Yitenda ya Wapostoli 2
2
Mwiyero waMupepo ghoKupongoka
1Apa dya rikanyine diyuwa dyodifeste dyoPendekoste, ha karire waheya pofotji mundhugho. 2Kapupi kamanana, ko kutunda mavuma muwiru ghokuninga yira dingundunga. No gha vurire mudyango dyodiheya di ha karire. 3Gho ha monine thinu thokuninga yira maretha ghomudiro, no thatapathanine kwayomuhe ghopapawo. 4Waheya ha yarire naMupepo ghoKupongoka, no ha tangire kughamba mandimi ghagho‐nagho, thika kenge gha yi wa pire Mupepo ghoKupongoka.
5MuJerusalema, mwakarire Hajuda hohahunga, awa ha tundire mumarudhi ghomahe ghopakaye. 6Apa ha yuvire hanu mavuma, ko kukongosha mbunga dhodhikuru pofotji. Ene pa ha yuvire eshi kehe yu ghopapawo ndimi dhendi ghana kughamba, mbadi ha dimukire eshi ngepi di hana yi wana. 7Ko kuyoghotera noghutetuka waheya ghuninga eshi: “Awa hanu hana kughamba ne, meshi waheya Hakagalileya. 8Ngepi di ghana kukuyuvera kehe yu ghopapetu, ndimi dhendi thinda? 9TwakaPartesi, Mederisi naWaelamite, nawa ha tunga muMesopotamiye, HakaJudeya naKapadosiye, muPontusi naAsiya. 10HakaFrigiya, naPamfiliya, HakaEgiptena no dihenda dyaLibiya kuSirene, nawanu hokutunda kuRoma, 11Hajuda nawahayidena awa ha tambura matawero ghaWajuda, HakaKreta no HakaArabiya. Twaheya tuna kuyuva, edi hana kughamba mumandimi ghetu twathinda, yinu yoyikuru eyi gha tendire Nyambi.”
12Waheya ha tetukire no ha tamangerire. Hamweya ha kwipudhurire eshi: “Yinye ya kona kuninga yi?”
13Ene hamweya ha shererire eshi: “Hana terera.”
Yiyaghura yaPetrusi mudiyuwa dyoPendekoste
14Munyima Petrusi, gha tumburire n̂ando mudyango dyawapostoli dikumi noyofotji no gha yaghurire kwawanu eshi: “Mwajuda, namwe mwahe mwe mwa tunga muJerusalema. Na kumutjwathanitha eyi ya hokoka. Mu tegherere koyi sho ni tongore. 15Hanu wa, mbadi hana terera thika di muna kughayara mwe. Yoyishi, edhi no ne shime viri dhoghukwoko noghune pamathikuthiku. 16Ava mwe, kadi kemo. Apa no kuna kuhokoka yinu yi gha ghambire Nyambi pamuporofeta Jogheli eshi:
17‘Kemo mbo yi kara mumayuwa ghoghuhura,
ame waNyambi:
Mbo na shurutha Mupepo wange pawanu wahe:
hamughundju wenu nawashengeteya,
mbana pumbu,
hangaghu wenu, mbana mono marupara,
hamayami wenu, mbana roto yirota.
18Karo pawatutughurukareri wange nawakadhikareri wange,
mbo na wa shuruthera Mupepo wange,
nawo mbana pumbu.
19Mbo na paka yidimukitha muwiru,
no yitetukitha, mbo na yi tapa pamuve: thinyinga nomudiro nodithi.
20Diyuwa mbo di nerupa,
no kaghonda, mbo ka na kihera,
mudiyuwa dishokuru dyomwiyero waFumu, mughufumu.
21Mbo yina kara ngeno:
Kehe yu mbo ghetha Dina dyaFumu,
mbo ghana pu kughamwena.’
22“Mwaisraghelite, mu teghere kuman̂ando ghano! Nyambi gha mu mu dimukithire Jesusi ghoMukanasereti, payitenda yongcame noyitetukitho noyidumiktho, eyi gha mu tendithire Nyambi mumwenu. Eyi ne mwa yi dimuka mwathinda. 23Nyambi gha yi nungire no gha yi rikanyithire, kughutho pakumutapa kukwenu. Amwe ne mwa mu tapire kwawaringi‐ringi, ha mu pamarere kuthikurushe no mwa mu paghire. 24Ene Nyambi gha mu tumunine mwawafu. No papendi thinda gha mu shuturire mutjitju dhokufa. Ya kanganine thikuma eshi gha kare mun̂otwa dhokufa.
25Kukwendi gha ghambire Davita eshi:
‘Ame na monanga Fumu roruheya kughutho wange.
Kurudyo rwange gha di,
no mbadi mbo ni hambadhoka.
26Yo ghuna kushamberera mutjima wange no rudimi
rwange kuna kundakura.
Shemwa, na kara nomakurupero ghomakuru eshi
yirama yange ne mbo yina para.
27Yoyishi mbadi mbo ni mwagherera mwawafu,
karo mbadi mbo tawa eshi mupikoye
ghomatjimapero ne mbo gha dhongonoke.
28Yowe wa ni honga mayira ghomoyo,
ghukara po ghoye,
mbo ghuna ni yaritha noyishamberera.’
29“Mwayendhange, yakerekandongo wetu Davita, kuna kuyimupathwerera thiwana: Gha fire no ha mu vumbekire. No mbira dhendi, netu dhi di pano. 30Ene muporofeta gha karire. No gha dimukire eshi, Nyambi gha mwedherire nomaturekero eshi yofotji ghopawanahoka wendi, mbo ghana hungumana padipuna dyendi. 31Yo gha monenine muvumbukero waKristusi kughutho no gha ningire eshi:
‘Mbadi ha mu mwagherera mwawafu,
no yirama yendi kadi ya kwora.’
32Nyambi gha tumunine Jesusi mukufa, eyi yatwe twatunonga twayo. 33Gha pwire kuyeyura kurudyo rwaNyambi, no gha tamburire Mupepo ghoKupongoka, oyu gha mu turekerire Wihe no gha mu tu shurutherire. Aye ne yoyu muna kumona pan̂anyin̂anyi, no kumuyuva. 34Yoyishi Davita mbadi gha dhinine kudiwiru, ene gha ningire eshi:
‘Fumu gha ningire kwaHekudyange eshi:
Hungumane kurudyo rwange,
35kate mbo ni kutendere han̂ore dhoye,
dimbaro dyomapadhi ghoye.’
36Isragheli yomuhe gha tanare no gha dimuke eshi shemwa: Nyambi Yo gha tendire Jesusi yu mwa pamarerire, gha kare Kristusi!”
Hapiruki hokutanga
37Pakuyiyuva yi hanu, ha dhegheterire thikuma mumitjima dhawo. No hepurire kwaPetrusi no kwawapostoli hamweya eshi: “Nye sho tu tende mwayendhetu?”
38Ko kuwahutha Petrusi eshi: “Mu piruke no mupwe kuyogha muDina dyaJesus Kristusi eshi, ghapwe kuthigherera maharwero ghenu. No mbo muna tambura Mupepo ghoKupongoka yira thitapa. 39Yoyishi ethi gha tureka Nyambi ne thenu, no thawanenu no thawahe wa ha kara kayenda, nawahe wa mbo ghetha Fumu Nyambi kukwendi.”
40Karo Petrusi gha nongononine noman̂ando ghomengi, no kuwatjokedha eshi: “Mupwe kughamwena mukatji kawanu hokupeghuha.”
41Awa ha tawire kuman̂ando ghendi, ha pwire kuyogha no thitara thawa ha pwire kuyogha mudiyuwa di, tha karire mayovi mahatu, kuwedherera kwawatawi hamweya. 42Ha kutapire nomitjima dhawo dhodhihe, kuyihonga yawapostoli no mumayereneno ghofotji nawakungi, no mumakupakerero ghomumakuyarekero nomumandapero.
Mbunga dhokutanga
43Hapostoli ha tendire yitetukitho yoyingi no yidimukitho, no wahe ya wa yarire nothiremeko. 44Wahe wa ha tawire ha karire pofotji, no ha munine yoyiheya mumakupakerero. 45Nawo ha tokomenine kughuritha mapya ghawo no ghugavo wawo. No manyinga gha, ha kutaperire thika kenge di gha nyanderire yomuhe. 46Kehe diyuwa ha tanarire mukukupakerera wahe pofotji mutembeli. Kutunda ndhugho yenda ndhugho, ha kuyarekerire mughundambo. Yidya yawo ha yi dire noyishamberera mughukumbirupitha, 47no ghukugha Nyambi. Diko dyodihe dya wa hakire. NaNyambi gha wedhererire kehe diyuwa hanu wa ha pwire kughamwena, kuthitara thombunga dhawatawi.
Currently Selected:
Yitenda ya Wapostoli 2: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
