Yohan 17

Yesuí vjúrø:tnò we

1Yesuí yadv́ng pv̀n shø̀:nò dá:ngí, muqlàng kaq dvjaq sórí yadø wae. “Vpèá, rvtø̀ tuq ráì. Nvcèpè Ngàí Nà ngø̀rdvgùng dvtan lúnlv́m dvpvt Nvcèpè ngø̀rdvgùng sv̀ng dètan daqò. 2Kadø íe wani Nàí Ngà kaq tvleshaq vsv̀ng shvngbe sv̀ng dvciqlvpat gø̀nshaq zílv́m dvpvt, Nàí nø vsv̀ng shvngbe kaq øplv́m vmíng Ngà sv̀ng èzǿng yv̀ngà.#Mat. 11:27 3Dvciq lvpat gø̀nshaq nø tiqgǿ wa èí nø dìng we Gvray Nà sv̀ng gø, Nàí dèzv́r daqà we Yesu Kristu sv̀ng gø sháò lòng íe. #1Yh. 5:20; 1Te. 1:9 4Nàí Ngà sv̀ng èzǿngà bv̀nlì wá dv́ng bǿngà weí rvgaq tø̀mø Nà ngø̀rdvgùng dvtan bǿngà. #Yoh. 4:34 5Wervtnø̀ Vpèá, rvgaq shini màvl dvgvp Nà nv̀ng tiqdø vdáng yà:ngà we ngø̀rdvgùng welù:ngí Nà mv́rdv̀ngø akvt Ngà sv̀ng shèring dakngà. #Yoh. 1:1; 17:24; Pil. 2:6-9 6Rvgaq tø̀m kèní Nàí Ngà sv̀ng tèleng bǿngà we vsv̀ngrì kaq Ngàí Nà bø̀ng dvtan bǿngà. Àngmaq nø Nàò èía nø, Nàí Ngà sv̀ng tèleng bǿngà. Àngmaq gø Nà kà sv̀ng cv́n døngá:mì. #Yoh. 17:9 7Ngà sv̀ng èzǿngà rì í dv́ngte nø, Nà yv́ngkèní í we àngmaqí akvt shá bǿà. 8Kadø íe wani Nàí Ngà sv̀ng vzíshaq kàrì Ngàí àngmaq sv̀ng zǿng bǿngà. Àngmaqí gø vtoò nø̀, Ngà nø Nà yv́ngkèní døng dakngà we gø jø̀ngjǿng shá bǿà. Nàí Ngà dèzv́r dakngà we sv̀ng gø àngmaq kv́m bǿì. #Yoh. 16:30 9Àngmaq dvpvt Ngàí røtnòe, rvgaq tø̀mòri dvpvt nø mvrøtnangò. Nàí Ngà sv̀ng tvleshaq rì àngmaq dvpvt mv̀ng røtnangòe. Pàwá wani àngmaq nø Nàò èíae. #Yoh. 6:37,44 10Vrá Ngàòrì shvngbe nø Nàòrì èía nø, Nàòrì gø Ngàòrì ni íe. Àngmaq taqkèní ngø̀rdvgùng shvring we Ngàí lún bǿngà. #Yoh. 16:15; Luk. 15:31 11Akvt kèní Ngà nø rvgaq tø̀mø màvlvm. Àngmaq nø rvgaq tø̀mø vl rae. Ngà nø Nà yv́ngsv̀ng long longe. Shànshér we Vpèá, Ngànípè nø tiqlòng íshà dø àngmaq gø tiqlòng wa ílv́m rvt, Nàí Ngà sv̀ng vzíshaq í we, Nà bø̀ngò jórnònggùn taqkèní àngmaq kaq èroqò. #Mat. 6:13; Yoh. 10:30 12Ngà nø àngmaq nv̀ng tiqdø à:lì dvgvp Nàí èzǿnga we Nà bø̀ng taqkèní àngmaq sv̀ng rok bǿngà. Shànshér Kàru kà dvhømlv́m dvpvt, vmv́nglv́m pè wa mø̀í nìnø, àngmaq tiqgǿ gø màmvng dø Ngaí gar bǿngà. #Shz. 41:9; 109:8; Yoh. 6:39; 2Te. 2:3

13Akvt Ngà nø Nà yv́ngsv̀ng long longe. Rvgaq tø̀mø shini vl dvgvp yadv́ng pv̀n shø̀n bǿngà we nø Ngà dvbòng nøt àngmaq vdòng taq dv̀nzø̀nglv́m dvpvt íe. #Yoh. 15:11 14Nà Mòngkà nø Ngàí àngmaq sv̀ng zǿng bǿngà. Ngà nø rvgaqò mvǿngà dø àngmaq gø rvgaqò mø̀í rvt, rvgaq nø àngmaq sv̀ng shvngoshìe. #Yoh. 15:19; 1Yh. 5:19 15Nàí àngmaq sv̀ng rvgaq tø̀m kèní lùlv́m dvpvt Ngà mvrøt. Mvgvm pè kèní àngmaq sv̀ng garlv́m dvpvt mv̀ng røtne. #Mat. 6:13; Luk. 22:32; 2Te. 3:3; 1Yh. 5:18 16Ngà nø rvgaqò mv̀ǿngà dø, àngmaq gø rvgaqò mø̀í. 17Dìnglù:ngí àngmaq sv̀ng Nà dvpvt shègaqò. Kadø íe wani, Nà mòngkà nø dìnglòng íe. #Yoh. 6:63 18Nàí Ngà kaq rvgaq tø̀m sv̀ng dèzv́r dakngà døni, Ngàí gø àngmaq kaq rvgaq tø̀m sv̀ng dvzv́ròe. #Yoh. 20:21 19Àngmaq nø dìnglù:ngí shvgaqò we lúnlv́m rvt, Ngà gø Nà dvpvt shvgaqshø̀nge. #Heb. 10:10

Kv́m vsv̀ng shvngbe dvpvt vjúrø:tnò we

20Àngmaq dvpvt wa Ngàí røtnangò we mø̀í, àngmaq kà taqkèní Ngà sv̀ng kv́m ra rì dvpvt gø røtnangòe. #Yoh. 17:9 21Àngmaq shvngbe nø tiqlòng wa ílv́m røtnòe. Nàí Ngà kaq dèzv́r dakngà we sv̀ng rvgaqí kv́mlv́m dvpvt,Vpèá, Nà nø Ngà vdòng taq èvl nø, Ngà gø Nà vdòng taq vl dø, àngmaq gø Nøngmaq vdòng taq laq vl.#Gal. 3:28 22Nøngmaq nø tiqlòng wa íshà dø, àngmaq gø tiqlòng wa ílv́m rvt, Nàí èzǿng yv̀ngà we ngø̀rdvgùng àngmaq sv̀ng zǿng bǿngà. #Dzr. 4:32 23Àngmaq nø tiqlòng wa í we taq kø̀mgømlv́m dvpvt, Ngà nø àngmaq vdòng taq vl nø, Nà gø Ngà vdòng taq èvle. Wekvt Ngà sv̀ng Nàí dèzv́r dakngà we nv̀ng Ngà sv̀ng Nàí èshònga døni, àngmaq sv̀ng gø èshù:ngò we sv̀ng rvgaqí shá lú:ngòe.#1Kr. 6:17; Gal. 2:20 24Vpèá, rvgaq àngké shini màshvzøngò dvgvp kèní Nàí Ngà sv̀ng èshònga rvt, Nàí ngø̀rdvgùng èzǿng yv̀ngà. Nàí Ngà sv̀ng vzíshaq rì àngmaqí yalòng ngø̀rdvgùng sv̀ng yv́ng lúnlv́m dvpvt Ngà vl yv́ngø àngmaq gø v́l lúnlv́m lòng sv̀ng Ngà shóngshø̀nge. #Yoh. 12:26; Eps. 1:4 25Døngman pè Vpèá, rvgaqí Nà sv̀ng mèshá nìgø, Ngàí Nà sv̀ng shánge. Nàí Ngà kaq dèzv́r dakngà we sv̀ng yarìí gø shá bǿà. 26Nàí Ngà sv̀ng èshòngà we shóngnøt àngmaq vdòng taq v̀llv́m nv̀ng Ngà gø àngmaq vdòng taq v̀llv́m dvpvt, Nà sv̀ng Ngàí àngmaq kaq shá dvzv́r bǿngà. Zv̀ndvtut gø shá dvzv́rlv́m íe,” wae.

Currently Selected:

Yohan 17: GSM

Highlight

Copy