Yohannis 10
10
Anu mece loyna kiyo
1Yeesus lel: “Ciidot daggehi caraf xabayaako korah aki araxko orobati garceena kee barheerhatto kinam rummah, rummah sinak arhxiyuk ane. 2Carafko orobati laakin ciidot loyna kinni. 3Kayyah dhawrheeni akah faaka. Ciido kaa dhaw taabbe, ishi ciidoh lel migacah akah deecimah irolle yayyaace. 4Ishim inkoh yayyaace gedda, isheh afadde akko yadiye, kaa dhaw taarhigemhi sabbatah lel amaa ciido kaa katayta. 5Godobot dhaw mitaarhigemhi sabbatah lel godobottaako akko kuddankah adde mikatayta” akko yerhxe. 6Yeesus ta amol-beeh tenlih waanisho kibah, usun ayim arhxuk yinem kaa mafhaminnooni.
7Amaymih Yeesus malammih: “Anu rummah rummah amaa ciidot daggehi caraf kiyom sinak arhxiyuk ane. 8Yi basolle yemeete mari garaacen kee barheerha kinon, ciido laakin ten mabbinna. 9Anu caraf kiyo. Akkinnanti yottaako orobemko, gargeerimo kee orobo kee yawco, amaye balih alle yaloolekke geyo kinni. 10Garceeni yamiitem, garaco, yagdafo kee yaylawo bisa kinni. Anu emeetem lel usun aniina yaalloona kee rakha kin aniina yaalloona ciloh kinni. 11Anu mece loyna kiyo. Mece loyni ishi aniina ishi ciidoh tillaabisha. 12Loyna akkinnixeti, casbeh yaneyaako lel amaa ciidoh wanna akkinnixeti, suula amiituk yable gedda amaa ciido xabah kuda. Amaa suula lel amaa ciido simbaacayaako faax-isha. 13Ciidot macal male, casbento kinamhi sabbatah lel kuda. 14-15Anu mece loyna kiyo. Yi abba yotta akah yaarhigeekah, anu lel yi abba akah aarhigeekah, anu innim aarhige, yim lel yi yaarhigin. Inni aniina lel ciidoh arhxuk tillaabisha. 16Ta ciidot daggeeko akkinnixe ciido yakkeedo liyo. Tena yakkeedo baaho yolle tane. Yi dhaw lel yaabboona kinon. Amaymih lel inki ciido kee inki loyna yannawna kinni. 17Anu inni aniina tillaabisha, malammih lel addabbo kiyomhi sabbatah yi abba yi kixina. 18Yi aniina yok beyati miyane, laakin anu inni farhih kinni tillaabisham. Tee tillaabisho reeza liyo, malammih tee addabbo lel reeza liyo. Ta amre yi abbaako kabbaateh aniyo” akko yerhxe.
19Malammih lel ta waanih sabbatah Yahuud fanadde sitta-waa saye. 20Tenko mango mari: “Usuk jinnetta leya, cubud kinni; aymih kaa naabbe?” yerhxin. 21Aki mari: “Tayim yimjinnine tiyahi waani maki. Jinnetti inti-maleh inti faako dhiica?” yerhxin.
Yotta kee yi Abba inketta kino
22Amaa waqhte Yerusaalemille Maqhdas carehi Ascassabti cid yekke. Xagaa lel kuuk yine. 23Yeesus lel maqhdas careeko, Suleymaan gabalalle hel-arhxuk yine. 24Amaymih lel Yahuud kaalle yekeekettiinih: “Manda fanah kinni ni shakkishsho litom? Masiix tekkemko caddoyishsheh noh warish” akko yerhxin. 25Yeesus: “Anu sinah warishe, atin laakin mitaaminiini. Anu yi Abbah migacalle aba ciyyo, yi sabbatah tashhide. 26Atin laakin yi ciidooko makitiinimhi sabbatah mitaaminiini. 27Yi ciido yi dhaw taabbe, anu lel ten aarhige, usun lel yi katattaan. 28Anu umman geedit aniina akah axaye, caduruh lel yalawna makinooni. Yi gabaako lel walaa inketti simbaaco maki. 29Tena yoh yoxoye yi Abba umman tiyaako naba. Abbat gabaako lel walaa inketti ten simbaaco mirhiica. 30Yotta kee yi Abba inketta kino” yerhxeh alle yedebbe.
31Yahuud lel kaa yagdafoona malammih dhayit yooqhocin. 32Yeesus: “Anu yi Abbaako mango mece abittot sin uybulluweh ane; tayimko awlih tiyah kinni dhayit yolle ciddoona litiinim?” yerhxeh alle yedebbe. 33Yahuud: “Mece waanih makiiki waatoh kinni dhayit kolle cidno linom, amayim lel atu xiyawto kito hanuk, ishek Yalla abtemhi sabbatah kinni” yerhxiinih alle yedebbin. 34Yeesus: “Sin sercatadde: ‘Atin yallit kitin erhxe’ yarhxiinim tunkuttubeh mitaneho? 35Tamaa Yallih waani akah tamiite marak yallit yerhxemko, Kutuub dumuso mirhiica. 36Abba yiqhiddiseyaako caalamalle fare tiyak: ‘Yallih Barha kiyo’ sinak arhxe gedda: ‘Yallah waatimak tanito’ yok tarhxiini? 37Anu inni Abbah ciyyo abak anniye wayemko, yi maamanina. 38Amayim abah ekkemko laakin, Abba yottadde, anu lel Abbadde aniyom taarhagoona kee tafhamoona ciloh, walaa yi aamine wayteenimih, amaa ciyyoh imina” yerhxeh alle yedebbe. 39Malammih kaa yabbarhoona farhen, usuk laakin ten gabaako kude.
40Tamaa erherhih Yohannis alle aythimmiqhuk yine Yordaanos waacina kin makaanolle yedeeh lel amalle defeye. 41Mango mari lel kaalle yemeetin. Usun lel: “Yohannis ishaarar maabinna, usuk ta xiyawti sabbatah yerhxem laakin inkoh rumma kinni” akko yerhxin. 42Mango mari lel kayyah yeemenin.
Currently Selected:
Yohannis 10: SCC
Highlight
Share
Copy
Want to have your highlights saved across all your devices? Sign up or sign in
©2024 Wycliffe Ethiopia
