Luukas 15
15
Telee ciidoh aymassal
(Maatiyos 18:12-14)
1Kado, miiri yaskattit kee zambi-wannun kayya yaabboona kaa gabolle kab-arhxuk yinin. 2Faarisiin kee sercat dhiiceenit lel: “Ta xiyawti zambi-wannun kabbaatah tenlih lel beeta” arhxuk angoroozomuk yinin. 3Amaymih ta aymassal akah warishe: 4“Awlih tiya kinni sinko, ciidooko bool yeelleyaako, amayimko inketta akko talaye gedda, telee inkettat goronuh aykee tee geyandah amaa boolsagla kee sagal zibolle xabinnixeti? 5Tee geya gedda lel xedenak dagadde tee haya. 6Careh yamiite gedda lel ishi soxoba kee ishi xuggitik: ‘Yok teleeh tine ciidotta geyeh aniyok yottaalih xedena’ akko yarhxih inkidde akah deecima. 7Amaydo, carshelle tooba farhshiishinnixe xaqqi-waanunti boolsagla kee sagal xiyawtiyaako ziyaada inki zambi-wanna yatoobeyah mango xeden yannaw kinam sinak arhxiyuk ane.
Telee fiddat tacriifah aymassal
8Hido, awlih numa kinni tamana fiddat tacriifa leyaako inkettä akko talaye gedda, faanus ifishsheyaako care fiiteh geytandah dhacumaatih wagiinnixeya? 9Geyta gedda lel: ‘Yok teleyeh tine fiddat tacriifa geyek, yottaalih xedena’ arhxuk ishi soxoba kee xuggitih inkidde akah deecimta. 10Amayim balih lel, Yallih malaykut-hi nifille yatoobe inki zambi-wannah xeden yanem sinak arhxiyuk ane”.
Yabizzire barhih aymassal
11Usuk yerhxe lel: “Wuli lamma barha le xiyawti yine. 12Cindhati lel ishi abbak: ‘Abba, ta iraarooko yi gide akko yoh xazil’ akko yerhxe. Usuk lel ishi iraaro lamma tenah xaziile. 13Dago lellecik sarrah lel amaa cindhati, luuk yinem inkoh yesketteh dherh baarho kallaaxe. Amalle lel ishi iraaro abizziruk cibdaanadde marak yine. 14Usuk ummannim yeyleyemko sarrah lel, amaa baarholle dhacuma culul yekke. Usuk lel luuk yinemko foyyak raaco erherhishe. 15Yedeeh lel xasamam zuwo ishi dhage fanah kaa dhirhiye, amaa baarhoh barhahi casbento ishek abe. 16Amaa xasamam beetan gollaf ko garba yamago lel hambereerak yine. Walaa inketti lel inkim akah maaxayinna. 17Ishi kasalle gaxe gedda lel: ‘Yi abbah casbentitko folo akko xaytaanah xabtamko ayidhdhi yane, anu laakin talle safrah rabak aniyo!’ yerhxe. 18‘Uguteyaako yi abba fanah adaw kiyo: “Abba, carsheeti didde kee ku nifille zambe abeh aniyo. 19Kamboh ku barhah decsiimam yoh meedda. Tamaa ishi casbentitko wuli tiya balih yi ubul”’ akko arhxo kiyo. 20Uguteh lel ishi abba fanah yemeete. Kaa abba, usuk dherhille mirixtah anuk kaa yubleyaako, raxmah uluc akko xarheyaako, yerdeh kaa yuxqufeh kaa fugute. 21Barhi lel: ‘Abba, carsheeti didde kee ku nifille zambe abeh aniyo. Kamboh ku barhah decsiimam yoh meedda’ akko yerhxe. 22Kaa abba laakin ishi garuuzak: ‘Iba lacteenih mece sara bahantaaki alle haya. Khaatim kaa gabadde, kabel lel kaa ibadde haya 23-24Yi barhi rabeh yinemko aniinalle gaxe, yeleeh yinemko lel geytimem hi sabbatah, kulus durutta bahteenih urxudantaaki, kata benneh nafraxoo’ akko yerhxe. Yafraxoona lel erherhishen.
25Kado, naba kaa barhi dhageeko yemeeteh careh kab-yerhxe gedda digir kee rigdo yoobbe. 26Khaddamteeko tiyah deecimeh lel akki tanem ayim kinam kaa essere. 27Usuk lel: ‘Ku sacal yemeeteh yane, ku abba lel usuk nagaa kee maaxiyoh akah gaxemhi sabbatah kulus zaraabic yurxude’ akko yerhxe. 28Usuk lel kurrayeh orobo xine. Kaa abba lel irolle alle yewceh kaa dhaacime. 29Usuk laakin ishi abballe: ‘Ubul, ta mango iggidit ku ukhdumeh aniyo, ku amre caduruh mixiniyo, yakko kibah inni barmaleelih akko afraxo bakal gantah yoh maaxayinnito. 30Ta ku barhi ku iraaro sharaamuthlih yeyleya yemeete gedda laakin, kulus durutta akah turxude’ yerhxeh alle deheye. 31Abba lel: ‘Yi barhawo, atu umman gedda yottaalih tanito. Inkoh yim lel kum kinni. 32Ta rabeh yinemko aniinalle gaxe, yeleeh yinemko lel geytime ku sacalah yafrixiinim kee xedenaanam farhshishsham kinni’” akko yerhxe.
Currently Selected:
Luukas 15: SCC
Highlight
Share
Copy
Want to have your highlights saved across all your devices? Sign up or sign in
©2024 Wycliffe Ethiopia
