Yohan 16

1“Ngàí nàmaq sv̀ng yadv́ng pv̀n dvtáì we nø nàmaq kv́mnøt mvtìnlv́m rvt íe. #Yoh. 14:29 2Àngmaqí nàmaq sv̀ng júrøt chø̀m kèní èlùngvtnø̀nge. Nàmaq sv̀ng èshvtnø̀ng rì nø, àngmaqí yadø wàì lòng nø Gvray kaq dvzø:mì we íe, wa dvda:mò we rvtø̀ tuq rae. #Mat. 5:11; 24:9; Luk. 6:22; Yoh. 9:22 3Àngmaqí nø Vpè sv̀ng gø, Ngà sv̀ng gø, mèsháshì rvtnø̀ yadv́ng pv̀n wà lú:ngòe. #Yoh. 15:21 4Ngàí nàmaq sv̀ng yadv́ng pv̀n dvtáì we nø werì bø̀n long dvgvp Ngàí dvtáshaq í we yarì sv̀ng nàmaqí dvdvm rǿnlvm dvpvt íe. Yadv́ng pv̀n dang nv̀mlat kení nàmaq sv̀ng mvshø̀nò we gø Ngà nø nàmaq nv̀ng shini à:lì rvt íe.

Yesu tvle Dvbvngshú dvzv́r daqò we

5Ínìgø akvt Ngà nø Ngà sv̀ng dèzv́r dakngà Pè yv́ngsv̀ng longvme. Íwe, ‘Nà kayv́ng èlovme?’ wa nø nàmaq kagǿí gø lemèrøtshà ni. 6Ngàí nàmaq sv̀ng yadv́ng pv̀n shø̀n bǿngà rvtnø̀, nàmaq taq nøt dvshà lòng èzø̀ngv́mshà. 7Ínìgø, Ngàí nàmaq sv̀ng kàdøng vla:tnìni, Ngà longvm lòng nø nàmaq dvpvt té shvla we íe.#Yoh. 14:16,26 Ngà mvlongvm nø̀ngnø Dvbvngshú nø nàmaq yv́ngsv̀ng mvdi daq. Ngà longvm kvt wa, Ngàí Àng sv̀ng nàmaq yv́ng dvzv́r dakngòe. 8Àng tuq daq kvtnø, mvrà vl dang gø, døngman dang gø, kàngélv́m dang gø, rvgaq tø̀m vsv̀ng kaq À:ngí chaqdvp dvtan daqòe. #1Kr. 14:24 9Àngmaq nø Ngà sv̀ng mvkv́m rvtnø̀ mvrà vl dang dvtan daqòe. #Yoh. 3:18; Rom. 1:18-19 10Ngà nø Vpè yv́ngsv̀ng longvm nø nàmaqí Ngà sv̀ng mèyv̀ng lóngshà rvt, døngman dang dvtan daqòe. #Dzr. 5:31 11Rvgaq yalòng øpshú dùpè sv̀ng kàngéshaq íá:mì rvtnø̀, kàngélv́m dang dvtan daqòe. #Yoh. 12:31; 14:30 12Ngàí nàmaq sv̀ng shø̀nlv́m gvzà vl nìgø akvt nø nàmaqí vto mèngutnø̀ng. #1Kr. 3:1-2 13Ínìgø dìnglòng dvtanshú Pvlàcè tuq daq kvt nø, nàmaq sv̀ng dìnglòng í dv́ngte shá dèzv́rvtnø̀nge. #Yoh. 14:26; 1Yh. 2:27 Àng nø Àng nø:tní mvshø̀n. Íwe À:ngí táò dv́ngte wa shø̀:nòe. Vzv̀ng kaq bø̀nlv́m rì gø dètá daqnø̀nge. 14Kadø íe wani Ngà yv́ngkèní lúnò we kàrì À:ngí nàmaq sv̀ng dètá daqnø̀ng nø Ngà ngø̀rdvgùng shvring lú:ngòe. 15Vpè yv́ng vl dv́ngte shvngbe nø Ngàò èǿngange. Wervtnø̀, Pvlàcèí nø Ngà yv́ngkèní lúnò we kàrì nàmaq sv̀ng dètá daqnø̀nge, vl bǿshà we íe. #Yoh. 3:35; 17:10

Nøt yòr lòng nø dvbùlv́m vpovm we

16Tv́n tiqlvng kèní nàmaqí Ngà sv̀ng mèyv̀ng lóngshà. Tiqlvng mèpvng vrá nàmaqí Ngà sv̀ng èyv̀ng lóngshàe,” a:lòe. #Yoh. 14:19 17Àng coqcv́nrì tiqmaq nø, “À:ngí nøngmaq sv̀ng, ‘Tv́n tiqlvng kèní nàmaqí Ngà sv̀ng mèyv̀ng lóngshà. Tiqlvng mèpvng vrá nàmaqí Ngà sv̀ng èyv̀ng lóngshàe,’ vrá, ‘Vpè yv́ngsv̀ng Ngà longvme,’ wa kà nø kadø wa we í má?” wa vrùnge. 18“‘Tv́n tiqlvng kèní,’ wa kà nø kadø wa we í má? Kapà sv̀ng shø̀n we nøngmaqí mvsháì,” wa vrúng mvnshìe. 19Coqcv́nrìí Àng sv̀ng yadang røt mvyǿ we Yesuí sháò rvtnø̀, “‘Tv́n tiqlvng kèní nàmaqí Ngà sv̀ng mèyv̀ng lóngshà. Tiqlvng mèpvng vrá nàmaqí Ngà sv̀ng èyv̀ng lóngshàe,’ wvng we yakà dang nàmaq nàrøtkénø̀ng má? 20Ngàí kàdøng vla:tnìni, nàmaq nø dèyórshìnø̀ng nø rv̀ngshvng èwà lóngnø̀nge, íwe rvgaq nø dvbù longe. Nàmaq nøt dèshànø̀ng nìgø, nàmaq nøt dvshàlòng nø dvbùlv́m vpovme. 21Svmaré nø, cv̀mré gv̀llv́m rvtø̀ vhøm ra kvt, puqnøn zá yà:ngí dvshàe. Ínìgø gv̀l bǿò mèpvng nø, rvgaq tø̀m taq cv̀mré tiqgǿ yv́ngshì daqì rvtnø̀ dvbù weí dvshà mvhøt bǿì rì vná bǿòe. #Esa. 26:17 22Welòng dø nàmaq gø akvt nøt dvshà we nàhǿmnø̀nge. Íwe Ngàí nàmaq sv̀ng vrá yv̀nga:tnì kvt nàmaq dèbù lóngnø̀nge. Nàmaq dvbùnøt sv̀ng kagǿí gø mèlúa bǿnø̀ng.#Esa. 66:14

23Weni taq nàmaqí Ngà sv̀ng røtlv́m tiqkà gø màvlvm. Ngàí kàdøng vla:tnìni, Ngà bø̀ng taqkèní nàmaqí Vpè sv̀ng kapà èrøtnø̀ng nìgø, À:ngí èzí daqnø̀nge. #Mat. 7:7; Mak. 11:24; Yoh. 14:13-14,20; 1Yh. 5:14 24Akvt høq nàmaq nø Ngà bø̀ng taqkèní tiqpv̀n gø shini mèrøtnø̀ng. Røt èmvnnø̀ng, wekvt èlún daqnø̀ng nø nàmaq nø dvbù nø:tní dv̀n èzø̀ng lóngnø̀nge.#Yoh. 15:11

Shaqshaqwa v̀llv́m dvká:mò we

25Yadv́ng pv̀n nø Ngàí kàshvbóng kèní shø̀n bǿngà. Ínìgø Ngàí kàshvbóng kèní vrá tiqkvt màshǿnshaq, Vpè dang dèdè chaqdvp nàmaq sv̀ng dvtálvm rvtø̀ tuq rae. #Yoh. 10:6 26Weni taq nàmaq nø Ngà bø̀ng taqkèní èrøtshì lóngnø̀nge. Nàmaq tvle Ngàí Vpè kaq røtlv́m íe, wvng we mø̀í. 27Pàwá wani nàmaqí Ngà sv̀ng èshòngshà nø, Ngà nø Gvray yv́ngkèní dø̀ng dakngà we sv̀ng gø èkv́mnø̀ng rvtnø̀, Vpèí ni nàmaq sv̀ng èshòngnø̀nge. #Yoh. 14:21 28Ngà nø Vpè yv́ngkèní dø̀ng dakngà nø, rvgaq tø̀m sv̀ng tok dakngà. Vrá Ngà nø rvgaq kèní búng nø Vpè yv́ngsv̀ng longvme,” a:lòe. 29Àng coqcv́nrìí, “Íe, akvt nø Nàí kàshvbóng màlv́ngshaq, chaqdvp èshø̀:nòe. #Yoh. 16:25 30Nàí nø í dv́ngte shvngbe èsháò we nv̀ng kagǿí gø Nà sv̀ng røt mvrà we nøngmaqí akvt shá bǿshà. Wervt Nà nø Gvray yv́ngkèní èdì daqì we nøngmaq ká:mìe,” a:lòe. #Yoh. 2:25 31Yesuí àngmaq sv̀ng, “Akvt namaq àngjǿng èkv́m bǿshà má? 32Yalà, nàmaq nø vdèdè chø̀m sv̀ng nàkangv́mnø̀ng nø, Ngà wa èguráshà we rvtø̀ tuq rae. Akvt ni tuq ráì.#Zek. 13:7; Mat. 26:31,45; Mak. 14:27,50; Yoh. 8:29 Ínìgø Vpè nø Ngà nv̀ng tiqdø vl rvt, Ngà wa mvǿngà. 33Ngà vdòng taq nàmaqí mòngzø̀l lòng lúnlv́m dvpvt, Ngàí nàmaq sv̀ng yadv́ng pv̀n dvtá bǿshà. Rvgaq tø̀m taq nàmaqí dvshà mvhøt lòng nàhǿm lóngnø̀nge. Ínìgø shaqshaqwa èv̀lnø̀ng, Ngà nø rvgaq sv̀ng jorv́mà,” a:lòe. #Yoh. 14:27; Rom. 5:1; 1Yh. 5:4

Currently Selected:

Yohan 16: GSM

Highlight

Copy