Johannesi 12
12
Kuna kumuwetha Jesusi muBetaniya nomaghadhi ghothende
(Mat 26:6–13; Mark 14:3–9)
1Mumayuwa kwoko nodyofotji kughutho ghoPaska, gha yendire Jesusi kuBetaniya oku gha karire Lasarusi, oyu gha tumunine mwawafu. 2Oku ya ko ha ka mu yumburire Jesusi yidya. Marta yomukakuyumbura, Lasarusi gha karire kuthidyero pofotji na wa ha hungumanine naJesusi. 3Ko kutumbura Maria mukawero maghadhi ghondhiro dihenda dyoliteri, no gha wethire mapadhi ghaJesusi, ho gha kuyurire mapadhi nohuki dhendi. No ndhugho dhodhiheya dha yarire nothiwe thomaghadhi gha.
4Ha ningi Judas Iskariyoti ghumweya ghopawakathishongero wendi, oyu mbo gha mu hokora eshi: 5“Nye hana dhiri kughuritha thende yu kumarandi mathere mahatu, no kutapera manyinga kwawahepwe?” 6Ene mbadi gha yi ghamberire mukukudhekera kwawahepwe, yoyishi gha karire mwidhi. Gha karire nokakomani, ho gha tumburangire ko yihupi.
7Jesusi gha ningire eshi: “Mu thighe gha kare. Gha yi kwaterekedhe kutunda kudiyuwa dino, no mbo gha ni wethe kumuvumbekero wange. 8Hahepwe ne nenu ha kara roruhe, amwe ne kadi nange roruhe.”
Hana shana kumupagha karo naye Lasarusi
9Wingi wawo Hajuda ha yuvire eshi, Jesusi ne po gha di naye no ha yendire ko. Ene mbadi ha yenderire Jesusi keho, no kwaLasarusi oyu gha tumunine mwawafu. 10Hapristeri hohakuru ha nungire eshi, ha mu paghe naye Lasarusi. 11Yoyi thingi thawo Hajuda ha yenderangire papendi kwaJesusi no ha tawire mwaJesusi.
Mwingeneno waJesusi muJerusalema
(Mat 21:1–11; Mark 11:1–11; Luk 19:28–40)
12Mudiyuwa dyokuranda ko, ha yuvire hanu awa heyire kudifeste eshi Jesusi ne ghana kumu muJerusalema. 13Ko kushimba kwawo mite dhomakindhu ha mu tjingawere ghushogherera eshi: “Ghusho! Gha fumane oyu ghana kwiya muDina dyaFumu! No Fumu waIsragheli!”
14Jesusi gha dhinine pathidongighana ethi gha wanine, thika di ya pwa kutjanga eshi:
15“Wa yapa, owe mbara Siyoni!
Mone ghana kumu Fumu ghoye
no ghana dhini pathidongi.”
16Hakathishongero waJesusi, mbadi ha tjwathanine pakutanga yinu yi. Ene munyima dhokumukutekera, ko kuvuruka kwawo eshi, yoyiheya yi ha tjangire yokukwendi, yina mu hokokera.
17Hanu awa ha karire naJesusi apa ghethire Lasarusi muthipiro, no pa gha mu tumunine mwawafu, ha kuyongire roruhe kuyinu yi. 18Yo dha mu tjingawererire mbunga. Yoyi ha yuvire eshi yo gha tendire thitetukitho thi. 19Ha ghambathana Hafarasayi eshi: “Mu mone, mbadiko thi muna kurongeka! Kaye kokahe kukutha kana kumukutha!”
Nako dhokumufumaneka ne dhina kokera
20Mukatji ka wa heyire kudifeste, mwa karire karo Hahirika hamweya awa heyire kukukanderera. 21Awo ha yendire kwaFilipusi oyu gha tundire muBetsayida ghomuGalileya ha ka mwipure eshi: “Mukadikuto, tuna haka shemwa kumona Jesusi.”
22Filipusi ko kuyenda gha ka yi tongwere Andreyasi. HaAndreyasi naFilipusi ha ka yi mu tongwerire Jesusi. 23Po gha wa tongwerire Jesusi eshi: “Dhi neya nako edhi sha kutekere Mwanamunu. 24Shemwa na kumutongwera: Ngeshi kadi wa kuwera dinona dyotumbi mumuve dishifu, dina kukara dyofotji vene. Ene ngeshi ha di fu, dina kureta mukesho ghoghukuru. 25Mukakuhaka moyo wendi, mbo ghuna yongara, ene yu ghokudhimba moyo wendi pakaye kano, mbo ghuna pu kughunguvura kumoyo ghororuheya. 26Ngeshi ha himi ghumweya kunikarera, gha ni kuthe. No ku ni di Me, ko sho gha kare mupikange. Karo kemo ngeshi ha ni karera ghumweya, mbo ghana mu kutekera Tate.
27“Nanyi‐n̂anyi, na ndundumena thikuma. Yinye ne sho ni ghambe? Ni ghambe eshi, Tate ni ghamwene muviri dhino ndi? Ene shemwa yo neyerire yoviri dhino. 28Tate kutekere Dina dyoye!”
Ko kushwagha diwyi mudiwiru eshi: “Ame na kutekera Dina dyange, no mbo na di kutekera.”
29Hanu wa hemanine po, ha yi yuvire no ha ningire eshi, mudikitero vene.
Hamweya eshi: “Muengeli ghana ghambaghura nendi.”
30Ha ningi Jesusi eshi: “Diywi di mbadi dina shwaghera muDina dyange, ene muDina dyenu. 31N̂anyi‐n̂anyi dhi neya nako dhokupangura kaye kano. Shokuru ghokaye kano, kuna kumuthindekera panunda. 32Ene ngeshi ha ni yeyura Me pano pamuve, na kukokerera waheya kukwange.” 33Eyi gha yi ghamberire yi, kukudimukitha eshi yifa munye mbo yi mu dya.
34Hanu ha mu tongwerire eshi: “Mumuragho ha tu honga eshi, Kristusi ne mbo ghana kara kuroruheya. No ngepi di ghuna kuninga eshi Mwanamunu gha pwe kuyeyura? Yidye yu Mwanamunu?”
35Ha wa hutha Jesusi eshi: “Shime kapupi kamanana thina kukara thishe kukwenu. Mu yendaghure muthishe oku mu di natho, gha dhire kumufika makokore. Oyu ghokuyendaghura mumakokore, mbadi ghana kudimuka oku sho gha shwaghere. 36Oku muna wana thishe, mu tawe kuthishe, mu kone kukara hanu wathishe.”
Yo gha ghambire Jesusi yi, munyima ko kuwayakunuka gha konde.
Kupira matawero kwawanu kwaJesusi
37Ngambi kenge gha tendire Jesusi yitetukitho yoyingi kwawanu, mbadi ha tawire mumwendi. 38Kemo sho gha pwe kurikanyitha man̂ando ghamuporofeta Jesaya, agha gha ningire eshi:
“Fumu, yidye gha tawa koyi twa yuvire?
No kwadye dha hokokera ngcamu dhaFumu?”
39Yo ha dhirerire kutawa. Yoyishi Jesaya gha ghambire parumweya karo eshi:
40“Nyambi gha pakire meho ghawo ghukunga
no gha kukutithire mitjima dhawo,
eshi ha dhire kukona kumona nomeho ghawo
no ha dhire kutjwathana nomitjima dhawo
no kupiruka temba,
Name kadi wa kuwerukitha.”
41Eyi gha yi ghamberire Jesaya, yoyi gha monine fuma dhaJesusi no gha ghambire yokukwendi.
42Yashemwa, wingi wawo hakamuragho waWajuda, ha tawire mumwendi. Ene pamurandu ghowoma ghokwaWafarasayi, yo ha dhirire kuyinongonona ghutunumeka eshi, maghana sha wa tjidhe mumasinagoge. 43Yoyi ha hakire eshi, ha wa fumaneke hanu kupiterera Nyambi.
44Ha kugherera Jesusi thikuma eshi: “Oyu ghokutawa muMwange, mbadi ghana kutawa muMwange keho, ene nomoYu gha ni tumine. 45No yu ghana kunimona, ghana mono Yu gha ni tumine. 46Ame neyire mukaye yira munyenge, eshi yomuhe ghokutawa muMwange, gha dhire kukara mumakokore. 47Ene ngeshi ghumweya ha tegherera kuman̂ando ghange, no ghana kughanyatha, mbadi na kumutetera ndhango. Yoyi mbadi neyire kukuterera kaye ndhango, ne kukughamwena kaye. 48Oyu ghokunimwagha no kadi wa kukwata man̂ando ghange, gha wana kare thinu thokumutetera ndhango, Man̂ando gha na yaghurire, gho mbo gha mu tetera ndhango paghuhura. 49Yoyishi mbadi na yi ghamba mumwange nothinda, ene shemwa Tate yu gha ni tumine, yo gha ni fundhwerire eshi ni tongore eyi sho ni ghambe. 50Na dimuka eshi mafundhwero ghendi ne moyo ghororuheya gha ninga. Eyi na kutongora, thiwana na kuyitongora thika di gha yi ni tongwerire Tate.”
Currently Selected:
Johannesi 12: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
