Luukas 16
16
Amaana hin masxadaadarih aymassal
1Yeesus katattaynitik lel: “Wuli masxadaadara le gaddaale kin xiyawti yine. Amaa xiyawtolle lel amaa masxadaadari kaa iraaro akko abizziruk yane yarhxin kissi alle yemeete. 2Akah deecimeh lel: ‘Ta kottaako aabbem ayim kinni? Kamboh masxadaadara takko mirhictaaki asxadaadarti gondo bah.’ 3Amaa masxadaadari lel ishi nabsek: ‘Yi manabotti asxadaadar yok beyak yanek, ayim abo kinni? Faraaco dhic maliyo, caagensiito lel xoolashshiita. 4Ayim abam abaysheh aniyo. Asxadaadarko haddaanima gedda, xiyaw sinni meelalle yi kabbaatoona kinon’ yerhxe. 5Sarrah, tiya tiyah ishi manabottahi cidat wannunuh deecimeh, erherh tiyak: ‘Yi manabotti cidah ayidhdha kodde leya?’ akko yerhxe. 6Usuk lel: ‘Oolac zeetko 3,000 litrotiya takkem’ akko yerhxe. Usuk lel: ‘Iba lacteh defeyteyaako, ku cidahi kitaab hinaaki, 1,500 uktub’ akko yerhxe. 7Sarrah lel ootiyak: ‘Atu lel ku cida ayidhdha kinni?’ akko yerhxe. Usuk: ‘Sinraako 40,000 kiilotiya takkem’ akko yerhxe. Kayyak lel: ‘Ku cidah kitaab hinaaki, 32,000 uktub’ akko yerhxe. 8Ifi cindhamko ziyaadah ta waqhtih cindham sinni ijoolih akah yadiin gorxe loonimhi sabbatah, amaa xaqqi-wanna akkinnixe masxadaadara kaa manabotti kaa siixoh kaa yossokoote. 9Ta gaddi bakita gedda umman geedit sigimalle sin kabbaatoona ciloh, xaqqi gadda akkinnixemko sinneh soxoba abittoona sinal tanem, sinak arhxiyuk ane.
10Dagumulle umun kinti, mangumulle gantah umun kinni, dagumulle xaqqi-wanna akkinnixeti lel mangumulle xaqqi-wanna maki. 11Amaydo, xaqqi gadda akkinnixemille umunaat akke wayteenimko, rummaahit gadda sinalle amaanatishsho lem miyatto kinni? 12Aki marihim kinamalle umunaat akke wayteenimko, sinim kinam miyatti sinah yaxaw kinni? 13Wuli tiya yincibeh wuli tiya akxine, wuli tiya yeynebeh wuli tiya ilaace kibah, lamma manabotta yakhdume khaddaam miyane. Yalla kee solaadi takhdamoona mirhictaana” akko yerhxe.
Sercat kee Yallih nigsinna
14Solaadi kixin Faarisiin tayim inkoh aabbuk alle ancaasak yinin. 15Usuk lel: “Atin tamaa xiyaw nifille sinne yisxiqqiqhe mara kitin, sin afcaado laakin Yalli yaarhige. Xiyaw nifille limo leti, Yallih nifille batakna kinni. 16Sercat kee Nobowa Yohannis fanah abittodde asak yinin; Amaymik sarrah lel Yallih nigsinnahi Mece Wari yimbissireh kinni, ummanti lel orobo adde dufuffuumak yane. 17Sercatko cindhaa dhimmiyo raddamko laakin, caran kee baarho talayem ruhuwa.
Fittix kee malammit marca
18Ishi numa yaftixeh akettö marcishitinnanti zina aba, ishi baclaako timfittixe numa marcishitinnanti lel zina aba.
Alazaar kee gaddaale kin xiyawto
19Wuli diimayin sartim kee mece caynah sara saritah, umman max mece nabradde mara gaddaale kin xiyawti yine. 20Kaa kanshellohi carafalle lel migacah Alazaar decsiita baaxenti biyokuh agoogiteya cidditeh yine. 21Amaa gaddaale kin xiyawtih thawlaako raddam beeto lel hambareerak yine. Amayimko ziyaada lel, kaara gantah tamiiteh kaa biyok ak murhuuca tine. 22Tekke lel, amaa baaxenta kin xiyawti rabeh, malaykut Abraahim gale#16:22 Abraahim gale Abraahim gale fanah baahen yarhxiinim abbublih yengele yarhxiinim kinni. Tee macna lel janna fanah kaa baahen yarhxiinim kinni. fanah kaa baahen. Amaa gaaddaale kin xiyawti gantah rabeh yumuccuge. 23Hadees cazaabadde yekkeh lel, intit xaf-ishe gedda waacinah Abraahim kee Alazaar agaggaagalle yuble. 24‘Abba Abraahimo, ta boladde waaxeltah rabak aniyok, yolle raxmat, ishi ferah erherha layedde hayeh anrab yoh dhamxishooki lel Alazaar yoh dhirhii’ yerhxeh zeere. 25Abraahim laakin: ‘Yi barhaw, atu ishi cumrelle ishi mecaaniiko takkanna geytem, Alazaar laakin amayim balih umaatih geyem izzikkir. Kado laakin usuk talle raaxassiitak yane, atu lel waaxeltah rabak tanito. 26Umbuka tayimko bextih lel, takkeeko sinalle tillabto fadhdham tillaabaanamko kee tamakkeeko nottalle inketti tillaabamko hi ciloh, notta kee sinhi fanadde naba bol yekkeh yane’ akko yerhxe. 27-28Usuk lel: ‘Abba, amaydo, koona sacal liyomhi sabbatah, ta cazaab kin makaano fanah yamiitiinimko ten fayshooki yi abbah care fanah kaa farrimto ku dhaacimak aniyo’ akko yerhxe. 29Abraahim laakin: ‘Usun Moosa kee Nobowat aydaras lon. Tena yaabboonaaki xab’ akko yerhxe. 30Usuk lel: ‘Maale, abba Abraahimo, laakin rabtemko inketti alle yedeemko yataaboona kinon’ akko yerhxe. 31Abraahim lel: ‘Moosa kee Nobowa aydaras aabbe waynimko, rabtemko ugute inketta yakkeedo yaamanoona makinooni’ akko yerhxe”.
Currently Selected:
Luukas 16: SCC
Highlight
Share
Copy
Want to have your highlights saved across all your devices? Sign up or sign in
©2024 Wycliffe Ethiopia
