LUKAS 15
15
Perumpamaan tentang Dombe de Nyep
(Mat 18:12-14)
1Ku nanek arik, mong jeoi pengutep cukei ru mai bedosa naibekumpol naiha-cerngai Yesus. 2Mai Farisi ru guru-guru Hukom Taurat naileunj, “Kek Kiterima mai bedosa ru Kigei Kicakcak ru enai.”#Luk 5:29-30 3Lalu Yesus Kicerite perumpamaan adeh nu enai:
4“Amen numom ju engkek mong 100 ikor dombe tapi nyep nuikor, maloh de kibeh? Tentu kek doh kiwes 99 ikor dombe ku padag rumpot ru kiet kikek nuikor dombe de nyep ajeh lei kikep. 5Bile ya kikep balek idombe ajeh, kek kikerakmik ru kigulap ku igelpal 6lalu kijog. Telas ajeh kicereg ikekawat ru ijiran-jiran ru kiurok, ‘Kerakmikloh besama ru eng kerana ya ngkep balek dombe eng de nyep!’ 7Begei ajehloh juga ku serga. Mong keremmik de lebeh entoi ha numom sengoi bedosa de kibetobat daripade 99 urag sengoi de naianggap diri liknai benar ru nainyek betobat.”
Perumpamaan tentang Duet de Nyep
8“Amen numom kerdor mong 10 duet perak tapi nyep nanek, maloh de kibeh? Tentu kek kisog ya pelite, kipes ideg, ru kikek ru ihad cerimat lei kikep balek iduet ajeh. 9Bile ya kikep balek iduet ajeh, kek kicereg ikekawat ru ijiran-jiran ru kiurok, ‘Kerakmikloh besama ru eng kerana ya ngkep balek duet eng de nyep!’ 10Begei ajeh juga malikat Jenang naikerakmik bile numom sengoi bedosa kibetobat.”
Perumpamaan tentang Kenon de Rikroj
11Yesus Kiurok nij, “Mong numom keral de mong nar mom kenon keral. 12Kenon de iloj kiurok nu imenek, ‘Apak, ogloh harta bahagian eng.’ Jadi, imenek ajeh pen kibahagi iharta nu ubai ikekenon. 13Pek liu ju kenjeh, kenon de iloj ajeh kikumpol dikdij iharta ru kiet nu lengrik de nyak. Ku pajeh, kek kijendak iharta ya sinui de pek tentu. 14Telas kiperdij iharta, mong belaku cengwag de ihad terok ku seluroh lengrik ajeh ru kek pen kisui melarat. 15Jadi, kek kikerjak ku numom sengoi ku lengrik ajeh de kior kek kijaga lek ku iladang. 16Kek ihad kicuag lei kaha-cak caknak lek ajeh. Tapi pek mong numom pen de naiha-og caknak nu kek.
17Kenon de iloj ajeh mula kisedar ru kiserngik, ‘Pekerjak-pekerjak menek eng naikep jeoi caknak lei belebeh-lebeh tapi eng ku padeh ngha-dendat ya cengwag! 18Eng doh ngjog nu menek eng ru ngurok nu kek begei adeh: “Apak, eng ya ngbedosa nu Jenang ru nu enjen. 19Eng pek layak bicereg kenon jen. Anggaploh eng sebegei pekerjak jen.” ’ 20Jadi, kek pen kijog nu imenek.
Imenek ya kibakek kek ju kennyak. Ya penoh neyayak, imenek ajeh kijerjar nu kek, kikawal, ru kinyui ha ikenon ajeh. 21Ikenon ajeh kiurok, ‘Apak, eng ya ngbedosa nu Jenang ru enjen. Eng pek layak bicereg kenon jen nij.’ 22Tapi imenek ajeh kicereg ipekerjak ru kiurok, ‘Deras, kot leknog de paleng bor ru perlog nu kek. Perlog juga cincet nu ijari ru kasot nu ijog. 23Pileh ru gojloh nuikor kenon lembu de bakcok. Beiloh hicakcak ru hibesuka 24kerana kenon eng adeh ya dat tapi ya kibalek sui nij. Kek ya rikroj tapi ya ngkep balek nij.’ Lalu enai pen naibesuka.
25Semase hal ajeh tejadi, kenon de sulog mong ku iselai. Mase kek kijog nu madeg, kicerngai engrok lagu ru mong mai naiberunggen. 26Kek kicereg numom ju ipekerjak lalu kitanya, ‘Ma de belaku ku padeg?’ 27Ipekerjak ajeh kiberlag, ‘Menang jen ya kijog. Menek jen kior goj kenon lembu de bakcok kerana menang jen ya selamat kijog!’ 28Kenon de sulog ajeh ihad kiberiknos ru kinyek pek kaha-muj nu madeg. Jadi, imenek kihol nu luar ru kipujok kek. 29Tapi ikenon ajeh kiurok, ‘Betahut-tahut eng ngbekerjak begei numom hambe jen, ru pek pernah nglawan ernor jen. Tapi nuikor kenon kambeg pen pek pernah jenog nu eng supaye ngbesuka ru kekawat eng. 30Tapi, bile kenon jen ajeh kijog telas kiperdij harta jen ru pelacor, jengoj kenon lembu de bakcok ha kek.’ 31Imenek kiberlag, ‘Bei, hek sentiase mong besama ru eng. Ma taleh hak eng ajeh, hak hek juga. 32Tapi hik patot hibesuka ru hikerakmik kerana menang hek ajeh ya dat tapi ya kibalek sui nij. Entem kek rikroj tapi ya hikep balek nij.’ ”
Currently Selected:
LUKAS 15: AEH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
