1 Hakorinte 4
4
Ghukareri wawapostoli
1Dyo sho mu tu mone eshi twe ne twakareri waKristusi. No hayendithi wa ha taperire yithithatero yaNyambi. 2Kwamuyendithi ya kara eshi shimengwa yu ha kurupera. 3Ene kukwange, mbadiko no kamana temba makurupero ghopapenu, ghokutetera ngambi ndhango dhodipuna dyopathinaghunu. Karo kemo mbadi na kona kukutetera nothinda ndhango. 4No mbadiko karo thi thina kupetha manghano ghange. Ene mbadi yina kuninga karo eshi me ne ha yi ni fundhwera. 5Yodigho mbadi mwa kona kutetera kughutho, oku mbadi gha neya Fumu. Oyu mbo gha reta yinu yokunda muthishe no kuhokora yighayara yomumitjima. No kehe yu mbo ghana tambura makughero kwaNyambi. Agha mbo gha tunda kwamunu thinda.
6Mumatjwathanithero ghano mwayendhange, na karire nothinda naApolosi yira yitamenedhi yokumuhonga, eyi dya ninga ditandhi dino eshi: “Kare mumiyindha dhi gha paka po Nyambi.” No mbadiko yu mbo gha kumona thinda yira ghumweya eshi, gha piterera mitiri wendi. 7Yidye gha kuhokora kughutho? No nye yi wa muna yi wa dhira kutambura?
8Mwa wana yoyihe yi mwa rumbera: Amwe kare mwa tunga! Atwe ne mbokapwe. Ngeshi ngo mwa karire shemwa mwafumu, ngo pofotji twa raghurire nenu. 9Ame na kuyimona eshi, Nyambi gha tupire twapostoli dyango dyoghuhura yira hanu wa ha teterire mukufa muarena. Atwe tuna kara twayineghidhitho yokaye, no yawaengeli no yawanu.
10Atwe ne twathuta pamurandu waKristusi,
amwe ne mwakamaghano mwaKristusi,
atwe ne twakashu, amwe ne mwatanavu,
mudikuto mwa kara mwe, atwe ne mudishamu.
11Kate pakapupi kano, ndhara no dinota tuna kufa,
ghuhepwe ne ghuna tu kokera
no kunyandeka hana kutunyandeka.
Kufambaghera tuna kufambaghera
12no ghukukutu tuna kurughana nonyara dhetu.
Kusherera hana kutusherera, mahuthero ghetu ne
makandadhekero ghofiyaghudhi,
hana kutukutha‐kutha,
atwe ne pakudhidhimeka.
13Kushamuna hana kutushamuna,
atwe ne pakuwanongopa.
Atwe ne twayinu yoyimango pano pamuve,
twadikangafudhi dyoyipara,
nopashadyarero shime kemo.
14Yinu yino, mbadi na kuyitjanga kukumufitha honyi. Ene kukumuneghedha ghuhunga, mwanange homwahakwa. 15Yoyishi ngambi ngo mu kare nohahongi mayovi mwaKristusi, mbadi mwa kara nawawihenu hohengi. Pamayuvithero ghombudhi dhodhiwa, na kara nowihenu mwaKristus Jesusi. 16Yo na kumutjokedhera eshi: Mu kuthe thitamenedhi thange! 17Payinu yino, po na tumena Timoteghusi ghomuhakwa kukwenu. Mwanuke ghomatjimapero mwaFumu. Aye mbo ghana mu vurukitha yipara yange noyihonga yomwaKristus Jesusi, eyi na mu hongire kokuhe mu kehe mbunga.
18Hamweya hopapenu, ha ghayarire eshi mbadi na kwiya karo kukwenu no ha tangire kunyeghenya. 19Ene tamba na kwiye kukwenu ngeshi gha kuhime Fumu. Po mbo na ni dimuka nothinda hakadihuna. Kadi payighamba yawo, ene payitenda yawo. 20Yoyishi ghutungi waNyambi, mbadi wa kara muman̂ado, ne mungcamu. 21Nye muna torora po? Na kwiye notjupa kukwenu ndi, endi muruhakitho no mumupepo ghoghuhunga?
Currently Selected:
1 Hakorinte 4: MHW1986
Highlight
Share
Compare
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986