УблапӀэ 19
19
ЯпшӀыкӀубгъонэрэ шъхьэр
Сэдомрэ Ӏаморэрэ якӀодыкӀ
1МэлэӀичитӀу пчыхьэм ехъулӀэу Сэдом къэкӀуагъ. Къэлэ къэлапчъэм Лотэ Ӏусыгъ. ГъогурыкӀохэр зелъэгъухэм, ар апэгъокӀынэу къэтэджыгъ, чӀыгум нэсэу шъхьащэ афишӀи, 2къыӀуагъ:
«Сизиусхьанхэр! ШъуиӀумэт иунэ шъукъеблагъ, чэщыр щишъухын, шъулъакъохэри шъутхьакӀынхэшъ, пчэдыжьым шъуигъогу шъутехьажьын». Ау ахэмэ къаӀуагъ: «Хьау, тэ урамым чэщыр щитхыщт».
3Ау лъэшэу ялъэӀугъэти, къезэгъыгъэх. Лотэ ахэр иунэ къыщагъэх, ешхэ ешъо афишӀыгъ, хьалыгъу мыкӀу мыпш афигъажъи, ыгъэшхагъэх. 4Ахэр чъыенхэу гъолъыжьыгъо имыфэхэзэ, къэлэдэсхэм – ныбжьыкӀэм къыщегъэжьагъэу анахьыжъым нэс зэкӀэ хъулъфыгъэу Сэдом дэсымэ – Лотэ иунэ бгъу пстэумкӀи къауцухьагъ. 5Лотэ къыращи, къыраӀуагъ: «Тыдэ щыӀэх чэщым щыӀэнхэу о къыпфэкӀогъэ лӀыхэр? Къытфищых ахэр, тэ ахэмэ емыкӀу ятхыщт».
6Лотэ пчъэшъхьаӀум къытеуцуагъ, ыкӀыбыкӀэ пчъэр зэфишӀи, 7къариӀуагъ: «Скъошыхэр, сышъолъэӀу, бзэджагъэ шъумышӀэ. 8Мары хъулъфыгъэ зымышӀагъэ пхъуитӀу сиӀ; ахэр сэ къышъуфисщынхэшъ, шъузыфаер яшъушӀ; ау мы цӀыфмэ зи яшъумыӀу, къысщыгугъхэу сиунэ къихьагъэмэ зи яшъумышӀ!»
9Ау ахэмэ къаӀуагъ: «Моу ӀукӀ! Хымэ цӀыфэу мыщ къэкӀуагъэм джы тэщ пае хьыкум ышӀынэу ары! Ахэмэ ятшӀэщтгъагъэм нахь Ӏаеу джы о тыкъыбдэзекӀощт». Лотэ лъэшэу къыжэхахьэхэзэ, пчъэр хаутынэу къекӀолӀагъэх. 10Ау хьакӀэмэ Лотэ унэм ращэжьи, пчъэр къырагъэтыжьыгъ. 11Унэпчъэ ихьапӀэм Ӏут цӀыфхэр, ини цӀыкӀуи, амылъэгъушъунэу къашӀыгъэх, ащ къыхэкӀэу пчъэ ихьапӀэм сыд фэдизрэ лъыхъугъэхэми, ахэмэ ар къагъотын алъэкӀыгъэп.
12ХьакӀэмэ Лотэ къыраӀуагъ: «Хэта мы къалэм джыри щыуиӀэр? Махълъэ, пкъохэр, ппхъухэр е нэмыкӀ горэхэр? ЗэкӀэ мы къалэм дэщ. 13Мы къалэр тэ дгъэкӀодыщт: мыщ дэсхэр зыгъэмысэрэ тхьаусыхэ макъэу Зиусхьаным лъыӀэсыгъэр ины дэдэти, къалэр дгъэкӀодынэу Зиусхьаным тыкъигъэкӀуагъ».
14Лотэ къикӀи, имахълъэхэу, ыпхъухэр зыщэщтхэм ариӀуагъ: «ПсынкӀэу мы къалэм шъудэкӀ! Зиусхьаным ар джыдэдэм ыгъэкӀодыщт». Ау ар мэсэмэркъэоу махълъэмэ къашӀошӀыгъ.
15Нэф къэшъ зэхъум, мэлэӀичмэ Лотэ агъэгуӀэу аублагъ: «ПсынкӀэ, уишъузрэ ппхъуитӀурэ дэщых! Армырмэ къалэр зыдгъэпщынэжькӀэ, ори удэкӀодэщт!»
16Ау ащ кӀыхьэ лыхьэ зырегъэшӀыти, мэлэӀичмэ, Зиусхьаным Лотэ гукӀэгъоу къыфишӀырэм ихьатыркӀэ, Лоти ащ ишъузи, ыпхъуитӀуи аӀэхэр къаубытхи, къалэм къыдащыгъэх. 17Къалэм дэкӀыгъахэхэу, ахэмэ ащыщ горэм Лотэ риӀуагъ: «Ппсэ къэухъумэжь! УкъызэмыплъэкӀ, кӀэйми укъыщымыуцу, къушъхьэм екӀужь, армырмэ ухэкӀодэщт!» 18Ау Лотэ ахэмэ къариӀуагъ: «Хьау, си Зиусхьан! 19О уиӀумэт унэшӀу къыщыпфагъ, ин дэд гукӀэгъоу къысфэпшӀыгъэри: псэоу сыкъэбгъэнэжьыгъ! Ау сэ къушъхьэм сынэсын слъэкӀыщтэп – тхьамыкӀагъор къыскӀэхьанышъ, сыхэкӀодэщт. 20Мары мо къалэр нахь благъ, ащ унэсын плъэкӀыщт, ар цӀыкӀушъ. Ащ сычъэщт, – ар цӀыкӀу, ащ сынэсынышъ, псэоу сыкъэнэжьыщт».
21«Дэгъу, – ыӀуагъ мэлэӀичым, – а уилъэӀуи къыпфэсшӀэщт: о зыфэпӀорэ къалэр згъэкӀодыщтэп. 22Ау зыгъэпсынкӀ, ащ о унэмысэу, Сэ сиӀоф езгъэжьэн слъэкӀыщтэп».
Ащ къыхэкӀэу ары къалэм ЦэуӀар#19:22 ЦэуӀар – ижъырэ джуртыбзэкӀэ къикӀырэр: цӀыкӀу. зыкӀыфаусыгъэр.
23Лотэ ЦэуӀар къызэсым, тыгъэм чӀыгум зыкъытыриӀэтыкӀыгъагъ. 24ЕтӀанэ Зиусхьаным Сэдомрэ Ӏаморэрэ, ощхым фэдэу тхъомзашхъорэ машӀорэ Зиусхьаным ыдэжь ошъогум къикӀэу къатырикӀагъ. 25А къэлитӀури, кӀэйри, а къалэхэм адэсхэри, чӀым къытекӀэхэри зэкӀэ ыгъэкӀодыгъэх. 26Ау Лотэ ишъуз зэплъэкӀыгъэти, щыгъу пкъэоу чъыгъэ.
27Ибрахьимэ пчэдыжьым жьэу къэтэджи, Зиусхьаным ыпашъхьэ зыщитыгъэ чӀыпӀэм къэкӀуагъ. 28Сэдомрэ Ӏаморэрэ ялъэныкъуи кӀэйри къызеплъыхьэхэм, ылъэгъугъ: хьакум Ӏугъор къызэрикӀэу, чӀыгум Ӏугъор къытекӀы.
29Джаущтэу кӀэим дэт къалэхэр ыгъэкӀодхэзэ, Тхьэр Ибрахьимэ егупшысагъ, Лоти зыдэсыгъэ къалэхэр зыгъэкӀодыгъэ тхьамыкӀагъом къыӀэкӀихыжьыгъ.
Лотрэ ыпхъухэмрэ
30Лотэ ЦэуӀар къыдэкӀыжьи, ыпхъуитӀуи игъусэу къушъхьэм щыпсэухэу рагъэжьагъ. ЦэуӀар дэсынкӀэ ар щынэщтыгъэ. Ыпхъухэр игъусэу ар гъочӀэгъым чӀэсыгъ. 31Зэгорэм ыпхъу нахьыжъ нахьыкӀэм риӀуагъ: «Тятэ жъы мэхъу, тыдэкӀи чӀыгум зэрэщыхабзэу, тэ къыдгохьан цӀыф чӀыгум тетыжьэп. 32Арышъ, тятэ санэ едгъэшъонышъ, ащ тыголъыщт, тятэми зытекӀыщтхэр, тилӀакъо мыкӀодынэу».
33А чэщым ахэмэ ятэ санэ рагъашъуи, пхъу нахьыжъыр ихьи, ятэ къыголъыгъ, къехъулӀагъэр зылӀэужыгъор ятэ къышӀагъэп – ар къызыгъолъыгъэри зытэджыжьыгъэри. 34КъыкӀэлъыкӀорэ мафэм пхъу нахьыжъым нахьыкӀэм риӀуагъ: «Мары сэ тыгъосчэщ тятэ сыголъыгъ; мы чэщыми санэ едгъэшъонышъ, ори ихьи, ащ къыголъ; тятэми зыхэкӀыщтхэр, тилӀакъо мыкӀодынэу». 35А чэщыми ятэ санэ рагъэшъуагъ: пхъу нахьыкӀэр ихьи, ащ къыголъыгъ, ау къехъулӀагъэр зылӀэужыгъор ятэ къышӀагъэп – ар къызыгъолъыгъэри, зытэджыжьыгъэри. 36Джаущтэу Лотэ ыпхъуитӀуи ятэкӀэ лъэрымыхь хъугъэх.
37Нахьыжъым шъао къыфэхъуи, ащ Моаб фиусыгъ. Ар непэрэ Моаб цӀыфхэм ят. 38Джащ фэдэу нахьыкӀэми шъао къыфэхъугъ, ащ цӀэ фиусыгъ: Бэн Ӏами. Джы къызнэсыгъэми ар непэрэ Ӏамон цӀыфхэм ят.
Currently Selected:
УблапӀэ 19: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
