LUKAS 14
14
Perembor ku Arik Sabat
1Ku nanek arik Sabat, Yesus Kiet Kicakcak nu deg numom pemimpen mai Farisi. Sengoi ku pajeh naicerimat ha Yesus. 2Ku pajeh mong numom keral de as iberog ya teu kiterbuk nu Yesus. 3Yesus Kitanya nu guru-guru Hukom Taurat ru mai Farisi ku pajeh, “Amen hijoi ha Hukom Taurat, bulehka tok hiperbor mai ku arik Sabat?”
4Tapi naikerakdik serakngek pek naiurok ma-ma. Jadi, Yesus Kicap sengoi ajeh ru Kiperbor kek ru Kior kek et. 5Telas ajeh Yesus Kiurok nu enai, “Amen numom ju engkek mong ikenon keral atao ilembu yog nu kateh perigi ku arik Sabat, ya tentu doh kiperhol ikenon atao ilembu ajeh ku sarik jijeh juga.”#Mat 12:11
6Naikerakdik serakngek pek dapat naiurok ma-ma.
Rendah Diri
7Bile Yesus Kineng ha memerip urag tengloh de naipileh tempat ginei ha sengoi-sengoi tehormat ku mije caknak ajeh, Kek pen Kicerite perumpamaan adeh nu dikdij enai: 8“Amen numom kipelawe engkek nu kenurik jekneg, agokloh gei ku tempat ginei ha sengoi-sengoi tehormat. Enggamak mong sengoi de lebeh penteng daripade engkek de bipelawe juga. 9Amen begei ajeh, tuan deg doh kiurok nu engkek, ‘Maap, tempat adeh ya bisedia ha sengoi adeh.’ Engkek doh engkeselsel, lalu tepaksa engkegei ku tempat de paleng belakang. 10Tapi bile engkek bipelawe, etloh gei ku tempat ginei de paleng belakang supaye tuan deg kihol nu engkek ru kiurok, ‘Bei sedara, geiloh ku tempat de lebeh bor.’ Lalu, engkek doh bihormat ku ngar dikdij tengloh de mong ku pajeh. 11Bok imai de kipetinggi idiri doh biperendah, ru bok imai de kiperendah idiri doh bipetinggi.”#Mat 23:12
12Lalu Yesus Kiurok nu tuan deg ajeh, “Bile hapelawe mai ha caknak tengah arik atao caknak kelem, agokloh pelawe kawat, atao tenek-menang, atao sedara-mara lihek, ataopen jiran hek de kaya. Amen habeh begei ajeh, enai doh naipelawe balek ha hek, ru haterima balek benalas ha bahneh lihek ajeh. 13Tapi bile habeh caknak ha mai, pelaweloh mai hajap, mai lumpoh, mai capek, ru mai buta. 14Hek doh biberkat kerana enai pek dapat naibalas balek bernor hek ajeh. Bernor hek ajeh doh bibalas ya Jenang ku arik sengoi-sengoi de benar ku mat Jenang biberkos ju danan.”
Perumpamaan tentang Kenurik Caknak de Entoi
(Mat 22:1-10)
15Numom ju sengoi-sengoi de naigei cakcak besama ru Yesus kicerngai ha bengwal Yesus ajeh. Kiurok nu Yesus, “Sengoi-sengoi de doh naicakcak ku caknak de bibeh ku serga de biperintah ya Jenang sebegei Raja, enai ajeh sengoi-sengoi de biberkat ya Jenang!”
16Yesus Kiurok nu sengoi ajeh, “Mong numom kibeh kenurik caknak de entoi. Kek kipelawe jeoi mai. 17Bile ya lei imase caknak ajeh bimula, kek kior ihambe kipasal nu dikdij mai de ya bijempot, ‘Beiloh, dikdij ya siap!’ 18Tapi numom penumom naiog alasan. Sengoi petame kiurok, ‘Eng pai ngbeli tik ru hod ngneng tik ajeh. Eng ngsemanj maap.’ 19Numom nij kiurok, ‘Eng pai ngbeli 10 ikor lembu ibek ru ngha-cuba guna lembu ajeh. Eng ngsemanj maap.’ 20Numom de kilek kiurok, ‘Eng pai ngjekjeg. Kerana ajehloh, eng pek dapat nghol.’ 21Hambe ajeh kijog ru kipasal nu ituan ha dikdij pekare ajeh. Tuan ajeh ihad kibelal, lalu kiurok nu ihambe ajeh, ‘Deras et nu jap-jap nong ru lurong, pelaweloh mai hajap, mai lumpoh, mai buta, ru mai capek.’ 22Ihambe ajeh kiurok, ‘Tuan, ernor enjen ya bibeh tapi lekat mong tempat kusong.’ 23Lalu tuan ajeh kiurok nu ihambe, ‘Et nu jap-jap nong ru lurong ku selai-selai, paksa sengoi naihol supaye deg eng tebeg.’ ” 24Yesus Kiurok nij, “Cerngailoh, pek mong numom pen ju tengloh de ya naipelawe ajeh doh kicakcak ku caknak kenurik eng!”
Wes Dikdij Hal ha Joi Yesus
(Mat 10:37-38)
25Mai jengoi naicip besama ru Yesus. Kek Kiceleg nu enai ru Kiurok, 26“Bok imai de kihol nu Eng tapi pek kihok Eng lebeh daripade ikeneng-menek, ikenon-kenah, itenek-menang, malah lebeh daripade nyawe ilei sendiri, kek pek buleh kijadi pengikot Eng.#Mat 10:37 27Bok imai de kaha-joi Eng tapi kinyek betanggong senusah lei hod kidat, kek pek buleh kijadi pengikot Eng.#Mat 10:38; 16:24; Mrk 8:34; Luk 9:23 28Amen numom ju engkek kaha-beh nanek menare, kek hod kikira canuk ibelanja supaye kipanei ijerengkeh cukopka tok kaha-peselesei ikerjak ajeh. 29Amen tok, telas ya kibeh iasas menare ajeh, kek pek dapat kipeselesei ikerjak ajeh. Lalu dikdij mai de nengneng hal ajeh doh nailog ha kek. 30Enai doh naiurok, ‘Nengloh, sengoi adeh kimula ikerjak tapi pek dapat kipeselesei!’ ”
31“Amen raja de mong 10 ribu urag aska kaha-beperag ru raja kilek de mong 20 ribu urag aska, raja ajeh hod kiserngik canuk ilei ajeh cukop kuatka tok kaha-lawan imusoh. 32Amen ilei pek mampu kaha-lawan, kek doh kingeng numom utusan untok kaha-berbor ru imusoh sementare imusoh ajeh lekat nyak. 33Begei ajeh juga nu dikdij liengkek. Pek mong numom pen ju engkek de buleh kijadi pengikot Eng amen pek kiwes dikdij hal de kipunya.”
Empoj de Beloj
(Mat 5:13; Mrk 9:50)
34“Empoj ihad beguna tapi amen empoj ya kibeloj, empoj ajeh pek dapat bipegerag nij. 35Empoj de beloj ya pek beguna nij ha tik ataopen biha-beh baja. Empoj ajeh doh bipej taleh! Amen engkek beentag, cerngailoh!”
Currently Selected:
LUKAS 14: AEH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
