Yitenda ya Wapostoli 5
5
Ananiyasi naSafira
1Ene pa karire murume ghumweya Ananiyasi namunu wendi Safira, awa ha ghurithire ghugavo wawo. 2Pamughuro wawo ha thighire ko dihenda dimweya. Oku ghana yi dimuka mukamadi. Yimweya ne ha yi twarire kwawapostoli. 3Ko kuninga Petrusi kukwendi eshi: “Ananiyasi, nye yi ghana kupemukithera kemo Shatani eshi, wangere Mupepo ghoKupongoka, pakuhoreka dihenda dyomughuro ghodipya dyoye? 4Dipya ne dyoye. No pa kudighuritha, wa kona kutenda nomanyinga thika di ghuna haka. Yinye yina kuyudhu pakutenda yi? Mbadi ghu nangera hanu, ene Nyambi ghu nangera.”
5Apa gha yuvire Ananiyasi yi, ko kuwa kwendi gha fe. Nawamweya wa ha yuvire yi ha yapire thikuma. 6Hangaghu ha mu henyenine no ha mu vungavungire ha ka vumbeke.
7Munyima, ngwa maviri mahatu gha pitire po, ko keya mukamadi wendi ghukashadhoka, koyi yina hokoka. 8Petrusi ha mwipura eshi: “Ni tongwere eshi, po nga yi hurera popa yi nga mu ghuritha dipya ndi?”
“Kemo, thika kenge yo,” dyo gha huthire.
9Ko kuninga Petrusi kwamukamadi eshi: “Pashanye nga mu kuyuvera kemo, mu yereke Mupepo waFumu? Hanu wa hana vumbeka didhiko dyoye, tamba ha kume karo popa no kuthero, wo sho ha kundjengandjengithe nowe.”
10Naye ko kufa popo kughutho waPetrusi. Ko kwingena mo hangaghu no ka mu mona eshi ghana fu, ha mu twara kwawo ha ka mu vumbeke kumbadi dhadidhiko dyendi.
11Mbunga dhawakriste wahe nawanu wahe wa ha yi yuvire, ha yapire thikuma.
Yidimukitho yoyingi noyitetukitho
12Pawapostoli, pa shwaghire yidimukitho yoyingi no yitetukitho mudiko. Nawakakutawa wahe, ha konganine rwingi pofotji mumukara ghoMaghundhi ghaSalomo. 13Ene hanu hamweya, mbadi ha ghayarire eshi ha kununge nawo. Ene diko, dya wa kutekerire. 14Ko kuvura hanu wa ha tawire mwaFumu, harume nawakamadi waheya ha pwire kuwedherera kuthitara thawatawi. 15Hanu hathinda ha shwaghithangire hakakukorwa mumukara, no kuwashimbera payirongo no pamadidi. Mukuninga eshi, gha pite po Petrusi ngambi mudhidhimbi wendi ghuna fughu hamweya. 16Karo hengi hanu homumaghumbo ghomumukunda waJerusalema, awa ha retire hakorwi nawanu wa ha yarire nomipepo dhodhimango. Waheya ha pwire kwirukitha.
Makuthakuthero ghawapostoli
17Mupristeri shokuru, nawakakumukunga wa ha hatire kwaWasadusayi, ha karire nonya dhodhikuru thikuma, no ha kuyuvire hengenene mo nawo. 18Ko kukwata kwawo hapostoli no kuwapaka modorongo. 19Ene muengeli waFumu, gha yandhururire paghuthiku yero yodorongo, no gha shwaghithire hapostoli ghuninga eshi: 20“Mu yende mu kemane mutembeli. Ho mu ka yuvithe diko mbudhi dhokuyara dhomoyo ghuno ghoghupya.”
21Nawo ha yi yuvire, no ha yendire pamathiku‐thiku mutembeli ha ka honge hanu.
Kapupi podigho popo, mupristeri shokuru nawakakumukunga, nawakamiti hodiko dyaIsragheli, ha kuputire ha tende ndhango dhishokuru. Ko kutuma hanu kudorongo ha ka rete hapostoli.
22Ene pa ha ka kumine ko hakarerimuragho, mbadi ha ka wa wanine mudorongo. Munyima ko kahuka na ha tongore eshi: 23“Dorongo, tuna ka dhi wana shime dha pwera kutjapera. Nawakakukunga kughutho ghoyero. Ene pa tuna yandhurura twingene, noyofotji mo temba.”
24Apa gha yi yuvire nduna wawakungi hotembeli, nawapristeri hohakuru, ko kuwawana thitangadimba no thitetu thothikuru koyi ya hokokire kwawapostoli. 25Popo ko kwiya ghumweya gha wa tongwere eshi: “Muna yi dimuka, harume wa mwa pakire mudorongo, waya ha nemana mutembeli, no kuna kuhonga diko!”
26Ko kuyenda ko nduna nawakarerimuragho, ha ka rete hapostoli. Ene kadi nomuthineneko, yoyishi ha yapire kudiko eshi, maghana sho ha wa paghe nomawe. 27Ha ka wa retire kughutho ghondhango, namupristeri shokuru gha ningire kukwawo eshi: 28“Mbadi twa ka mu tuyekedhire ghumushinga eshi, kadi wa kuhonga hanu muDina dino ndi? Pan̂anyi‐n̂anyi ne, Jerusalema yomuhe ghana yara noyihonga yenu! Karo muna shana kuturambeka kuyifa yamurume yu.”
29Petrusi gha huthire mudina dyawapostoli eshi: “Munu, gha kare noghutawedhi kwaNyambi pakutanga, kupiterera hanu! 30Nyambi wawakerekandongo wetu, gha tumunine Jesusi mwawafu munyima dhokumupagha mwe, no papendi mwa mwambire kuthikurushe. 31Nyambi gha mu yeyurire kurudyo rwendi, gha kare Mukamiti no Mukomononi. No gha kone kureta Isragheli kumapirukero, no ha pwe kuthigherera maharwero ghawo. 32Natwe yatwe twatunonga ghoyinu yi. NaMupepo ghoKupongoka, oyu gha tapa Nyambi koyu gha mu yuva.”
33Pakuyiyuva hamuragho, ko kufudhakana kwawo no ha shanine kupagha hapostoli. 34Ene Mufarasayi ghodina dyoGamaliyeli, muhongi ghomuragho, oyu ha kutekerire hanu wahe. Ghemanine mundhango no gha kumberire eshi, ha wa shwaghithe hapostoli tango kamanana panunda.
35Munyima gha ningire kundhango eshi: “Mwaisraghelite, mu koneke thiwana koyi muna kushana kutenda nawarume wa. 36Kanako kana pitipo, nga yi hokoka pano yaTeghudasi, eyi ya karire mumeman̂anyeno no gha ghambire eshi, aye ne yomukayidimuka. Gha karire ngwa nawarume mathere mane hokuhata kukwendi. Gha pwire kupagha, nawa ha mu kuthire ha pwire kuharan̂anya. No meman̂anyeno, mbadiko yi ya shwaghire po. 37Munyima dhendi, heman̂anya Judasi ghoMukagalileya, munako dhoditjango dyawanu. Naye gha kukokererire dihenda dyodiko, gha di pemune. Ho gha pwire kupagha naye. No hakakumuranda wahe, ha pwire kutjidha‐tjidha. 38Kuyoyiheya yi, na kumupa dighano dyange ngeno: Mu thighe hanu wa, no mu wa shuture. Yoyishi, ngeshi yi hana kuhima no yi hana kutenda ne yawanu, ngo mbadiko thi mbo thi shwagha po. 39Ene ngeshi ngo mwaNyambi ya tunda, ngo mbadi mbo mu kona kuwashinga. Ya mba hokoka munyima eshi, yamwe mwathinda mwa kananine Nyambi.”
Ndhango dha mu teghererire. 40Nawo hethire hapostoli mundhango no kuwamwashura. Gho ha wa shingire eshi, mbadi ha kona kughamba shime thinu muDina dyaJesusi. Kutunda po ko kuwathigha.
41Hapostoli ha shwaghire mundhango, no ha shambererire thikuma eshi, yina wa roghera yokuwambirupitha no kuwanyandeka muDina dyaJesusi. 42Ene mbadi ha vumwine kehe diyuwa mukuhonga hanu mutembeli no mumaghumbo, no kuyuvitha mbudhi eshi Jesusi ne Kristusi.
Currently Selected:
Yitenda ya Wapostoli 5: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
