Yitenda ya Wapostoli 1
1
Maturekero ghaMupepo ghoKupongoka
1Owe Teghofilighusi, mumbapira dhange dhokutanga na tjangire mo yoyiheya eyi gha tendire Jesusi no yi gha hongire kutunda pakutanga 2kate pamudhineno wendhi ghokudiwiru. Kughutho ghomudhineno wendi, gha rawerire paMupepo ghoKupongoka harume wa gha tororire eshi hapostoli. 3Munyima dhokufa kwendi, gha wa neghedhire yidimukitha yoyingi eshi, Ye ne muyumi. Mumayuwa makumi mane, gha hokokangire kehe pano kukwawo, no gha ghambangire nawo yokughufumu waNyambi. 4Apa gha karire nawo rumweya kuthidyero, gha wa tongwerire eshi: “Mwa tunda mo muJerusalema, ene mu taterere tango yitapa eyi gha mu toyedhera Tate, thika di mwa yuvire kukwange. 5Johannesi ne nomeyu gha yoghangire. Ene mwe, mumayuwa ghomapu mbo muna yogho naMupepo ghoKupongoka.”
6Apa ha kukongwedhire parumweya karo, ha mwipurire Jesusi eshi: “Hekudyetu, dhonako dhino sho ghutumune karo ghufumu waIsragheli ndi?”
7Ko kuwahutha kwendi eshi: “Eyi ne kadi yenu, yokudimuka manako no yivaka eyi gha paka po thinda Tate nongcamu dhendi. 8Amwe ne mbo muna tambura ngcamu dhaMupepo ghoKupongoka, apa mbo gheya kukwenu. No mbo muna kara mwatunonga twange hokuJerusalema, no muditunga dyodihe dyaJudeya no dyaSamariya, kate kuyiyeghekamuto yokaye.”
Mudhineno waJesusi
9Apa gha manine kughamba kemo, ko kudhina kwendi kudiwiru, oku wo pakumumona. Divuyi dya mu ngambwerire eshi ha dhire kumumona shime. 10Oku shime ha dhini, awo pakumudighamena ghumununungurukera. Popo vene, ko kuwemanena harume hawadi hoyivata yoyikenu. 11Awo ha ningire kukwawo eshi: “Mwakagalileya, nye mu nemanena ghudighamena kemo kudiwiru? Jesusi yu ghana tundu kukwenu no ghana dhini kudiwiru, kemo mbo gha ka huka thika di muna mu mono ghana kudhina kudiwiru.”
Mukakuranda kwaJudasi
12Ko kuhuka kwawo kuJerusalema, kutunda kudirundu edi ha ta eshi dyondwe pepi no mbara. Muhanyamo ghokukona kuyenda Hajuda muSabata popamuragho wawo. 13Apa ha kumine mumbara, ko kudhina kwawo kungonda dhokuwiru, oku ha karangire roruhe awa twa ta eshi: Petrusi naJohannesi, Jakobusi naAndreyasi, Filipusi naTomasi, Bartolomeghusi naMateghusi, Jakobusi ghomwana Alfeghusi, Simoni ghomutanavu naJudasi ghomwana Jakobusi. 14Waheya ha karire pofotjie ghukon̂otwedha mumandapero no ghukumbera, pofotji nawakamadi omu gha karire naye Maria ghonyina Jesusi nawaminendi.
15Mumayuwa gha, gha karire makonganeno ghawakumbunga hokurikanya dithere nomakumi mawadi. Petrusi gha karire mukamiti no gha ningire eshi: 16“Mwayendhange, yitjanga yipwe kurikanyitha eyi gha pumbire Mupepo ghoKupongoka mukanwa kaDavita, yokwaJudasi oyu gha karire mukamiti wa wa ha kwatire Jesusi. 17Yoyishi gha pwire kutara kuthitara thetu no gha pwire kutorora mukuyerana kuyitenda yetu. Ene yo gha karire mukamiti wa wa ha kwatire Jesusi.
18“Manyinga gha gha wanine Judasi mughuringi‐ringi wendi, ha gha ghurithire kuthirwa. Yifa yendi ne gha wire ghufurumano, ho dya payukire dira no ya shwaghire mo yihoye. 19Yapwire kudimuka kwawahe homuJerusalema. Yodigho ha ghu tire ghu muve mundimi dhawo eshi Akeldama, kuninga eshi, Muveghothinyinga.
20“Yoyishi mumbapira dhomamipisalema yemana mo eshi:
‘Mu thighe dyango dyendi nyara‐nyara,
mwa toperera eshi gha tunge mo ghumweya,
no ghumweya wayenaye gha hangere
muthirughana thendi.’
21“Po sho tu wedherere po ghumweya, gha kare ghushupi ghomuvumbukero waJesusi netu. 22Aye gha kare ndani ghumweya ghomwawarume, awa twa karire nawo rure oru twa yendaghurire naFumu Jesusi, muthishwaghameho. Kutunda pakumuyogha Johannesi, kate gha tundire kukwetu gha dhine kudiwiru.”
23Nawo ko kureta hawadi kughutho: Josefu oyu ha tire karo eshi Barasabasi ngambi Justusi naMatiyasi. 24Ko kuraperera kwawo eshi: “GhoFumu, owe wa dimuka mitjima dhawahe. Neghe po ghumweya ghopawawadi wa ghuna torora. 25Eshi gha kare mupostoli mukukarera, mudyango di ghana thighi Judasi mukunguru, gho gha tambire oku ya mu tambera.”
26Munyima ha tendire fungu‐fungu, nofungu‐fungu dha kwatekire Matiyasi. Ko kumutorora gha kare mupostoli ghodikumi nohawadi.
Currently Selected:
Yitenda ya Wapostoli 1: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
