KEJADIAN 31
31
Yakub ru Iperingak Naidek Laban
1Ku nanek arik, Yakub kicerngai kekenon keral Laban naiurok begei adeh: “Yakub ya kikot dikdij harta hak apak hik. Kek kikep dikdij kenaya ju harta apak hik.” 2Yakub juga kineng Laban ya pek ramah nij nu ilei, pek begei manah entem.
3Lalu Yahweh Kiurok nu Yakub, “Jogloh nu tik jenang rak hek, tik sesedara-mara hek. Eng doh Ngbeserta ru hek.”
4Jadi, Yakub kior numom sengoi pasal nu Rahel ru Lea supaye baiburuk kek ku padag, ku tempat daknek ibinatag. 5Bile ubai bailei, Yakub kiurok nu ubai, “Eng ngneng apak jerkek ya pek ramah nij nu eng, pek begei manah entem. Tapi Jenang de bisembah ya apak eng Kibeserta ru eng. 6Jerkek juga ya jerkepanei eng ya ngbekerjak keras ha apak jerkek. 7Hamapen begei ajeh, kek ya kitipu eng ru kiubah upah eng lei 10 kali. Tapi Jenang pek Kibiar kek kibeh jehat nu eng. 8Bile apak jerkek kiurok, ‘Binatag-binatag daknek de bebintek naijadi upah hek,’ dikdij binatag daknek ajeh pen naiperyos kenon de bebintek. Bile kek kiurok, ‘Binatag-binatag daknek de bebelang naijadi upah hek,’ dikdij binatag daknek ajeh pen naiperyos kenon de bebelang. 9Begei ajehloh Jenang ya Kikot binatag-binatag daknek apak jerkek lalu Kiog nu eng.
10Ku musem binatag daknek naibekseg, eng ngberakpok ru ngneng dikdij kambeg ibek de tengah naibekseg ajeh beloreng, bebintek, ru bebelang. 11Lalu malikat Jenang Kiurok nu eng ku kateh empok ajeh, ‘Yakub!’ Eng pen ngberlag, ‘Ma, Jen?’ 12Malikat ajeh kiurok, ‘Nengloh, dikdij kambeg ibek de tengah naibekseg ajeh beloreng, bebintek, ru bebelang. Eng saje Ngator hal ajeh ha hek kerana Eng ya Ngneng dikdij ma de bibeh ya Laban nu hek. 13Engloh Jenang de ya Ngperneng Diri LiEng nu hek ku Betel. Ku pajeh hek ya hacerog minyak zaiton ku kemil nanek batu neingat ru ya habesumpah nu Eng. Hunen sekyaploh ru jogloh nu tik asal hek.’ ”
14Lalu Lea ru Rahel baiberlag, “Ya pek mong nij bahagian ju kenaya apak jar de doh jarkep. 15Kek kianggap jar begei mai aseg. Kek ya kijual jar ru kek kiperdij duet ajeh de kiterima ha jar! 16Jadi, dikdij kenaya de bikot ya Jenang ju apak jar, ajehloh hak jar ru kekenon jar. Behloh ma de bior ya Jenang nu hek.”
17-18Jadi, Yakub kisekyap kaha-jog nu Ishak iapak ku tik Kanaan. Kek kiperhuj ikekenah ru ikekenon ku kemil iunte-unte, lalu kek kiwag ibinatag-binatag daknek, ru kien dikdij de ya kikep ku Mesopotamia.
19Sebelom naicip, Rahel kisij patong pelindog peringak hak iapak. Ku mase ajeh, Laban ya kiet kaha-gunteg sentol idombe-dombe. 20Yakub kitipu Laban mai Aram ajeh ru pek kipasal ha iennet ajeh. 21Begei ajehloh Yakub ru iperingak naikot dikdij iharta lalu naiet ju kenjeh. Enai nailintas Batag arik Efrat lalu naituju nu kawasan lod Gilead.
Laban Kibeseh Yakub
22Nik arik ju kenjeh, Laban biog panei Yakub ru iperingak ya naijar. 23Jadi, Laban kikumpol isesedara ru naibeseh Yakub selame tujoh arik lei kaha-merek nu enai ku kawasan lod Gilead. 24Tapi sebelom Laban kiterbuk nu Yakub, Jenang Kiterbuk nu Laban mai Aram ajeh ku kateh iempok ku nanek kelem. Jenang Kiurok nu Laban, “Agok sekali-kali haancam Yakub walau ya nanek engrok pen.”
25Bile Laban kilei nu tempat Yakub, Yakub ru iperingak ya naipasag kemah ku kawasan lod Gilead. Laban ru isesedara pen naipasag kemah enai ku pajeh, pek nyak ju Yakub.
26Lalu Laban kiurok nu Yakub, “Ma de ya habeh nu eng? Hek hatipu eng ru haen jar kekenon eng begei sengoi de bitawan mase perag. 27Yama hatipu eng lalu haet serakngek? Amen hapasal nu eng, eng tentu ngterlas hek haet ru senuka, biireng ya lagu, tamburin, ru kecapi! 28Tapi hek pek haog kesempatan pen ngha-nyui kenon-cenok ru kekenon kerdor eng, ngha-bengsat cip abor. Budoh betol bahneh hek adeh! 29Eng ngbekuasa ngha-beh jehat nu engkek tapi kelemnek Jenang de bisembah ya apak hek, Kiog amaran nu eng supaye pek ngancam hek. 30Eng ngpanei hek haet kerana ihad haha-gujog. Tapi yama hasij patong pelindog peringak eng?”
31Yakub kiberlag, “Eng nget serakngek kerana ngsengoh jenterhan kekenon jen. 32Tapi amen jenbakek sengoi de siksij patong ajeh, kek doh bihukom dat. Periksaloh ku ngar sesedara-mara hik adeh same ade barang hak jen ajeh mongka tok ku padeh. Amen mong, kotloh.” Tapi Yakub pek kipanei patong ajeh bisij ya Rahel.
33Jadi, Laban kiet nu kemah Yakub ru kirungkas dikdij. Telas ajeh kek kiet nu kemah Lea ru nu kemah nar mom ihambe kerdor, tapi patong ajeh pek kiburuk. Ipenyudah, Laban kimuj nu kateh kemah Rahel. 34Tapi Rahel ya kikot patong ajeh ru kipermuj nu kateh kantong pelana unte, ru kek kigei ku ikemil pelana ajeh. Laban kirungkas dij kemah Rahel tapi pek kiburuk patong ajeh.
35Lalu Rahel kiurok nu iapak, “Wesloh agok belal kerana eng pek ngjinjeg ngha-samut jen. Eng tengah ngbebehip.” Laban kikek patong ajeh ru ihad cerimat tapi pek kiburuk.
36Telas ajeh Yakub kibelal ru kiurok nu Laban, “Jenghat ma de ya ngbeh? Ma senalah eng lei jenbeseh ha eng? 37Hunen, telas jenrungkas dikdij barang eng, jenbakekka barang hak jen ajeh? Perholloh ru dekloh barang ajeh ku padeh supaye dikdij sengoi eng ru sengoi jen buleh naineng. Biar naibeh keputusan bok antare har de betol.
38Eng ya nggei besama ru enjen 20 tahut iluniu. Dombe ru kambeg enjen ya jeoi naibiak bor, ru pek pernah ngcak nuikor pen kambeg ibek ju binatag daknek enjen ajeh. 39Binatag daknek de dat bijerop ya binatag liar pek pernah ngen nu jen. Ngganti ya lieng. Binatag daknek de bisij ku arik yah atao kelem selalo jentuntot supaye ngganti. 40Ngbeked ku mase yah ru ngsekngej ku mase kelem. Eng selalo pek buleh ngbukbet. 41Begei ajehloh keadaan eng mase ngbeh kerjak ha jen selame 20 tahut. 14 tahut iluniu eng ngkerakjak ngha-berkep nar mom kenon kerdor jen, ru 6 tahut nij ngha-berkep kenawat kambeg ru dombe. Selame ajeh, enjen ya jenubah upah eng lei 10 kali. 42Amen Jenang apak eng, Jenang de bisembah ya Abraham ru Ishak pek Kibeserta eng, tentu jenor eng et ru teg kusong. Tapi Jenang ya Kiperatik senusah eng ru kerjak de ya ngbeh. Kerana ajeh, kelem adeh nek Jenang ya Kitegor jen.”
Jenanji antare Yakub ru Laban
43Lalu Laban kiberlag nu Yakub, “Nar urag kerdor ajeh kenon eng, kekenon ubai ajeh hak eng, ru kenawat kambeg ru dombe ajeh pen hak eng juga. Dikdij ma de haneng ku padeh hak eng. Tapi eng pek buleh ngbeh ma-ma ngha-terhan kekenon eng atao kenon-cenok eng. 44Hunen beiloh harbeh jenanji ru biarloh jenanji ajeh kijadi bukti hek ru eng ya harbedamei.”
45Yakub kisetuju lalu kikot nanek batu entoi ru kitergak sebegei batu neingat. 46Lalu kek kior isesedara-mara supaye naikumpol batu-batu ru naibeh nanek senusot. Telas ajeh naicakcak besama beg senusot batu ajeh. 47Laban kiog muh senusot batu ajeh Yegar Sahaduta, tapi Yakub kiog imuh Galed.#31:47 Galed: Muh adeh imaksod, senusot saksi.
48Lalu Laban kiurok nu Yakub, “Senusot batu adeh doh kijadi saksi tentang jenanji de harbeh ku arik adeh.” Ajehloh isebab senusot batu ajeh biog imuh Galed. 49Senusot ajeh juga biog imuh Mizpa kerana Laban kiurok,#31:49 Mizpa: Muh adeh imaksod, tempat biperatik. “Semoge Yahweh Kiperatik har selame hargei nyak. 50Amen hek haaniaye kekenon eng atao hajeg kekerdor kilek, hamapen pek mong mai de doh bepasal hal ajeh nu eng, ingatloh hal adeh: Jenang doh Kineng dikdij hal ajeh ru Kijadi saksi antare har.
51Adehloh batu senusot ru adehloh batu neingat de ya ngtergak. 52Batu senusot ru batu neingat adeh kipeingat ha har supaye eng pek buleh nglalu senusot adeh ngha-serag hek, ru hek pen pek buleh halalu batu senusot adeh ru batu neingat adeh haha-serag eng. 53Jenang de bisembah ya Abraham, Nahor, ru apak ubai doh Kijadi hakem har.”
Lalu Yakub kibesumpah kaha-pegag ijenanji. Kek kibesumpah ku kateh muh Jenang de bisembah ya Ishak iapak. 54Kek kigoj nuikor binatag ru kipesembah sebegei korban ku kawasan lod ajeh. Kek kicereg dikdij isesedara-mara naicakcak besama. Telas siap caknak, naibet ku pajeh ku ikenglem.
55Ku ipepegelap huper Laban kinyui ru kibesat cip abor nu ikekenon kerdor ru ikenon-cenok. Kiberkat enai lalu kijog nu itempat ginei.
Currently Selected:
KEJADIAN 31: AEH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
