1 Hakorinte 5
5
Yiparitha yoyiyi nomahumbithero ghayo
1Munu ghana yuvanga shemwa yoyiparitha yoyiyi mukatji kenu. No yiparitha yokemo, moyidi karo mukatji kawahayidena. Ya kara yira murume nanyina ghokumurera wa hana kupara pofotji, yira hakakukuyeka. 2Amwe muna kughayara eshi, mwa hunga kupiterera hamweya, mbadi mwa kona kuyitokotera ndi? Ngeshi kemo, ngo mwa tundithire murume yu gha tendire yinu yi mukatji kenu. 3Kukwange ngambi kenge di na dhirire kukara ghunu wange kukwenu, mumudhimu wange name po na karire. Ene ngeshi po na karire shemwa, ngo na manine kumudimbwerera yoyikara yendi. 4Pakutanga muDina dyaHekudyetu Jesusi twa yinungire. Oku namwe po, name po na karire mumudhimu pofotji nongcamu dhaHekudyetu Jesusi, tuna kongana pakumutapa murume yu kwaShatani. 5Kemo dyo ya kona kutunda po yipara yendi yoyimango. Eshi ghu kone kupwa kughamwena mudhimu wendi mudiyuwa di mbo gheya Fumu.
6Makununeko ghenu mwathinda ne mbadi mahunga. Mbadi mwa dimuka eshi, kamuhahaghana ne kukona kuhahitha muhaha ghoghuheya ndi? 7Mu mwaghe muhaha ghoghukuru‐kuru, po sho mu kare mwathu‐thun̂unyi. Gho mu kare yamwe shemwa. Ndjwighana wetu ghoPaska ne ha mu tu paghera: Aye yoKristusi. 8Twimbe ne keho difeste, ene kadi nomuhaha ghoghukuru‐kuru, ngambi nomuhaha ghoyitenda yoyimango no yoyiyi. Ene noghuroto ghothu‐thun̂unyi ghoghukushuki no ghushemwa.
9Mubapira dhange dhokutanga, na mu tjangerire eshi, mwa karanga pofotji nawa hana kupara murungu. 10Yino mbadi na kuyighayarera kwawakarungu, ngambi kwawakaghumu, endi kwawakambango ngambi kwawakareri wawanyambi hombango hokaye kano. Yoyi ngeshi kuwathigha, ngo mbadipo mwe pano pakaye. 11Ame na tjangire eshi, mwa karanga namunu yu gha kutoya thinda ghutawi. Oku ye gha kara rungu ngambi ghumu, ngambi mukareri wawanyambi hombango ngambi mupata endi thidakwi, ngambi mukambango. Namunu ghokemo, mbadi mwa kona kudya pofotji nendi.
12Paghuhura mbadi na kona kutetera hanu wa ha dhira kukara mumbunga. 13Nyambi yo mbo gha wa tetera. Amwe ne mwa kona kutetera henu: “Mu tjidhe mo hanu hohamango mumwenu.”
Currently Selected:
1 Hakorinte 5: MHW1986
Highlight
Share
Compare
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986