Mʉkpanganɨa 16
16
Hagalɨ ɔnɔtɨɔ Abalama mwana
1Salaɨ, moi ɔ Abalama, a꞉ɓio jɛnɛ-sɨ ta ɓɔ angɔmʉnɔtɨenimʉ swaɨ mwana. Ɨyɔ Salaɨ, a꞉ɓio nɔ baya mʉngana, muto Ɓamisili ɔngɔ, ino ɓɔ Hagalɨ. 2-3Ambise ɔ mago tɛkɛɓɛ, ngʉka ɨyɔ Abalama a꞉wolo-ɔɔ ɨkʉmbʉ anɔ Kanana, kʉdɔ, Salaɨ a꞉ɓio nayɔ aka ɓɔ «Dɔ MAKWƆƁƗƗ a꞉nengyo ɨmɨ, ɓɔ natɨnɔtamʉ ɓana, ɨndɔ jonokieni nɔ Hagalɨ, baya ngɨasɛmɨ, adiga tɨa ɨyɔ akɛ a꞊nanɔtɨa ga pɔ ɨmɨ mwana.» Ɨyɔ Abalama, ɔ꞉baya ta ndʉ aka Salaɨ a꞉sugo-ɔɔ. Salaɨ ɔ꞉sɨka baya angɔ Hagalɨ, muto Ɓamisili ɔngɔ, nɔ, ɔ꞉mumosio swaɨ ga gbʉ. 4Ɨyɛ ndʉ Abalama ɓa꞉jonokio nɔ Hagalɨ, ɔ꞉tɔsio ta ɓʉa. Ɨyɛ Hagalɨ a꞉sio ta ɓʉa ɓanɨ, ɔ꞉potio nɨna Salaɨ ngakɛ a꞉ɓio mamʉkwangɔ, tɨta ɓʉtʉʉ.
5Ga Salaɨ nɔ Abalama ananɨ ɓɔ: «Yaka ngɨyɛ Hagalɨ a-ɔɔ nɛmɨ anunokio, yɔnakangɔ ta ʉwɛ. Ɨmɨ akɛ, na꞉nenjo pɔngɔ baya ngɨasɛmɨ. Ɨyɛ ndʉ a꞉sio pɛ ɓʉa ɓɔ gba, ɨmɨ, nɛka tɨta ɨkyɛmʉ yɛta ɓʉtʉʉ akɔ mesu kangɔ. Ta MAKWƆƁƗƗ akɛ atɨkio isu nɔwɛ, mʉkɔmbʉ ngʉwɔnanɨ.» 6Ga Abalama nayɔ aka ɓɔ: «Hoo, sɨ baya asɔɔ a ta ɛsɨ ɔ ʉpanʉ wɔsɔɔ tɛ, mʉkɨa pɨ ta ndʉ aka mʉtɨma wɔsɔɔ wa꞊baya-ɔɔ.» Kʉdɔ, Salaɨ ɔ꞉potio nayɔ kyananaka ɓʉmʉ ɓʉmʉ aɓɔya ta aka, ɨyɔ Hagalɨ a꞉hɛyanaka-ɔɔ.
7Malaika wɔ MAKWƆƁƗƗ wa꞉mijeyo ɨyɔ Hagalɨ anambamba ɔ ɨkɔ, anɔ ɨngbaa yɔ Sulia, amukengu. 8Ga malaika nayɔ ɓɔ: «Ʉwɛ, Hagalɨ baya ɔ Salaɨ, wanɨka gbanɨ nɔ wanɨsa gbanɨ?» Hagalɨ ɔ꞉mutosio ɓɔ: «Ɨmɨ, nɔ꞉hɛyanakɔ anɨngwa atɨ makwasɛmɨ Salaɨ.» 9Ga malaika ngɨyɔ MAKWƆƁƗƗ nayɔ ɓɔ: «Tɔwa ta ɓɔ kpalaa, atɨ makwasɔɔ, nɔ ɓio pɨ ta ɛsɨ ɔ ʉpanʉ wangɔ.» 10Malaika wɔ MAKWƆƁƗƗ ɔ꞉matɨa ɓata akɔsugo ɓɔ: «Ɨmɨ, na꞊chiso ɨfananja ngɨyɛsɔɔ ɨja, sɔkɔmʉ nɔ ipoye.» 11Ga malaika wɔ MAKWƆƁƗƗ ɓata nayɔ ɓɔ: «Ɨna, ʉwɛ ɨyakɛ wanɔ ɓʉa akɛ, wa꞊nɔta suo mwana ata gue, nɔ, wɔ꞊mʉsʉa suo ino ɓɔ Ɨsɨmaɛlɨ#16:11 Ɨsɨmaɛlɨ: pɔ ɓɔ ɨsɨ yɔngɔ ɓɔ «nʉka» nɔ Ebelenia. Dɔ, MAKWƆƁƗƗ ɔ꞉kɔ ndɨana ngɨyɛsɔɔ ʉkanɨ. 12Ɨyɔ Ɨsɨmaɛlɨ, a꞊ɓio sina akɔ uɓei ngʉangɔ, ndʉ ɨndʉ yɔ iju. A꞊ɓɨɓɛndana sina nɔ ɓombi ɓaɓomu, nɔ ɓombi ɓaɓomu ɓa꞊mʉchwɛa sina ʉwa. A꞊wolo sina ɨyɔ, ta ɗu ɓɔ kɛlɛ nɔ ɓana ɓɔ ɨsɛ ngʉɓɔmɔ ɓaɓomu.»
13Hagalɨ ɔ꞉ɓokwono ɓɔ: «Ɨmɨ, nɛ꞉nɔ ndɨ MAKWƆƁƗƗ ta ingono, ɨyɔ ngɨa ɔ꞉nɛnɔ ɨmɨ pɛɨ?» Kʉdɔ, ɔ꞉mʉsʉa MAKWƆƁƗƗ ngɨa a꞉ɓio ɓɔ ɔmʉchwɛanɨeni ino ɓɔ: «Ʉwɛ akɛ wa Asɔɓɨɨ ngɨa akɨna.» 14Yaka ngɨyɛ ɓa꞉sʉa-ɔɔ ɨkɔ ngɨyɛnɛnɨ, ino ɓɔ ɨkɔ yɔ «Bɛlɨ-Laɨ-Lɔɨ#16:14 Bɛlɨ-Laɨ-Lɔɨ: pɔ ɓɔ ɨsɨ yɔngɔ ɓɔ «Mombi ngɨa anɔ uɓei nɔ ɨyakɛ anɛmɨ anɨna» nɔ Ebelenia», ya꞉kwa ɓanɨ. Ɨkɔ ngɨyɛnɛnɨ, ya amusungati wɔ Kadɛsɨ nɔ Bɛlɛdɨ.
15Hagalɨ ɔ꞉mʉnɔtɨa Abalama ta mwana ata gue. Ɨyɔ Abalama, ɔ꞉mʉsʉa ino ɓɔ Ɨsɨmaɛlɨ. 16Hagalɨ a꞉mʉnɔtɨa Abalama Ɨsɨmaɛlɨ, ɨyɔ Abalama, ɔɓieni tɨa nɔ mago ɓatɛkɛɓɛ ɓɛgɨna nɔ mɛɗɨa.
Currently Selected:
Mʉkpanganɨa 16: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
