Lukasi 1
1
Mbudhi dhaJesus Kristusi thika di gha dhi tjangire
N̂ando kwa Teghofilighusi
1Muhakwa wange Teghofilighusi!
Hengi ha yerekire kutjanga yithimwetwedha eyi ya hokokire mukatji ketu. 2Podigho ha tu thimwetwedherire awa ha yi monine, hayuvithi hombudhi dhodhiwa. 3Yodigho ha ni ghayara name eshi tango ni yi shane‐shane thiwana yithimwetdwedha yi, ndani po ni yi kutjangera mokurongama. 4Kemo sho kone kudimuka eshi yinu yi ha kuhongire ne, yaghushemwa.
Kuna kuyuvitha mushamurukero waJohannesi ghoMukadiyoghero
5Mumayuwa ghaHerodesi, ghofumu ghoJudeya, gha karire mupristeri ghumweya ghodina dyoSakariyasi. Oyu gha tundire mumbunga dhaAbiyani. Namukamadi wendi Elisabeti, gha tundire mudira dyaAroni. 6Mughuwadi wawo ha karire hahunga kughutho waNyambi. Awo ha rikanyithire mumiragho no ha kwatire yoyihe yomuyihima yaFumu. 7Ene mbadi ha wanine mwana, yoyishi Elisabeti ne gha karire mbumi. Karo mughuwadi wawo ha kuruparire thikuma.
8Oku shime gha karera muyirughana yendi yoghupristeri mukukarera Nyambi murufo rwendi, 9ko kumwiyera yihima yoyikara yoghupristeri, eshi gha yende mutembeli waFumu kukutjotjomekedha hapo kuthinyaku. 10Mbunga dhodhihe dha karire panunda ghurapera, no kutaterera muyambo ghohapo.
11Ko kumuhokokera muengeli waFumu oyu ghemanine kurudyo rothinyaku. 12Apa gha mu monine Sakariyasi, gha tutukwire no gha yapire thikuma. 13Ene muengeli gha ningire kukwendi eshi: “Wa yapa, Sakariyasi yoyishi ndapero dhoye dhina pu kuyuverera. No mukamadi ghoye Elisabeti, n̂anyi gha kushamuruke mwana ghokatughuru. Ho mbo ghu mu te eshi Johannesi. 14Aye mbo ghana kara divetu‐vetu dyoyishamberera yoye no yiyumbaghuka yoye. No hengi mba shamberera kumushamurukero wendi. 15Yoyishi mbo ghana fumana mumeho ghaFumu. Vinyu no warende mbadi mbo gha yi nwa. Aye mbo ghana yara naMupepo ghoKupongoka kutunda kumushamurukero wendi. 16No mbo ghana pirura diko dyaIsragheli kwaFumu Nyambi wawo. 17Aye mbo ghana kara mukamushongwe waFumu mumupepo nomungcamu dhofotji yira Eliya. Mbo ghana shemwithanitha hakerekandongo nawanahoka wawo, mbo ghana thighura hathururu kundhira dhodhihunga. Kemo mbo gha tenda diko kumwiyero waFumu.”
18Ha ningi Sakariyasi kwamuengeli eshi: “Panye sho ni yi dimukere? Yoyishi ame na kurupara, mukamadi wange naye gha kurupara.”
19Muengeli gha mu huthire eshi: “Yame Gabriyeli mukakukarera Nyambi. No na pu kutuma eshi ni ghambe noye, gho ni kuyuvithe mbudhi dhino dhoyishamberera. 20Mone ghuna kukara ghothipurupuru no kughamba temba, kate mudiyuwa edi mbo yi hokoka yinu yino. Yoyishi ghuna shwena kutawa kuman̂ando ghange agha mbo gha rikanya munako dhagho.”
21Hanu ha mu tatererire Sakariyasi, no ha tetukire eyi gha dhighamenine mutembeli. 22Apa gha shwaghire mo mbadi gha konine kughamba nawo. Ko kudimuka kwawo eshi runa ka mu hokokera rupara mutembeli. Aye dyo gha kumumamunine kenge yo nawo mughupuru‐puru wendi.
23Apa dha pwire nako dhoyirughana yendi yomutembeli, ko kuhuka kudighumbo. 24Munyima dhomayuwa gha, munu wendi ko kukara ghuremu. No gha kuhorekire tughonda kwoko, ho gha ningire eshi: 25“Kemo ghana tendi Fumu nange. Ghana ni thetuka mumayuwa ghano, pakunitunditha kunyanda kwange mukatji kawanu.”
Mayuvithero ghombudhi dhomushamurukero waJesusi
26Mukaghonda koghukwoko noghofotji koghuremu waElisabeti, ko kutuma Nyambi muengeli Gabriyeli kwambuyama muNasareti muditunga dyaGalileya. 27Mbuyama gha mwandekerire Josefu, murume ghomwanahoka waDavita. Dina dyambuyama ne Maria. 28Apa gha kumine muengeli kukwendi gha mu ningire eshi: “Ghurumere, wa yara n̂eke! Fumu noye gha di.”
29Aye gha tutukwire kuman̂ando gha, no gha tetukire eshi, nye dina kuninga dirumeritho di. 30Muengeli gha mu tongwerire eshi: “Wa yapa, Maria, yoyi ghuna wana n̂eke kwaNyambi. 31Mone, ghuna kukara mudira, no mbo ghuna shamuruka mukaye katughuru, ho mbo mu te dina dyendi eshi Jesusi. 32Mbo ghana pupana no mbana mu ta eshi Mwana Shokuru. Fumu Nyambi mbo ghana mu pa dipuna dyakerekandongo wendi Davita. 33No mbo ghana raghura mundhugho dhaJakopu yira fumu kuroruheya. Ghufumu wendi mbadi mbo ghuhura.”
34Maria gha ningire kwamuengeli eshi: “Ngepi mbo yi kara, ame ni shi kara nomurume?”
35Muengeli gha mu huthire eshi: “Mupepo ghoKupongoka ghana kwiya kukoye. Nongcamu dhaShokuru dhina kutembera peghuru dhoye. Yodigho oyu mbo shamuruka, mbana mu ta eshi mupongoki Mwana Nyambi. 36Ghu mone eshi, Elisabeti ghomwapoye, naye karo nga wana katughurughana mughukurukadhi wendi, oyu ha tire eshi mbumi. Kaghonda kano kokaghonda kendi koghukwoko noghofotji. 37Yoyishi kwaNyambi ne mbadiko thokumukanga.”
38Ko kuhutha Maria eshi: “Nomupika Nyambi me. Yi kare thika kenge di ghuna ghamba.”
Ko kudhongonoka muengeli tarara.
Maria ghana ka dhingura Elisabeti
39Maria mbadi gha kudhugha‐dhughire, ghemanine wangu no gha yendire kumarundu kudighumbo dyaJuda. 40Ko kengena kwendi mudighumbo dyaSakariyasi, no gha rumerithire Elisabeti. 41Apa gha yuvire Elisabeti dirumeritho dyaMaria, ko kushamba mwanuke ghomudira dyendi. NaElisabeti ha yara naMupepo ghoKupongoka. 42Ha kugherera eshi:
“Owe wa fumana pakatji kawakadhi,
no gha fumana mwanuke ghomudira dyoye.
43Ngepi ya kona kukara yi eshi
nyina Hekudyange gheye kukwange?
44Yoyi mone eshi, pakuyuva dirumeritho
dyoye mughuma wadyo mumatwi ghange,
ghana yumbaghuka ghushamba mwanuke
ghomudira dyange.
45Mukaruvigha oyu gha tawa eshi,
yoyiheya eyi gha mu tongwerire Fumu ne mbo yina rikanya!”
Dimbo dyomakughero dyaMaria
46Munyima ha ningi Maria eshi:
“Mudhimu wange ghu kughe Nyambi,
47no moyo wange ghuna kushamberera mwaNyambi
ghoMughamweni wange;
48ghana kengi kumakufupipithero ghamupikendi;
yoyi mone eshi kutunda kudyarero mako ghomahe
mbana ni ti eshi mukaruvigha.
49Aye mukangcamu dhodhihe,
ghana ni tendera yinu yoyikuru.
Dya pongoka Dina dyendi.
50Aye gha neghedha thin̂eke thendi
kutunda kwawanahoka kate kwawaneghani
awa ha mu kutekera.
51Nodyoko dyendi gha ni tendera yitenda yongcamu.
Hakadihuna mumitjima dhawo
gha wa hanyaghura po;
52hakamakuto gha wa tunditha pamapuna ghawo
no gha yeyura hakakukushwahura.
53Hakakufandhara gha wekutitha noyitapa yoyiwa
no hatungi gha wa tjidha nyara‐nyara.
54Ghana ghamwena mupikendi Isragheli
nothighayara thomaturekero ghothin̂eke.
55Thika di gha tongorire kwakerekandongo wetu
kwaAbrahamu no kwawanahoka wendi,
kate kuroruheya.”
56Maria ha ka kara kwaElisabeti yira tughonda tuhatu, munyima ha ka huka kudighumbo dyawo.
Mushamurukero waJohannesi ghoMukadiyoghero
57Apa gha rikanyine mayuwa ghokushamuruka Elisabeti, ko kureta kwendi mwanuke ghokatughuru mukaye. 58Hakamaparaghumbo nohendi ha yuvire eshi Fumu ghana mu neghedha thin̂eke thothikuru, ko kushamberera nendi pofotji.
59No mudiyuwa dyoghukwoko noghuhatu, heyire kukuken̂a mwanuke, gho ha himine kumuta Sakariyasi kudina dyawihe. 60Nyina ne gha ningire eshi: “Kadi kemo! Kumuta eshi yo Johannesi.”
61Awo ha mu hutha eshi: “Noyofotji temba ghomudiko dyoye ghodina dyokemo!” 62Ko kurava kwawo wihe eshi ngepi di sho gha mu te mwanuke.
63Ha rombo kwendi thikwere no gha tjangire po eshi: “Johannesi dina dyendi.” Ko kutetuka waheya. 64Popo vene ko kuyahuka Sakariyasi no gha tangire kughamba, ho gha kughire Nyambi. 65Ko kututukwa waheya hakamaparaghumbo, nothiko thothiheya thomumarundu ghaJudeya ha ghambire yoyinu yi. 66Waheya awa ha yi yuvire, ya wa dhekire mumitjima dhawo no ha ningire eshi: “Ngepi di mbo gha kara yu mwanuke?” Yoyishi nyara dhaNyambi ne nendi dhi di.
Dimbo dyomakughero dyaSakariyasi
67Sakariyasi ghowiha mwanuke, gha yarire naMupepo ghoKupongoka no gha pumbire eshi:
68“Gha fumane Fumu, Nyambi waIsragheli
yoyi ghana dhingura kiko dyendi muthin̂eke
no ghana di roghithera makomweneno.
69Ghana twimekera Mukomononi ghongcamu,
ghomukadiko dyaDavita ghomupikendi.
70Kemo dyo gha yi ningire pakare‐kare
patunwa twawaporofeta wendi hokupongoka.
71Mukutushutura twe kwawan̂ore dhetu
no mumoko gha wa ha tu dhimba.
72Aye gha ferire n̂eke hakerekandongo wetu,
no kuvuruka ghundambo wendi ghokupongoka.
73Aye gha mwedherire kerekandongo wetu Abrahamu
74gha tu ghamwene mumoko ghawan̂ore dhetu.
No tu mu karere mukupira woma,
75mughupongoki nomughuhunga mumayuwa ghomahe ghomoyo wetu.”
76“Owe mwanuke, mbana ku ti eshi,
ghomuporofeta waShokuru
yoyi mbo ghuna kara ghomukamushongwe
waFumu kukumuroghithera ndhira dhendi.
77Mbo ghuna dimukitha diko dyendi makomweneno.
Makomweneno ghomathigherero ghomaharwero ghawo.
78Matumero kuthin̂eke thaNyambi wetu.
Thika muvo ghodiyuwa
dyo mbo gha hokoka no kutusheghenyena ko kayenda.
79Mbo ghana reta munyenge
kwawa ha kara mumakokore
no kwawa ha kara mumumvure ghokufa,
no kurongeka mayira ghetu mundhira dhothiraro.”
80Na mwanuke gha kurire no gha karire nongcamu mwaMupepo. Aye gha karire mumamboreya, kate kudiyuwa di gha kuhokorire gha kuneghe muIsragheli.
Currently Selected:
Lukasi 1: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
