LUKAS 11

Doa de Biajar ya Yesus

(Mat 6:9-13; 7:7-11)

1Ku nanek arik, Yesus Kibedoa ku nanek tempat. Bile Idoa ya dij, numom ju Ipengikot-pengikot kiurok nu Kek, “Guru, ajarloh jik bedoa begei Yohanes Pembaptis kiajar ha ipengikot-pengikot.” 2Yesus Kiurok nu enai, “Bedoaloh begei adeh:

‘Menek,

semoge Jen bihormat.

Semoge Jen memerintah sebegei Raja.

3Ogloh jik caknak jap arik.

4Amponloh dosa jik kerana jik pen jiampon ha dikdij mai de besalah nu jik.

Pernyakloh jik ju cenuba.’ ”

5Telas ajeh Yesus Kiurok nu Ipengikot-pengikot, “Seandainye mong numom ju engkek kiet nu deg ikawat ku semakdek kelem ru kiurok, ‘Sedara, ogloh ngpinyap nik kebek ruti ju hek 6kerana kawat eng ya kisingah nu madeg eng ku iceknip tapi mahentok de mong ngha-jamu nu kek.’ 7Ikawat ajeh kiberlag ju ikateh deg, ‘Agok kacau eng! Pintu ya bitutop. Eng ru kekenon eng ya jibukbet. Eng pek dapat ngkos ru ngha-og ma-ma nu hek.’ ” 8Yesus Kiurok nij, “Cerngailoh, tuan deg ajeh doh pek kikos ru kiog ruti nu sengoi de sengmanj ajeh hamapen sengoi ajeh ikawat. Tapi, ha kerana ikawat ajeh pek kiselsel ru teros-meneros kisemanj, tuan deg ajeh doh kikos ru kiog ma taleh de ikawat ajeh kisemanj. 9Jadi, cerngailoh adeh: Semanjloh, doh biog. Kekloh, doh engkeburuk. Gadokloh pintu, doh bibuka. 10Kerana, bok imai de kisemanj doh kikep. Bok imai de kikek doh kiburuk. Nu bok imai de kigadok pintu, doh bibuka. 11Pek mong menek ju engkap engkek de doh kiog tijik amen ikenon kisemanj kak, 12atao doh kiog mangai amen ikenon kisemanj pengleg. 13Hamapen engkek jehat, engkepanei engog ma de bor nu kekenon engkek. Gandakloh nij Menek de ku serga! Kek doh Kiog IKelog Santen nu mai de sengmanj nu Kek.”

Yesus ru Beelzebul

(Mat 9:32-34; 12:22-30; Mrk 3:22-27)

14Ku nanek arik, Yesus Kiperet nyanik de kibeh numom sengoi kijadi bisu. Bile nyanik ajeh ya kihol, sengoi ajeh ya dapat kibelwal. Mai jengoi cengang empag enai naineng hal ajeh. 15Tapi mong memerip urag de naiurok, “Kek Kiperet nyanik-nyanik ya kuasa Beelzebul raknak dikdij nyanik.”

16Mong mai kilek naiha-uji Yesus, jadi naisemanj Yesus Kibeh tanda ajaib untok Kaha-pebukti Kek Kihol ju Jenang. 17Tapi Yesus ya Kipanei ma de naiserngik lalu Kiurok nu enai, “Jap-jap kerajaan de isengoi naibelawan ratak liknai doh kitateh. Ru jap-jap peringak de naibelawan ratak liknai doh kihancor. 18Begei ajehloh juga ku hal kerajaan Ibles. Amen nyanik-nyanik ku kateh kerajaan Ibles nailawan ratak liknai, kerajaan ajeh doh pek kitahan. Ngurok hal ajeh kerana engkeurok Eng Ngperet nyanik-nyanik ya kuasa Beelzebul. 19Amen Ngperet nyanik-nyanik ya kuasa Beelzebul, ya kuasa bok pengikot-pengikot engkek naiperet nyanik-nyanik? Jadi, pengikot-pengikot liengkek naipebukti peniker engkek ajeh sek! 20Eng Ngperet nyanik-nyanik ya kuasa Jenang. Hal ajeh kiperneng Jenang ya mula Kimemerintah sebegei Raja ku engkap engkek.

21Bile sengoi kuat de cukop lengkap isenjate kijaga ideg, dikdij iharta selamat. 22Tapi, bile sengoi de lebeh kuat kiserag ru kipealah kek, isenjate doh birampas, ru dikdij iharta de bikot doh bibahagi.

23Bok imai de pek kisukong Eng, kek kilawan Eng. Ru bok imai de pek kikumpol pengikot-pengikot besama ru Eng, kek kibeh enai ajeh naiceraklah!”

Nyanik Kilos

(Mat 12:43-45)

24“Bile nyanik kihol ju numom sengoi, nyanik ajeh kikakkek tempat sod kaha-berihat. Tapi, bile pek kikep tempat sod, nyanik ajeh kiurok kaha-jog nij nu deg de ya kihol.

25Nyanik ajeh pen kijog ru kineng deg de kidek entem berseh ru besemiak. 26Jadi, kiajak tujoh nyanik kilek de lebeh jehat daripade kek. Dikdij liknai naimuj nu sengoi ajeh ru naigei ku pajeh. Ipenyudah, keadaan sengoi ajeh kijadi lebeh terok daripade canuk.”

Keremmik de Sejati

27Telas Yesus Kiurok begei ajeh, mong numom kerdor ju mai jengoi kiurok kuat, “Kek de kimakok ru kipermem ha Jen biberkat ya Jenang.”

28Tapi Yesus Kiberlag, “Mai de ceringai ru jijoi ha engrok Jenang ajehloh de biberkat ya Jenang.”

Mai Jengoi Naisemanj Tanda

(Mat 12:38-42; 16:4)

29Ku mase gumaken jeoi mai jengoi naibekumpol ku pajeh, Yesus Kiurok, “Sengoi ku jaman adeh ihad jehat. Naisemanj Ngperneng tanda ajaib. Tapi had nanek taleh tanda ajaib de Ngperneng nu engkek doh. Tanda ajeh tanda ajaib Nabi Yunus. 30Sama begei Nabi Yunus kijadi tanda nu mai ku kote Niniwe, Eng Kenon Manusia doh Ngjadi tanda ha sengoi jaman adeh. 31Ku arik Jenang Kipeadel dikdij mai, ratu ju lengrik Syeba doh kikos besama ru engkek mai jaman adeh lalu kitudoh ha engkek kerana ratu ajeh kihol ju mol bumi kaha-cerngai neajar Raja Salomo de cerdeg ajeh. Cerngailoh, ku padeh hunen mong Ilei de lebeh entoi daripade Raja Salomo!#1 Raj 10:1-10; 2 Taw 9:1-12 32Ku arik Jenang Kipeadel dikdij mai, mai de gigei ku kote Niniwe entem doh naikos besama ru engkek mai jaman adeh lalu naitudoh ha engkek kerana ya naibetobat ju dosa liknai bile naicerngai gah de biperlei ya Nabi Yunus. Cerngailoh, hunen ku padeh mong Ilei de lebeh entoi daripade Nabi Yunus!”

Lau ru Guer

(Mat 5:15; 6:22-23; Mrk 4:21; Luk 8:16)

33“Pek mong numom pen de kitod pelite lalu kidek ku tempat cenem atao kiserkop ya pasu, tapi tentu kek doh kidek pelite ajeh ku kemil parak supaye bok imai de mikmuj nu kateh deg kiburuk icahaya de lau. 34Mat engkek ajeh pelite berog engkek. Amen lau mat engkek, lauloh berog engkek juga. Tapi amen mat engkek guer, guerloh berog engkek juga. 35Jadi, jagaloh cahaya liengkek ajeh supaye pek kijadi guer. 36Amen dikdij berog engkek lau ru pek mong nanek pen anggote berog engkek ajeh de guer, engkek doh lau begei bisog ya cahaya pelite.”

Yesus Kipecelaka Mai Farisi ru Guru-guru Hukom Taurat

(Mat 23:1-36; Mrk 12:38-40)

37Telas Yesus Kibeajar, numom Farisi kipelawe Kek cakcak nu imadeg. Jadi, Yesus pen Kiet nu majeh ru Kigei cerner ku mije Kaha-cakcak. 38Mai Farisi ajeh kihiran kineng Yesus pek Kisuj Iteg canuk sebelom Kicakcak, kerana hal ajeh kilanggar adat jenang rak enai. 39Tuhan Yesus Kiurok nu kek, “Engkek mai Farisi begei cawan ru pingat de bisuj hat iluar taleh tapi ku ikateh tebeg ya tenamak ru jenghat. 40Engkek budoh! Hodloh engkepanei tentang hal adeh: Ilei de bahbeh ma de mong ku iluar Kibeh ma de mong ku ikateh juga. 41Ogloh ru senang sengik ma de mong ku engkek nu mai hajap. Amen engkebeh begei ajeh, luar ru kateh engkek doh jadi berseh.

42Celakaloh engkek mai Farisi kerana engkeog pesepulohan ju selaseh, inggu, ru herba-herba de kilek tapi engkeabaikan neadel ru haknok nu Jenang. Mimang engkepatot engkeog pesepulohan, tapi agokloh abaikan juga neadel ru haknok nu Jenang.#Im 27:30

43Celakaloh engkek mai Farisi kerana engkegemar gigei ku tempat ginei ha mai tehormat ku deg sembahyang, ru engkegemar bihormat ya mai kilek ku tempat kengnem. 44Celakaloh engkek kerana engkek begei ha penep de walah itanda. Engkek begei ha penep de bijebat-jebat ya mai de pek naisedar naicip ku kemil penep.”

45Numom ju guru-guru Hukom Taurat kiberlag nu Yesus, “Guru, bengwal Jen de begei ajeh kihina ha jik juga.”

46Yesus Kiberlag, “Celakaloh engkek guru-guru Hukom Taurat juga kerana engkedek beban de nyeh nu mai kilek tapi gek pen pek engkebeh ma-ma engkeha-tulog enai ajeh! 47Celakaloh engkek kerana engkebeh penep de bor-bor ha nabi-nabi tapi jenang rak liengkek sendiriloh de perdat ha enai. 48Jadi, engkebesetuju ru bahneh jenang rak engkek ajeh kerana enailoh de perdat nabi-nabi ru engkekloh de bahbeh penep ha nabi-nabi ajeh. 49Kerana ajeh, Jenang de cerdeg Kiurok, ‘Doh Ngngeng nabi-nabi ru rasul-rasul nu enai tapi doh naiperdat ru naisiksa nabi-nabi ru rasul-rasul ajeh!’ 50Jadi, mai jaman adeh doh naibetanggongjawab nu dikdij nabi de biperdat sejak dunia bibeh, 51mula ju danan Habel leiloh nu danan Zakharia de biperdat ku semakdek antare Deg Jenang ru tempat ennog pesembahan ha Jenang. Cerngailoh, mai jaman adeh doh naibetanggongjawab nu dikdij danan ajeh.

52Celakaloh engkek guru-guru Hukom Taurat kerana engkekerlag mai naipanei ha heknod Jenang. Liengkek sendiri engkenyek bepanei ha heknod Jenang, ru engkekerlag mai kilek juga de naiha-panei tentang hal ajeh!”

53Ya telas Yesus Kiet ju tempat ajeh, guru-guru Hukom Taurat ru mai Farisi mula naikecam ha Kek. Naitanya jeoi tenanya 54kerana naiha-perangkap Yesus ya Ibengwal.

Currently Selected:

LUKAS 11: AEH

Highlight

Copy