1 Hakorinte 1
1
Mbapira Dhokutanga Kwawakakorinte
1Edhi dha tunda kwaPaghulusi, oyu ghapwa kwitha kumahimeno ghaNyambi, gha kare mupostoli waKristus Jesusi, namuyendhendi Sostenesi.
2Kwawambunga dhaNyambi hoMukorinte, awa gha pongorire no wa hetha eshi ha kare hahati wendi. No karo kwawahe ngambi ku ha di kwakonako. Awa hetha Dina dyaJesus Kristusi ghoFumu wawo no Hekudyetu.
3N̂eke no thiraro kukwenu thaNyambi ghoWihetu naFumu Jesus Kristusi!
Matumero
4Na kutumera Nyambi wange pano kukwenu kuthin̂eke thi gha mupa kehe pano mwaKristus Jesusi. 5Yoyishi mumwendi gha mu tungeka Nyambi mu kehe thinu. Thikuma ne muyitapa yon̂ando no muyidimuka. 6Mbudhi dhaKristusi, dha thikera thikuma mumwenu. 7Eshi mu dhire kuyawa nokamanana temba kuyitapa yon̂eke. Amwe mudi nomataterero ghokuyara ghurura, kumahokokero ghaHekudyetu Jesus Kristusi. 8No Aye ne yo ghana mwimanena kate paghuhura. Eshi mwa kupire murandu mudiyuwa di mbo gheya Hekudyetu Jesus Kristusi. 9Nyambi ne gha hungama, oyu gha mwitha eshi mu kupakerere pofotji naMwanendi Kristus Jesusi ghoHekudyetu.
Kupira makuyuvero ghomumbunga
10Ame na kumurawera mwayendhange mwahe, muDina dyaHekudyetu Jesus Kristusi eshi, mwahe mu kare pofotji. No pa kara makuyakunukero pakatji kenu. Mu kununge pofotji muyikara yofotji no muyighayara yofotji. 11Ame na kughamba yinu yi mwayendhange. Yoyishi Hakakoloye ha ni thimwetwedherire eshi, mbadipo makuyuvero pakatji kenu. 12Po na kuningera ne me eshi, ghumweya kughamba ghana kughamba eshi: “Ame ne waPaghulusi.” Ghumweya eshi: “NoMukaapolosi me.” Ghumweya naye: “Ame ne waKefasi.” Ndani ghumweya eshi: “Ame ne waKristusi.” 13Oyu Kristusi nane, ne muyipindhi ha mu tetaghura ndi? Paghulusi ne ha mu mupamarera mwe ndi, endi mudina dyaPaghulusi ha mu yoghera mwe?
14Na kutumera Nyambi eshi, noyofotji temba ghopapenu yu na yoghire shimengwa Hakrispusi na Gayusi. 15Mbadiko yu gha kona kughamba eshi, amwe ne mudina dyange mwapwa kuyogha. 16Kadi kemo, na yoghire karo hakadidhiko dyaStefanasi. Ene mbadi na dimuka karo eshi na yoghire ghumweya. 17Kristusi, mbadi gha ni tumine kukuyogha keho, ene ni yuvithe karo mbudhi dhodhiwa. Keho kadi noman̂ando ghoghunya‐nyami. Yoyishi maghana sho dhi yongare ngcamu dhothikurushe thaKristusi.
Kristusi yongcamu noghunyanyami waNyambi
18Mbudhi dhothikurushe thaKristusi ne dhithuta kwawahayongara. Kukwetu twe ha ghamwena ne ngcamu dhaNyambi. 19Yapwa kutjanga eshi:
“Ghunya‐nyami wawanya‐nyami
mbo na ghu dhimitha,
no yitwetha yawakakukuhonga,
mbo na yi dhongonona po.”
20Kupi ghadi munya‐nyami pano ghomukaye kano? Kupi mukamarukwaro? Kupi ghadi mukamaghano? Mbadi gha paka Nyambi ghunya‐nyami ghokaye kano mughuthuta ndi?
21Ethi ne thothitambo thaNyambi mughunya‐nyambi wendi eshi, kaye mbadi ka kona kudimuka yidimuka yaNyambi muyitwetha yako. Yodigho, po gha himenine Nyambi mughunongo wendi eshi, payiyaghura yi wathuteka kaye, hapwe kughamwena wa ha tawa. 22Hajuda ha romba yitetukitho, Hahirika ne ghunya‐nyami ha shana. 23Atwe ne Kristusi yu ha pamarire yo tuna kuyuvitha. KwaWajuda, thinu thi ne thiyi no kwawamweya ne thithuta. 24Ene kwawa hapwa kwitha kwaNyambi, Hajuda ngambi Hahirika, Kristusi ne ngcamu dhaNyambi no ghunya‐nyambi waNyambi. 25Ethi tha kara pakaye ghuthuta, kwaNyambi ne thaghunya‐nyami ghoghukuru kupiterera ghunya‐nyami wawanu. No thi tha kara pakaye thikashu, kwaNyambi ne tha kara nongcamu dhodhikuru kupiterera ngcamu dhawanu.
26Mu ghayare vene mwayendhange eshi, ngepi di mwa karire apa ha mwithire. Thika di ha ghayara hanu, mbadi pa karire hakakukuhonga hohengi, ngambi hatungi hohengi, ngambi hakamakuto hohengi. 27Ene yi ya kara yithuta pakaye, gha yi torora Nyambi eshi, ha fithe honyi hakakukuhonga. Hakashu hopakaye ghawa torora Nyambi ha fithe honyi hakangcamu. 28Nawa hapirire dikuto pakaye ngambi kupira dina, karo kemo wa ha kara nyara‐nyara, ghawa torora Nyambi eshi, ha dhongonone thi tha kara thinu. 29Yodigho, mbadiko yu gha kara nothinu ethi sho thi mu fumanekithe kughutho waNyambi. 30Matumero kwaNyambi eshi mwe ne mwa kupakerera naKristus Jesusi. Aye gha tu karerire ghunya‐nyami ghu wa tunda mwaNyambi eshi: mathigherero, ghupongokithi no mashutwero. 31Yodigho thika di ha yitjanga eshi:
“Oyu ghana kukukutekera, gha kukutekere mwaFumu.”
Currently Selected:
1 Hakorinte 1: MHW1986
Highlight
Share
Compare
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986