Lukasi 22
22
Dighano dyokupaghitha Jesusi
(Mat 26:1–5, 14–16; Mark 14:1–2, 10–11; Joh 11:45–53)
1Difeste dyoghuroto ghothuthun̂unyi, edi ha toyire eshi Paska, dya heyine pepi. 2Hapristeri hokakuru nawakamarukwaro ha shanine kayira kokumupagha Jesusi, yoyishi ha yapire kwawanu.
3Shatani ghengenine mwaJudasi oyu ha tire eshi, Iskariyoti, oyu gha tundire muthitara thawahashadikumi nohawadi. 4Aye gha yendire kwawapristeri hohakuru no kwawakoneki hotembeli, gha ka ghambaghure nawo eshi, ngepi di sho gha wa hokwere Jesusi. 5Awo ha shambererire no ha kuyuvire nendi eshi ha mu ruwere. 6Naye gha tawire no gha shanine kambenene kokutapa Jesusi, oku nawanu temba sha yi dimuke.
Marongathaneno ghomakuyarekero ghoPaska
(Mat 26:17–25; Mark 14:12–21; Joh 13:21–30)
7Diyuwa dyoghuroto ghothuthun̂unyi edi sha paghe ndjwighana ghoPaska, dina rikanya. Ko kutuma Jesusi haPetrusi na Johannesi no gha wa tongwerire eshi: 8“Mu yende mu karongathane yoPaska tu ka kone kudya.”
9Awo ha mwipurire eshi: “Kupi ghuna haka oku sho tu ka roghithere?”
10Ha wa hutha eshi: “Mu yende vene popa sho mu kengene mumbara, muna ka kuhangana namurume ghokutengena kandimbe komeyu. Ho mu ka mu kuthe kate mundhugho dhi sho gha kengene. 11No mu ka tongwere thinda shandhugho eshi: ‘Muhongi ghana kukwipura eshi, kupi sho gha kuyarekere Ye nawakathishongero wendi yoPaska?’ 12Aye ghana ka mu neghedha ngonda dhishokuru dhokuwiru edhi dha pwa kuroghitha, mo sho mu ka rongathanene.”
13Nawo ha yendire no ha wanine yoyiheya thika di gha yi wa tongwerire Jesusi no ha rongathanine yoPaska.
Matungekero ghomurarero ghoghuhura
(Mat 26:26–30; Mark 14:22–26; 1 Kor 11:23–25)
14Apa dha rikanyine nako, ko kuyenda Jesusi kuthidyero pofotji nawapostoli wendi. 15Ko kuwatongwera kwendi eshi: “Na ghayarire rwingi eshi, ni dye nenu makuyarekero ghano ghoPaska, kughutho ghokunyanda kwange. 16Yoyi na kumutongwera ghushemwa eshi: Mbadi mbo ni yidya karo oku mbadi ghuna rikanyenena mo kuyara ghufumu waNyambi noyidimukitha yagho.”
17Ko kudhamuna kwendi thinwitho, ha tumera nondapero eshi: “Mu tumbure no mu kutapere. 18Shemwa na kumutongwera: Mbadi mbo ni nwa karo vinyu, oku mbadi ghu neya ghufumu waNyambi.”
19Munyima gha tumburire ghuroto ha tumera nondapero, ko kughuyondora no gha ghu wa pire noman̂ando eshi: “Eyi ne yirama yange eyi na kumutapera. Mbo mu yi tende kumavurukero ghange.” 20Ko kudhamuna kwendi karo thinwitho munyima dhomakuyarekero no gha ningire eshi: “Thinwitho thi ne ghundambo ghoghupya, ethi thina pu kuwetha nomanyinga ghange, agha mbo gha mu ndendeshera.
21“Ene mu mone nyara dhamukakunihokora, pofotji ni di nadho pano pathidyero. 22KwaMwanamunu yina kukara thika di ya kara po, ene mawe kwamunu yu ghana kumuhokora.”
23Ko kukwipudhura kwawo hathinda eshi, yidye ghopapawo ghokukona kutenda thinu thi.
Ghukuru ghoshemwa
(Mat 20:24–28; Mark 9:30–37; 10:41–45; Joh 13:4–5, 12–17)
24Ko kwiman̂anya n̂anani mukatji kawo eshi, yidye ghomukuru papawo. 25Jesusi gha wa huthire eshi: “Mwawanu mwa kara eshi, oyu ghana kuwaraghura kumahimeno ghendi, hana kumutoya eshi fumu. Ene wa hana kukupambeka ghufumu mungcamu, hana kuwatoya eshi haghamweni. 26Kukwenu ne mbadi sho yi kare kemo. Mukuru mumwenu gha kare yira mwanuke, no mukamiti yira mupika. 27Yoyishi yidye mukuru, yoyu gha di kuthidyero ndi, endi mupika? Shemwa yoyu gha di kuthidyero, kadi kemo ndi? Ame ne yira nomupika mumwenu.
28“Amwe ne yamwe mwa karire nange roruhe mumayerekero ghange. 29Thika di gha ni tenderire Tate ghutungi kemo na kumutendera Name ghutungi. 30Mu kone kudya no kunwa nange mughutungi wange kuthidyero, no kuhungumana kumapuna mu raghure mako dikumi nomawadi ghaIsragheli.
Mayuvithero ghomuhamwero waPetrusi
(Mat 26:31–35; Mark 14:27–31; Joh 13:36–38)
31“Simoni, Simoni! Tegherere! Mone eshi, Shatani ghana tokomena eshi gha mu yeruthe mwe yira mahangu. 32Ene na kuraperera eshi maghana sho gha kupare matawero ghoye. Ngeshi wa kukuhuthe diyuwa dimweya, wa kutanarithe hayendhoye.”
33Ko kuhutha Petrusi eshi: “Fumu, na kwinduka kukunikwata Noye no kufa Noye.”
34Aye ne gha mu huthire eshi: “N̂a kukutongwera Petrusi, mbadi sho gheghe ngondovoro owe ne ku ghuna ni hamura paruhatu eshi, mbadi wa ni dimuka.”
Man̂anani
35Gha ningire karo Jesusi kukwawo eshi: “Apa na mu tumine notukomani temba noyikutu temba nomakuha temba ne, mwa pirire po thinu thimweya ndi?” Awo ha huthire eshi: “Vatwe, no nye temba.”
36Ha wa tongwera eshi: “Pashan̂anyi‐n̂anyi, kehe yu gha di nokakomani endi nothikutu gha kone kuyishimba. Noyu gha pira thimende, gha ghurithe thivata thendi kuthimende. 37Yoyi ghushwemwa na kumutongwera: Man̂ando ghoyitjanga agha gha ninga eshi: ‘Gha pwire kurikanyitha nawaringi‐ringi’ kukwange ne yina kara ghushwemwa. Yoyishi eyi ya hata kukwange, yina yara mo pan̂anyi‐n̂anyi.”
38Awo ha huthire eshi: “Fumu, mamende mawadi ne gha.” Naye gha wa huthire eshi: “Yina rikanya.”
Jesusi muGetsemani
(Mat 26:36–46; Mark 14:32–42)
39Jesusi gha shwaghire mumbara, no gha yendire kudirundu dyondhwe popamuhingo wendi. Hakathishongero wendi nawo ha mu kuthire. 40Apa gha kumine padyango, gha ningire kukwawo eshi: “Mu rapere, maghana sho mwingene mumayerekero.”
41Ha wa yakunuka kakoghana gha ka kare pithendi. Ko gha ka tongamenine no gha tangire, 42kurapera eshi: “Tate, ngeshi ngo ghu hime, ngo ghu ni kerukithe thinwitho thokunyandi thi. Ene kadi yihima yange, yihma yoye keho.” 43Ko kumuhokokera muengeli ghomudiwiru no gha mu tanarithire. 44Yoyishi wa mu wanine woma ghokufa, ho gha raperire thikuma. Diyuywa dyendi dya karire yira marothi ghomanyinga, agha ghana kuhoyera pamuve.
45Apa gha manine kurapera, ko kwimana kwendi gha yende kwawakathishongero wendi no gha wa wanine hana pothomokera muturo, ghukasha kuyitokota. 46Ko kuwatongwera kwendi eshi: “Nye muna rarera? Mu pinduke no mu rapere, maghana sho mu were mumayerekero.”
Kuna kumukwata Jesusi
(Mat 26:47–56; Mark 14:43–50; Joh 18:3–11)
47Oku shime ha ghamba Jesusi, ko kwiya dikuta dyawanu. Noyu ha toyire eshi Judasi, ghumweya ghopawashadikumi nohawadi, gha piterire kughutho wawo no gha henyine kwaJesusi gha mu ncumite. 48Jesusi gha mu tongwerire eshi: “Judasi, ghuna kuhokora Mwanamunu ghuncumita we?”
49Apa ha yi monine yi awa ka karire naJesusi, ha mwipurire eshi: “Fumu, tu wa keshaghure nodimende ndi?” 50Yofotji ghopapawo, gha keshurire ditwi dyorudyo dyamupika mupristeri shokuru.
51Jesusi gha huthire eshi: “Perere poye, thighe keho!” Munyima ha kundama kuditwi no kudimughugheka karo.
52Ko kuninga Jesusi kwawapristeri hohakuru no kwawakungi hotembeli no kwawamayami awa ha mwiman̂anyenine eshi: “Nye muna kurokokera nomamende nomiramu yira kwamuringi‐ringi? 53Mayuwa no mayuwa na karanga nenu mutembeli, ene mbadi mwa yeyurire nyara eshi mu ni kwate. Pan̂anyi‐n̂anyi ne, yoyishi dhonako dhongcamu dhomakokore, mwa kona kuyikona.”
Petrusi ghana kumuhamura Jesusi
(Mat 26:57–58, 69–75; Mark 14:53–54, 66–72; Joh 18:12–18, 25–27)
54Ko kumukwatha kwawo no ha mu twarire mundhugho dhamupristeri shokuru. Petrusi ne gha karire kayenda kamanana no kumukutha‐kutha. 55Pambandha dhomarombe ha kon̂erire po mudiro, oghu ha kudhingire hanu. Naye Petrusi gha kupatekire mukatji kawo. 56Mukamadighana ghomupika, gha mu monine oku ghana hungumana kumudiro. Ko kumurondonona kwendi no gha ningire eshi: “Murume yu, nendi gha karire naye.”
57Petrusi ne gha mu hamurire eshi: “Mukamadi we, mbadi na mu dimuka me yu!”
58Kapupi kamanana ha mu mono karo ghumweya no gha ningire eshi: “Nowe karo yowe ghopapawo.” Aye Petrusi ne pakuhamura eshi: “Owe, kadi yame!”
59Munyima dhokenge yo, ko kutanaritha ghumweya karo eshi: “Shemwa murume yu, naye gha karire pofotjie nendi. Naye mukaGalileya yu!”
60Ene Petrusi gha hamurire shime eshi: “Murume we, mbadi na kudimuka eshi yinye ghuna kughamba!” Popo vene oku shime nga karera mukughamba, ko kwigha ngondovoro. 61Ko kuthetuka Fumu gha deme Petrusi. Petrusi naye ha vuruka man̂ando agha gha mu tongwerire Fumu eshi: “Kughutho ghokwigha ngondovoro, ghuna kunihamura paruhatu.” 62Ko kushwagha Petrusi panunda no gha ka dirire thikuma.
Kuna kumusherera Jesusi
(Mat 26:67–68; Mark 14:65)
63Harume wa ha kungire Jesusi, ha mu shererire no kumupumaghura. 64Ko kumughanga kwawo tuku kumeho no kumwipura eshi: “Owe ne ghomuporofeta, toye eshi yidye yu ghana kupumura?” 65Shime ha ghambire karo kukwendi yinu yomushedhaghuro.
Jesusi kughutho ghondhango dhaWajuda
(Mat 26:59–66; Mark 14:55–64; Joh 18:19–24)
66Apa dya vire diyuwa ko kukukongwedha hamayami hodiko nawapristeri hohakuru nawakamarukwaro. No ha retire Jesusi kughutho wawo. 67Ha mwipura kwawo eshi: “Ngeshi yowe Kristusi yi tu tongwere.” Aye gha wa huthire eshi: “Ngambi ngo ni yi tongore, ngo mbadi sho mu tawe. 68Karo ngambi ngo ni pure, ngo mbadi sho mu kone kuhutha. 69Ene pan̂anyi‐n̂anyi, mbo ghana hungumana Mwanamunu kurudyo rwaNyambi ghoMukangcamu dhodhihe.”
70Ko kumwipura waheya eshi: “Yowe Mwana Nyambi ndi?” Aye gha wa huthire eshi: “Thika di muna ghamba: Yame no!”
71Pa ghamberire eshi: “Nye sho tu shanene karo hatunonga? Tuna yi kuyuvera twathinda mukanwa kendi!”
Currently Selected:
Lukasi 22: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
