Johannesi 13
13
Jesusi ghana kuyogha mapadhi ghawakathishongero wendi
1Kughotho ghokuyungayungera membero ghodifeste dyoPaska, gha dimukire Jesusi eshi, dhi neya nako dhokutunda ye pano pakaye no kuhuka kwaWihe. Gha hakire hendi awa ha karire muno mukaye. No ruhakitho rwendi, gha ru hokorire kate pakahero karo.
2Jesusi gha karire kuthidyero nawakathishongero wendi. Shatani ye ne ku kare ngengena muyighayara yaJudasi, ghomwana Simon Iskariyoti, eshi gha mu hete Jesusi. 3Jesusi gha dimukire eshi, Wihe gha tapire yoyiheya munyara dhendi, no gha tunda kwaNyambi no mbo ghana huka kwaNyambi. 4Munyima ghemanine kuthidyero no gha shupurire mwaye wendi, ho gha tumburire mukata gha ghu kughange. 5Gho gha pingwerire meyu mukaronga kokukuyoghera, no gha tangire kuyogha mapadhi ghawakathishongero wendi, ho gha wa kuyurire nomukata oghu gha kughangire.
6Pakukuma kwaSimon Petrusi, hepura Petrusi kukwendi eshi: “Fumu ghuna haka kuyogha mapadhi ghange ndi?”
7Jesusi gha mu huthire eshi: “Eyi na kutenda, mbadi sho yi tjwathane pan̂anyi‐n̂anyi, ene mbo ghuna yi tjwathana munyima.”
8Petrusi gha ningire kukwendi eshi: “Mbo kufere eshi kuyogha mapadhi ghange we!”
Po gha mu tongwerire Jesusi eshi: “Ngeshi mbadi sho ni kuyoghe, ngo mbadi sho ghu kupakerere nange.”
9Simon Petrusi, gha ningire kukwendi eshi: “Fumu, kadi mapadhi keho, ene no moko no rupara rwange karo.”
10Ha mu hutha Jesusi eshi: “Oyu ghana yoghana, mbadi gha nyanda shime munyima kuyogha mapadhi ghendi, yoyishi ghana kenenena. Amwe muna keni pan̂anyin̂anyi, ene kadi mwahe.” 11Aye Jesusi gha dimukire eshi, yidye sho gha mu hokore. Yo gha ghamberire eshi: “Mbadi muna kenenena mwaheya.”
12Apa gha manine kuyogha mapadhi ghawo, gha kukavire karo mwaye wendi no gha hungumanine ha wa tongwera eshi: “Muna yi tjwathana eyi na mu tendi ndi? 13Amwe muna kunitoya eshi, muhongi no Fumu, ene yina mu hungamena. Yoyishi yoYame yu. 14Ngeshi ngo Yame Fumu wenu no muhongi wenu, gho na yogho mapadhi ghenu, mwa kona namwe kukuyoghathana mapadhi ghenu. 15Yoyi na mu pa thitamenedhi, no thika di na tendi Me kukwenu, kemo dyo mbo mu tenda namwe. 16Shemwa na kumutongwera, mupika mbadi gha piterera hekudyendi, nathitumi, mbadi gha piterera mukakumutuma. 17Muna yi dimuka pan̂anyi-n̂anyi, mwakaruvigha ngeshi ha mu yi tendi namwe karo.
Jesusi ghana kunegha munyathi wendi
(Mat 26:21–25; Mark 14:18–21; Luk 22:21–23)
18“Mbadi na kughamba kukwenu mwahe. Ene na dimuka wa na torora po. Yitjanga ne yi pwe kurikanyitha ndani. ‘Oyu ghana kudya kughuroto wange, yo ghana ni thambera mumughongo wange.’ 19Pan̂anyi‐n̂anyi, na kumutongwera yoyihe kughutho ghokuhokoka kwayo. Apa mbo yi hokoka mu kone kutawa eshi, Ame ne Yame vene. 20Shemwa na kumutongwera, oyu ghokutambura yu mbo ni tuma Me, Yame ghana tambura; no yu ghokunitambura, ghana tambura Yu gha ni tumine.”
21Munyima dhoman̂ando gha, ko kundundumena Jesusi thikuma no gha tuyurire eshi: “Yashemwa na kumutongwera, yofotji ghopapenu ghana kunihokora.”
22Ko kukukengathana hakathishongero no mbadi ha dimukire eshi, yidye ghana kuninga. 23Mukathishongero yu gha hakire thikuma Jesusi, gha hungumanine kughunyonga wendi kuthidyero. 24Simon Petrusi gha mu thundire no gha shanine kumwipura eshi, yidye ghana kuninga Jesusi. 25Ko kupirukera kwendi kwaJesusi, gha mwipure eshi: “Fumu, yidye yu?”
26Jesusi gha huthire eshi: “Yoyu sho ni tambeke thidhindo thoghuroto, ethi sho ni verere mumuhore.” Ha tumbura thidhindo thoghuroto gha thi verere mumuhore, no kuthitambeka kwaJudasi ghomwana Simon Iskariyoti. 27No apa gha manine Judasi kutumbura thidhindo thoghuroto, ko kwingena Shatani mumwendi. Ha mu ningi Jesusi eshi: “Eyi ghuna shana kutenda, yi tambukithe wangu!”
28Ene wa ha karire kuthidyero, noyofotji temba yu gha kwatire dighano di eshi, nye ghana yi mu tongwerera. 29Yoyishi Judasi gha karire nokakomani, ya ghayarire hamweya eshi kutuma ghana mu tumu Jesusi eshi: “Yende ghu ka ghure eyi tuna nanyanda padifeste.” Ngambi gha tape thinu kwawahepwe.
30Apa gha manine kutumbura Judasi thidhindo thoghuroto, ko kushwagha kwendi wangu. Oghu ne ghuthiku.
Mahukero ghaJesusi ne pepi gha di
31Oku ghana shwagha Judasi, ha ningi Jesusi eshi: “N̂anyi‐n̂anyi kuna kumufumaneka Mwanamunu. Nyambi naye ghana kupwa kufumaneka paPendi. 32Ngeshi Nyambi ghana kupwa kufumaneka paPendi, Nyambi naye ghana kumufumaneka karo, ene ghana kumufumaneka pawangu‐wangu. 33Hanange, kapupi kamanana na kukara nenu. Mbo muna ni shana, no thika di na tongwerire Hajuda, kemo na kumutongwera namwe: Oku na kuyenda Me, mbadi mwa kona kukuma ko. 34Muragho ghoghupya na kumupa. Mu kuhake pofotji. Thika di na mu haka Me kemo sho mu hake namwe karo. 35Ngeshi ha mu kuhaka pofotji, mbana dimuka wahe eshi, mwakathishongero wange.”
Petrusi ghana kumuhamura Jesusi
(Mat 26:31–35; Mark 14:27–31; Luk 22:31–34)
36Simon Petrusi gha mwipurire eshi: “Fumu, kupi ghuna kuyenda ne?”
Ha mu hutha Jesusi eshi: “Oku na kuyenda mbadi wa kona kunikutha ko pan̂anyi‐n̂anyi. Ene munyima, mbo ghuna ni kuthu.”
37Petrusi gha ningire kukwendi eshi: “Fumu, nye sho ni dhirere kukukutha popano? Na kona kutapa moyo wange papoye.”
38Jesusi gha mwipurire eshi: “Wa kona kutapa moyo ghoye papange? Yashemwa na kukutongwera, kughutho ghokwigha ngondovoro, ghuna kunihamura paruhatu.
Currently Selected:
Johannesi 13: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
