Lukasi 3
3
Yiyaghura yaJohannesi ghoMukadiyoghero
(Mat 3:1–12; Mark 1:1–8; Joh 1:19–28)
1Mumwaka ghodikumi nokwoko ghoghupanguri wamuraghuri Tiberiyusi, Pontius Pilatusi, gha karire mukungi ghoditunga dyaJudeya. Herodesi oku ye fumu ghoditunga dyaGalileya. Naminendi Filipusi mupanguri ghomuItureya no muTragonitisi. Na Lisaniyasi mupanguri ghomuAbilene. 2HaAnnasi naKayifasi ha karire hapristeri hohakuru.
Mumayuwa gha, po dha mwiyerire n̂ando dhaNyambi Johannesi ghomwana Sakariyasi mumamboreya. 3Aye gha randekire Jordani yomuhe ghuyuvitha hanu eshi ha piruke ndani, po sho gha wa thigherere. Nyambi maharwero ghawo, no ha pwe kuyogha. 4Thika kenge di ya pwire kutjanga murukwaro rwamuporofeta Jesaya eshi:
“Diywi dina kwitha mumamboreya eshi:
‘Mu roghithe ndhira dhaFumu;
mu mu ghorwere mayira.
5Kehe kaghurumuko mu ka tuthere,
no kehe dirundu nodirundughana yi pwe kumbandawera.
Mayira ghokupeta gha ghororoke,
nomayira ghokupundadhoka gha pwe kudyadyangedha.
6Nawanu wahe mbana mono makomweneno,
agha mbo gha tunda kwaNyambi.’ ”
7Ko kukongana mbunga dhodhikuru dhawanu kwaJohannesi eshi, na gha wa yoghe. Aye gha ningire kukwawo eshi: “Mwayiyoka mwe, yidye ghana mu tongwera eshi mwombe kughughandhi ghushokuru waNyambi? 8Mu rete ndani yoyiwa yokuneghedha eshi muna piruka. No mwa kupambeka mwathinda eshi: ‘Atwe ne twa kara nawihetu Abrahamu.’ Eyi na kuyimutongwera yi ne yoyishi: Nyambi, gha kona kumba mawe gha gha kare hana Abrahamu. 9Yodigho, kamo ne kare nga kendama pamidhi dhoyitondo. Kehe thitondo thokudhira kwima mbuyo dhodhiwa, hana kuthiteta no kuthivukumena mumudiro.”
10Ko kumwipura hanu eshi: “Nye ne keho sho tu tende?”
11Aye gha wa huthire eshi: “Oyu gha kara noyishupata yiwadi, gha tape thimweya koyu gha thi pira. Noyu gha wana yidya, naye gha tende kemo.”
12Haketethi nawo heyire eshi na gha wa yoghe. Ko kumwipura kwawo eshi: “Muruti, nye sho tu tende?”
13Kukwawo gha ningire eshi: “Mwa ketithanga kupiterera pa ha mu rawera.”
14Hamashurundate nawo ha mwipurire eshi: “Atwe ne nye sho tu tende?” Ko kuwahutha kwendi eshi: “Mbadi mwa kona kuthineneka ngambi kukungura munu mungcamu; no mwa shivana yoyitambura yenu.”
15Ko kukara mataterero ghomakuru mwawanu no ha kwipudhurire eshi, oyu Johannesi ne ngwa yoKristusi. 16Johannesi gha huthire waheya eshi: “Ame na kumuyogha nomeyu vene, ene ghana kumu mukangcamu ghokupiterera me. No mbadi na fumana eshi ni shuture tukanda tomakuha ghendi me. Aye mbo ghana mu yogho naMupepo gho Kupongoka nomudiro. 17Munyara dhendi mo thi di thipuritho thendi, no mbo ghana kombo thindanda thendi kehe pano. Mahangu mbo ghana teri muthishete thendi, mungu ne mbo ghana ghu tumekera nomudiro ghushidhimana.”
18Karo gha thundawedhire hanu rorwingi noyinu yimweya, no kuwayuvitha mbudhi dhodhiwa. 19Gha koghaghurire karo Herodesi ghofumu yoyinu yaHerodiyasi ghomuna minendi, no yinu yoyihe yoyimango eyi gha tendire Herodesi. 20Ene Herodesi gha rundurukire shime noghuyi, kate gha pakire Johannesi mudorongo.
Diyoghero dyaJesusi
(Mat 3:13–17; Mark 1:9–11)
21Apa dha pwire kuyogha mbunga dhodhihe, naJesusi karo kemo, no oku shime gha karera Jesusi mukuraperera, ko kuyandhuruka diwiru. 22NaMupepo ghoKupongoka gha hokokire muthishwaghameho muthishwi thodikutji, no gha temberire peghuru dhendi. Dya shwaghire karo diywi mudiwiru eshi: “Yowe Mwanange ghomuhakwa. Mu moye na paka yishamberera yange.”
Mashimurukero ghaJesusi
(Mat 1:1–17)
23Apa gha tangire Jesusi thirughana thendi, oku ye nomyaka dhendi makumi mahatu. No gha karire thika di ha mu ghayarerire eshi, mwana Josefu, mwana Eliya, 24mwana Matata, mwana Levi, mwana Meligiya, mwana Janayi, mwana Josefu, 25mwana Matatiyasi, mwana Amosi, mwana Nahumu, mwana Esili, mwana Nagayi, 26mwana Maghata, mwana Matatiyasi, mwana Semeyini, mwana Joseke, mwana Joda, 27mwana Johannesi, mwana Resa, mwana Serubabeli, mwana Seghalitiyeli, mwana Neri, 28mwana Meligi, mwana Adidi, mwana Kosama, mwana Elimadama, mwana Eri, 29mwana Josuwa, mwana Eliyeseri, mwana Jorimi, mwana Matati, mwana Levi, 30mwana Simiyoni, mwana Juda, mwana Josefu, mwana Jonama, mwana Eliyakimu, 31mwana Melegha, mwana Menna, mwana Matata, mwana Natani, mwana Davita, 32mwana Isayi, mwana Obeti, mwana Boghasi, mwana Salomini, mwana Nagisoni, 33mwana Aminadabu, mwana Adimini, mwana Arini, mwana Hesironi, mwana Peresi, mwana Juda, 34mwana Jakopu, mwana Isaka, mwana Abrahamu, mwana Tera, mwana Nahoru, 35mwana Serugu, mwana Rehu, mwana Pelegi, mwana Heberi, mwana Sala, 36mwana Kenani, mwana Aripagasadi, mwana Semu, mwana Noghe, mwana Lamegi, 37mwana Metusalaka, mwana Henogo, mwana Jeredi, mwana Mahalaleli, mwana Kenani, 38mwana Enosi, mwana Seti, mwana Adami, mwana Nyambi.
Currently Selected:
Lukasi 3: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
