Yohan 15

Yesu nø bìmrøng mvdø̀ng í we

1“Ngà nø bìmrøng mvdø̀ng ǿngàe. Ngà Vpè nø vshv́ngshú íe. #Shz. 80:8; Yer. 2:21 2Ngà vdòng taq caqshì nø̀ àngshí mvzí we dvgv̀ng í dv́ngte sv̀ng À:ngí tu:tnò nø̀, àngshí zí we dvgv̀ng í dv́ngte nø, àngshí té zílv́m rvt À:ngí dvshè:ròe. #Mat. 15:13 3Nàmaq nø Ngàí shø̀nò we kà rvt akvtni èshèrv́mshà. 4Nàmaq nø Ngà vdòng èv̀lnø̀ng. Ngà gø nàmaq vdòng v̀llv́m íe. Bìmrøng taq mvcaqshì we dvgv̀ng nø àngshí zí mvlú:nò dø, nàmaq gø Ngà vdòng mèv̀lnø̀ng ninø, àngshí mèzí lóngnø̀ng. 5Ngà nø bìmrøng ǿngàe, nàmaq nø dvgv̀ngrì èínø̀nge. Ngà vdòng vl nø Ngà gø àng vdòng vl we wegǿ nø àngshí gvzà zí longe. Pàwá wani Ngà taq mècaqshìnø̀ng nìnø nàmaqí pà gø wá mèlúnnø̀ng. #1Kr. 12:12,27; 2Kr. 3:5 6Ngà vdòng taq màvl gǿ nø gu:rò nø̀ shúngvm we dvgv̀ng dø íe. Werì sv̀ng mvshù:mò dá:ngí svmi sv̀ng gu:rò nø̀ vkatnvme. #Mat. 3:10; 13:40 7Nàmaq nø Ngà vdòng èv̀lnø̀ng nø, Ngà kà gø nàmaq vdòng vl nìnø, nàmaq èshòngnø̀ng we kapà gø èrøtshìnø̀ng. Wekvt nàmaq sv̀ng èzí daqnø̀nge. #Mak. 11:24 8Nàmaq nø àngshí gvzà èzínø̀ng yv́ngkèní Ngà coqcv́n jǿng èínø̀ng we dvtan lú:ngòe. Wekvt Vpè ngø̀rdvgùng bung longe. #Mat. 5:16 9Vpèí Ngà sv̀ng èshòng dø, Ngàí gø nàmaq sv̀ng shù:ngìe. Ngà shóngnøt vdòng èv̀lnø̀ng. 10Vpè dvkv́mkà Ngàí cv̀nò nø̀, Àng shóngnøt vdòng Ngà vl dø tiqdvchá, nàmaq gø Ngà dvkv́mkà ècv̀nnø̀ng nìnø, Ngà shóngnøt vdòng èvl lóngnø̀nge. #Yoh. 8:29; 14:15; 1Yh. 2:4 11Ngà dvbùnøt nàmaq vdòng vl nø nàmaq dvbùnøt dv̀n zø̀nglv́m dvpvt, Ngàí nàmaq sv̀ng yadv́ng pv̀n dvtá bǿshà. #Yoh. 17:13

12Yalòng nø Ngà dvkv́mkà íe. Ngàí nàmaq sv̀ng shù:ngì dø, nàmaq tiqgǿ nø tiqgǿ nàshòngkénø̀ng. #Yoh. 13:34; 1Yh. 3:11 13Vdè rv̀mnvng dvpvt vdè gø̀nshaq dvbǿmshì we yalòng mvdv̀m té ring we shóngnøt nø màvl. #Yoh. 10:11; 1Yh. 3:16 14Nàmaq nø Ngàí dvká:mì rì ècv̀nnø̀ng ninø, Ngà rv̀mnvngrì èínø̀nge. #Mat. 12:50; 28:20; Yoh. 8:31 15Akvt kèní Ngàí nàmaq sv̀ng vshuq màa:lì. Kadø íe wani vshuqí nø àngkà:ngí kapà wàò we mvsháò. Nàmaq sv̀ng nø Ngàí rv̀mnvng a:lìe. Kadø íe wani Vpè yv́ngkèní Ngàí tángò rì shvngbe nàmaq sv̀ng dvtá bǿshà. 16Nàmaqí Ngà sv̀ng rècv̀ngshà we mø̀í, Ngàí mv̀ng nàmaq sv̀ng rvcv̀ng bǿshà. Nàmaq èdìnø̀ng nø zá:nò we àngshí zílv́m Ngàí nàmaq sv̀ng bv̀nlì shvri bǿshà. Wekvt Ngà bø̀ng kèní nàmaqí Vpè sv̀ng kapà èrøtnø̀ng nìgø, À:ngí nàmaq sv̀ng èzí daqnø̀nge. #Yoh. 6:70; 13:18 17Nàmaq tiqgǿ nø tiqgǿ vshòngké ràe. Yalòng nø Ngà dvkv́mkà íe.

Rvgaqí shvngo ra we

18Rvgaqí nàmaq sv̀ng shèngovtnø̀ng kvt, nàmaq sv̀ng shini mèshèngonø̀ng dvgvp, Ngà sv̀ng shèngong we sv̀ng èshánø̀ng. #Yoh. 7:7; 1Yh. 3:13 19Nàmaq nø rvgaqò èínø̀ng nìnø, rvgaq nø àngòrì sv̀ng shóngshì døni nàmaq sv̀ng èshòngnø̀ng ni we íe. Ínìgø nàmaq nø rvgaqòrì mèínø̀ng. Ngàí nàmaq sv̀ng rvgaq kèní rvcv̀ng bǿshà rvt, rvgaqí nàmaq sv̀ng shèngonø̀ng we íe. #Luk. 6:22; Yoh. 17:14; 1Yh. 4:5 20‘Vshuq nø àngkàng mvdv̀m té ring we mø̀í,’ wvng nàmaq sv̀ng Ngàí vl bǿshà kà sv̀ng mèsøngnø̀ng. Àngmaqí Ngà sv̀ng dv́ng dvki nàrèng nìnø, nàmaq sv̀ng gø dvki nàrèvtnø̀nge. Àngmaqí Ngà kà sv̀ng cà:nò nìnø, nàmaq kà sv̀ng gø cv̀n lúngòe. #Mat. 10:24; Yoh. 13:16 21Ngà bø̀ng rvtnø̀ àngmaqí nàmaq sv̀ng yadv́ng pv̀n shvngbe èwàvtnø̀nge. Kadø íe wani, Ngà sv̀ng dèzv́r dakngà pè kaq àngmaqí mvsháò rvt íe. #Mat. 5:11; Mak. 13:13; Yoh. 16:3 22Ngà la mvdø̀ng nø àngmaq sv̀ng mvshø̀nò nìnø, àngmaq nø mvrà màvl ni we íe. Íwe akvt nø, àngmaq mvrà dangø dvpéshìlv́m màv̀lá:mì. 23Ngà kaq shèngong gǿ nø, Vpè sv̀ng gø shvngoshì we íe. #Luk. 10:16; Yoh. 5:23; 1Yh. 2:23 24Kagǿí gø mvwà dá:rò we bv̀nlì Ngàí àngmaq dvhø̀ taq mvwv̀ng yv̀ngò nìnø, àngmaq nø mvrà màvl ni we íe. Akvt nø yadv́ng pv̀n àngmaqí yv̀ng bǿà nìgø, Ngà sv̀ng gø, Vpè sv̀ng gø àngmaq shvngoshìe. #Yoh. 14:11 25Íwe yalòng nø, ‘Mvtú màdáshaq Ngà sv̀ng àngmaq shvngoshìe,’ wa àngmaq Dvrá kàru taq vru yà:ngà kà dvhø̀:mò we íe. #Shz. 35:19; 69:4 26Vpè yv́ngkèní di daq nø Ngàí nàmaq yv́ngsv̀ng dvzv́ralv́m í we dìnglòng Pvlàcè, Dvbvngshú tuq daq kvt, Àng nø Ngà dang shvkse wáshì daqe. #Luk. 24:49; Yoh. 14:26 27Nv̀mlat kèní Ngà nv̀ng tiqdø èvlnø̀ng rvtnø̀, nàmaq gø Ngà dang shvkse èwáshì lóngnø̀nge.” #Luk. 1:2; Dzr. 1:8; 5:32

Currently Selected:

Yohan 15: GSM

Highlight

Copy