Yitenda ya Wapostoli 4
4
HaPetrusi naJohannesi kughutho ghondhango dhaWajuda
1Shime ha karera haPetrusi naJohannesi mukughamba nawanu, ko kuwatjavukera hapristeri namukuru wawakakukunga tembeli, naWasadusayi. 2Hanu wa ha tokotire thikuma. Yoyishi hapostoli ha hongire hanu no kuwayuvitha eshi, hafu mbo hana vumbuka no muvumbukero waJesusi ne wa shemwa. 3Munyima hanu ha kwatire haPetrusi naJohannesi. Yoyishi dya tokerire diyuwa, ko kuwengeneka mudorongo kate pamathiku‐thiku, mudiyuwa dyokuranda ko. 4Ene wa ha yuvire yiyaghura yawo, ha tawire. No thitara thawatawi, tha vurire kate kumayovi kwoko.
5Apa dya vire diyuwa, ko kukuputa hakamuragho wahe, nawamayami nawakamarukwaro muJerusalema. 6Karo namupristeri shokuru hamweya. 7Munyima ko kuwareta wa hapostoli hashawadi kughutho wawo. Awo ha wepurire eshi: “Pangcamu dhadye no mudina dyadye, mwa yi tendera yi?”
8Ko kumuyara Petrusi Mupepo ghoKupongoka, no kuwatongwera eshi: “Mwakamuragho, namwe mwamayami hodiko. 9Dyarero muna kutupangura kuthitenda thothiwa thokwamukatjitju, no ngepi di gha neruka. 10Mwaheya mwe no diko dyodihe dyaIsragheli, mu dimuke eshi yinu yi ne muDina dyaJesus Kristusi ghoMukanasareti, po gha nemanena yu muna kumona kughutho wenu mundjewa‐ndjewa. Jesusi yu mwa pamarerire. Ene gha mu tumunine Nyambi mwawafu.
11Aye ne,
‘Yodiwe di ha yondorire hashokeki wenu.
Shemwa yo ghana kara kashemandhugho.’
12Yo gha reta makomweneno, mbadiko ghumweya. No mbadiko karo dina di ha tapa pano pamuve kwawanu, omu twa wana makomonokero.”
13Hakamuragho ha tutukwire apa ha monine kughudhughutjima waPetrusi naJohannesi. Yoyishi ha wa dimukire eshi wo ne, mbadi ha kuhonga no hanu vene. Karo ha wa dimukire thiwana eshi awa ne hakathishongero waJesusi. 14No apa ha monine murume yu gherukire, gha nemana kwawapostoli, mbadi ha konine karo kuwapambeka thinu. 15Munyima ko kuwarawera eshi ha shwaghe mundhango, tango ha kuvurekere ko pithawo eshi:
16“Nye sho tu tende nawanu wa?” dyo hepurire. “Yoyishi thitetu thoghushemwa thi thina hokoka papawo, hana thi dimukerera thiwana Hakajerusalema wahe. No mbadi twa kona kuthikanana. 17Ene mukuninga eshi, yinu yino mbadi ya kona kutapathana thikuma mudiko, tu yi wa shwenene thikuma no kuwayapitha eshi, mbadi ha kona kughamba shime naghumweya muDina dyaJesusi.”
18Kutunda po, mukamuragho ko kwitha hapostoli no kuwashinga eshi: Nokamanana temba, mbadi ha kona kurundurura kuyuvitha thinu muDina dyaJesusi, ngambi kuhonga. 19Petrusi naJohannesi ha wa huthire eshi: “Mwa kona kununga mwathinda, ethi tha roghera Nyambi. Pakutanga mukutawedhere mwathinda ndi, ndani Nyambi? 20Yoyishi kukwetu, mbadi ya rikanya eshi, tu thighe kughamba yi twa monine no yi twa yuvire.”
21Apa gha manine kuwashweneka thikuma mukamuragho hapostoli, ko kuwashutura gha wa thighe. Eyi ha yi tenderire, yoyishi papirire thihumbithero. Thikuma ne payikara yodiko. No hanu wahe ha kughire Nyambi ko yi ya hokokire. 22Murume yu tha hokokerire thitetu thoyirughana yi, gha karire nomyaka dhokupiterera makumi mane.
Ndapero dhawakakutawa
23Apa ha manine kuwashutura haPetrusi naJohannesi, ko kuhuka kwawatawi wawo, no ka wa thimwetwedhera eyi ha ghambire hapristeri nawamayami kukwawo. 24No pa ha yi yuvire waheya wa, ha kupakerire mundapero kwaNyambi ghuninga eshi:
“GhoFumu, Yowe wa tendire diwiru no muve no dikuruviya, no yoyihe yi ya kara mo. 25Owe ne wa ghambire mukanwa kaDavita, ghokerekandongo wetu paMupepo ghoKupongoka eshi:
‘Pashanye hana karera hahayidena thivunganyi,
no hana peghuhitha mako maghano ghawo?
26Hafumu hopamuve nawaraghuri,
heman̂anyine ha kukwatithe ha dhimbi Fumu no Yu gha pwire kuwetha, wendi.’
27Eyi yo ya hokikire shemwa mumbara dhino. Herodesi naPontighus Pilatusi nawahayidena, no diko dyaIsragheli, ha kupakererire heman̂anyene mupongoki ghoye no mukareri ghoye Jesusi, yu wa wethire. 28Nawo ha tendire yoyiheya, yi wa rikanyithire pakutanga no yi wa nungire.
29“Keho ne ghoFumu, mone eshi ngepi di hana kututughumukera. Ninge eshi hapikoye, mbo ha yuvithe n̂ando dhoye noghudhughutjima ghoghukuru. 30Dyoko dyoye di rete merukitho. No dihokore yidimukitha no yitetukitha, muDina dyamupongoki ghoye nomukareri ghoye Jesusi.”
31Munyima dhokurapera kemo, ko kukin̂a dyango di ha karire pofotji. No wahe ha pwire kuyaritha naMupepo ghoKupongoka, no ha yuvithire n̂ando dhaNyambi noghutjima.
Makupakerero ghoghushwi wawatungi
32Wingi wa wa ha tawire, ha karire nomutjima ghofotji nomudhimu ghofotji. Mbadiko yu gha ningire eshi kanu kopayimuna yendi ne ka kare kendi. Ene ha yi kutaperire waheya pofotji. 33Hapostoli ha nongononine noyitenda yongcami eshi, Fumu Jesusi ne gha vumbukire mwawafu. No n̂eke dhaNyambi dha kurire papawo wahe. 34Karo, noyofotji temba yu gha nyandire pakatji kawo. Yoyishi yu gha karire nodipya, ngambi ndhugho, gha yi ghurithire po. Eyi ya shwaghire po gha ka yi retire, 35no gha yi tapire kwawapostoli. Awo ne ha yi taperire kwakehe yu, thika di gha nyanda.
36Josefu ghoMulevite, oyu ha shamurukerire muSipurusi, no yu ha tire hapostoli eshi Barnabasi, — kuninga eshi mutjimapithi. 37Naye gha ghurithire farama dhendi, no gha retire manyinga ha gha tapa kwawapostoli.
Currently Selected:
Yitenda ya Wapostoli 4: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
