Lukasi 2
2
Mushamurukero waJesusi
(Mat 1:18–25)
1Mumayuwa gha, ko kuraghura fumu shokuru Augustusi muragho eshi ha tjange mena ghawapikendi wahe. 2Agha matjangero ghokutanga gha karire oku Sirinusi komisare waSiriye. 3Waheya ha yendire ha ka tjangithe mena ghawo, kehe yu kudighumbo dyodiko dyendi.
4Na Josefu naye gha yendire ko. Gha tundire mudighumbo dyaNasareti dyomuditunga dyaGalileya no gha yendire kuditunga dyaJudeya kuBetelehema kudighumbo dyaDavita. Yoyishi ye gha karire mwapa Davita no mwanahoka wendi. 5Nambandeke wendi Maria oyu gha karire muremu mudira, gha yendire pofotji nendi kuditjango. 6Apa ha karire mo ko kurikanya mayuwa ghokushamuruka kwendi. 7Gha shamurukire mwana ghokatughuru ghombedi dhendi, ha mu dhingi nomahina no kumurangeka muwato ghokudyera ngombe, yoyi mbadi ha wanine maturo mudighumbo.
Hakakudithandjwi nawaengeli
8Pamukunda ghodighumbo ne pa karire hakakuditha awa ha kungire mitanga dhawo paghuthiku. 9Ko kuhokoka kukwawo muengeli waFumu, nothishe thaNyambi ko kuwarwedhimena. Awo ne ko kututukwa thikuma. 10Muengeli gha wa tongwerire eshi: “Mwa yapa, mu mone eshi na kumuretera mbudhi dhodhiwa, edhi mbo dhi shambereritha waheya. 11Dyarero ghana pu kushamuruka Mushuturi mudighumbo dyaDavita. Aye ne Kristusi ghoFumu. 12Thokumudimukitha mwe ne thino eshi, muna ka wana kakeke kokupwa kudhinga nomahina no kurara muwato ghokudyera ngombe.”
13Ko kuhokoka kwamuengeli yu tushumba tomudiwiru otu twa shoghererire Nyambi pofotji ghuninga eshi:
14“Difumanekero kwaNyambi muwiru,
nothiraro pamuve
kwawanu awa gha menya‐menyena Ye.”
15Apa gha wa thighire muengeli gha huke kudiwiru, ko kughambathana hakakuditha eshi: “Tu yende kuBetelehema tu ka mone eyi yina hokoka ko no yi ghana tu dimukitha Fumu.”
16Ha tambukire ko, no ha ka wanine Maria naJosefu namwanuke ghokurara muwato. 17Apa ha mu monine, ko kuthimwetwedha kwawo eyi gha wa tongwererire muengeli yokwamwanuke yu. 18Ene waheya wa ha yuvire mbudhi dhi kwawakakuditha, ha tetukire yoman̂ando ghawo. 19Maria gha pungurire man̂ando ghomaheya gha, no kughavuruka mumutjima wendi. 20Hakakuditha ha hukire ghukugha Nyambi no kumushogherera kuyoyihe eyi ha yuvire no kumona, thika di ha yi wa tongwerire.
Maken̂eno ghaJesusi
21Munyima dhomayuwa kwoko nomahatu pakurikanya nako dhokumuken̂a, ha mu tire dina dyendi eshi Jesusi. Dina di gha mu tire muengeli kughutho ghongayaro dhendi mwanyina.
22Apa gha pwire mayuwa ghendi ghokudhirerekedha, thika di wa karire muragho waMosesi, kokumutwara kwawo muJerusalema ha ka mu tupure kwaFumu. 23Thika di ya pwire kutjanga mumuragho waFumu eshi: “Kehe katughurughana ghombedi, gha pwe kupongwera kwaFumu.” 24Ha twarire karo ndupu pofotji nendi thika di wa ghamba muragho waFumu eshi: “Tumbogho tuwadi ngambi makutjana mawadi.”
HaSimiyoni naAnna mutembeli
25Mumayuwa gha, gha karire murume ghodina dyoSimiyoni muJerusalema; murume yu gha karire muhunga no gha yapire Nyambi, no gha taterire Muhengaghuri wawakaIsragheli. NaMupepo ghoKupongoka gha karire papendi. 26No papendi ya pwire kuhokoka eshi, mbadi sho gha wane kufa oku shime mbadi ghana mono Kristusi waFumu. 27Na Mupepo ghoKupongoka gha mu yendithire mutembeli. No apa ha mwingenekire mwanuke Jesusi hawihe nanyina mutembeli, eshi ha tende nendi thika di wa hima muragho, 28gha tumburire Simiyoni mwanuke mumoko ghendi no gha kughire Nyambi ghuninga eshi:
29“Fumu, thighe mupikoye gha yende muthiraro,
thika di dha ghamba n̂ando dhoye.
30Yoyi meho ghange ghana mono Mushuturi ghoye.
31Oyu wa turekire kughutho ghomeho ghomako ghomahe.
32Thishe thomakenithero ghomarudhi
kudifumanekero dyodiko dyoye dyaIsragheli.”
33Hawihe nanyina ha tetukire yoyinuyi ha ghambire yokukwendi. 34Munyima ko kuwakandadheka Simiyoni, no gha tongwerire Maria ghonyina mwanuke eshi: “Mone mwanuke yu ha mu paka po kukuwitha no kwimeka hohengi muIsragheli. Thidimukitho thi, mbana thi kanana hohengi. 35Ene dimende mbo dina tuyura mutjima ghoye, noyighayara yawengi mbo yina kokoka kuthishe.”
36-37Karo pa karire muporofeta ghombuyama Anna, ghomwana Fanuweli, ghomukadiko dyaAseri. Gha kuruparire thikuma. Apa ha mu yekire, aye mushengeteya, no gha karire nadidhiko dyendi myaka kwoko nodhiwadi. Munyima gha karire mudidhi. Mumayuwa gho gha karire nomyaka dhendi makumi kwoko nomahatu nomyaka dhine. Mbadi gha tundire kutembeli kukukarera Nyambi, pakudhirera no kuraperera mutenya no ghuthiku. 38Munako dhodho naye ko kwiya mo, no gha tumerire Nyambi. Ha ghamba yokwamwanuke wawahe, awa ha taterera makomweneno ghaJerusalema.
39Apa ha manine kurikanyitha yoyiheya thika di ya karire mumuragho waFumu, ko kuhuka kwawo kuGalileya kudighumbo dyawo dyaNasereti. 40Mwanuke gha kurire no gha tanarire no gha yarire noghunyanyami, non̂eke dhaNyambi dha karire papendi.
Mwanuke Jesusi mutembeli
41Hawihe nanyina Jesusi, ha yendangire kehe mwaka kuPaska kuJerusalema. 42Apa gha karire Jesusi nomyaka dikumi nodhiwadi ha yendire karo kudifeste, thika kenge di ha yendangire roruhe. 43Munyima dhokupwa difeste, ko kuhuka hawihe nanyina kukwawo. Mwanuke Jesusi ne gha thigharire muJerusalema, oku no kuyidimuka temba hawihe nanyina. 44Yoyi ha ghayarire eshi mo gha di mumbunga dhoruyendo. Ha yendi kwawo diyuwa dyodihe, ndani hana ka mwipudhura kwawapawo no kwawandambo. 45Apa ha dhirire kumuwana ko kathighuka ha huke kuJerusalema, kukumushana. 46Munyima dhomayuwa mahatu, gho ha ka mu wanine mutembeli oku ghana hungumana mukatji kawahongi. Pakutegherera kukwawo no kuwepura. 47Wahe wa ha mu teghererire, ha tetukire kumaghano ghendi no kumepwero ghendi. 48Apa ha mu monine hawihe nayina, ha tetukire. Nyina gha mu ningire eshi: “Mwanuke, nye ghuna tendera kemo netu? Mone eshi wiho name, tuna kushana nowoma.”
49Aye ne gha wa huthire eshi: “Pashanye muna ni shanena? Mbadi mwa dimuka eshi ni kare mundhugho dhaTate ndi?” 50Awo mbadi ha tjwathanine eyi gha ghayarire.
51Ndani gha hukire nawo kuNasareti, no gha karire ghutumanethi kukwawo. Nyina gha pungurire yoyiheya yi mumutjima wendi. 52Jesusi gha kurire nomaghano noghunu mwene mukuroghera Nyambi nawanu.
Currently Selected:
Lukasi 2: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
