LUKAS 12

Amaran tentang Sengoi de Kibepure-pure

(Mat 10:26-27)

1Sementare beribu-ribu sengoi naibekerumun lei naijekbat ratak liknai, Yesus mula Kiajar Ipengikot-pengikot canuk. Kiurok, “Bejaga-jagaloh ha ragi mai Farisi, maksod Eng, sikap enai ajeh de nekbepure-pure.#Mat 16:6; Mrk 8:15 2Dikdij ma de bicernem doh biperlau ru dikdij ma de bikerdik doh bipasal nu jap-jap mai.#Mrk 4:22; Luk 8:17 3Ma de engkeurok serakngek doh bicerngai bik ku ngar mai jengoi, ru ma de engkebiseg ku entag ku kateh bilek de betutop doh bipasal kuat-kuat nu majeh-manen.”

Sengohloh ha Jenang

(Mat 10:28-31)

4“Ngurok nu engkek kekawat Eng, wesloh agok sengoh ha manusia de dapat naiperdat ha berog tapi pek naibekuasa naiha-beh ma-ma nij telas ajeh. 5Tapi Eng Ngternyol nu engkek Ilei de patot engkesengoh. Sengohloh ha Jenang kerana telas berog engkek biperdat, Kek bekuasa Kipej engkek nu kateh os nyeng. Betol-betol Ngurok nu engkek, sengohloh ha Kek!

6Lima ikor cep rej iregak due sen tapi pek nuikor pen de bisip ya Jenang. 7Merip ijengoi sog ku kui liengkek pen ya Kipanei. Kerana ajeh, wesloh agok sengoh ha manusia. Engkek lebeh beharga daripade jeoi cep rej!”

Neaku Kenon Manusia ku Ngar Manusia

(Mat 10:19-20, 32-33; 12:32; Mrk 3:29; 13:11; Luk 21:14-15)

8“Cerngailoh nij, bok imai de kiaku Eng ku ngar mai jengoi, Eng Kenon Manusia pen doh Ngaku kek ku ngar malikat-malikat Jenang. 9Tapi bok imai de kinyek beaku Eng ku ngar mai jengoi, Eng pen doh Ngnyek beaku kek ku ngar malikat-malikat Jenang.

10Bok imai de kilawan ha Eng Kenon Manusia kiguna bengwal nej doh biampon. Tapi bok imai de kihina Kelog Santen doh pek biampon.

11Bile engkek bidakwe ku deg sembahyang, atao ya pemerintah ru penguasa, agokloh risau begeiharok engkeha-bele diri ru ma de patot engkeurok 12kerana Kelog Santen doh Kiajar engkek ma de patot engkeurok ku mase ajeh.”

Perumpamaan tentang Sengoi Kaya de Budoh

13Numom ju mai jengoi ku pajeh kiurok nu Yesus, “Guru, orloh tenek eng kiperdok harta saka nu eng.”

14Tapi Yesus Kiurok nu kek ajeh, “Sedara, pek mong numom pen de belantek Eng untok jadi hakem atao pembahagi harta saka ku engkap engkek!” 15Lalu Yesus Kiurok nu mai jengoi ku pajeh, “Bejaga-jagaloh! Agokloh tamak kerana sinui manusia pek begantong nu jengoi iharta.”

16Telas ajeh Kek Kicerite perumpamaan adeh nu enai, “Mong numom mai kaya de ikennem hasel tik ihad jeoi. 17Kek kiserngik, ‘Ma de patot ngbeh kerana eng pek mong tempat ngha-dek hasel kennem tik eng?’ 18Lalu kiurok, ‘Adehloh de doh ngbeh. Eng doh ngteh deg-deg gudang eng ru ngbeh ilei de lebeh entoi nij. Doh ngdek dikdij gandom ru harta eng de kilek ku tempat pai ajeh. 19Telas ajeh doh ngurok nu diri lieng sendiri, “Hek mong jeoi harta de tahan pek dij betahut-tahut iluniu. Jadi berihatloh, cakcakloh, ngekngutloh, ru kerakmikloh!” ’ 20Tapi Jenang Kiurok nu kek, ‘Hek budoh. Ku kelem adeh juga nyawe hek doh bikot ju hek. Sie-sie taleh harta de hakumpol ajeh kerana doh bikep ya mai kilek!’

21Hal begei ajeh doh tejadi nu sengoi de kikumpol harta ha diri ilei sendiri tapi ilei ajeh pek kihargai hal-hal de beharga ku mat Jenang.”

Hal Nerisau

(Mat 6:25-34)

22Yesus Kiurok nu Ipengikot-pengikot, “Kerana ajeh, cerngailoh. Agokloh risau ma engkeha-cak untok engkeha-sui atao ma engke-ha log untok engketutop berog engkek. 23Sinui lebeh penteng daripade caknak, ru berog lebeh penteng daripade leknog.

24Peratikloh ha engag! Cep ajeh pek naisepag mat beneh ru pek naikikkej ru pek mong deg daknek caknak atao deg gudang, tapi Jenang Kiog caknak nu enai. Gandakloh engkek nij, engkek lebeh beharga daripade cep-cep ajeh! 25Pek mong numom pen ju engkap engkek de dapat kipecereg iumur hamapen nek gek ya inerisau sinui. 26Pekare de macot ajeh pen pek dapat engkebeh, jadi agokloh engkerisau tentang hal-hal de kilek. 27Peratikloh ha cengwai bunga-bunga ku padag. Bunga-bunga ajeh pek naikerakjak ru pek naitintaj. Tapi cerngailoh, Raja Salomo de ihad kaya ajeh pen pek kilog lebeh bor daripade bunga-bunga ajeh! 28Jenang Kihias rumpot ku padag hamapen rumpot ajeh mong ku arik adeh ru huper bipej nu kateh os. Amen Jenang Kibeh begei ajeh nu rumpot, gandakloh nij nu engkek. Tentu Jenang doh Kiog leknog nu engkek. Engkek mimang sengoi-sengoi de kurang pecaya nu Jenang!

29Jadi, agokloh risau ma de engkeha-cak ru ma de engkeha-ngut. Agokloh risau tentang hal-hal ajeh. 30Dikdij hal ajeh sentiase birisau ya mai de pek naikenal ha Jenang. Tapi Menek engkek ya Kipanei keperluan engkek ajeh.

31Ogloh diri engkek supaye biperintah ya Jenang sebegei Raja. Amen engkebeh begei ajeh, dikdij keperluan engkek ajeh doh biog nu engkek.”

Harta ku Serga

(Mat 6:19-21)

32“Engkek de gaknek, wes agok sengoh kerana Jenang Kipekenan Kaha-memerintah engkek sebegei Raja. 33Jualloh harta engkek ru og iduet nu sengoi hajap. Behloh dabal de pek dapat kirepot, imaksodjeh harta de engkedek ku serga. Harta ajeh selamat kerana ku pajeh mai siksij pek dapat kimuj ru bubok pek dapat kiperusak. 34Kerana, ku belok harta engkek mong, ku pajehloh juga sengik engkek mong.”

Hambe de Bejaga-jaga

35“Engkek hodloh sentiase engkebesiap-sedia ru pastikan juga pelite engkek sentiase der. 36Hodloh engkebesiap-sedia begei ha hambe-hambe de naipimpoj ha tuan enai kijog ju kenurik jekneg. Bile kijog ru kigadok pintu, enai dapat deras naibuka pintu ha kek. 37Tuan enai ajeh doh senang isengik amen kineng ihambe-hambe ajeh lekat naibejaga! Cerngailoh abor, tuan enai ajeh doh kisedia idiri kaha-layan ha enai ru kilawe enai gei cerner ku mije. Lalu doh kijamu enai cakcak. 38Tuan enai ajeh doh senang isengik amen kineng ihambe-hambe ajeh naibesiap-sedia naipoj ha kek pek kira kek kijog ku tengah kelem atao ku ipepegelap. 39Ingatloh hal adeh! Amen tuan deg kipanei pukol merip mai siksij kaha-hol, kek doh pek kibiar ideg bimuj. 40Kerana ajeh, engkek pen juga hodloh sentiase engkebesiap-sedia kerana Eng Kenon Manusia doh Nghol ku mase de pek engkesangka.”#Mat 24:44

Hambe de Setie ru Hambe de Pek Setie

(Mat 24:45-51)

41Petrus kitanya, “Guru, perumpamaan de Jencerite ajeh ha jik atao ha dikdij mai?”

42Tuhan Kiberlag, “Bokka ilei hambe de setie ru cerdeg? Ilei ajeh hambe de biog kuasa ya ituan supaye kiuros dikdij ihambe-hambe de kilek ru kiog caknak nu enai ku mase de ya bipetetap. 43Amen tuan ajeh kijog ru kineng ihambe ajeh kibeh ma de bior, ituan ajeh doh senang isengik nu kek. 44Cerngailoh abor! Tuan ajeh doh kiog kuasa nu hambe ajeh supaye kiuros dikdij iharta. 45Tapi seandainye hambe ajeh kiserngik, ‘Tuan eng pek kigujog-jog,’ jadi kek pen mula kipet hambe kekeral ru kekerdor, ru ilei kicakcak, kingekngut, ru kibelbel. 46Telas ajeh ku arik ru mase de pek kisangka, ituan ajeh doh kijog. Tuan ajeh doh kihukom hambe ajeh ihad nyeh ru kipej ihambe ajeh nu tempat mai de pek pecaya.

47Hambe de kipanei ha heknod ituan tapi pek kibesiap-sedia atao pek kibeh heknod ituan ajeh, kek doh kikena jeoi peknet. 48Tapi hambe de pek kipanei ha heknod ituan ru kibeh senalah, kek doh bipet had gek taleh. Nu sengoi de biog jeoi, ju kek doh bituntot jeoi juga. Nu sengoi de biog lebeh jeoi nij, ju kek doh bituntot lebeh jeoi nij juga.”

Yesus Kibeh Manusia Naiceraklah

(Mat 10:34-36)

49“Eng Nghol Ngha-pej os nu bumi, ru ihad Ngbeharap os ajeh ya der! 50Tapi lekat mong seniksa de ihad nyeh de patot Ngterima. Sengik eng ihad susah selagi hal ajeh pekseg sudah. 51Engkesangka Eng Nghol nu dunia adeh Ngha-beh mai naisui damei? Tok! Cerngailoh, Eng pek Nghol Ngha-beh mai naisui damei, tapi Ngha-cerlah engkek. 52Ju hunen, lima urag ku kateh nanek peringak doh bicerlah: Nik lawan nar, ru nar lawan nik. 53Enai doh naibelawan ratak liknai: Iapak kilawan ikenon keral, ru ikenon keral kilawan iapak. Iamek kilawan ikenon kerdor, ru ikenon kerdor kilawan iamek. Ijak kilawan imengsau kerdor, ru imengsau kerdor kilawan ijak.”#Mi 7:6

Tanda ha Jaman Adeh

(Mat 16:2-3)

54Yesus Kiurok nu mai jengoi, “Bile engkeneng sagop kihuj ju arah barat, segera engkeurok, ‘Iarik kaha-manik,’ ru hal ajeh mimang tejadi. 55Bile engkerasa pinoi kipoi ju arah selatan, engkeurok, ‘Iarik kaha-beked,’ ru hal ajeh mimang tejadi. 56Engkek sengoi de nekbepure-pure! Engkek dapat engkeagak ha iarik bile engkeneng tanda-tanda de tejadi ku langit ru ku bumi, tapi pek engkepaham tanda-tanda ha jaman adeh.”

Berbor ru Musoh

(Mat 5:25-26)

57“Petentu ya liengkek sendiri ma de engkerasa betol hod engkebeh. 58Amen mong mai de kaha-dakwe engkek ku mahkamah, cubaloh engkeberbor ru sengoi ajeh ku mase engkek lekat ku kateh ceknip nu mahkamah. Amen tok, sengoi ajeh doh kisaher engkek nu ngar hakem, ru hakem ajeh doh kiog engkek nu ipegawei lalu ipegawei ajeh doh kipermuj engkek nu kateh jel. 59Cerngailoh, engkek doh pek dapat engkehol ju kenjeh leiloh engkebayar dij idende.”

Currently Selected:

LUKAS 12: AEH

Highlight

Copy