KEJADIAN 30
30
1Bile Rahel kipanei kek pek buleh kiperyos kenon ha Yakub, kek kiiri sengik ha itenek lalu kiurok nu Yakub, “Ogloh eng kenon, amen tok, eng doh ngdat!”
2Yakub kiberiknos nu Rahel ru kiurok, “Eng adeh apeka Jenang! Kekloh de Kibeh hek pek habekenon!”
3Lalu Rahel kiurok, “Adeh hambe eng Bilha. Besamaloh ru kek supaye kek buleh kiperyos kenon ha eng. Ru care begei ajeh eng pen buleh ngjadi amek.”
4Jadi, Rahel kiog ihambe Bilha nu igengsir sebegei ikenah, ru Yakub pen kibesama ru Bilha. 5Telas ajeh Bilha kimakok lalu kiperyos numom kenon keral. 6Rahel kiurok, “Jenang ya Kipeadel ha bahneh eng ru ya Kiurok bahneh eng ajeh betol. Kek ya Kicerngai doa eng ru Kiog numom kenon keral nu eng.” Kerana ajehloh, Rahel kiog muh kenon ajeh Dan.#30:6 Dan: Muh adeh imaksod, peadel.
7Bilha kimakok nij ru kiperyos numom kenon keral. 8Rahel kiurok, “Eng ya ngkerekwat nglawan ha tenek eng ru eng ya ngmenang.” Kerana ajehloh, kek kiog muh kenon ajeh Naftali.#30:8 Naftali: Muh adeh imaksod, bejuang.
9Bile Lea kipanei kek ya pek kibekenon nij, kek kiog ihambe Zilpa nu Yakub sebegei ikenah. 10Telas ajeh Zilpa hambe Lea kiperyos numom kenon keral ha Yakub. 11Lea kiurok, “Eng ihad ngbeuntong!” Kerana ajehloh, kek kiog muh kenon ajeh Gad.#30:11 Gad: Muh adeh imaksod, untong.
12Pek liu ju kenjeh Zilpa kiperyos nij numom kenon keral ha Yakub 13ru Lea pen kiurok, “Eng ihad ngkerakmik! Hunen dikdij kerdor doh naiurok eng ihad ngkerakmik.” Kerana ajehloh, kek kiog muh kenon ajeh Asyer.#30:13 Asyer: Muh adeh imaksod, bahagie.
14Ku musem kiknej gandom Ruben kiet nu selai lalu kiburuk keneng penglai.#30:14 Penglai: Keneng penglai adeh mong ihasiat de dapat kibeh deng-kenon kijadi subor. Kek kien keneng ajeh nu iamek Lea. Bile Rahel kipanei hal ajeh, kek kiurok nu Lea, “Ogloh eng gek keneng penglai de biburuk ya kenon hek ajeh.”
15Tapi Lea kiberlag, “Hek ya hakot gengsir eng. Keneng penglai de biburuk ya kenon eng pen hek hagu-kot juga!”
Rahel kiurok, “Amen hek haog eng keneng penglai de kiburuk ya kenon hek ajeh, ku kelem adeh hek buleh habesama ru Yakub.”
16Ku dui ajeh bile Yakub kijog nu madeg ju iselai, Lea kisamut kek sambel kiurok, “Hek hod habesama ru eng kelem adeh kerana ya ngbayar ru keneng penglai de biburuk ya kenon eng.” Kerana ajeh, Yakub kibesama ru Lea ku kelem ajeh.
17Jenang Kicerngai doa Lea. Kek kimakok lalu kiperyos kenon keral kelima ha Yakub. 18Lea kiurok, “Jenang ya Kibalas bor nu eng kerana ya ngog Zilpa nu gengsir eng.” Kerana ajehloh, kek kiog muh ikenon ajeh Isakhar.#30:18 Isakhar: Muh adeh imaksod, ‘orang gaji’ atao ‘mong gaji.’
19Telas ajeh Lea kimakok nij ru kiperyos numom kenon keral keenam. 20Kek kiurok, “Jenang ya Kiog hadiah de ihad bor nu eng. Hunen gengsir eng doh kihormat eng kerana ya ngperyos enam urag kenon keral ha kek.” Kerana ajehloh, kek kiog muh ikenon ajeh Zebulon.#30:20 Zebulon: Muh adeh imaksod, hormat.
21Telas ajeh Lea kiperyos numom kenon kerdor ru kiog imuh Dina.
22Lalu Jenang Kiingat ha Rahel. Jenang Kicerngai doa kek ru Kipebuleh kek kiperyos kenon. 23Rahel kimakok lalu kiperyos numom kenon keral. Rahel kiurok, “Jenang ya Kipernyep neaep eng. 24Semoge Yahweh Kiog numom kenon keral nij nu eng.” Kerana ajehloh, kek kiog muh ikenon ajeh Yusuf.#30:24 Yusuf: Muh adeh imaksod, ‘kek kiog nij’ atao ‘kek kipernyep.’
Tawar-menawar antare Yakub ru Laban
25Telas Rahel kiperyos Yusuf, Yakub kiurok nu Laban, “Ogloh eng ngjog nu tik lieng. 26Ogloh kenon-kenah eng. Eng ya ngbekerjak ngha-berkep enai. Ogloh jik jijog. Jen pen ya jenpanei eng ya ngbekerjak keras ha jen.”
27Tapi Laban kiurok nu kek, “Cerngailoh nok. Amen hahod, geiloh ku padeh. Eng ngkep ramalan adeh: Yahweh ya Kiberkat eng kerana hek. 28Pasalloh merip taleh de hasemanj. Eng doh ngbayar.”
29Yakub kiberlag, “Ya jenpanei sendiri eng ya ngbekerjak keras ru binatag daknek jen ya betambah jeoi ku kateh jenaga eng. 30Sebelom nghol, harta daknek jen pek memerip tapi hunen ya jenjadi kaya. Yahweh ya Kiberkat jen kerana eng. Hunen ya leiloh imase ngha-bekerjak ha peringak lieng sendiri.”
31Laban kiurok, “Amen begei ajeh ma de patot ngog nu hek?”
Yakub kiberlag, “Pek payah jenog ma-ma pen. Amen jensetuju ru ma de ngha-cadang adeh, eng doh lekat ngjaga binatag daknek jen. 32Ogloh eng ngcip ku engkap dikdij kenawat kambeg ru dombe jen ku arik adeh, ru ngkot jap-jap dombe de bebelang atao bebintek, ru kenon dombe de belag, ru juga jap-jap kambeg de bebelang atao bebintek. Ajeh taleh upah de ngsemanj. 33Ku mase nu ngar doh, senang jenha-panei eng ngbeh jujorka tok nu jen. Bile jenperiksa binatag daknek de kijadi upah eng, ru jenbakek mong kambeg de pek bebintek atao bebelang, atao dombe de pek belag, jen doh jenpanei binatag ajeh ngsij.”
34Laban kiberlag, “Eng ngsetuju! Har doh harbeh ma de hacadang ajeh!” 35Tapi ku arik ajeh Laban kikot dikdij kambeg ibek ru ikenan de bebelang, bebintek, ru bewarne biyeg. Kek juga kikot dikdij kenon dombe de belag. Lalu kek kior ikekenon keral naijaga idaknek ajeh. 36Telas ajeh Laban ru iperingak naiwag dikdij binatag daknek ajeh inyaknak nik arik ceknip. Kenawat kambeg ru dombe de lekat mong ajeh bijaga ya Yakub.
37Telas ajeh Yakub kikot cak-cak de pai bitas ju keneng hawar, keneng badam, ru keneng berangan. Kiwog icekop cak-cak ajeh lei kijadi bebelang. 38Lalu kek kidek cak-cak ajeh ku kateh tempat ngeknut ku ngar kenawat kambeg ru dombe kerana binatag-binatag ajeh naigemar bekseg mase naingut teu. 39Jadi, binatag-binatag ajeh naibekseg ku ngar cak-cak ajeh. Ipenyudah, naiperyos kenon de beloreng, atao de bebelang, atao de bebintek.
40Telas ajeh Yakub kicerlah kekenon kambeg ru dombe ajeh ju binatag-binatag kilek. Lalu kek kiperngar binatag daknek kilek nu arah binatag Laban de beloreng atao de belag. Ru care ajehloh kek kiberkep kenawat binatag daknek ilei sendiri ru kipeaseg ju binatag daknek Laban.
41Bile binatag de kuat tengah naibekseg, Yakub kidek cag-cag ilei de kiwog icekop ajeh ku ngar binatag-binatag ajeh ku kateh tempat ngeknut. 42Tapi kek pek kidek cag-cag ajeh ku ngar binatag de lemah. Kerana ajeh, dikdij binatag de lemah kijadi hak Laban ru dikdij binatag de kuat kijadi hak Yakub. 43Ru care begei ajehloh Yakub kijadi ihad kaya. Kek mong jeoi ikambeg, idombe, iunte, ikeldei, ru ihambe-hambe.
Currently Selected:
KEJADIAN 30: AEH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
