Yohannis 9

Yeesus inti-malek yooboke xiyawto urusa

1Yeesus tillaabak yooboke maxko inti-male kin xiyawto yuble. 2Kaa katattaynit lel: “Mudarris, usuk inti-malek yoobokem zambe abtem kayya, woole kaa dhaltoyya?” yerhxiinih kaa esseren. 3Yeesus: “Yallih ciyyo kaa araxah tamballaw ciloh kiyah, zambe usuk maabinna, woole kaa dhaltoyya maabinnooni. 4Lellec kuuk yi fare tiyahi ciyyo abno nolle tane; walaa inketti ciyyo adde abo taana bar lel amiituk yane. 5Anu ta caalamalle aniyom fanah ta caalamti ifo kiyo” yerhxeh alle yedebbe. 6Tayim yerhxemko sarrah, baarholle thuf-yerhxeh thufeenaako kalla abe. Sarrah amaa xiyawtih intit amaa kallah xishiye, 7kayyak lel: “Aduwaaki, Selihoom (tee macna ‘fartotta’ kinni) raadde cakalish” akko yerhxe. Usuk lel yedeeyaako cakalisheh abluk gaxe.

8Amaa kaa xuggit kee awwalah caageena kuuk kaa yubleh yine mari: “Tati tamaa defeyeyaako caagensiitak yine tiya makiho?” arhxuk yinin. 9Gari: “Kayya kinni” yerhxin. Gari: “Maale, laakin kayyah higgida” yerhxin. Usuk yibbirhekkeeko: “Amaa xiyawti yotta kinni” arhxuk yine. 10Amaymih usun lel: “Amaydo ku intit aaginah fakkite?” akko yerhxin. 11Usuk: “Yeesus akko yarhxin xiyawti kalla abeyaako intit yoh xishiyeh: ‘Aduwaaki Selihoomudde cakalish’ yok yerhxe. Anu lel cakalishe gedda mablo geye” akko yerhxe. 12Usun: “Usuk awla yane?” akko yerhxin. Usuk lel: “Maarhige” akko yerhxe.

13Amaa awwalah inti-male kuuk yine xiyawto Faarisiinille kaa baahen. 14Kado, Yeesus kalla abeyaako kaa intit adde faakem Sambat kuuk yine. 15Amaymih amaa Faarisiin usuk aaginah mablo geyo dhiicem malammih kaa esseren. Usuk lel: “Usuk yi intitille kalla alle haye, anu lel cakalisheh abluk aniyo” akko yerhxe. 16Amaa Faarisiinko gari lel: “ Sambat mirhawrhomhi sabbatah, ta xiyawti Yallaako maki” yerhxin. Gari laakin: “Zambe le xiyawti ta gina le ishaarar aaginah abo dhiica?” yerhxin. Ten fanadde lel sitta-waa yekke. 17Amaymih amaa inti-malek malammih: “Usuk intit koh faakemhi sabbatah, atu kaa sabbatah ayim tarhxe?” akko yerhxin. Usuk: “Usuk nabii kinni” yerhxe.

18Amaa xiyawti inti-male kuuk yinem kee mablo geyem Yahuud maamaninnooni, aykee amaa mablo geye xiyawtih dhaltoyyah deecimaanah: 19“Tati tamaa inti-malek yooboke akko tarhxin sin barha kinni?” arhxuk ten esseraanandah. 20Kaa dhaltoyya: “Tati ni barha kinam kee inti-malek yoobokem naarhige. 21Kado aaginah yablem kee miyatti akah faakem laakin minaarhige. Usuk gufaa kinnik kaa essera. Isheh nabseh isheh akah waanisho dhiica” yerhxiinih alle yedebbin. 22(Kaa dhaltoyya Yahuud akah mashshiiteenim lel, Yeesus Masiix kinamah ashhidinnanya sunagoogeeko yawco kinamalle Yahuud mece geddaakoh gaba-beeteenih yiniinimhi sabbatah kinni. 23Amaymih kinni lel: “Gufaa kinnik, kaa essera” yerhxiinim).

24Amaymih lel amaa inti-male kuuk yine xiyawtoh malammit gedda akah deecimeenih: “Yallah nabne uxuu. Ta xiyawti zambi-wanna kinam naarhige” akko yerhxin. 25Usuk lel: “Zambi-wanna kinni, maki maarhige. Inki xaaja laakin aarhige, inti-male kuuk inemko, kado able” yerhxeh alle yedebbe. 26Usun: “Usuk ayim koh abe? Ku intit aaginah koh faake?” akko yerhxin. 27Usuk: “Anu awwalko sinah warisheh aniyo, atin laakin yi mabbitiini. Aymih kinni malammih akah taabboona fadhdhaanam? Atin gantah kaa katattaynit takkoona farhak taniini?” yerhxeh alle yedebbe. 28Usun lel akah waatimeenih: “Atu kaa katattayna kito, nanu laakin Moosat katattaynit kino. 29Yalli Moosaalih waanishem naarhige, ta xiyawti awlaako amiituk yanem laakin minaarhige” yerhxin. 30Amaa xiyawti: “Ubula, tayim cibra kinni! Awlaako yemeetem mitaarhigiini, usuk laakin intit yoh faake. 31Yalli zambi-wannun miyaabbem naarhige, laakin akkinnanti Yalla mashshiitah kaa farhi abatiya yekkemko, Yalli kaa yaabbe. 32Ta caalam erhedhdhemko taahe inti-malek yooboke tiyahi inti faakati caduruh yomoobbeh miyaarhige. 33Ta xiyawti Yallaako akke wayaado inkim abo dhiice mirhaarho” yerhxeh alle yedebbe. 34Usun: “Atu nabaatih zambeelih toobokeyaako, ni taydaraso?” yerhxiinih alle yedebbin. Irolle lel kaa yeyyeecin.

35Yeesus kayya irolle yeyyeeciinim yoobbeh yineyaako kaa geye gedda: “Xiyawti Barhah taamine?” akko yerhxe. 36Usuk: “Maddara, miyatto kinni amaati, akah aamanok?” yerhxeh alle yedebbe. 37Yeesus: “Kaa tubleh tanito, kottaalih waanishak yaneti lel kayya kinni” akko yerhxe. 38Usuk lel: “Maddara, aamine” yerhxeh akah yucbude. 39Yeesus: “Anu tamaa ablinnixe mari yabloona, yable mari lel intit wayoona ciloh ta caalamalle firdeh kinni emeetem” yerhxe. 40Faarisiinko gari amaa kaa agaagalle tineya tayim yoobbiinih: “Nanu gantah inti-malit kino?” akko yerhxin. 41Yeesus: “Inti malit kuuk tiniinih takkindo, zambe aalle mirhaarhitiini; kado laakin: ‘Nable’ arhxuk tanin, sin zambi lel sinlih raaca” akko yerhxe.

Currently Selected:

Yohannis 9: SCC

Highlight

Copy