glan lende. Lakro khelepen his shoukar an i yaka o rayestar Herodes oun an i yaka kolendar, kay pash leste beshdo hi oun rhan. Koy penas o Herodes ap koy čate: “Tou nay mangeh mandar, hoy tou kameh. Me dau kova toute!” 23Oun yob das pes sovel: “Hoy tou mandar ninna mangeh, kova dau tout, ninna te mangeh mandar o paash miro themestar oun bravlepen.”
24Oun koy čay djas vin pash peskri date, oun poučas latar: “Hoy mangap lestar?”
Koya penas: “O shero o Yohannestar, kova kay taufras i menshen.”
25Koy djas li sik dren pash o Herodeste, oun mangas lestar: “Me kamau, te dess man kanna ap i čaro o shero o Yohannestar, kova, kay taufras i menshen.”
26Har o Herodes kova shounas, doukas leskro dji. Ninna te khaytas les kova, kamas lo peskro lab te rikrell, hoy yob glan kolende das, kay pash leste troul i rhapaskri beshdo his oun shounan, har yob pes sovel das. 27Doleske bičras lo i lourdes pash o Yohanneste, te dell lo leskro shero tele. Kova djas an o stilepen, oun das leske o shero tele, 28hidjras ko shero ap i čaro, oun das les kol čate. Oun koy čay das les peskri date.
29Oun har shounan o Yohanneskre mala kova, van le, lan o moules lentsa, oun paskran les.
O Yezous dell panč zerya menshen te rhal
30Oun kol deesh-te-douy, kay o Yezous pash i menshende bičras, kolla van pale, oun penan o Yezouseske lauter, hoy yon kran oun penan. 31Kote his yaake boud menshe, kay van oun djan, te his len kek tsiro, te rhan le. Oun yob penas ap lende: “Avenn, djas kote, kay kokres ham, te lenn t'mer nevi zoor!” 32Oun yon ouleran an o bero kote, kay yon kokres hi. 33Har kol menshe dikan, kay yon ouleran penge, nashan le dran i tsele forya kote khetne, kay o Yezous peskre malentsa djas. Oun yon his glan lende koy.
34Oun o Yezous djas dran o bero vin, oun dikas kol boud menshen. Kolla khaytan les. Yon his har bakre, kay hi len kek bakrengro, kay dell garda ap lende. Oun yob rakras lentsa i rah tsiro.
35Ap i rati van leskre mala pash leste, oun penan: “Kate, kay mer ham, della či te rhal, oun i rati vella. 36Biče kal menshen toutar, te djan le pash i harhende oun an i gaba, te ginenn le penge maro!”
37Koy penas lo ap lende: “Denn t'mer len te rhal!”
Penan le: “Kameh, te las douy-sheel roupene beme, te ginas maro oun das len te rhal?”
38Penas lo: “Kitse mare hi t'men? Djan koy oun dikenn!” Oun har yon kova djinan, penan le leske: “Panč mare oun douy mače.”
39Oun o Yezous penas lenge, te beshenn le pen lauter kate te kote an o zenlepen khetne. 40Oun yon beshan pen kate te kote khetne, yaake te his kate sheel beshdo, oun kote his paash-sheel beshdo. 41Oun yob las kol panč mare oun kol douy mače an i vasta, dikas pre ap o bolepen, parkras pes pash o Debleste, oun phagas kol mare an kotya. Palle das lo len peskre malende, te denn le kova i menshende. Oun kol douy mače das lo ninna i tsele menshende.
42Oun yon rhan lauter oun van čalo.
43Palle hadan le kol kotya pre, hoy ačan pral. Koy van deesh-te-douy marengre gone pherdo lendar. Oun yon hadan ninna kol mačendar pre, hoy pral ačan. 44Oun kolla, kay rhan kol mare, kolla his panč zerya morsha.
O Yezous djal ap o baro pani
45Oun sik pral kova tradas o Yezous peskre malen, te djan le an o bero, te oulerenn le glan leste vergel ap i vavar rig pash o foro Betsayda. Yob ačas pash i menshende, te bičrell lo len khere.
46Har yob bičras len pestar, djas lo ap i berga, te rakrell lo o Debleha. 47Ap i rati his ko bero mashkral ap o baro pani. Oun yob his ap o them kokres. 48Oun i zorelo dourho phourdas pral o baro pani, oun das ap lende. Oun yob dikas, har yon pen tele maran an o bero, te venn le pash o them. Sik taysarlake, his yaake starenge, vas lo pash lende, oun djas ap o baro pani, oun kamas langs lende te djal. 49-50Yon lauter dikan les, oun i daar tapras len. Yon patsan, kay hi yob i moulo, oun dan gole i daryatar. Sik penas lo ap lende: “Ma darenn! Me hom. Lauter hi mishto!”
51Oun yob vas pash lende an o bero, oun o zorelo dourho moukas tele. Oun lenge ačas o rakepen krik.
52Ninna te dikan le, hoy yob kol panč marentsa kras, hayvan le gar, havi zoor les hi. Lengro dji his har bar.
Boud menshe venn sasto
53Oun yon ouleran vergel pral o pani oun djan ap o them pash o foro Genezaret. 54Oun har yon dran o bero stan, prindjran les i menshe sik, 55oun nashan an o tselo them trouyel, oun hidjran kol nasselen ap i čibya kote, kay yon shounan, te hi lo. 56Oun kote, kay yob djas, an i gaba, an i forya, oun ap o them, čivan le i nasselen kote, kay i menshe khetne venna, oun mangan lestar, te moukell lo len i kotar leskro ripen an-taprell. Oun hakeno, kay ap leskro ripen tapras, vas sasto.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.