Yitenda ya Wapostoli 6
6
Matorwero ghawadiyakoni kwoko nohawadi
1Mumanako gha, apa ha vurire hatawi, ya karire yinyeghenya pakatji kawakakughamba Thihirika naWakathiheburayi. Eshi hadidhi wawo, hapwe kukorera kehe diyuwa. 2Hapostoli dikumi nohawadi, ko kwitha kwawo hakakutawa wahe pofotji no kuwatongwera eshi: “Mbadi ya rikanya eshi, tu yongarithe mayuvithero ghon̂ando dhaNyambi, mu kutanaritha yikorera. 3Apa no mwayendhange, mu torore mukatji kenu harume kwoko nohawadi, hoyikara mwene. Awa ha yara naMupepo ghoKupongoka, noghunyanyami eshi ha wa pake muthirughana thino. 4Atwe ne mbo tu tape ghukoneka wetu ghoghuhe kumandapero, no mughukarera ghonando.”
5Yihima yi, ya wa rogherire hatawi wahe no ha tororire Stefanusi. Murume ghomatawero ghokuyara, no gha yarire naMupepo ghoKupongoka. Karo kemo ha tororire shime Filipusi, Progorusi, Nikanori, Timoni, Parmenasi, naNikolaghusi yu gha tundire ku Antiyokiya noyu gha tundire pakutanga mughuhayidena, kate kuGhujuda. 6Ko kuwatwara kwawapostoli. Awo ha wa rapererire no kuwakambeka manyara.
7Nando dhaNyambi dha tapathanine kughutho. No thitara thawatawi homuJerusalema tha tanarire thikuma. Karo wingi wawo hapristeri, ha tawire.
Kunakumukwata Stefanusi
8Stefanusi yu gha pire Nyambi n̂eke dhodhingi no ngcamu, gha tendire yitetuki yoyikuru no yidimukitho, mukatji kodiko. 9Hamweya wa ha hata kusinagoge dhaWapika hoHakomonoki, thika di ha dhi toya. Edhi dha tunda kwaWajuda homuSirene no muAleksandriya. Ha kuyuvire pofotji naWajuda wa ha tundire kuthiko thaSilisiye naAsiya, no heman̂anyenine Stefanusi. 10Ene mbadi ha mu konine kughunyanyami ghu gha wanine kwaMupepo no ghu gha ghambithire. 11Ko kuhongaghura kwawo hanu, ha ninge eshi: “Tuna mu yuvu ku ghana kushwahura Mosesi naNyambi.”
12Awo ne ko kumuputera diko nawamayami, nawakamarukwaro. Awa, ha mu gahukerire, no ha mu kokerire kundhango. 13Gho ha wanine hashupi hombango ha ninge eshi: “Murume yu, mbadi yina kuhura kukwendi yokutoyaghura yinu yotembeli dhokupongoka, no yomuragho. 14Atwe tuna mu yuvu di ghana kughamba eshi, oyu Jesusi ghoMukanasareti, mbo ghana dhingununa tembeli no kupiraghura yi gha tu pire Mosesi.”
15Oku shime ha mu nungurukera ghumukengurura, hakandhango wahe Stefanusi, ko kumona kwawo rupara rwendi runa pitura yira rwamuengeli.
Currently Selected:
Yitenda ya Wapostoli 6: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
