Yitenda ya Wapostoli 7
7
Yiyaghura yaStefanusi
1Mupristeri shokuru ko kwipura Stefanusi eshi: “Yashemwa ndi?” 2Ko kuninga Stefanusi eshi: “Mwayendhange no mwatate, mu tegherere kukwange! Nyambi yu dyeyera dikuto dyodihe, gha hokokire kwakerekandongo wetu Abrahamu. Oku ye shime gha karera muMesopotamiye, kughutho ghokatunga ye muHarani. 3Nyambi gha ningire kukwendi eshi: ‘Tunde muditunga dyawiho nawapoye. No ghu yende kuditunga di mbo ni ka kuneghedha.’ 4Abrahamu gha tundire muditunga dyaWakagalata, no gha ka tungire muHarani. Munyima dhokufa wihe, ko kumudhirutha Nyambi gha mu tware kuditunga di muna kutunga mwe pashadyarero. 5Nyambi mbadi gha mu pire yimuna yendi thinda muditunga dino. No dikaha temba. Ene ditunga di gha di mu turekerire yira ghushwi wendi. Munyima dhendi hanahoka wendi, ngambi kenge gha pirire mwana. 6Nyambi gha ningire ngeno: ‘Hanahoka wendi, mbana kara hathinda‐shaditunga dyawanumaghana. Ko mbo ha ka kara ghupika, no mbo hana ka wana ghukukutu, rure romyaka dithere. 7Ene mbo na humbitha diko di mbo di wa tenda ghupika.’ Shime gha ghambire Nyambi eshi: ‘Kutunda po, mbo hana dhiruka no mbo hana na ni karera mudyango dino.’ 8Ndani Nyambi, gha kunungire ghundambo naAbrahamu, omu tha kara thidimukitho thomaken̂eno. Ho ya karire kenge yo eshi, Abrahamu gha ken̂ine mwanendi Isaka mudiyuwa dyoghukwoko noghuhatu munyima dhomushamurukero wendi. Isaka naye dyo gha tendire naJakopu. NaJakopu naye dyo gha tendire nawakerekandoko wetu dikumi nohawadi.
9“Panya dhawakerekandongo, ko kumughuritha Josefu kughupika muEgiptena. Ene Nyambi gha karire nendi, 10no gha mu ghamwenine muyinyanda yendi yoyiheya. Nyambi gha mu pire Josefu ghunya‐nyami, kate gha mu ghovamenine Faragho, ghofumu waEgiptena. Faragho, gha mu pakire yira mukadyango dyafumu waEgiptena, nothindashamarombe ghendi ghomahe. 11Munyima, ko kukara diyerenge muEgiptena yomuhe no muKanaghani karo. Kunyanda kwa karire kukuru thikuma. Ngambi hakerekandongongo wetu, mbadi ha konine kuwana thidya munyara. 12Apa gha yuvire Jakopu eshi, muEgiptena ne mo yidi yidya, ko kutuma ko kwendi hakerekandongo wetu muruyendo rwawo rokutanga. 13Paruyendo rwawo roghuwadi, ha kudimukitha Josefu kwawakuru wendi. NaFaragho naye gha yuvire yohapa Josefu. 14Ko kutuma Josefu ha ka shimbe wihe Jakopu, nawapendi wahe. Wahe pofotji ne, hanu makumi kwoko nomawadi nohakwoko. 15Jakopu gha yendire ku Egiptena no ko gha ka fererire ye, nawakerekandongo wetu. 16Mwimba dhawo ha dhi twarire kuSigemu, no ha ka dhi vumbekire mumbira dhi gha ghurire Abrahamu nomanyinga ghomengi muSigemu, kwawanahoka waHemori.
17“Munako dhi eshi, Nyambi ngo gha rikanyithe eyi gha turekerire Abrahamu, tha vurire thikuma thitara thodiko muEgiptena. 18Fumu ghomupya oyu gha dhirire kudimuka Josefu, gha karire muEgiptena noyipara yayo‐nayo. 19Aye gha karire nomaghano ghomaringi‐ringi kwawaguva wetu, no gha tendire ghukenya kwawakerekandongo wetu. Gha wa thinenekire eshi, ha mwagherere hanawo no ha fe. 20Munako dhi, gha pwire kushamuruka Mosesi no gha roghire thikuma. No rure rotughonda tuhatu ha mu korerire hawihe. 21Munyima ha mumwagherera kwawo. Ko ka mu shekamwana Faragho ghomukamadi. Naye gha mu kurithire yira mwanendi ghokukwerekera. 22Mosesi gha pwire kuhonga mughunyanyami ghoghuhe waWakaegiptena no gha rwedhimine mun̂ando nomuyitenda.
23“Apa gha karire nomyaka dhendi makumi mane, gha rurire eshi gha ka dhingure haguva wendi hodiko dyaIsragheli, eshi ngepi di hadi. 24No apa gha monine eshi, ghumweya ghopapawo kuna kumupetha Mukaegiptena, ko kumughamwena kwendi murume yu ha pethire. No gha paghire nonyinya Mukaegiptena.
25“Aye gha ghayarire eshi, hapendi ha tjwathane eshi Nyambi ghana mu tendi thighamwenitho thawo. Awo ne mbadi ha yi tjwathanine. 26Mudiyuwa dyokuranda ko, ko kutjavukera kwendi Haisraghelite hawadi, oku hana kurwa. Ho gha shanine kutenda thiraro no gha ningire eshi: ‘Mwanu mwe, amwe ne mwakaghumina! Yinye muna kurwera?’ 27Ene ju gha tangire mvo, ko kupumura Mosesi pamatji gha ninge eshi: ‘Yidye yu ghana kutendi yira mukamiti nomupanguri kukwetu? 28Ghuna shana kunipagha thika di nga ghu pagha peghundha Mukaegiptena ndi?’ 29Apa gha yi yuvire Mosesi, ko kutjira gha ka kare Mukamidiyani. Ko gha ka wanenine hana hawadi.
30“Munyima dhomyaka makumi mane, ha mu hokokera muengeli diyuwa dimweya mumamboreya kudirundu dyaSinayi aye Mosesi muthiginda thokutumbuka. 31Mosesi gha tutukwire thikuma ko yi gha monine. Eyi gha kokerire ko gha ka mone eshi yinye yi, ko kuyuva kwendi diywi dyaFumu eshi: 32‘Yame Nyambi wawakerekandongo ghoye, Nyambi waAbrahamu, waIsaka naJakopu.’ Mosesi gha tutumine, no mbadi gha thoterire ko eshi gha yi mone. 33NaFumu gha ningire kukwendi eshi: ‘Shuture makuha ghoye yoyishi, dyango dyo ghu nemana ne, muve ghokupongoka. 34Rupetho rodiko dyange romuEgiptena ne na ru mono. Nomadiro ghawo na gha yuvu. Yo neyera kukuwaghamwena. Henye pepi, na haka kukutuma kuEgiptena.’
35“YoMosesi yoyu, oyu ha dhirire kutawa Haisraghelite, noyu ha ningire eshi: ‘Yidye gha kupaka yira mukamiti nomupanguri?’ Shemwa yo gha tumine Nyambi kukwawo yira mukamiti nomushuturi, pamuengeli yu gha mu hokokerire pathiginda. 36Kemo dyo ya karire eshi, gha wa tware Mosesi. Myaka makumi mane gha tendire yidimukitho noyitetukitho muEgiptena, kudikururuviya dyoDikihu nomumamboreya. 37Oyu ne yoMosesi yofotji, oyu gha ningire kudiko dyaIsragheli eshi: ‘Nyambi, mbo ghana tumbu muporofeta mwawenu wa hakuhonga, yira yame.’
38“Aye yoyu gha karire dinungo dyodiko, apa dya kukongwedhire diko mumamboreya, pakatji kawakerekandongo wetu namuengeli oyu gha ghambaghurire nendi padirundu dyaSinayi. Gha wanine man̂ando ghomoyo, agha sho gha tupe.
39Hakerekandongo wetu ha shwenine kutegherera kukwendi. Hamu shamunine no ha rurire kuEgiptena. 40Ko kuninga kwawo kwaAroni eshi: ‘Tu tende hanyambi, awa sha kone kutupitera kughutho. Yoyishi Mosesi yu gha tu tundithire muEgiptena, mbadi tuna dimuka edi gha di.’ 41Eyi ya randire ko ne, ha tendire nyambi ghothitjwandjo mumanako ghogho, muthishwi thondana. Ko kureta ko miyambo na ha tendire mafeste, kudifumanekero dyoyitenda yonyara dhawo. 42Ene Nyambi gha wa pirukerire mughongo, no gha wa thighererire ha kanderere nungwedhi, thika di ya pwire kutjanga mumbapira dhamuporofeta eshi:
‘Kemo ya karire kukwange ndi, owe Isragheli,
eshi miyambo dhokupagha nodhokukon̂enera mu dhi ni retere
mumyaka dhodhihe makumi mane mumamboreya?
43Ava ko, tende waMologo mwa shimbire
noditungwedhi dyanyambi wenu Refani.
Yoyitjwandjo yi mwa tendire kukuyikanderera.
Yo mbo ni mu tumena kuthambodiya dhaBabiloni.’
44“Hakerekandongo wetu, ha kupungwerire tende ghoghushupi mumamboreya. Mosesi gha yitendire kumahimeno ghaNyambi, pathitamenedhi thi gha monine. 45Nawanahoka wa ha randire ko, ha tamburire tende yu, no ha mu shimbire apa ha karire mukunyanda mughutungi wa Josiwa, muditunga di gha tjidhire Nyambi wa ha tungire mo, kughutho wawakerekandongo wetu. Mo gha ka karire tende kate mumayuwa ghaDavita. 46Nyambi gha mu nongopire. Munyima Davita, gha kumberire kwaNyambi eshi, gha mu shokekere tembeli dhawanahoka waJakopu. 47Ene yu gha shokekire tembeli ne Salomo. 48Nyambi ghomukakupiterera ne, mbadi gha tunga mo yi ha shokeka hanu, thika di gha yi ningire muporofeta eshi:
49‘Diwiru ne dipuna dyange,
nomuve ne dyodimbaro dyange,
dyo ghana kughamba Fumu.
Ndhugho dhorudhi munye ne mbo mu ni tendera,
ngambi dyango munye dyo maturumuthero ghange?
50Kadi yame nothinda na tendire yinu yoyiheya yi ndi?’
51“Mwakaghukukutu mitwi mwe! Mwahayidena mumitjima dhenu. Mwayipuru‐puru kun̂ando dhaNyambi. Yamwe mwakakukanunutha roruhe Mupepo ghoKupongoka. Thika di ha tendire hakerekandongo wenu, dyo muna kutenda namwe. 52Pa karire muporofeta, yu ha dhirire kukutha‐kutha hakerekandongo wenu ndi? Awo, wo ha paghire hakamushongwe waNyambi, awa ha yuvithire pakare‐kare mwiyero waMuhunga. Apa no, yamwe mwathinda muna kumuheta Muhunga no kumupagha. 53Amwe ne yamwe mwanu mwe mwa tamburire muragho waNyambi, pawaengeli. Ene mbadi mwa ghuteghererire.”
Kuna kumupagha Stefanusi nomawe
54Apa ha yi yuvire hakamuragho, ko kukuhuma ngayegho kughupata. 55Ene Stefanusi, gha yarire naMupepo ghoKupongoka, gha dighamenine kuwiru, no gha monine ghufumu waNyambi, naJesusi yu ghana hungumana kurudyo rwaNyambi.
56“Mu mone,” dyo gha ningire, “na mono diwiru dina yandhuruka, naMwanamunu gha nemana kurudyo rwaNyambi.” 57Ko kukushomonona kwawo thikuma no kukuvuka mumatwi ghawo. Ndani hana kumugahukera kwawo yira munu yofotji. 58Ko kumuparanya kwawo mumbara, ha ka mu paghe nomawe. Hatunonga ha pakire yitere yawo kwamungaghu ghodina dyoSaghulusi. 59Oku shime ha mu vukuma nomawe, ko kwitha Stefanusi eshi: “Fuma Jesusi, tambure mudhimu wange!”
60Ko kukuvama kwendi pamanwi ghendi, no gha kughererire eshi: “Fumu, wa wa wedherera ko nodiharwero dino.”
Noman̂ando ghano, ghoghafire nagho.
Currently Selected:
Yitenda ya Wapostoli 7: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
