LUKAS 13
13
Hod Betobat
1Ku mase ajeh, memerip urag naipasal nu Yesus tentang Pilatus de kiperdat mai lengrik Galilea de tengah naipesembah korban nu Jenang. 2Yesus Kiurok, “Kerana enai biperdat begei ajeh, dosa enai ajeh lebeh entoika daripade dosa mai Galilea de kilek? 3Tok! Tapi Ngurok nu engkek, amen pek engkebetobat ju dosa, engkek juga pen doh bipebinasa. 4Ya engkepanei tentang 18 urag de dat bitimpak ya deg menare ku Siloam. Dosa enai ajeh lebeh entoika daripade dikdij mai kilek de gigei ku kote Yerusalem? 5Tok! Tapi Ngurok nu engkek, amen pek engkebetobat ju dosa, engkek juga pen doh bipebinasa.”
Perumpamaan tentang Keneng Jehuk Are de Pek Bepelek
6Lalu Yesus Kiurok perumpamaan adeh nu enai, “Numom mong nutarek keneng are ku ikebon anggor. Ku nanek arik, kek kikek ha pelek ku keneng are ajeh tapi pek kiburuk ma-ma. 7Kerana ajeh, kek kiurok nu ipekerjak kebon, ‘Nengloh, nik tahut iluniu eng nghol ru ngkek ipelek tapi pek ngburuk nukebek pen. Gikloh keneng jehuk adeh kerana kijendak ha tik taleh!’ 8Tapi, ipekerjak kebon ajeh kiberlag, ‘Tuan, dekloh keneng jehuk adeh ku tahut adeh taleh. Eng doh ngcangkol kelileg itik ru doh ngcup ya baja. 9Amen keneng jehuk adeh kibepelek ku tahut nu ngar doh, borloh. Tapi amen tok, gikloh.’ ”
Yesus Kiperbor Numom Kerdor Cungkoh ku Arik Sabat
10Ku nanek arik Sabat, Yesus Kibeajar ku deg sembahyang. 11Ku pajeh, mong numom kerdor de cungkoh ru pek dapat kijinjeg tegak 18 tahut iluniu kerana bisangrog ya nyanik. 12Mase Yesus Kineng ha kerdor ajeh, Yesus Kicereg kek ajeh ru Kiurok, “Ju hunen hek ya habor!” 13Lalu Yesus Kidek Iteg ku kerdor ajeh, ru ku sarik jijeh juga kerdor ajeh kijinjeg tegak lalu kipateh ha Jenang.
14Pemimpen deg sembahyang ajeh kibelal kerana Yesus Kiperbor mai ku arik Sabat. Kek kiurok nu dikdij mai ku pajeh, “Ku kateh seminggu, mong enam arik untok hikerakjak. Holloh ku mase ajeh untok engkek biperbor, apeka ku arik Sabat!”
15Tuhan Kiberlag nu pemimpen ajeh, “Hek, sengoi de nekbepure-pure! Ku arik Sabat, dikdij liengkek engketerlas lembu atao keldei ju kandag ru engkeen enai nu luar supaye naingut teu. 16Nengloh, ku padeh mong numom kerdor ju kenon-cenok Abraham de bikurog ya Ibles iluniu ya 18 tahut. Kek mimang patot biterlas ju kenurog Ibles ku arik Sabat!” 17Berenglag Yesus ajeh kipeselsel dikdij mai de nailawan Kek tapi mai kilek naikerakmik ha dikdij bahneh Yesus de ihad ajaib.
Perumpamaan tentang Mat Sawi
(Mat 13:31-32; Mrk 4:30-32)
18Lalu Yesus Kiurok, “Ijengoi sengoi-sengoi de biperintah ya Jenang sebegei Raja doh gumaken jeoi begei ha perumpamaan adeh: 19Numom kikot numeknat mat sawi, lalu kicet ku iselai. Mat sawi ajeh kicuai ru kijadi nutarek jehuk, lalu cep naibeh deg ku icag.”
Perumpamaan tentang Ragi
(Mat 13:33)
20Yesus Kiurok nij, “Sengoi-sengoi de biperintah ya Jenang sebegei Raja doh naipengaroh ha sengoi-sengoi dunia 21begei ha perumpamaan adeh: Numom kerdor kikot ragi lalu kigaol ru 40 liter tepong lei dikdij genaol ajeh kihuj.”
Pintu de It
(Mat 7:13-14, 21-23)
22Ku kateh Iceknip nu kote Yerusalem, Yesus Kilalu memerip pekan ru kampug sambel Kibeajar. 23Mong numom kibetanya nu Yesus, “Jen, had gaknek talehka sengoi de doh bipeselamat?”
24Yesus Kiberlag nu mai jengoi ku pajeh, “Kerekwatloh betol-betol engkeha-muj nu pintu de it kerana jeoi mai naikerekwat naiha-muj tapi doh pek dapat. 25Ku mase ituan deg kikos ru kitutop ipintu, engkek de jinjeg ku luar doh engkegadok ha pintu ru engkeurok, ‘Tuan, bukaloh pintu ha jik!’ Tapi doh kiberlag, ‘Eng pek ngkenal engkek!’ 26Lalu doh engkeberlag, ‘Jik mong jicakcak ru jingekngut ru enjen, ru enjen juga mong jenbeajar jik ku kote jik!’ 27Tapi kek doh kiurok, ‘Eng pek ngkenal engkek. Etloh ju kendeh, dikdij engkek de bahbeh jehat!’
28Ku mase engkeneng ha Abraham, Ishak, Yakub, ru juga dikdij nabi-nabi mong ku serga de biperintah ya Jenang sebegei Raja tapi engkek bipej nu luar, engkek doh engkejinjap ru ihad engketesiksa. 29Mai doh naihol ju seluroh bumi untok naiha-cakcak ku caknak de bibeh ku serga de biperintah ya Jenang sebegei Raja.#Mat 8:11-12 30Cerngailoh! Sengoi de keknit doh kijadi canuk, ru sengoi de canuk doh kijadi keknit.”#Mat 19:30; 20:16; Mrk 10:31
Haknok Yesus nu Kote Yerusalem
(Mat 23:37-39)
31Ku mase ajeh juga, mong memerip urag mai Farisi naiterbuk nu Yesus ru naiurok, “Etloh ju kendeh kerana Raja Herodes Antipas kaha-perdat Jen.”
32Yesus Kiberlag, “Et pasal nu sengoi jehat ajeh, ‘Ku arik adeh ru ku arik huper, Eng doh lekat Ngperet nyanik ru Ngperbor mai nyik. Ku arik inik doh, baruloh tugas Eng siap.’ 33Hamapen begei ajeh, Eng mesti lekat Ngpeteros ceknip Eng nu kote Yerusalem ku arik adeh, ku arik huper, ru ku arik puuteh juga. Eng Ngcip nu majeh kerana had ku Yerusalem talehloh nabi-nabi biperdat.
34Yerusalem, Yerusalem! Engkeperdat nabi-nabi ru engkepej batu nu sengoi-sengoi de bingeng ya Jenang! Ya memerip kali Eng Ngha-eb dikdij liengkek begei ha nuikor amek pog de kieb ikekenon ku kerop ikengyeg, tapi engkenyek! 35Yerusalem, engkek doh biwes ya Jenang lei serakngek bokhentok de mong ku pajeh. Cerngailoh, engkek doh pek engkebakek ha Eng nij lei tiba imase Nglos nij nu engkek ru engkeurok begei adeh: ‘Semoge Kek de Kihol sebegei wakel TUHAN biberkat.’ ”#Mzm 118:26; Mat 21:9; Mrk 11:9; Yoh 12:13
Currently Selected:
LUKAS 13: AEH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
