Johannesi 21
21
Jesusi ghana kukuhokora karo kwawakathishongero wendi
1Munyima dhoyinu yi, gha hokokire karo Jesusi kwawakathishongero wendi, padikuruviya dyaTiberiyasi. Ene ngeno gha hokokire. 2Simon Petrusi ha karire pofotji naTomasi oyu ha toyire karo Didimusi, naNatanagheli ghoMukana muGalileya nawana Sebedeghusi nohakathishongero hamweya hawadi. 3Ko kunginga Simon Petrusi kukwawo eshi: “Kuyenda na kuyenda ni ka teghe kuthi.”
Awo ha mu huthire eshi: “Natwe tu yende noye karo pofotji.” Ha yendi kwawo ha ka perame muwato, ene mughuthiku ghu, mbadi ha wanine nokamanana temba. 4Eyi kuna kukya, ko kwimana Jesusi padiya. Hakathishongero mbadi ha dimukire eshi, oyu ne Jesusi. 5Ha ningi Jesusi kukwawo eshi: “Amwe mwanu, mbadi muna kwata ko thokudya ndi?”
Awo ha huthire eshi: “Ava twe.”
6Ko kuwatongwera kwendi eshi: “Mu kondhere dikwe kumutara ghorudyo, muna kuwana thinu.” Nawo ha tupekire dikwe, ene pakatharagho kothi, mbadi ha konine kukoka karo dikwe.
7Po gha ningerire mukathishongero ghumweya oyu gha hakire thikuma Jesusi kwaPetrusi eshi: “Fumu yu!” Pakuyuva Simon Petrusi eshi, nane Fumu yu, ko kushupata kwendi thivata thendi thopeghuru, yoyishi peghuru dhoyirama yendi ne nyara‐nyara gha karire, no gha dabwamine mumeyu. 8Awo mbadi ha karire kayenda nondundu, ngwa manaro dithere dyofotji. Hakathishongero hamweya wa ha karire nowato, heyire no hana kokire dikwe dyothi. 9Apa ha thekerire, ha monine mudiro ghuna kutumbuka nokathi po. Pa karire karo ghuroto. 10Jesusi gha wa tongwerire eshi: “Mu netere ko thi pathi dhi muna teghura n̂anyin̂anyi.”
11Ho gha peramine muwato Simon Petrusi, no gha kokerire dikwe kundundu. Dikwe dya yarire nothi dhodhikuru, dithere dyofotji nomakumi kwoko nodhihatu. Ene ngambi kenge dha yarire mo thi, mbadi dya tjinukire dikwe.
12Ha wetha Jesusi eshi: “Mwiye na mu dye.”
Ne noyofotji temba ghopawakathishongero wendi yu gha mwipurire eshi: “Yowe dye?” Ha dimukire eshi yu ne yoFumu. 13Heya Jesusi no gha tumburire ghuroto gha ghu wa pe, nothi karo kemo.
14Oru ne roroghuhatu ru gha kuhokorire Jesusi kwawakathishongero wendi, munyima dhomuvumbukero wendi mwawafu.
Petrusi ghana kuwana karo marawero ghendi
15Apa ha manine kudya, hepura Jesusi kwaSimon Petrusi eshi: “Simoni, mwana Johannesi, wa ni haka thikuma kupiterera wano ha di pano ndi?”
Aye gha mu huthire eshi: “Kemo, Fumu. Wa yi dimuka eshi na kuhaka.”
Ha mu tongwera kwendi eshi: “Dithe ndjwighana dhange.” 16Ko kumwipura karo paruwadi eshi: “Simoni, mwana Johannesi, wa ni haka thikuma ndi?”
Aye gha mu huthire eshi: “Kemo, Fumu. Wa yi dimuka eshi na kuhaka.”
Munyima gha mu tongwerire eshi: “Koneke ndjwi dhange.” 17Ha mwipura karo Jesusi paruhatu eshi: “Simoni, mwana Johannesi, wa ni haka ndi?”
Ko kutokota Petrusi yoyi paruhatu gha mwipurire eshi: “Wa ni haka ndi?” Munyima gha mu huthire eshi: “Fumu, owe ne wa dimuka yoyiheya no wa dimuka eshi na kuhaka.”
Ha mu tongwera eshi: “Dithe ndjwi dhange. 18Ghushemwa na kukutongwera eshi: Apa wa karire ghomungawana, ghothinda wa kuvatekire yitere yoye no wa yendire ku ghuna himi. Ene pa wa kukurupara, mbo ghuna vishura nyara dhoye no ghumweya wayenaye, mbo ghana kukwata no kukutwara ku ghuna dhiri kuhima.” 19Eyi gha yi ghamberire Jesusi yi, gha mu dimukithire ko eshi, yifa munye mbo gha fumanekitha Nyambi Petrusi.
Munyima gha mu tongwerire eshi: “Ni kuthe!”
Mukathishingero yu gha hakire thikuma Jesusi
20Pakupiruka Petrusi, ha mono kwendi mukathishongero yu gha hakire Jesusi thikuma, ghana mu randa. Aye ne yoya gha yeghamenine Jesusi pamuyidi kuthidyero gha mwipure eshi: “Fumu yidye mukakukuhokora?” 21Apa gha mu monine Petrusi, ghepurire kwaJesusi eshi: “Oyu ne ngepi?”
22Jesusi gha mu huthire eshi: “Ngeshi ngo ni hake eshi gha kare muyumi kate ku mbo ni keyera karo, kadi ya kukutokotitha we. Ni kuthe vene!”
23Munyima mbudhi dhi, dha tapathanine mwawayendhawo eshi, mukathishongero yu ne mbadi mbo gha fa. Ene Jesusi mbadi gha tongwerire Petrusi eshi, Johannesi mbadi mbo gha fa. Ne: “Ngeshi ngo ni hake eshi gha kare muyumi kate ku mbo ni keyera karo, kadi ya kukutokotitha we.”
24Mukathishongero yu, yo gha nongononine yinu yi no yo gha yi tjangire no tuna dimuka eshi, manongweneno ghendi ne gha ghushemwa.
25Po yi di karo yinu yoyingi eyi gha tendire Jesusi. Ene ngo ya pwire kutjanga thofotji kuthofotji, na ghayara eshi kaye kokahe ngo mbadi sho ka wane dyango dyomarukwaro gha.
Currently Selected:
Johannesi 21: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
