1 Hakorinte 3
3
Matunderero ghomakuyakunukero
1Mwayendhange, ame mbadi na kona kughamba nenu yira hanu wa wayenditha Mupepo waNyambi. Ame na kughamba thika hanu hopakaye. No thika twanuke tu twa tawa mwaKristusi. 2Ame na mu korerire nomahwe. Kadi noyidya yoyikukutu. Yoyishi, ngo mbadi mwa konine kuyitahuna. No dyarero shime mbadi mwa kona kuyikumitha mo. 3Yoyishi mwe ne shime mwanu hopakaye. Mukatji kenu modhidi nya no mvo. Eyi ne mbadi yina kuninga eshi mwene shime mwakaye noyikara yenu ne yakaye ndi? 4Ngeshi ha ningi gumweya eshi: “Ame ne waPaghulusi,” no ghumweya eshi: “Ame ne waApolosi,” mbadi mwakakaye shime mwe ndi?
5Yidye ne Apolosi? Yidye ne Paghulusi? Awo ne ha karire vene apa mwa wanine matawero mwe. No kehe yu kutenda ghana kutenda thirughana thika di gha thi mu pire Fumu. 6Ame, na tapekire, Apolosi ne mukakuvetera. Ene Nyambi, yo gha yikurithire. 7Eyi mbadi yina kutamba kwamukakutapeka endi kwamukakuvetera. Ene kwaNyambi yu gha yikurithire. 8Mukakutapeka namukakuvetera ne waheya pofotji. Nyambi mbo ghana ruwera kehe yu popathirughana thendi. 9Atwe ne twarughani pofotji muthirughana thaNyambi, amwe ne mwadipya dyaNyambi.
Hakakutawa ne dhondhugho dhoNyambi
Namwe karo mwandhugho dhaNyambi. 10Pathin̂eke thaNyambi thi gha ni pire, na kara yira mushokeki mwene yu gha paka kashemandhugho. No ghumweya ghana kushokekera po. Ene gha kenge thiwana eshi ngepi di sho gha shokekere po. 11Yoyishi noyofotji temba yu gha kona kupaka po kashemandhugho kamweya, yira ka kakarire po pakutanga. Kashemandhugho ka ne Jesus Kristusi. 12Ngambi kushokekitha nomangondo, yikuvo, mawe ghondhiro, yitondo, muhonyi ngambi yitengetji yi ghana kupaka munu pakashemandhugho. 13Thirughana thakehe yu mbo thina shwagha. Mudiyuwa di mbo gheya Kristusi, mbo yina shwagha thiwana yoyihe. Diyuwa mbo dineya nomudiro. No mudiro mbo ghuna yereka thirughana thakehe yu. 14Ngeshi ghumweya ha dhi tanara ndhugho dhendi, mbo hana muruwera. 15Ngeshi ghumweya ha thi pyera thirughana thendi, mbadi mbo ha mu ruwera. Ene mbana mu ghamwena yira munu yu hana kuyokora mudidhiko.
16Mbadi mwa yidimuka eshi, mwatembeli waNyambi mwe ndi, no Mupepo waNyambi ne mumwenu wa tunga? 17Ngeshi munu ha mbandaghura tembeli waNyambi, naNyambi mbo ghana mu dhongonona. Yoyishi tembeli waNyambi ne gha pongoka, no tembeli yu ne yoyamwe.
18Mbadiko yu gha kona kukwangera thinda. Ngeshi ha ghayara ghumweya ghopapenu eshi ye ne munya‐nyami muyinu yopakaye. Mu thighe gha kare muthuta eshi, mbo gha kone kukara munu ghomunya‐nyami shemwa. 19Yoyishi ghunya‐nyami ghokaye kano, kwaNyambi ne ghuthuta. Yapwa kutjanga eshi:
“Aye ghana kukwata hanya‐nyami mughunya‐nyami wawo.”
20Muthipindhi thimweya eshi:
“Fumu gha dimuka yindhundha yawanya‐nyami
no gha yidimuka eshi yapira mudyo.”
21Yodigho, gha kutanawera ghumweya pawanu. Yoyiheya yi ne ya kara yenu. 22Ngambi Paghulusi, ngambi Apolosi, ngambi Kefasi, ngambi kaye, ngambi moyo, ngambi kufa, ngambi yon̂anyi‐n̂anyi, ngambi yokughutho, yoyiheya yenu. 23Ene mwe, mwa kara waKristusi, Kristusi ne waNyambi.
Currently Selected:
1 Hakorinte 3: MHW1986
Highlight
Share
Compare
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986